جــــدول سيــــاحي لحبيبتي الكــــــــويت

q8ya metnaqla · 29-08-2015, 01:19 AM

بســم اللــه الـرحمــن الـرحيـــم

سويت جدول لمده تقريبا 15 يوم ادري وايد بس تقدرون اتقلصونه .. يعني تقدرون اتقسمون الايام ويصير عندكم جدولين او اتنقون منه الايام اللي تبونها وعاجبتكم
وحسب وقت وجودكم في الكويت اذا مواسم او شتا او صيف

بسم الله نبتدي

ابراج الكويت ولابد من زيارتها

وهذي عملتنا اليديده
من فئة 20 الى 1/4 ربع ..
1 دينار = فيه 10 ( 100 فلس ) الخرده الحديد
5. نص دينار = فيه 5 ( 100 فلس )
25. ربع = 250 فلس فيه ( 200 فلس و 50 فلس )

اليوم الاول: يوم الوصول

اذا قلنا وصلتوا الصبح ورحتوا الفندق وريحتوا وصليتوا الظهر تطلعون وتروحون اتغدون في احد المطاعم اللي تحبونها وتبون اتجربونها..

بعد الغدا لو قلنا انكم في منطقة شرق تقدرون تروحون سوق شرق اتمشون واتسوقون فيه وتقعدون في الكافيهات اللي على المرسى وعقب تطلعون منه وتروحون ..

متحف بيت ديكسون ( بيت المقيم السياسي البريطاني في الكويت ) منطقة شرق مقابل وزارة الخارجيه وبجانب الامانه العامه للمجلس الاعلى للتخطيط والتنمية ، يعني اذا طلعتوا من سوق شرق اخذوا يمين وتلقونه على ايدكم اليسار ..

تقرير متحف بيت ديكسون

https://www.arabtrvl.com/vb/t26720.html

وبعده متحف بيت السدو على شارع الخليج العربي رقمهم 22432395 او متحف الكويت الوطني ، وبعدين ترجعون الفندق اتريحون بو ساعه وتطلعون على مارينا مول اتمشون و تحجزون فيلم وقت متأخر تدشون بعد العشا ..

العشا في احد المطاعم في مارينا ويفز تعبرون من جسر مارينا مول يوديكم على جهة المطاعم على البحر في مكان بالنص شكل خيمه بنص البحر في جم مطعم اهناك او المطاعم اللي عالمرسى ..

وبعدين تدشون الفيلم اللي حجزتوا له ..

بيت ديكسون

سوق شرق والمرسى

اليوم الثاني

الصبح على ال 9 اتريقون في اي مطعم ، وبعد الريوق اتروحون مدينه الكويت وتروحون سوق المباركيه بما ان الجو حلو ويحتوي على كل شي ( الذهب ، الملابس ، البشوت ، سوفنير ، المسابييح ، العطور ، المكياج ، الخضار ، الفواكة والخ .... ) بعد ما اتخلصون تسوق وتمشي زيارة مدرسة المباركية و مسجد الدوله الكبيرة وانصح في زيارته وهذا تقرير عنه

https://www.arabtrvl.com/vb/t27230.html

و اتغدون في احد المطاعم الشعبيه اكلهم ترا واااااايد حلو ( الشمم ، دلق سهيل ، السيخ البحريني والخ ... من مطااعم ) .. عندكم وفي ساحه يديده اسمها سومو الحلوه القعده فيها تكون ورا العماره البيضا واغلبها محلات ومطاعم شباب كويتيين...
العصر تروحون متحف طارق رجب : عنوانهم الجابريه ، قطعه 12 ، شارع 5 ، اوقاتهم من 9-12 الظهر ومن 4-7 المسا تليفونهم 25317358 او 25339063.
بعد المتحف المغرب تروحون سوق السالميه الاحمر مكانه عند دوار الجوازات الدائري الخامس اتسوقون واتمشون فيه ..
وبعدها تقضون وقتكم في منتزه بوليفارد مجابل السوق الاحمر منتزه يديد وجميل وتعشون فيه ..

https://www.arabtrvl.com/vb/t26168.html

او العشاء في احد المطاعم في السالميه على البحر ..
المبـــــاركيـــــة

اليوم الثالث

الصبح اتريقون على 9:30 او 10في مول 360 في جنوب السره (منطقة الزهراء ) على الدائري السادس مطاعم عالمية ومحليه ولا احلى وبعد الريوق اتمشون واتسوقون في المول بس لاتكشخون في هاليوم واايد وراكم لعب عقب ما اتخلصون سوق وتمشي واتغدون عقب اتصلون العصر في المول..
وتتجهون منطقة صبحان المنطقه مقابله لمنطقه جنوب السره وتروحون نادي الصيد والفروسيه ترمون اشوي وتركبون الخيل الدائري السادس بجانب منتجع صحارى
او تحضرون سباقات الخيول اذا كان في

