رحــلــتــي الــثــانــيــة إلــى مــالــيــزيــا (مــايــو 2015) ...

Bu Rashid · 23-06-2015, 03:00 PM

هلا أختي بيبي فيس
والله يالشيخة خبرج رمضان وداومت
وصار كلش ما عندي وقت
بس آنه قاعد أحاول أفرغ روحي شوية وأشتغل على البارت الجديد
وإن شاء الله قريب راح أخلص منه وأحطه

Bu Rashid · 23-06-2015, 11:51 PM

اليوم الخامس
(24 مايو 2015)

قعدنا الساعة (7:00) صباحاً طبعاً قعدنا هاليوم من وقت لأن ورانا رحله طويلة إلى جنتنغ، المهم تجهزنا ونزلنا إلى الفطور وبصراحة كان فرق بين فطور الصنواي لاجون وبين فندق أسكوت كان فطورهم بسيط جداً وكل يوم نفس الأصناف ما تتغير، المهم أكلنا الفطور وطلعت أطلب تاكسي، كلمت الموظف اللي يقعد برع وقلت له أبي تاكسي أبي أروح إلى جنتنغ طلب لي الموظف تاكسي أزرق وقالي أنت تفاهم معاه وملاحظة أن جميع التكاسي اللي توقف عند الفندق هي اللي باللون الأزرق، رحت لسائق التاكسي وقلت له بجم تودينا جنتنغ وتنتظرنا وترجعنا قالي (300) رينغت، قلت له وايد آخر كم، قالي بوديك جنتنغ وبوديك حديقة الفراولة وحديقة النحل وبعد قالي بيوديني جم مكان قلت له (250) رينغت أوكي، قالي ما يصير شوي، قلت يالله نتوكل على الله، قالي أوكي مو مشكلة، وناديت الأهل وركبنا التاكسي وقالي بعد ساعة بنوصل، قلت له شنو أسمه، قالي أسمي حفيظ، وكان السائق شاب هادئ وما يتكلم وايد وحليو وكان كل يبي يساعد بس مشكلته أنه ما يتكلم عربي ولغته الإنجليزية شوية ضعيفة.

المهم بعد تقريباً (45) دقيقة وصلنا إلى حديقة الفراولة ونزلنا ونزل معانا السايق وراح سأل الكاونتر عن التذاكر، وقالي أن قبل كان الدخول مجاناً والحين سوو الدخول بفلوس ورحت للكاونتر لأن ودفعت (26) رينغت للدخول (8) رينغت للكبار و (5) رينغت للصغار، ودخلنا مزرعة الفراولة وتمشينا في الممرات بين شجيرات الفراولة وكانت أشكال الفراولة رائعة جداً وكانت المزرعة كبيرة جداً، وكان في وسط المزرعة محل يبيع منتجات الفراولة وأشترينا من عندهم مربى الفراولة وحلاوة الفراولة وفراولة فرش، وكان عندهم بعد إذا تبي أنت شخصياً تقطف الفراولة تدفع مبلغ ويعطونة سلة، بس أحنا ما رحنا لأن كنا نبي نستغل وقتنا ونخليه كله في جنتنغ، وهذي صور لحديقة الفراولة

وهذي صورة لبعض النحل المجفف

وبعدها مشينا ورحنا إلى طيور المتو والنايجل وكانوا أكثر من نوع وقالوا لي صوروا مع الطيور بـ (20) رينغت، قالوا الأطفال يبون قلنا يالله، حطوا واحد فوق راسي واثنين على كتفي واثنين على يديني وواحد على يد راشد وواحد على يد شوق وصورنا وكانت الصورة وايد حلوة، وهذي صور الطيور الصورنا معاهم

وبعدها مشينا على أساس نبي نطلع من المزرعة ولكن المزرعة كانت مثل المتاهة تلف فيك لف علشان تطلع تمر على سوق وبعدها تمر على مزرعة الفطر وبعدها تمر على مزرعة الزهور وبعدها بعد تمر على سوق وبعدها تطلع، كأنها متاهة برنامج الحصن هههههههه، وبعد ما طلعنا لقينا السائق ينطرنا في الخارج.

ركبنا مرة ثانية السيارة و اتجهة فينا إلى محطة التلفريك، ووقف سيارته ونزلنا وساعدنا في شراء التذاكر وصورنا داخل مبنى التلفريك وبعدها قالي آنه راح أنتظركم لين ما ترجعون قلت له أوكي، ورحنا إلى التلفريك وما كان فيه زحمه وايد، لأنه كان يوم الأحد وأتوقعت أن راح نحصل زحمة كبيرة، لكن الحمدلله ما نطرنا سيدة ركبنا التلفريك وكان حدة روعة بس اللي خرب علينا كانت معانا عائلة هندية وكانوا طول الوقت يتكلمون وايقرقرون وبصوت عالي ومتخرعين وكانوا وايد مزعجين، وهذي للتفريك وأحنا صاعدين للأعلى

وصلنا إلى القمة جنتنج ونزلنا من التفريك وشرينا صورتنا، أنزين الحين توهقت وين أروح، رحت وسألت الشرطة الموجودين ودلوني، لين ما وصلت إلى الملاهي المغلقة، وآنه في الطريق صورت أعمال البناء في الملاهي الخارجية وهي ما زالت مستمرة

وعند وصولنا إلى الحديقة المغلقة كان في عروض كثيرة وحلوة منها استعراض للرجل ذو الأرجل الطويلة واستعراض ورقص لفرقة من الشباب والفتيات وغيرها من العروض، المهم رحت للكاونتر وأخذنا تذاكر للألعاب (132) رينغت لـ (2) كبار و (2) صغار، ورحنا ولعبنا الأطفال ولعبنا أحنا وياهم، وهذي صور للحديقة المغلقة

