مغامراتي البحريه في الكروز MSC للأراضي النروجيه - الصفحة 19

نانا ابو عابد · 16-11-2015, 01:32 PM

الف سلامة عليكي ما تشوفي شر...

اجزاء حلوة بالباص والمطل رائع والمكان خيالي للتصوير وبالفعل لو كان قبل الغروب رح يكون اجمل ...

بانتظار جولاتك المقبلة...

مسافر زاده الخيال · 16-11-2015, 08:43 PM

جزء جميع ومليان اكشن وصفك الدقيق لكل التفاصيل يجعلنا نعيش معك لحظة بلحظة وللأسف اصعب شيئ في أي رحلة ان يتعرض الشخص لمثل هذه المواقف وفعلا مكان الإصابة مؤلم جدا واعلم هذا كوني طبيب استغربت عدم وجود نقطة طبية في النورد كيب كان من الممكن ان يتم اجراء اسعافات أولية او على الأقل وجود كرسي متحرك حتى تتابعي الرحلة بانتظار تتمة الرحلة لنعرف التفاصيل

آخـــرفـــرصـــة · 17-11-2015, 12:06 AM

جميل النورث كيب و فعلا لو وصلتوا قبل المنظر بيكون أجمل

1000 لابأس عليك شد عضلي و الثلج يخففه كثير

و ما قصروا جابوا لك كرسي يساعدك كثير

جزء أليم بس عدى على خير

هداوه · 17-11-2015, 01:19 PM

اقتباس : المشاركة الأصلية كتبت بواسطة emo0o

الف سلامة عليك هداوة

وان شاء الله تكونين خفيتي بعد الثلج

وبانتظار الاجزاء الجاية

الله يسلمك يارب
اليوم ان شاءالله ابشروا بجزء يديد ان شاءالله
فيه وايد احداث ومواقف

هداوه · 17-11-2015, 01:32 PM

اقتباس : المشاركة الأصلية كتبت بواسطة q8ya metnaqla

كاني موجوده بس بالويكند كان علي غياب
عليكم بالعافيييه
عجيبه هالرحلة الصور اتيين والطبيعه شحلوهااا
وسلاماااات ماتشوفين شر
هذا الم البطه اتوقع شد عضلي كان حايشج
وان شاءالله ما عكر باجي رحلتكم

ايه كنتي غايبه ولما تغيبين افتقدج
الله يعافيج يارب
المكان جدا جميل بس ماستانست فيه
اعتقد صار عندي تمزق
تابعيني وبتعرفين واليوم فيه يديد

اقتباس : المشاركة الأصلية كتبت بواسطة أبوفيصل

سلامات والله الموقف صعب بس ماشاء الله عليك مشيتي حتى وصلتي

الله يسلمك
شفت كيف انا مناضله
بس للاسف ماقدرت اوصل للنهايه كان الالم اقوى مني

اقتباس : المشاركة الأصلية كتبت بواسطة أبو طلال*

متابعين هالتقرير الرائع
والمشوق
واحسنو التصرف بكل صراحه
في الكرسي المتحرك
وهنا يعكس للجميع مدى حرصهم على خدمة مسافرينهم

اقتباس : المشاركة الأصلية كتبت بواسطة أبو طلال*

ننتظر بقيه المغامرات والرحله الرائعه

الله لايحرمني من متابعتكم الجميله
كان لابد منه بس انا مافكرت اسألهم هم اللي سألوني
فعلا كان اهتمامهم فيني كبير
ان شاءالله اليوم

اقتباس : المشاركة الأصلية كتبت بواسطة الايمان

ماتشوفين شر يا ام عيسى

اقتباس : المشاركة الأصلية كتبت بواسطة الايمان

اتوقع هذا شد عضلي لان احنا مانتحرك وبالسفر نمشي وايد فتشد العضله

جزء رائع والمناظر خيال

الشر يعداج حبيبتي

كان شد عضلي وعقب صار تمزق
انا سعيده انه عجبكم

q8ya metnaqla · 17-11-2015, 02:52 PM

ماتفقدين غالي حبيبتي [emoji173][emoji173]
سلامتج [emoji253]
ان شاءالله ناطره الجزء اليديد