تقرير نادي الفروسية وحضور بطولة

https://www.arabtrvl.com/vb/t4512.html

مركز ميادين للرماية

تقرير عنه

https://www.arabtrvl.com/vb/t27324.html

Mayadeen

وبعدين المنطقه اللي يم صبحان والمطار منطقه الضجيج تروحون وتسابقون سيارات

Welcome to prokartkw بروكارت

او زيارة فعاليات اذا في مدينة الكويت لرياضة المحركات وتكون هذه المدينه جنوب الكويت تبعد تقريبا 40 دقيقه.

موقعهم الالكتروني

https://www.kmt.kw/ar/visits/

بعد ما اتخلصون تروحون الفندق تريحون وبعد صلاه العشا تروحون منطقه البدع ، شارع التعاون عند الفنادق موفنبيك وارجان وريجينسي قعدات خارجيه كافيهات ومطااعم اتعشون في اللي يعجبكم .. او اوربيلا بجانب فندق النخيل مكان وايد حلو وفيه مطاعم وكافيهات عالمية ومحلية او سكاي لاونج في فندق راديسون او ذي سبوت مجمع مطاعم صوب فندق الجميرا او المطاعم والكافيهات في منطقة الشويخ الصناعية ورا ابيات.

مول 360

اربيلا

اليوم الرابع

الصبح اتريقون في الفندق اتسون ريوق بيتوتي
نخي وباجيلا وخبز تنور جبن وخيار وزيتون من هالسوالف على اذان الظهراتصلون واتوكلون على الله
منطقة العبدلي ( زيارة احدى المزارع مثل البحيرة او باب دكاله او سدير او زهره او ختيار ثاني زيارة دار الاوبرا مركز الشيخ جابر الثقافي في مطاعم ونافوره وكافيهات و طبعا عروض وحفلات وامسيات والخ تقدرون تحجزون لها عن طريق الاونلاين مركز جميل لابد من زيارته) ومتحف قصر السلام افتتح في 2020 من احلى المتاحف عن تاريخ الكويت وشيوخها ..

وهذا موقعهم

https://www.jac-kw.com/ar/

العروض يتم ذكرها في موضوع الانشطة
تقرير محمية باب دكاله

https://www.arabtrvl.com/vb/t24778.html

تقرير مركز الشيخ جابر الثقافي (دار الاوبرا)

https://www.arabtrvl.com/vb/t25219.html

https://www.arabtrvl.com/vb/t30104.html

وبعدها تردون الفندق اتريحون ساعه او ساعه ونص ،، وتوكلون على الله باتجاه مجمع الافنيوز على الدائري الخامس اتسوقون واتمشون فيه ..

تقضون فيه باجي اليوم وبعد العشا تدخلون السينما باليل ..

الترفيهية (تم اغلاقها للتجديد )

الافنيوز

اليوم الخامس

الصبح الريوق على 9 في احد المطاعم على الخط الساحلي الخليج العربي او البدع كيفكم

بعد الريوق تروحون حولي اتسوقون في اسواقها اذا تبون شي عملي او للحفلات مجمع المهلب (شارع بيروت ) او مجمع الاندلس ومجمع النقره الشمالي (شارع بيروت ) مجمع البروميناد وايد حلو ويديد وفيه صالة تزلج
واماكن لعب للاطفال - مقابل منطقة القادسية
عقب ماتخلصون في بحولي متحف من احلى المتاحف في الكويت واهمها ( متحف بيت العثمان ) انصح الكل يزوره

تقرير عن متحف بيت العثمان

https://www.arabtrvl.com/vb/t24708.html

بعد الغدا تروحون الفندق اتريحون وتطلعون على 4 تروحون الابراج وبعدين تلعبون
حرب الاصباغ اللعبه واايد حلوه اذا كنتوا قروب تلعبون ضد قروب واذ شخصين تقدرون تدشون مع قروب هذا سايتهم

http://www.aintball-kuwait.com/

وبعد صلاه العشا تختارون تروحون مسرحيه او حفله .. و تلقون في السوشال ميديا والمنتدى والجرايد اليوميه الفعاليات والامسيات والحفلات والندوات
واذا ماتبون جذي تقدرون تروحون مول العاصمة وايد حلو او مجمع الصالحيه راقي وكله ماركات في مدينه الكويت شارع الجهراء اتمشون فيه وبعدين اتعشون في المطاعم اللي برا مع اللي عند النافوره اوداخل المجمع
بعض مطاعم وكافيهات البدع

المهلب

البروميناد

متحف بيت العثمان

بينت بول (حرب الاصباغ )

اليوم السادس
الصبح 9:30 الريوق اي مكان حابين ..

