بسم الله الرحمن الرحيم
السلام عليكم ورحمه الله وبركاته

عيدكم مبارك وتقبل الله طاعتكم حبيت اعايدكم بتقرير البرازيل وان شاء الله تستانسون فيه .. في ظل هالاوضاع اللي نعيشها الله يرفعها عنا ويحفظ خليجنا

سيداتي سادتي أهلاً وسهلاً بكم في القارة البرازيلية

سينْيوراس إي سينْيُوريس ، سيجا بيم فينْدوس آو كونتينينتي برازيلييرو

Senhoras e senhores, sejam bem-vindos ao continente brasileiro.

عُدنا والعودُ أحمدُ إلى تقارير السفر بعد آخر سفرة لي كانت شهر 2025/8

وهذي سلسلة حكايات عالمــــية أخرى تتحقق لي بزيارة القارة البرازيلية

في قصص الشعوب .. طرائف لا تنتهي
وعالم حلو بهي .. يسكن في القلوب
في قصص الشعوب

هنــــــــا القــــارة الـــبرازيليـــة







رحلة البرازيل وما ادراكم شلون خذيت الموافقة..
شهر 2024/10 سجلت مع قايد قروب رحلة كولومبيا بس لرحلة البرازيل فبراير 2025 طبعا عقب موافقة غير مؤكدة مهزوزة في وايد من لاءات بس قلت بحجز مكان اضمن لي ..
ومع مرور الوقت اختكم مرت بعارض صحي وصعب اني اسافر ، لكن تميت ساكته وقلت بكمل الحجز ..
اهني الإدارة العليا رفضت رفض تـــام ومن غير مناقشة .. يا الله يبا بدل غير عفيه الله يخليك والخ من كسرة خاطر تقنعه ابدا مافي مو راضي يقتنع كلش..
استسلمت ورضيت بالواقع وسحبت حجزي وانا ضايق خلقي..
ومن داخلي صراع داخلي وناسة اني بروح اليابان وزعلانه على البرازيل بس قلت مافي زعل يا البر انتي بتروحين البرازيل سنة 2025 ما تخلص إلا وانا رايحه اذا الله اراد شلون ما ادري ..

المهم دخلت علينا سنة 2025 وبديت بالاسطوانه المعهودة والحنه فوق راسه
اللي صار وسهل علي الموافقة ان في شهر 3 تم ترشيحي لحضور مؤتمر في البرازيل بشهر 11 اهني طرت من الفرحة وقلت يت في وقتها وطبعا قعدت اقوله ترا بروح مو تقول لا وما لا ومنو بيروح ومن هالحجي .. تبي تروح امش معاي ،، طبعا رده انا شنو يوديني الديرة بعيدة ودرب قلت التعب على الطيارة .. قلت إذا ما تبي بااخذ أختي وافق الحمدلله كولولوووولوووش الحمدلله ..

وعقب الموافقة ارتحت نفسيا وسافرت اليابان وانا متطمنة ان وراي آخر السنة إن شاء الله سفرة قوية .. ما سويت ولا شي ..

شهر 7 رحت صلالة سفرة سريعة وبعدين شهر 8 رحت مايوركا ولما الحين ما سويت اي شي للبرازيل ..

شهر 9 للأسف وصلني خبر بتغيير اسماء المرشحين للمؤتمر وعدد الحضور .. واسمي مو معاهم الله يا ضيقة الخلق اللي حاشتني دخلت البيت زعلانه وافكر شنو اقول حق ابوي ..
بنفس الوقت كنت افكر في قروب قايدتنا اللي رحت معاها المغرب عندها رحلة للبرازيل بشهر 11 قلت اذا جذي نروح معاها .. فقعدت معاه ويهي زعلان واكسر الخاطر واقوله اللي صار يعني اهو زعل معاي و بنفس الوقت وده يقول خيره ولاتروحين بس يدري اني بروح وفي راسي .. تمينا اسبوع تقريبا ساكتين ومحد يفتح الموضوع وعقب حبيبي بروحه قال خلاص يبا اذا تبون توكلوا على الله ..
انا اهني ما صدقت اللي اسمعه وأكد عليه ويقولي اي يبا توكلوا على الله .. ولا اسمع صوت ثاني يقول لااا !
امي مو راضيه لااااا يازمن .. هذي قصة ثانية اشفيج يمه ليش لا ؟
ديرة خطرة وبروحكم وبعيدة وانتي تدرين انا ما احب هالدول والمنوال اللي ما نخلص منه ..
يا ربي الحين شنو اسوي .. خلاص الحين انا لازم اسكت واهما يتفاهمون امي وابوي ..
عقب يومين تمت الموافقة واخيرا من الطرفين الحين اقدر ايبب مرة ثانية
الف الصلاة والسلام عليك يا حبيب الله محمد كلولولولولولولولوش

في تاريخ 2025/10/23 بدت رحلة التجهيزات وأول شي

اولا : الفــــــــــيزا





المتطلبات



شكل مبنى السفارة من برا وتقع بمنطقة مبارك العبدالله (غرب مشرف)



واهني تلقون موضوع الفيزا
للأمانة ما طولت قدمتها الخميس الأحد اتصلوا قالوا جاهزين الجوازات..

https://www.arabtrvl.com/vb/t56712.html

ثـانيـا : العمــــلات
عملة البرازيل ريال برازيلي





1 دينار كويتي = 18 ريال برازيلي = 3 دولار تقريبا

ثـالثـا : الطـيــــــــران



تم الحجز عن طريق موقعين الخطوط الكويتية و الطيران الفرنسي بعد ما شيكت على الاسعار والأوقات رسيت على الفرنسية لوجهة البرازيل..

