السلام عليكم
- اول شي استهدوا بالله وتعوذوا من ابليس واللي ضايق صدره يقفل الموضوع لا يفرغ حرته فيني
طبعا كلنا نتعب في البحث والتجهيز للسفر ومعروف ان السفر يرهق ميزانية الكثير منا ( السفر بصراحه مكلف للكثيرين ) وغالبا هي سفره واحد في السنه والبعض كل سنتين او اكثر ...
- كل واحد ينقل الصورة بمنظاره وحسب رأيه واكيد اكيبد اكيد انه ماتعنى وتعب وصور وسوى تقرير الا انه يبي يفيد المسافرين الاخرين سواء يوجهم لمكان او يحذرهم من اخر او يفيدهم بمعلومه او يشرح لهم آلية معينة الخ ...
في سفره لي لماليزيا اللي كانت 16 يوم اعتقد الى الان احس اني اكلت مقلب مدته ( 3 ايام ) وما الوم احد فيه لان الجميع مجتهد .....بس ادين لهم بالشكر والفضل لجمال 13 يوم اخر ...
الاسبوع هذا رحنا لمانشستر ( تمت التغطيه في سناب شات العرب المسافرون ) ويمكن اسوى تقرير عنها لان رحت معها لويندرمير ايضا ....
بلاكبول ... صداها في اذني ... وضجيج جمالها يملأ رأسي ... وحسرة عدم رؤيتها تحرقني ان لم ازرها وانا سأكون بالقرب منها ....
عقدت العزم بالمبيت ليلة فيها ولعلها تكفيها من ( 3 ليال ) ...
ولكن رغبتي في زيارة البحيرات ايضا طاغية ... فأنا طماع ... فجشع المسافر في كثرة التنقل لا يعدله شيء ...
وصلنا مانشستر وكان الحجز مبدئيا ليلتين ...
لا اخفيكم ان شوقي الى بلاكبول افسد علي شي من متعتي في مانشستر ....
قضينا اليوم الاول في مانشستر ...
اليوم الثاني ومن ( النجمه على قولة اخوانا المصريين ) انطلقنا بسيارتنا الى بلاكبول ووصلناها بعد ساعة وكانت المواقف متوفرة بكثرة ..... واخذنا تذكرة مواقف لمدة 3 ساعات ...
لكن الصدمه والصدمه والصدمه .... لا بل هو حادث شنيع مزق كل الاشواق والاماني الجميله ... فالحسناء انقلبت ساحره والجميله سقط قناعها ...
رأيي بتجرد ( اكرر انه رأيي الشخصي )
مدينة اقل من عادية ، مجرد متنفس لمانشستر وماحولها لمشاهدة البحر ربما ( اشك انهم يجون لها )
الاسواق ( مانشستر اجمل بكثير ففيها ترافورد سنتر من اكبر مولات اوربا )
intu Trafford Centre | Manchester Shopping
الالعاب :
لايوجد شي ( يستاهل العنوه ) و التون تاورز ( مدينة الالعاب المشهورة ) تبعد ساعه ونصف عن مانشستر ( نفس المسافه تقريبا )
https://www.altontowers.com/

- اقصد بالنسبة لي حرام لما يجي واحد او عائلة دافعين ومتكلفين ( فيزا ، تذاكر طيران ) اقول لهم رحوا بلاكبول ...
بلاكبول قرية ساحليه اخذت اكبر من حجمها بكثير واشوفها مثل مدينه قريبه منا اسمها ( كلاكتون ) سبق زرتها وفكرت اسوي تقرير عنها بس ( وش اقول ) وشكل هذا نمط كثير من القرى الساحليه هنا ...
- انا هربت منها الى وندرمير مع حسرة على الـ ( 3 ) ساعات + ساعة المشوار لها ...


- اذا كنت غلطان لاتقسون بالرد علي واعتذر سلفا عن كلامي اللي مارح يعجب يمكن كثيرين ... بس تبقى اذواق وتجارب ... والمهم ان الواحد يكون مبسوط في سفره ويختار اللي يناسبه هو بعينه موب اللي ناسب احد اخر ...