Sent from my iPhone using Tapatalk

آخر مواضيع q8ya metnaqla

- مركاز العرب المسافرون 11
- إندونيسيا استفسارات
- شبه الجـــزيـــرة الايبيـــريـــة ( اسبـــــانيــــا ) 2023
- هنــــا شبــــه الجــــزيــرة الايبيــــريـــة ( البــــرتغـــــال ) 2023
- ريوقنا في the orangery

توقيع : q8ya metnaqla

كويتية متنقله في أعالي جبال الأنديز، قاطعه فيها الإكـــــوادور من الشمــال للجنـــوب

https://www.arabtrvl.com/vb/t49320.html

كنزٌ دفين اكتشافُ ارضٍ ضائعةٍ كنا نعرف بوجودها ولكن لم نستطع الوصول إليها(كولومبيــا)

https://www.arabtrvl.com/vb/t48941.html

مراسلتكم من الاتحاد السوفيتي سابقا (روسيــا 2019 )

https://www.arabtrvl.com/vb/t45053.html

في قصص الشعوب طرائف لاتنتهي وعالم حلو بهي يسكن في القلوب في قصص الشعوب (المكسيـــــك)

https://www.arabtrvl.com/vb/t41667.html

الى الزيتونة وعقبه بن نافع وابن خلدون بلد العلم والثقافة والتاريخ( تــونس الخضـــرا )

https://www.arabtrvl.com/vb/t39247.html

سـكــة سفــر فيهـا مشـاويـر العمــر ( امـريكــا ديسمبــر 2017 )

https://www.arabtrvl.com/vb/t31951.html

كل انسان يصبح شاعرا اذا لامس قلبه الحب : من بلاد الفلاسفه (اليونان)

https://www.arabtrvl.com/vb/t7554.html

اوروبا عشقي · 17-11-2015, 09:10 PM

شكرا

هداوه · 17-11-2015, 09:47 PM

اقتباس : المشاركة الأصلية كتبت بواسطة q8ya metnaqla

ماتفقدين غالي حبيبتي [emoji173][emoji173]
سلامتج [emoji253]
ان شاءالله ناطره الجزء اليديد

اقتباس : المشاركة الأصلية كتبت بواسطة q8ya metnaqla

Sent from my iPhone using Tapatalk

اللهم آمين

اقل من ساعه وانزله ان شاءالله

اقتباس : المشاركة الأصلية كتبت بواسطة FuNnY GIRL

بعد عمري ياهدهد سلامة رجولج كلش مب وقت الالم

مرات اتصير امور في السفر استغفرالله كلش مب وقتها

هيه والله مول مب وقتها

انا كل سفره لازم امرض تجيني انفلونزا قووووويه ولاابي اضيع اليوم في الفندق اتشوفيني اجبر عمري احاول اطلع اتمشى وابلع بنادول علشان الحراره لاياس مع الحياه خخخخخ

ههههههههههههههههه

فعلا لاياس مع الحياه

وهذا اللي سويته

بسم الله عليج بس الرجل شي صعب لان الواحد ماراح يقدر يمشي على فكره انا كل سفره بعد يجيني هالالم في البطه لان نمشي فجاه مساافات احنا مانمشيها في بلادنا وحتى في مفصل الورك الم يضايقني وزوجي مشاءالله عليه هو طياره يعصب علي يقولي امشي بسرعه احنا جاين علشان نمشي حده يستمتع بالمشي في اوروبا هو رياضي ماعنده مشاكل بس انا اللي اروح فيها لازم كريمات فولترين وبنادول علشان يخف لان من وين لين وين امشي

100 % كلامج صحيح وهذا اللي يصير ويانا

هالمسافات خصوصا اللي جايبه اعيال كل بيبي اعظامها تعورها اكثر وتتعب وزين سويتي انج حطيتي ثلج لانه يخفف واجد الاصابات شكل صادتج اصابه يوم صرختي سلامتج والله ،،، والله يخلي لج بناتج يارب فديت البنات محلاهم

