صباح الخير عليكم
ونكمل ثاني يوم تجهزنا وفطرنا في بوفية الفندق البوفية زي ماذكرت منوع وعندهم جهاز لي صنع البانكيك شي شي لذيذ
الحمدلله خلصنا ورحنا اللوبي علشان نحجز لي رحلة اليوم
رحلتنا كانت لي (the peak-مصنع مجوهرات-ويقال قرية الصيادين-واستانلي ماركت)
طبعا الرحلة مع قروب ومرشدة سياحية
جاء الباص وأخذنا الي اول مكان the peak وهو مكان مرتفع تشوف جمال المدينة من فوق
اول شي ركبنا ترام قديم والمرشدة قالتلنا اللي يقدر يجلس ناحية اليمين علشان المنظر يكون احلى وبعدين طلعلنا سلالم كهربائية الين وصلنا القمة





شوفو الجمال


[IMG]http://images.tapatalk-cdn.com/15/10/04/
ae7685ad90e0e8375ce5deca50dc647f.jpg[/IMG]


في هذا المكان في كوفيهات ومطاعم ومحلات تبيع الهدايا التذكارية المكان جدا جميل ويومها كان الجو غيم
وقالت المرشدة المرة الجاية زورو المكان في الليل جمال ثاني
ورجعنا لي باصنا واتجهنا الي مصنع المجوهرات للأسف الشديد في هذا اليوم أنا كنت مريضةماقدرت أصور اي شي في المصنع وكل شوي يزيد التعب
هذة الصورة الوحيدة لي مبنى كان قبال المصنع

أنا اشوف المكان مايستاهل اول مادخلنا جلس يتكلم عن المصنع وعن المجوهرات وبعدين كيف يتم العمل على القطع
وبعدين دخلنا المحل اللي يبيع للي حاب يشتري وكانوا عاملين خصومات وفيه مشروبات مجانية للي حاب وبس
ورجعنا لي باصنا واتجهنا على قرية الصيادين او يقال قرية علشان ماشفت قرية مجرد تركب قارب يأخذك بجولة وتشوف كم قارب ومطعم بحري وبس واللي يقهر في الموضوع زي مافهمنا من المرشدة ان نحنا مخيرين اذا حابين نطلع القارب اولا لكن لمن وصلنا نزلنا من الباص وقالتلنا المشرفة اطلعو المركب وبعد الجولة القصيرة اللي ذكرتها الحرمة اللي كانت تقود المركب قالت يلا ادفعوا يعني خلونا نطلع القارب وكأن من ضمن الجولة صح ان المبلغ رمزي لكن ليه تستغفلونا وللأسف الكل دفع وهو يطالع في بعض مستغربين
وهذة الصورة الوحيدة اللي اخذتها للمطعم البحري واصلا مافي شي يستاهل التصوير

ورجعنا الباص وعلى استانلي ماركت طبعا انا كنت خلاص في قمة التعب مادري كيف كملت الرحلة وكمان مافي الا صورة وحيدة للشارع

ستانلي ماركت هو ازقة فيها محلات تبيع ملابس وهدايا تذكارية وألعاب وطبعا سفن الفن المكان ماقدرنا نغطية كله بسبب التعب اللي فيني وكمان المرشدة أعطتنا 10دقايق بس أبدا ماتكفي
ورجعنا الفندق وأخذت حبة من هذا اللي في الصورة

دواء حق الانفلونزا عجيب ونمت نوم الين ثاني يوم
وكدا انتهى هذا اليوم وان شاء الله اعوضكم بالجزء الجاي




أرسلت بواسطة iPad بإستخدام Tapatalk