بعدين زيارة مركز الشيخ عبـــدالله الســـالم الثقــــافي ( افتتح في مارس 2018 ) في منطقة الشعب البحري على شارع الخليج العربي
عباره عن 6 متاحف رئيسية وانصح بزيارته وااااايد حلووو للكبار و الصغاار راح تحبونه منها : التاريخ الطبيعي - علوم الفضاء - العلوم الاسلامية العربية - ومتحف العلوم ومبنى للوثائق شي جمييل ..

الموقع الالكتروني :

http://www.sshic.com/projects/sheikh...ultural-centre

الانستغرام : ascc_kw

تقرير عن المركز

https://www.arabtrvl.com/vb/t35720.html

وبعدها تروحون السالميه شارع سالم المبارك واتمشون واتسوقون في هالمجمعات ( السلام - ليلى غالاري ، البستان ، الفنار، سنتر بوينت ، مركز سلطان سوبرماركت حلوو ، مجمع زهره ، مجمع مريم ، مجمع الثريا وتقعدون في احدى الكافيهات اللي على الشارع وكلهم مشي يم بعض ..

الغدا : على راحتكم وعلى اختياركم..

بعد صلاه العصر تروحون متحف بيت الكويت للاعمال الوطنية ، عنوانهم منطقة الشويخ ، قطعه 7 ، شارع 7 بجانب المسرح العام ، فيلا 32 ،، تليفون 24846336.

بعد المتحف تروحون برج الحمرا راقي وهدووء محلات ماركات عالمية، منطقه شرق ، شارع الشهدا ، اتسوقون وتقعدون في كافيهاته او مطاعمه او مول العاصمة والعشا فيه او والعشا في منطقة شرق مقابل قصر السيف ، من بعد دوار مسيد الدوله الكبير اتكملون سيده تكون مطاعم على ايدكم اليسار في خوش مطاعم ..

السالمية
مجمع اولمبيا

ومجمع ذي كيوب المربع فتح

مجمع الرايه منطقة شرق

اليوم السابع

الصبح الريوق مارينا ويفز السالميه اي مطعم على المرسى ،، بعد الريوق اتروحون المركز العلمي على شارع الخليج اذا خليتوا مارينا مول يمينكم كملوا سيده تلقون المركز العلمي على ايدكم اليسار لي وقت صلاه الظهر مثلا ..

تقرير المركز العلمي

https://www.arabtrvl.com/vb/t4087.html

بعدين اتروحون اتغدون في اي مطعم على شارع الخليج العربي وعقب الفندق واتريحون اشوي بعد ماتصلون العشا تروحون يوم البحار مكان العاب وقعدات شعبيه واكل شعبي ،، او اتعشون في المباركية اذا تبون الاشياء الشعبيه ..

اذا ماتبون شعبي تروحون منطقه الخط الساحلي الجنوبي من بعد المسيلة الى منطقه الفحيحيل كلها اماكن حلوه وفيها مطاعم وقعدات خارجية
مثل ( ذي فيلج وديفون و ذي ليك و ذي سبوت في ابو الحصاني والمسيله ) - (سبونز وليفلز وسي فيو ومنيوز من الفنطاس الى بوحليفه) ومن كويت ماجيك مول الى الكوت ..

مارينا مول ومارينا كريسنت

المركز العلمي

حديقة الشعب

ليفلز وسي فيو

اليوم الثامن :

الصبح اتريقون في مول ذي وير هاوس في منطقة الصباحية افتتح في 8/2023 وايد حلو شامل كل شي وفيه اكبر ايكيا او تروحون the gate mall واتسوقون لي حزه الظهر وفي سينما غراند وهو مول يديد ووايد حلو وفي مجمع البيرق من المجمعات الحلوه والمنطقه حوله بعد فيها اسواق شعبيه واقمشه والخ طبعا في منطقة العقيله

تقرير عن gate mall

https://www.arabtrvl.com/vb/t218.html

،، بعدين تروحون منطقه الفحيحيل مجمع الكوت واتمشون في مجمع الكوت في Q8 Karting و على المسيان تقعدون في وحده من الكافيهات اللي يطلون على النافووره المكاان واايد حلووو ..