فعلا صارلي تمزق في الاربطه أو العضله

اللهم أمين ويخليلج عيالج يارب

اقتباس : المشاركة الأصلية كتبت بواسطة FuNnY GIRL

ورحلة القباقب ماحبيتها حسيتها ممله شنو يجمعونا ويخلونا نمسك قباقب وعقب يقطعونها قدامنا وعقب يخلونا ناكلها زين واللي مايحب القباقب مثلي وكان في الرحله شنو يسوي

كانت نص ونص بس لو ماسرناها بنضييج أكثر

اما الرحله الثانيه شوي امتع فيها حركه ،،، تعرفين حسيت الكروز ممل شوي لان اكثر ايامنا اتكون في البحر ملل احس نسوي نفس الشي يوميا انا بررريه من قلب بنت الطبيعه والبراري ماحب البحر حسيت ملل اقوم من الصبح واتم لين العصر علشان نوصل مكان معين راح اليوم الانسان يكون نشيط في بداية النهار اكثر من بعد نص النهار لان يبتدي الخمول ،،، يمكن مع الاحداث الجايه تتغير نظرتي عن الكروز كل شي جايز مع هدهد الجميله

بصراحه أنا مول ماحسيت بالملل ولا الخمول بالعكس احس بالنشاط والحيويه

وبعدين فيها وايد انشطه عشان نتسلى فيها وبالنسبه لي يلستي بعض الاوقات مجابله البحر

وأنا أقرأ أو أكتب وأسمع شي أحبه

هاي من أمتع أوقاتي

بالاضافه انه نحن نوصل بعض الاوقات من رحلات طويله ونكون مرهقين ونحتاج لهالراحه والهدوء

متابعه معاج وكثير حابه اعرف الاحداث وتقرير خرااااااااااااااااااااااافي يستحق 1000000000000000000000 نجمه

فديتج كلج ذوق

ويكفيني حبكم ومشاركاتكم ويايي

هداوه · 17-11-2015, 10:48 PM

الجزء 6 واليوم السادس

اليوم بنزور مدينه أسمها

ترومسو Tromso

معلومات عنها

المعلومات جمعتها من أخونا elr7al من الانستا

تقع ترومسو في منتصف منطقة الشفق القطبي ( أضواء الشمال )

وأفضل وقت تشوفونه بوضوح بيكون في ( 12 و 1 ) ويستمر الى شهر ابريل

بالليل تتزين المدينه بالانوار ولاتجد بيت واحد يطفئ الكهرباء في بيته

تتوفر في المدينه محلات المسلمين واللي يبيعون لحوم مذبوحه ع الطريقه الاسلاميه

وفيها مسجد ومركز اسلامي

من الامور المهمه اللي لازم نعرفها انه

الشمس تختفي من 26 نوفمبر الى 15 يناير

وفي الصيف لاتغرب الشمس عنها أبدا من 18 مايو حتى 26 يوليو

وتسمى بظاهرة الشمس منتصف الليل

وتكثر في المدينه الكثير من الفعاليات ومن هاي الفعاليات :

* ركوب زلاجات كلاب الهاكسي وتسمى Lapland

* ركوب زلاجات حيوان الرنه وهو من فصيلة الغزلان

* مشاهدة الحيتان في المحيط أو البحر النرويجي

* ركوب الهليكوبتر ومشاهدة ترومسو من أعلى

* ركوب طائره صغيره تاخذ جوله في سماء المناطق المجاوره والجزر

* جوله في المحيط لصيد الاسماك

* جوله في البحيرات المتجمده وممكن عمل دائره في وسط البحيره وتنزل خيط فيها وتصيد سمك

* فيها متاحف وممكن زيارة الجامعه التي فيها صاله كبيره تستطيع من خلالها

انك تشوف الشفق بالضبط اذا ماشفت الشفق بعينك

* استئجار الدرجات الثلجيه في وديان منطقة Lapland

* ركوب التلفريك ومنه تشوف مدينة ترومسو

* ركوب الخيل

سلبيات ترومسو ..

* غلاء المطاعم فيها

* برد شديد لأنها في القطب الشمالي

بالنسبه للسكن فيها

المدينه فيها فنادق 5 نجوم وأكواخ جميله وراقيه وأسعارها تبدأ من 400 درهم الى 900 درهم باليوم

ممكن من هالموقع تشوفون أنواع الاكواخ ومعلومات عنها

Hjem - Tromsأ¸ Camping

بالنسبه للمواصلات فيها ..

