العرب المسافرون

بوابة السفر الى الولايات المتحدة الأمريكية U.S.A

بسم الله الرحمن الرحيم

السلام عليكم ورحمة الله وبركاته


بداية اتشرف بتسجيل عضويتي في منتدى العرب المسافرون الجديد اللي هو امتداد لمنتدى العرب المسافرون مكتوب واللي كان لنا فيه ذكريات جميلة ومعلومات مفيده .. طبعاً ما راح ابكي على الأطلال لأن في النهايه المنتدى السابق كبر وازدهر بالاخوان اللي
كانوا فيها سواء من إدارة أو اعضاء وذول ان شاءالله البركه فيهم وهم من يقدرون يرجعون المحتوى المفقود بإذن الله بجهودهم وتعاون الجميع ..

انا حبيت انزل موضوع عبارة عن تجربه لاكثر من مره مع شركة oakwood الأمريكية وهي شركة تقوم بإدارة شقق مفروشة في الولايات المتحدة لمدد قصيرة واللي هي تبدأ من شهر (أقل مدة يمكن الحجز فيها) طبعا تعد شركة oakwood من اهم واصدق الشركات
في التعاون وتقديم الخدمات الراقية لعملائها وتوفير العديد من الوحدات السكينة المفروشة بنظام الشقق الفندقية بداخل مجمعات سكنية تشمل الأمن ومواقف السيارات بالاضافة إلى كلاب هاوس ومسابح للكبار والصغار .. اتكلم عن تجربتي معاهم واللي كانت
دايما في ولاية كاليفورنيا وهي عشقي الأبدي ... طبعا راح اتكلم عن أخر رحلة كانت لي هناك وراح تقتصر على السكن فقط حتى يكون هذا الموضع متخصص بالسكن ... كانت بداية الرحلة في منتصف شهر ديسمبر 2014حتى 20 من شهر يناير 2015
وطبعا تم الدخول الى موقع الشركة اللي هو :
Corporate Housing, Temporary Apartments, Government Lodging, Serviced Apartments and Extended Stay Housing | Oakwood
واختيار الفترة الزمنية واللي لازم ماتقل عن شهر كامل .. طبعا في خيارات لتحديد الولاية والمدينة المطلوب السكن فيها ، فقمت بإختيار ولاية كاليفورنيا ومنها مدينة Santa Monica واللي هي بالنسبة لي عروس الولاية لما تحمل في طرقاتها ومبانيها ذكريات
جميلة لي و لأفراد أسرتي .. طبعاً بعد ما يتم تعبئة الخانات المطلوبه راح تنزل لكم قائمة فيها الوحدات السكنية المتوفرة وراح يتم عرضها بحسب قربها من المنطقة المطلوب السكن فيها وطبعا كل وحدة راح يتم فيها عرض عنوان الموقع بالكامل مع اسم البناية
بالاضافة لصور خاصة بالمجمع وتوصيف للخدمات المتوافرة فيه .. بعد اختيار المجمع المطلوب راح يتم النقل الى صفحة جديدة وتكون بعنوان طلب الاستفسار عن الوحدة من حيث السعر (اغلب الوحدات لايتم عرض سعرها) وفيها عدة خانات منها خانات البيانات
الشخصية لراغب السكن الاسم العنوان الايميل رقم الهاتف (لو حاب يتم التواصل معك هاتفيا) بالاضافة لمربع طلبات اضافية وهنا ممكن تكتب طلبات اضافية تطلبها في الوحدة مثلا انك حاب انها تكون قريبه من منطقة تجارية او مثلا تفضل مكان يكون فيه اطلاله
قريبه لبحر مثل منطقة ديلي راي .. وبعد الانتهاء من تعبئة الخانات ويتم ارسال الايميل راح يجي لك ايميل تلقائي من الشركة يتم اعلامك فيه باستلام طلبك وانا راح يتم الرد عليه خلال 24 ساعة من أيام العمل .. طبعاً راح يوصل لك ايميل خلال يومين او ثلاث
ايام بحد أقصى يتم خالاله اعلامك اذا كانت الوحدة السكنية اللي اخترتها متوفرة أو لا طبعاً اذا كانت متوفره راح يتم ارسال لك صور للوحدة السكنية والمجمع السكني بالاضافة الى السعر واذا حبيت يكون هناك (هاوس كيبنغ) خلال فترة إقامتك ممكن يتم توفيرها
وتكون مره اسبوعيا وبمبلغ اضافي يضاف لقيمة الايجار ، وفي حال لم تكن الوحدة السكنية متوفرة راح تقوم الشركة بإرسال لك عدة خيارات لوحدات سكنية حسب المواصفات اللي طلبتها + بالموقع اللي انت حاب تسكن فيه ، وبعد ما تقوم بإختيار الوحده اللي
عجبتك راح تقوم الشركة بإرسال لك عن طريق الايميل عقد ايجار تقوم بطباعته وتعبئة البيانات الخاصه بك في الخانات الموضحه ( العقد بسيط وممكن تستعين بخدمة قوقل للترجمة في حال واجهتك صعوبات في تفسير بعض البنود) وبعد ماتملي العقد وتوقعه
بتكون في فورمه ثانية تطبعها وتعبي فيها بيانات البطاقة الائتمانية الخاصة بك وتوقيعك ، بعد ماتملى العقد وفورمة البطاقة الائتمانية تقوم بعمل مسح ضوئي لهم (سكان) وتقوم بإعادة ارسالها للشركة اللي بدورها تتأكد من أنك قمت بتعبئة البيانات المطلوبة
في العقد بالاضافة لتوفر مبلغ الايجار + تأمين يتم ارجاعه لك خلال اسبوع 10 ايام من تاريخ تسلم الوحدة ، بعد ذلك يتم ارسال لك تفاصيل السكن وخارطة تفصيلية للموقع، طبعا ممكن تسأل كيف ممكن اعمل تشيك او وتيشك اوت ؟ هل هناك مكتب استقبال
في البناية اللي تتوفر فيها الوحدة السكنية ؟ لا مافي احد راح يستقبلك لعمل الشيك أن والشيك أوت ! لكن لما يتم ارسال لك بيانات وخارطة الموقع الخاص بالبناية راح يكون فيه صفحة تحصل فيها صورة لصندوق عليه لوحة ارقام ( سيفتي بوكس) هذا الصندوق
يكون بالعادة في مدخل البناية الرئيسي طبعا بعد ماتوصل الى البناية وتوقف سيارتك تتوجه الى المدخل الرئيسي وتبحث عن الصندوق (السيفتي بوكس) اللي تم ارسال صورته لك بالاضافة للكود اللي راح تدخله(الرمز) بعد ماتفتح الصندوق راح تحصل فيه مجموعة
اظرف بريدية عليها اسماء ناس ابحث فيها بتحصل ظرف بإسمك، تفتح الظرف بتحصل فيهمفتاحين للشقه الخاصه فيك و بطاقة لدخول موقف سيارات المجمع السكني الخاص فيك.
اللحين راح أعرض لكم صور من الموقع لطريقة الحجز






طبعا هذا بس مجرد شرح لموقع الاوك وود واللي يقدم خدمة تأجير وحدات سكنية مفروشة لفترات قصيرة يحتاج لها الكثير من الأعضاء ، وانا اعتبره موقع صاحب ثقه خصوصا ان عندي معاهم عدة تجارب وضامنهم .. وانا جاهز لأي استفسار

تحياتي