واتمشون في اسواق فحيحيل الشعبيه وبعدها اتعشون في مجمعات مطاعم ومنها spoons - ليفلز - سي فيو - ميرال والخ من اسامي لمجمعات المطاعم الاماكن وايده باتجاه ابراج غاليه وعاليه اذا خليتوا مجمع كويت ماجيك يمينكم كملوا سيده تلقونهم اختاروا المكان اللي يعجبكم..

او حديقة بوتانيكال جاردن في قصر بيان

وهذا تقرير عنها تفتح فقط كل يوم خميس للزوار الفترة الصباحية

https://www.arabtrvl.com/vb/t20410.html

gate mall

الكوت

سبونز

اليوم التاسع :

الصبح الريوق في مجمع الافنيوز واتمشون اشوي مو وايد لان وراكم روحه الفروانيه مجمع العربيد في دراريع (الجلابيات) ومجمع مغاتير والحمرا مول ،، اتخلصون من الفروانيه تروحون السالميه اتغدون اهناك في مثلا مجمع the cube من المجمعات اليديده على البحر ..
موجوده صورته فووق

وبعدين على 5 بعد ماتريحون تروحون متحف القرين (بيت الشهيد بدر العيدان ) عنوانهم : القرين ، قطعه 4 ، شارع 3 ، منزل 59 .. تليفونهم 25430343 ..

او اذا ماتبونه خلوه وريحوا وشوفوا لكم مسرحيه او حفله ، واذ ماتبون مسرحيه او حفله تقدرون تروحون سوق السالميه الاحمر او ارض المعارض في منطقه مشرف اذا كان في معرض او المعارض الصغيره اللي يم المستشفى الاميري منطقه شرق مثل ( fa gallary، بيت ديفا والسدره موجودين منطقة شرق ، 52 degrees موجود في الشويج مجمع التلال والمعارض اللي نعلن عنها في المنتدى.. ) .

او تروحون حديقه الشهيد من الحدايق الحلوه في الكويت ووممتازه لزيارتها وفيها جزء الجزء الثاني نافورة ومجسمات عن الكويت قديما و حاضر ومتاحف وايضا يتم فيها عروض ثقافيه للاطفال والكبار .. وبعدها العشا في اي مطعم داخل الحديقة او احد الابراج اللي حول الحديقة ..

تقرير عن الجزء الأول لحديقة الشهيد وتقام فيها معارض وانشطة للأطفال وحفلات

https://www.arabtrvl.com/vb/t20125.html

https://www.arabtrvl.com/vb/t26444.html

متحف شهداء القرين

حديقة الشهيد على الدائري الاول من احلى الحدايق انصح في زيارتها

اليوم العاشر :

OPEN DAY

اليوم الحادي عشر:

الصبح اتريقون في مطاعم اللي مجابله قصر السيف منطقة شرق عقب دوار المسيد الكبير اتكملون سيده اتشوفون المكان على ايدكم اليسار المكان كله مطاعم .. او اتريقون في المباركية وياسلام على ريوق المباركية .. او منطقة الشويخ ورا التلال في محلات وكافيهات ومطاعم حلوه

بعدين يمكم متحف الكويت الوطني24565342 او 22451195 من ضمنه ( دار الاثار الاسلاميه 22400992 ، ومتحف التراث الشعبي 22429158 ) ويم المتحف بيت البدر واهو من اقدم البويت الكويتيه 22429158 ، ويمهم مكتبة الكويت الوطنية .

بعد ما اتخلصون من المتاحف تتجهون السالميه عند المارينا ويفز تحجزون على عباره ام الخير وتتجهون على جزيره فيلجا (فيلكا) واتمشون فيها واتشوفون اثارها وترجعون الديره على 5 او 6 المغرب ..

تقرير عن مجمع ديسكفري للأطفال

https://www.arabtrvl.com/vb/t6897.html

وبجذي انتهى يومكم الاثري بما انه كله اثار ومتاحف.

التأجير للرحلات البحرية من مارينا كريسنت

اليوم الثاني عشر:

بعد الريوق اتروحون رحله بحريه عندكم مكتب سلسان لتأجير اليخوت هذا سايتهم

Home

مكانهم شارع الخليج بجانب مطعم مركز سلطان اتأجرون بروحكم من 1 – 4 على كيفكم جم ساعه تبون وتقدرون تروحون وتشوفون الجزر الكويتيه او يتمشى فيكم في الديره على الخليج انتوا اللي تختارون.
او تاخذون الطراد اللي من المارينا يكون فيه بوفيه غدا او عشا ويتمشى فيكم ..
وزيارة لعبة الفندق الغامض في سيمفوني السالمية

https://www.arabtrvl.com/vb/t20597.html

وبعد الرحلة ممكن زيارة سوق اليمعه للي يحبون هالاسواق ..