كويت - باريس - كويت
على الدرجة السياحية بسعر 185 د.ك للشخص



https://www.kuwaitairways.com/en

الطيران الفرنسي : باريس - ريو - ساوباولو - باريس .

بسعر 1,300 د.ك للشخص على درجة البزنس..



https://wwws.airfrance.fr/en

رابــعــــــا : الفنــــادق



تم حجز كل الفنادق من موقع بوكنغ الا فندق واحد من اجودا..
ريو دي جانيرو 1 يوم بــ ليلة فندق portobay rio de janeiro
اورو بريتو 3 أيام بـ ليلتين فندق hotel solar do rosario من موقع اجودا ..
ريو دي جانيرو 5 أيام بــ 4 ليالي فندق portobay rio de janeiro
باراتي 3 أيام بــ 2 ليلة فندق casa mar paraty
ايتايبفا 1 يوم بــ ليلة فندق pousada tankamana
شلالات ايقوازو 3 أيام بــ 2 ليلة فندق wish foz do iguacu
ساوباولو 3 أيام بــ 2 ليلة فندق qoya sao paulo paulista, curio collection by hilton

نتطرق لهم تالي عند زيارة كل مدينة..

خـامســا : الصحـــــــة و التطعيمـــــــات



قبل السفر بفترة كافية عليكم التأكد من الوجهة اللي رايحين لها اذا تحتاج الى اي تطعيمات ..

- لازم مراجعة عيادة المسافرين في دولتكم او الصحه الوقائية .
- تلقي التطعيمات اللازمة قبل شهر من السفر على الاقل ليتمكن الجسم من تكوين المناعة .
-اصحاب الامراض المزمنة مراجعة دكتورهم عشان يعرفون لو في تطعيمات تتعارض مع ادويتهم ..

التطعيمات العـالميــــة :

- الحمى الصفراء ( ينصح عند السفر لهذه البلدان : وسط وغرب افريقيا - وسط و جنوب امريكا )
- الحمى الشوكية ( ينصح عند السفر لهذه البلدان : جنوب الصحراء الكبرى الافريقية )
- الالتهاب الكبدي (ب) ( ينصح عند السفر لهذه البلدان : امريكا الجنوبية و بعض الاجزاء من افريقيا و اسيا و شرق اوروبا )
- التهاب الدماغ الياباني
- التهاب الدماغ المنقولة عبر القراد
- التيفود (ينصح عند السفر لهذه البلدان : بعض جنوب شرق اسيا - امريكا الجنوبية و الوسطى - وبعض افريقيا )
- داء الكلب
- الملاريا ( ينصح عند السفر لهذه البلدان : المناطق الواسعة بأفريقيا و غرب افريقيا جنوب شرق اسيا - شرق اوروبا - الباسفيك - وسط وجنوب امريكا - الشرق الاوسط - امريكا اللاتينية )

الخط الساخن لسكان الكويت ألو صحة 151

رحت عيادة المسافر اللي تتبع منطقتنا بس رحت باليوم الغلط اللي ما في عيادة فقالوا اذا مستعيلة روحي الادارة العامة للصحة العامة في منطقة الصباح الطبية مداومين يومياً..

وتوكلت على الله ورحت









وصلت قلت لموظف الاستقبال انا بسافر ابي اعرف التطعيمات للبرازيل ..
قالي تعبين هالنموذج وبعدين تدخلين على الدكتور

وهذا النموذج



عبيته ودخلت على الدكتور ويصدمني بالتطعيمات عيوني طلعت



للبرازيل خذيت 5 تطعيمات طبعا كل دولة تختلف في دول يقولون لمواطنينهم مافي تطعيمات بس احنا بالكويت لا في تطعيمات و اضافة بعد حبوب ملاريا لمدة 21 يوم..

خذينا :
1- الحمى الصفراء 2- التيفويد 3- السحايا 4- تيتانوس 5- كبدي أ
كلهم بيوم واحد خذيناهم قبل السفرة ب تقريبا 25 يوم ..

وخذينا الجواز الاصفر
هذا الجواز الاصفرلازم يكون معاكم بالسفر ممكن يطلبونه منكم حتى دول افريقيا..



بما ان زيارتنا الى امريكا اللاتينية (القـارة البرازيلية) يعني بنكون في غابة وحدايق والزرع والجبال محتاجين ندهن جسمنا بسبري وكريم الوقاية من الحشرات و اي كائنات تنقل الامراض.



ســادســاً : الطقـــس



في وقتنا الجو وايد حلو ربيعي وبعض الايام مطر واشوية رطوبه

ســابعــاً : القـــــروب



مكون من : محدثتكم وأختها فقط

الرحلة مستواها : متــوسط ( اللياقة البدنية ).

ثـامنــاً : الأمـــان



على الاماكن اللي زرناها ما حسينا في شي انخاف منه .. واللي شفته الوضع كان طبيعي الا مواقع معينه يقولون لا تزورونها وخلكم في المناطق والشوارع الحيوية وراح اقولكم وين في اماكن قالوا لا تروحون لها بالتقرير..

التطبيقات اللي استخدمتها

اوبر اعتماد كلي وسعره رخيص



الترجمة ممتاز translate ضروري لان نااااادر تحصلون احد يتكلم انجليزي



لحجز الانشطة والفعاليات والمواصلات او سيارة وسايق
تريب ادفايزر وفياتور وGetYourGuide وشركات برازيلية بذكرهم لكم تالي.



صديقنا قوقل ماب



والصديق اليديد الذكاء الاصطناعي chatgpt



ساعدني في التخطيط والمعلومات

جذي تقريبا جاهزين ومستعدين نحلق فوق القارات والبحار والمحيطات