الافضل انك تستأجر سياره فيها

ولو ما أستأجرت فعندهم مواصلات متوفره وممكن ياخذونك للانشطه اللي فيها

تفاصيل هاليوم

تذكرون أمس يوم رقدت وانا كنت أتألم من ريولي

اليوم صحيت متأخره خصوصا انه أمس راقدين متأخر ولكن ولله الحمد اشعر بتحسن كبير في ريولي

اعتقد كمادات الثلج لها تأثير كبير في علاج تمزق الاربطه او العضله اللي في ريولي

بالاضافه للمرهم والحبه الخاصه لآلام العضلات

أصبحت أفضل ولكن ظليت أعري وانا أمشي

وانا سايره المطعم الصبح شافني الموظف اللي ينظف الغرف في القسم الثاني

وهوهندي وسألني عن حالتي وليش أعري وخبرته اني أتألم منها

قاللي انا بيبلج فكس فركي ريولج منه

قلتله أوكي وشكرته

وفعلا عقب شاف بنتي وعطاها ياه وحطيت منه ورجعته له قبل بيوم من نهاية الرحله

وصلنا مدينة ترومسو الساعه 1 الظهر

للاسف اني مارتبت اي رحله مع القروب ولعدة أسباب

اولها اني شفت فيها وايد انشطه وفكرت اني بنقدر نسير بروحنا وبيكون أوفر علينا

ولكن كنت غلطانه

والسبب الثاني انه الرحلات المقترحه اغلبها ماعجبتنا واللي عجبتنا كانت فل

وماحاولت فيها

السفينه رست في منطقه بعيده عن سنتر المدينه بـ 4 كيلو ولكن الحلو فيهم ولأنهم جدا منظمين

كانوا موفرين شاتل يوصل للسنتر برسوم 16 يورو للشخص

وموفرين وايد باصات

واعتقد كل ربع ساعه يتحرك شاتل

ومحددين لنا انه آخر شاتل للعوده بيكون الساعه 7 ونص

ياويله اللي بيتأخر

آآآه ع جو هاليوم تعيييييس

شمس وحر

في الاحوال الجويه مكتوب انه مشمسه جزئيا

أي جزئيا الا شمس تسطع ع خمرت راسنا لين نضينا منها

استغفرالله مب نحاسه فينا

تصدقون هاي المنطقه صوب القطب الشمالي والحر مايعرفونه

والشمس اذا تطلع في اشهر معينه ومعروفه هالمنطقه بشدة البروده

بس عشان نحن ييناهم انقلبت الاحوال عندهم حر وشمس من صوب

وريولي متعطله من صوب ثاني

صدق الحاله تعيسه والياي أتعس

ركبنا الشاتل ونزلنا في السنتر وهالمكان اللي نزلنا فيه هو مكان مواقف الباصات ( الشاتل )

أول مانزلنا سرنا المكتب السياحي عشان نسأل عن الرحلات اللي نباها

في هالمبنى الابيض المكتب السياحي

وكان مزدحم

لما وصلنا الدور سألناهم عن رحلتين نبا نسيرلهم

الاولى رحلة لحيوان الرنه وهناك فيه خيم وممكن نيلس في الخيم ويقدمولنا وجبه من لحم الرنه