او تشوفون فريق الطيارات الورقيه وين يكون عرضهم

او تجربة الطيران
او زيارة مزرعة البحيرة الزقاء او محمية باب دكاله في العبدلي

تقرير مزرعة البحيرة

https://www.arabtrvl.com/vb/t24743.html

او تروحون السينما ..
لكم حرية الاختيار
انتيك من سوق اليمعه

تأجير الرحلات البحرية

تجربة الطيران اما على الخليج او على الخط الساحلي للشاليهات

الطيارات الورقيه اماكنها ( شاطئ شويخ - المسيلة - بنيدر )

البحيرة الزرقاء : تفتح من 3 ايام عيد الاضحى 2015 - من 9ص الى العشا .. دخول المحميات .. موسمية اعلن عنها في موضوع الانشطة

اليوم الثالث عشر:

بعد الريوق تتجهون منطقة العميريه على الدائري الخامس Kuwait zoo وبعد ما اتخلصون zoo تروحون منطقه الشويخ حلبة سرب في سباق سيارات ووناسه للي عندهم صبيان

وبعدها تروحون جمعيه الشاميه منطقه الشاميه اتمشون فيها لان هذا الشي مو موجود عندكم اهو سوبر ماركت وسوق وكل شي فيها ، او جمعيه الروضه ( منطقه الروضه ) ..

بعد ما اتخلصون من الجمعيه اتروحون منطقه الجابريه ( متحف محمد الشيباني ، منطقة الجابريه قطع 5 شارع 3 تليفون 25320901 .. او تمرون الجهراء وتروحون القصر الاحمر ومنها تشوفون الجهراء.

اتخلصون من المكان اللي اخترتوه اتروحون مقهى شعبي سليمان الشميمري منطقه شرق يم سوق شرق واتعشون فيه او اذا تبون مجمع اولمبيا على شارع الخليج العربي بعد مارينا مول باتجاه المركزالعلمي.

اومروج فيه مطاعم وكافيهات وصالة تسلية والعاب خارجيه للاطفال ومزرعه في منطقة صبحان على الدائري السادس يم منتجع صحارى

مروج

حلبة سرب

Sirbb Circuit | Start your engines

اليوم الرابع عشر و الخامس عشر:

تقدرون تحجزون شاليه لمده ليلتين او ليله وهذيل اسامي الشاليهات :

1- شاليهات الوطنية - منطقه الخيران- طريج 290 جنوب الكويت- تليفونهم 22425211.
2- منتزه الخيران- منطقه الخيران- طريج 278 جنوب الكويت- تليفونهم 23951122.
3- منتزه خليفه - منطقه جليعه- طريج 240 جنوب الكويت- تليفونهم 23280144 او 232407262.
4- شاليهات صالح شهاب- منطقه جليعه- طريج 245 جنوب الكويت- تليفونهم 23280573 / 23280571 / 23280865.
5- فندق ومنتجع سيشل - منطقه جليعه- طريج 245 جنوب الكويت- تليفونهم 1844444.
6- شاليهات الجون - منطقه جليعه - طريج 245 جنوب الكويت- تليفونهم 23281801 / 23281897.
7- فندق ومنتجع هيلتون- منطقه المنقف- جنوب الكويت خط فحيحيل الساحلي- شاليهات عاديه وشاليهات بحوض سباحه خاص- تليفونهم 22256222 / 23725500 / 23724348.
8- منتجع سفير الدانه - منطقه الفنطاس- طريج 209 جنوب الكويت خط فحيحيل الساحلي- تليفونهم 23902760.
9- فنادق ومنتجعات - موفنبيك ، شيك ، رمال ، النخيل - منطقه البدع - شارع التعاون.
تليفوناتهم : النخيل 25646266 / 1824060 ، موفنبيك : 22253100 ، شيك : 25725050.
10- منتجع صحارى- منطقه صبحان - على الدائري السادس بجانب نادي الصيد والفروسيه- شاليهات عاديه وشاليهات بحوض سباحه خاص - المنتجع واايد راقي واايد هادي - تليفونهم 1840084.
11- منتجع سليل الجهراء-منطقه الجهراء - شمال الكويت- تليفونهم 24575901 / 24567444.
- 12 منتجع وفندق الجميرا - منطقة المسيلة -شارع التعاون

ملااحظــــــــــات :