وبعد ما خلصنا من الألعاب دخلنا المتحف وكانوا الأطفال يبون يدخلون بيت الوحوش بس قلت لهم لا أخاف ما يناموا علينا فليل، وهذي صور للمتحف

وبعد هالجولة واللعب لمدة (3) ساعات قلنا بس خلاص خلنا نروح نتغذا، وفي طريقنا إلى مطعم الغداء مررنا بالقرب من فندق فيرست وورلد وهذي صور له

وصلنا إلى مطعم بوبيلز أند بيتس (بتوصية من الأخت قصة حب) وقعدنا وكان المطعم مزدحم، وأعطونا قائمة الطعام واحترنا شنو نطلب، وفي النهاية طلبنا سباغتي مع كرات اللحم و2 بيتزا مارغريتا، السباغتي جهزت وجابوها لنا ولكن البيتزا تأخرت وايد ويوم سألتهم ليش قالوا لي أن قوالب البيتزا عندهم قليلهم والطلبات على البيتزا كثيرة، وكلينا السباغتي وخلصنا ونظرنا يمكن نص ساعة وبعدين جابوا البيتزا، السباغتي كانت مقبوله بعض الشيء لكن البيتزا كانت روعه، وهذي صور للغداء مع قائمة الطعام والفاتورة

وبعد ما خلصنا الغداء رحنا إلى ذا بيكري (أيضاً توصية من الأخت قصة حب) وطلبنا منه شيز كيك بالفراولة وشيز كيك بالمانجو و 2 دونات للأطفال، حاولت أحصل لي طاولة في الخارج ما حصلت وقعدنا داخل وكلنا الشيز كيك كان خيال، وبعدها رجعت طلبت لي مرة ثانية شيز كيك بالفراولة لأنها كانت رائعة، وهذي صور من ذا بيكري

وهذي صور من أمام مدخل فندق جنتنغ آيلاند

وبعدها توجهنا إلى محطة التلفريك للرجوع، وهذي صور لتلفريك الرجوع

وأول ما وصلنا إلى محطة التلفزيك أتصلت في السائق قلت له أني وصلت وجانا بالسيارة وركبنا معاه ومشينا، وأخذنا السائق إلى مزرعة النحل قلت له بس خلاص ما نبي نروح رجعنا الفندق تعبنا، وأحنا في طريق الرجعة لقينا هالأصحاب في وسط الشارع يلعبون ووقف عندهم السائق وقال جوفوا وصوروا

وعلى الساعة (5:00) وصلنا الفندق وقلت للسائق جم حسابك، قالي (250) رينغت، حاسبناه وبعدها صعدنا إلى الشقة ورحينا إلى الساعة (7:00)، وبعدها قلت لأم العيال والأطفال شرايكم نروح نتمشى في البافليون، قالوا تمام، قلت يالله عيل، وطلعنا من الفندق وتمشينا شويه وليقينا الممر المكيف بجنب فندق أمبينا وصعدنا وتمشينا إلى مجمع البافليون وتسوقنا شويه وهذي صورة وحيدة صورتها للمجمع

وبعدها قالوا الأطفال إلا يبون ماكدونالدز، سألت وين أقرب ماكدونالدز، قالولي في شارع العرب، ونزلنا شارع العرب ومشينا لين ما ليقينا ماكدونالدز وتعشينا وبعد ما خلصنا العشاء، قلت لهم تبون تاكسي حق الرجعة ولا تبون تتمشون، أم العيال قالت تبي تتمشى والأطفال تعبانين، حملت شوق على أكتافي وقلت حق راشد تحمل شوية وبنوصل، ورجعنا الفندق بنفس الطريقة اللي جينا فيها، طبعاً شوق نامت وراشد قاوم لين ما وصلنا الفندق، وبعد ما نومت الأطفال قعدت أفكر في اليوم التالي أودي الأطفال حديفة الحيوانات أو كيدزينيا, وبعد طول تفكير أخترت كيدزينيا لأني في تايلند راح أوديهم سفاري فما حبيت أكرر لهم ويوم رحت بانكوك طلع بعد عندهم كيدزينيا في مجمع سيام براجون.

وهذي مصاريف اليوم الخامس

ووصلنا إلى نهاية اليوم الخامس

إنتظرونا قريباً في اليوم السادس في ماليزيا

أبن السلطنةمعجبون بهذا.

Bu Rashid · 23-06-2015, 11:56 PM

إهداء للأخت قصة حب

وآنه أكل في هالشيز كيك تذكرت قعدتج في الجلسات الخارجية بليل وأنتي تاكلين هالشيز كيك
هههههههههههههههههههه

أبن السلطنةمعجبون بهذا.

قصة حب · 24-06-2015, 11:05 AM

اقتباس : المشاركة الأصلية كتبت بواسطة Bu Rashid

إهداء للأخت قصة حب

وآنه أكل في هالشيز كيك تذكرت قعدتج في الجلسات الخارجية بليل وأنتي تاكلين هالشيز كيك
هههههههههههههههههههه

يا سلام عليك

عليكم بالف الف عافيه
لاتنسوني من دعواتكم
احترم الناس الوفيه

يازين ماليزيا زيناااااااااااااااااااااه

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
دليـــــل السفــــر إلــى بـــــروكســـــل بقلم LREEM@	فريق التطوير	تقارير لا تنسى	28	28-03-2024 11:50 AM
رحــلــتــي شــهــر الــعــســل أمــــريــــــــــــكـــــــا	ali pontiac	تقارير لا تنسى	86	04-07-2021 09:31 AM