والرحله الثانيه

المزالج اللي تجرها الكلاب

واعتقد في الصيف حسب ماخبرتنا الموظفه مانقدر نركب هاي المزالج بس نسير ونشوفهم

وفي الشتاء بس نقدر نركبها

النحاسه انه هالرحلتين ممتوفرات وطلعوا بدري

وقالت ليش ماخذيتوها مع القروب من السفينه

وعقب دلتنا ع مكتب وقالت جربوا يمكن تلحقون عليهم قبل لايسيرون

ونركض لين المكتب الثاني وشفناه مسكر وشفنا باص واقف

ونركض عندهم وسألناهم عن الرحله اللي نباها

وقالوا نحن آخر باص يطلع وتاسفوا انه فل

ورجعنا المكتب السياحيوسألناهم اذا نبا نسير القمه بالكيبل كار

لانه ماعندنا اختيار ثاني

خبرونا انه نقدر نشتري تذكرة الباص حق يوم كامل ونتنقل فيها

قلنا بنشتري التذكره وبنسير القمه بالكيبل كار

وعقب بنتجول بالباص في المدينه وممكن نوقف في مكان ثاني ننزل فيه

هاي تذكرة الباص

كانت قيمة التذكره بـ 90 كرونا للشخص

ورقم الباص اللي بيودينا للكيبل كار كان رقم 26

سرنا وين مكان توقف الباص ومشينا لين السنتر وعرفنا الموقف

والجو خايس

وصل الباص وركبنا فيه وركبوا معانا ناس بيسيرون نفس المكان

وأعتقد انه فيه منهم من كروزنا

نزلنا الباص قريب من الكيبل الكار

هنيه صارلي موقف عنصري

ونحن في الباص كانت في وحده كارهتنا يمكن عشان نحن عرب ومسلمين

لما نزلنا من الباص نزلوا معانا معظم اللي في الباص ومن بينهم هاي البنت

وكنا نمشي مع الناس اللي نزلوا وسايرين صوب الكيبل

وأنا أمشي مع بناتي وماسكه فوني فجأه طاح عني في الارض

فقمت التقطته بسرعه وحطيته في شنطتي

جان اتيني البنت ومدت ايدها تبا الفون

في البدايه مافهمت شو تقول

واتحسب ترمس عشان فوني طاح

وعقب فهمت منها انها تقوللي انه هالفون مب فونج

فقلتها فوني

وقالت حق وحده تمشي قريب منا انه هذا فونج عندها

ردت هاذيج وهي مستغربه وقالت

هذا مب فوني

قفطت هاي الخايسه وراحت بدون حتى ماتعتذر وانا مثل الهبله مب فاهمه شو السالفه

وعقب فهمت انه في وحده مضيعه فونها وهاي الخايسه لما شافت فوني طاح

وانا شلته بسرعه فكرته انه فون الحرمه وأنا سارقتنه

عاد اللي قهرني مب عشان بس ظنت فيني سوء وهو مايخصها

انما ما اعتذرت ومشت ولا كأنه صار شي

صحيح هي انحرجت جدام الجميع بس كانت صدق حقيره

يمكن حد يسأل :