- حديقه الشعب تصلح للكبار والاطفال

.(تم الاغلاق في 2017 للصيانة والتجديد)

- المدينه الترفيهيه تصلح للكبار والاطفال
.(تم الاغلاق في 2017 للصيانة والتجديد)

- لعبة المتاهة لعبة الالغاز trapped inn - escape game
من الالعاب اليديده وانصحكم اتجربونها وااايد حلوه
موجوده في مجمع سيمفوني السالمية بجانب فندق ميسوني ويفضل مو اقل من شخصين اللي يلعبونها.
وهذا موقعهم
https://www.trappedinn.com/aboutus.html
الانستغرام : @trapped_inn

- زيارة مزرعة ياسمين من المزارع الجميلة (مصنع كامل من منتجات البان وعسل والخ)
في منطقة الوفره
لعمل جولة بالمزرعه التنسيق مع / بدر الايوبي
00965-99888912
ايميل : bader.alayoubi@kuwaitagro.com
الانستغرام : @yasminfarms
الانستغرام : @albandairy

- مزرعة باب دكاله ( محمية جميلة جدا تهتم بالطيور والحيوانات الاليفه )
مفتوحة للزوار بنهاية عطلة كل اسبوع ( موسمية ) يتم الاعلان عنها في موضوع الانشطة.
الانستغرام : @bab_dokalh

- مزرعة البحيرة ( محمية جميلة تهتم بالورد والنباتات وبعض الحيوانات )
مفتوحة للزوار بنهاية عطلة كل اسبوع ( موسمية ) يتم الاعلان عنها في موضوع الانشطة.
الانستغرام : albohayra

- مزرعة سدير ( محمية جميلة جدا تهتم اكثر بالمزروعات وفيها انشطة مثل حجز مكان للشواء ويسون ايام فيها طبخ من شيف كويتين
ومن منتجات المزرعة وايد حلوه )
مفتوحه للزوار بنهاية عطلة كل اسبوع ( موسمية ) يتم الاعلان عنها في موضوع الانشطة.
الانستغرام : sadeer_farms

مدينة الكويت لرياضة المحركات
موقعهم
https://www.kmt.kw/ar/visits/
الانستغرام @kmtkw

-PRO KART تصلح للكبار والاطفال .

- حلبة سرب تصلح للكبار والاطفال.

- المركز العلمي يصلح للكبار والاطفال.

- PAINTBALL تصلح للكبار والاطفال .

- المجمعات كلها فيها اماكن خاصه للاطفال.

- المتاحف تصلح للكبار والاطفال.

- نادي الصيد والفروسيه يصلحون للكبار والاطفال .

- اماكن للطائرات الورقيه في منطقه المسيله بجانب قريه المسيله المائيه او في منطقه بنيدر منطقه شاليهات .

- مجمع ديسكفري مدينه الكويت على الدائري الاول للاطفال ( مغلق حاليا للترتيبات.
[FONT=Arial][SIZE=4][COLOR=#0000f

- حديقة حولي بارك منطقه حولي للاطفال.

-المسرحيات في للاطفال وفي للكبار والحفلات والامسيات والندوات (موسم مهرجان هلا فبراير- مواسم الاعياد- المواسم الثقافيه في مركز الشيخ جابر الثقافي - وحديقة الشهيد والمجلس الوطني للثقافه ) ( نعلن عنها في موضوع الانشطة والفعاليات )

- حديقة بوتانيكال قصر بيان كل يوم خميس الصبح

- مخيم وزارة الدفاع اعتقد في منطقه صبحان ( فيه انشطة ترفيهيه) .

- مخيم شركة نفط الكويت اعتقد في منطقه جليعه جنوب الكويت (انشطه ترفيهيه).

-القصر الاحمر منطقه الجهراء.

- مزارع الوفره ( منطقه الوفره جنوب الكويت )

- الاكوا بارك مائيه ( في الصيف ) منطقه شرق تحت الابراج.

- قريه المسيله المائيه ( منطقه المسيله )في الصيف
.(مغلقه من يوليو 2018 للتجديد و الصيانه)

- ملاعب الصابون كوره القدم (في الصيف).

- ارض المعارض الدوليه في مشرف ( نعلن عنها في موضوع الانشطة والفعاليات )

- معارض الازياء والكماليات ( نعلن عنها في موضوع الانشطة والفعاليات )

- الشاليهات والمنتجعات ..

اتمنى يعجبكم الجدول وما اكون قصرت فيه واتمنى اني غطيت اغلب الاماكن في ديرتي الغالية الكـــــــويت وان شاء الله اي شي يديد اضيفه على هالموضوع
واي استفسار بالخدمه

منتدى العرب المسافرون الكـــــــــويت

جارة القمر, عشقي السفر, ابراهيم 43 و 3 آخرون معجبون بهذا.

توبليرون · 29-08-2015, 02:06 AM

يعطيييج العافية ابرار
جدول شامل كل شي ماشاءالله
واماكن جديدة وحلوة للعوائل والافراد
شكراا لمجهودج المميز

q8ya metnaqla · 29-08-2015, 03:05 PM

اقتباس : المشاركة الأصلية كتبت بواسطة توبليرون

يعطيييج العافية ابرار
جدول شامل كل شي ماشاءالله
واماكن جديدة وحلوة للعوائل والافراد
شكراا لمجهودج المميز

الله يعافيج ام حسين ..
العفو ماسويت شي [emoji253]

Sent from my iPhone using Tapatalk

آخر مواضيع q8ya metnaqla

- هُنا إمبــــراطـــوريــ اليــابــان ــــة
- استفسارات اليابان
- رحلة صيفية بحرية في ربوع الجبل الأسود (مونتينيغرو 7/2024)
- حي الله هالقطري حي الله حبه ربى في حشاي .. مانحتاج حق السري سراينا هالجاي
- هنــــــــا سنغــافورة الكفــاح الإصــرار التعليــم التطــور

توقيع : q8ya metnaqla

كويتية متنقله في أعالي جبال الأنديز، قاطعه فيها الإكـــــوادور من الشمــال للجنـــوب

https://www.arabtrvl.com/vb/t49320.html

كنزٌ دفين اكتشافُ ارضٍ ضائعةٍ كنا نعرف بوجودها ولكن لم نستطع الوصول إليها(كولومبيــا)

https://www.arabtrvl.com/vb/t48941.html

مراسلتكم من الاتحاد السوفيتي سابقا (روسيــا 2019 )

https://www.arabtrvl.com/vb/t45053.html

في قصص الشعوب طرائف لاتنتهي وعالم حلو بهي يسكن في القلوب في قصص الشعوب (المكسيـــــك)

https://www.arabtrvl.com/vb/t41667.html

الى الزيتونة وعقبه بن نافع وابن خلدون بلد العلم والثقافة والتاريخ( تــونس الخضـــرا )

https://www.arabtrvl.com/vb/t39247.html

سـكــة سفــر فيهـا مشـاويـر العمــر ( امـريكــا ديسمبــر 2017 )

https://www.arabtrvl.com/vb/t31951.html

كل انسان يصبح شاعرا اذا لامس قلبه الحب : من بلاد الفلاسفه (اليونان)

https://www.arabtrvl.com/vb/t7554.html

آخـــرفـــرصـــة · 29-08-2015, 01:59 PM

رائع أبرار
جدول متميز و مثل ما قلت ممكن الواحد يختار منه اللي يحب
الله يعطيك العافية دوم ما تقصرين

يسعد مساك

فيصل · 29-08-2015, 02:13 PM

عفيه عليج

ما قصرتي والله علي الجدول

q8ya metnaqla · 29-08-2015, 03:07 PM

اقتباس : المشاركة الأصلية كتبت بواسطة آخـــرفـــرصـــة

رائع أبرار
جدول متميز و مثل ما قلت ممكن الواحد يختار منه اللي يحب
الله يعطيك العافية دوم ما تقصرين

يسعد مساك

الله يعافيك بوغسان
يستاهلون زوارنا ..
ومساك يارب [emoji253]

اقتباس : المشاركة الأصلية كتبت بواسطة فيصل

عفيه عليج

ما قصرتي والله علي الجدول

ماسويت الا الواجب يا بوغازي [emoji253]
وشكرا لكم على هالمنتدى [emoji120][emoji253]

Sent from my iPhone using Tapatalk

آخر مواضيع q8ya metnaqla

- هُنا إمبــــراطـــوريــ اليــابــان ــــة
- استفسارات اليابان
- رحلة صيفية بحرية في ربوع الجبل الأسود (مونتينيغرو 7/2024)
- حي الله هالقطري حي الله حبه ربى في حشاي .. مانحتاج حق السري سراينا هالجاي
- هنــــــــا سنغــافورة الكفــاح الإصــرار التعليــم التطــور