ليش ماسويتلها مشكله وسكت

باختصار الشي اللي أقدر أطنشه أطنشه مب كل موقف بوقف عنده وبتضارب

لا أنا في بلدي ولاعندي وقت أضيعه مع هالاشكال

بالاضافه انه نحن بروحنا صبايا وما ابا مشاكل مع حد

نرجع لتفاصيل هاليوم

وصلنا عند الكبل كار وكان الجو شمس وحر ويلوع بالجبد

والاخيس انه الطابور طويييل لين شباك التذاكر

فديتهم بناتي كانوا هم واقفين في الطابور وانا يلست ع الكرسي بسبب ريلي

والناس اصلا تشوفني أعري ( أعرج ) وانا أمشي

هذا من غير انه وحده من بناتي فيها احتقان وتعبانه شوي

تقريبا انتظرنا ساعه ونحن فطسانين من الحر ونبا نشرب ماي ومافي حد عدالنا يبيع ماي

وعقب وصل دورنا وحجزنا التذاكر وكان الشخص ب 150 كرونا

عقب ماحجزنا كنا واقفين في الطابور بعدنا مادخلنا داخل المدخل

فصار هنيه موقف جميل ومعاكس للأولي

ونحن واقفين كانوا جدامنا عائله وحده مع زوجها وعيالها

لما شافتني واقفه قالتلي

تعالي ادخلي داخل يعني خلتني اتجاوز الطابور

لما طليت من الباب لقيت مثل يلسه واستراحه قبل الدخول للكيبل

شكرتها ودخلت ويلست

مسكينه كسرت خاطرها اني واقفه وهم يشوفوني اسحب اريولي فجدمتني ودخلتني

وعقب بناتي دخلوا ويلسنا ننتظر موعد وصول الكيبل

ودورنا حد يبيع ماي أو مكينه اللي فيها بارد اوماي وللاسف ماحصلنا

لو ندري الوضع بيكون جيه كنا أشترينا قبل لانركب الباص

كنت كارهه نفسي وكارهه الرحله وودي كنت أرجع للسفينه

وصل الكيبل وركبنا الحمدالله بعد معاناه

وصلنا القمه وشفنا جدامنا كوفي ويلسات

من التعب اول شي يلسنا في الكوفي وساروا البنات يشترون ماي وغيره

الغريبه انه كانوا حاطين جيك في ماي وكاسات بلاستيك ويقدمون الماي مجانا

في وقتها استغربت ممتعوده من الاجانب ع المجان كل شي عندهم بفلوس

المهم بنتي صبتلي ماي وشربته وكان باااارد ولذيذ

أول مره أشرب ماي طعمه حلو جيه

تحسون انه ماتشبعون منه ممثل ماينا من كاس واحد انتفخ بطنا

شربت يمكن 3 كاسات وخلص الجيك وعقب سرت بروحي أكلم الحرمه عشان تصبلي ماي

وكانت الصدمه

فتحت الحنفيه وصبت ماي

وانا أقول في خاطري معقوله هذا ماي اللولب جيه لذيذ وحلو ويسرسح

مابتصدقون خليتها تترس الجيك مرتين وما أدري كم كاس شربت

يمكن 10 من عطشي ومن حلاته

وردت الروح فيني وقررنا نطلع من المبنى ونتفرج ع المدينه ترومسو من فوق

في ناس يالسه برع فرحانه بالشمس

أصلا محد يلس داخل غيرنا ههههههههههههههه

متشبعين من الشمس

في البدايه مشيت مع البنات وعقب هم اتجدموا عشان يصورون

ويتصورون وأنا تمشيت ع راحتي أصور

الصراحه المكان جميل لو الجو غير

مدينة ترومسو

فيه ناس تروح تمشي وما أدري شو في الجهه الثانيه

لا أنا قادره أسير ولا أقدر أخلي بناتي يروحون وأنا ما أعرف شو في هالمكان

حق كتاكيتكم

أنا كتاكيتي كبروا ربي يحفظهم

هذا هو المبنى اللي وقف فيه الكيبل وفيه الكوفي

وهاي الحافه وقفنا عندها وصورنا وتصورنا وفيه سياج للحمايه

شوفوا قمم الجبال لازال عليها بقايا ثلوج

عقب ماخلصنا نزلنا

وعقب رجعنا بالباص لين تجمع الباصات

عقب رجعنا السفينه بالشاتل في الوقت المحدد

سرنا غرفتنا وشفنا هالهديه الحلوه من الهندي اللي ينظف غرفتنا

ريحنا شويه وعقب سرنا حضرنا العرض في المسرح

طبعا عروضهم جميله وماتتفوت

عقب ماخلص العرض سرنا تعشينا

وفليل يلسنا في المطعم نلعب ورقه

وانتهى هاليوم اللي كان أحلى شي فيه هي يلستنا في السفينه

حسيت ردتلي روحي

تابعوني في اليوم 7

وأحداثه

مقدام, مجدي, الركيب و 2 آخرون معجبون بهذا.

مسافر زاده الخيال · 17-11-2015, 11:34 PM

مناظر رائعة شوقتينا ان نتذوق المياه العذبة مياه القطب الشمالي اعتقد حتى الهواء نظيف ومنعش فهذه المناطق طبيعتها بكر ونسب التلوث شبه معدومة ولكن اجمل مافي الرحلة هي لمة العائلة في نهاية يوم شاق ومتعب

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلة الأحلام المتوسطيه في الكروز EPIC	وجهات أوروبية	رحلات الجزر والكروز	157	05-08-2019 04:10 PM
رحلات الكروز cruise Tasik فى بحيرة بوتراجايا الرائعة	أبوعبدالله (الاسفار )	ماليزيا	16	07-12-2017 05:40 PM
رحلة فردية للأراضي الامريكية ...	Tamem	بوابة امريكا	108	20-11-2015 08:37 AM
اريد قائمة لاسماء شركات الكروز من تقوم برحلات على المضايق النرويجية وجزيرة ايسلندا	غرام الامل	بوابة اسكندنافيا	3	25-02-2015 03:00 PM