توقيع : q8ya metnaqla

كويتية متنقله في أعالي جبال الأنديز، قاطعه فيها الإكـــــوادور من الشمــال للجنـــوب

https://www.arabtrvl.com/vb/t49320.html

كنزٌ دفين اكتشافُ ارضٍ ضائعةٍ كنا نعرف بوجودها ولكن لم نستطع الوصول إليها(كولومبيــا)

https://www.arabtrvl.com/vb/t48941.html

مراسلتكم من الاتحاد السوفيتي سابقا (روسيــا 2019 )

https://www.arabtrvl.com/vb/t45053.html

في قصص الشعوب طرائف لاتنتهي وعالم حلو بهي يسكن في القلوب في قصص الشعوب (المكسيـــــك)

https://www.arabtrvl.com/vb/t41667.html

الى الزيتونة وعقبه بن نافع وابن خلدون بلد العلم والثقافة والتاريخ( تــونس الخضـــرا )

https://www.arabtrvl.com/vb/t39247.html

سـكــة سفــر فيهـا مشـاويـر العمــر ( امـريكــا ديسمبــر 2017 )

https://www.arabtrvl.com/vb/t31951.html

كل انسان يصبح شاعرا اذا لامس قلبه الحب : من بلاد الفلاسفه (اليونان)

https://www.arabtrvl.com/vb/t7554.html

A.Alsubhi · 29-08-2015, 08:01 PM

يا إلهي ماهذا الإبداع , أقسم بالله انك ملكه روحي ياشيخه الله يعطيك الصحه والعافية

جدول رائع جداً ورايق والحقيقة اتمنى ان شاء الله ازور لكويت في مهرجان هلا فبراير...

OLGA · 29-08-2015, 10:09 PM

يعطيج العافيه ابرار ما قصرتي ..
اكيد كل الي بيزور الكويت راح يستفيد منه .. شكرا

q8ya metnaqla · 30-08-2015, 11:30 AM

اقتباس : المشاركة الأصلية كتبت بواسطة ابو عمر _ JDH

يا إلهي ماهذا الإبداع , أقسم بالله انك ملكه روحي ياشيخه الله يعطيك الصحه والعافية

جدول رائع جداً ورايق والحقيقة اتمنى ان شاء الله ازور لكويت في مهرجان هلا فبراير...

[emoji3][emoji5] الله يعافيك بوعمر [emoji5]
يستاهلون زوارنا هالجدول
ان شاءالله حياكم الله العين أوسع من المكان [emoji253]

اقتباس : المشاركة الأصلية كتبت بواسطة OLGA

يعطيج العافيه ابرار ما قصرتي ..
اكيد كل الي بيزور الكويت راح يستفيد منه .. شكرا

الله يعافيج اولغا
ان شاءالله ويستانسون فيها ..
العفوو[emoji253]

Sent from my iPhone using Tapatalk

آخر مواضيع q8ya metnaqla

- هُنا إمبــــراطـــوريــ اليــابــان ــــة
- استفسارات اليابان
- رحلة صيفية بحرية في ربوع الجبل الأسود (مونتينيغرو 7/2024)
- حي الله هالقطري حي الله حبه ربى في حشاي .. مانحتاج حق السري سراينا هالجاي
- هنــــــــا سنغــافورة الكفــاح الإصــرار التعليــم التطــور

توقيع : q8ya metnaqla

كويتية متنقله في أعالي جبال الأنديز، قاطعه فيها الإكـــــوادور من الشمــال للجنـــوب

https://www.arabtrvl.com/vb/t49320.html

كنزٌ دفين اكتشافُ ارضٍ ضائعةٍ كنا نعرف بوجودها ولكن لم نستطع الوصول إليها(كولومبيــا)

https://www.arabtrvl.com/vb/t48941.html

مراسلتكم من الاتحاد السوفيتي سابقا (روسيــا 2019 )

https://www.arabtrvl.com/vb/t45053.html

في قصص الشعوب طرائف لاتنتهي وعالم حلو بهي يسكن في القلوب في قصص الشعوب (المكسيـــــك)

https://www.arabtrvl.com/vb/t41667.html

الى الزيتونة وعقبه بن نافع وابن خلدون بلد العلم والثقافة والتاريخ( تــونس الخضـــرا )

https://www.arabtrvl.com/vb/t39247.html

سـكــة سفــر فيهـا مشـاويـر العمــر ( امـريكــا ديسمبــر 2017 )

https://www.arabtrvl.com/vb/t31951.html

كل انسان يصبح شاعرا اذا لامس قلبه الحب : من بلاد الفلاسفه (اليونان)

https://www.arabtrvl.com/vb/t7554.html

مسقط الخير · 30-08-2015, 08:31 AM

جدول مناسب أن شاء الله لي زيارة في دورة كأس الخليج 23 معا مجموعة من الشباب
جزاكم الله كل خير