لندن والعمُر - إستفسارات .

Kladiio · 08-11-2015, 01:29 PM

-

ابو عبدالله · 09-11-2015, 01:05 AM

اقتباس : المشاركة الأصلية كتبت بواسطة Kladiio

السلام عليكم ورحمة الله - مساء النور .
أستفدت كثير من مشاركتكم ، الله يسعدكم

طبعاً قررت هالسنة أسافر وللإسف ما حصلنا رفيق للرحلة للآن
لكني صامل بإذن الله ب زيارة لندن لوحدي .

طبعاً أول سفرة ليا في آوربا
وحاب أستفيد منكم في شغلات كثيرة

* ميزانيتي تقريباً شاملة التذاكر والسكن ( 20 ألف )
< هل هي كافية ولا مبالغ فيها ولا قليلة !
الصرف ع حسب الشخص تقدر تقضي اليوم ب 20 باوند مصروف شخصي وانت طالع الى 1000 لو حبيت ... بس انت وش وضعك اقتصادي او موب اقتصادي لانه يترتب عليه كل شي من مصروف وسكن الخ ...
* أيام سفري بتكون من يوم 19 ديسمبر إلى 28 ديسمبر ( بينهم 8 أيام بتمشى فيها )
* أبي توزيع صحيح للميزانية
* جاوب ع اللي فوق انت اقتصادي او لا
* إختيار منطقة أو فندق جيد للسكن
* رايي يمكنه شاذ شوي عن الناس بس اللسكن باطراف لندن ينزل سعر السكن الى النص بالراحه وانت كذا او كذا لازم تبعد عن فندقك عشان تتمشى والمترو يقرب البعيد والدنيا امن وامان
* ودي أروح لمانشستر لزيارة نادي مانشستر ليوم واحد تقريباً يوم 26 ديسمبر < البوكسنق دي
< فماني عارف وش النظام والطريقة للذهاب + حجز تذاكر المباراة
وهل أسوي شيك آوت من فندقي أو لا !
* يوم روحه وورجعه + ملعب احس متعبه ... لو تجلس يوم هناك على الاقل وتمر سوقهم ( ترافورد ) والمشوار طبعا بالقطار .. وحجز التذاكر اذا مبارة شيك موقع الاستاد ..
* كم المصروف اليومي ، شامل الأكل والمواصلات و الأماكن السياحة
" مع العلم أكلي غالباً بيكون فاست فود "
* اذا ضبط البرنامج عرفنا كم تقريبا ..بس المواصلات يكلفك الاسبوع 31 باوند تقريبا ( تيوب+ باصات ) للزون 1+2 واذا بتطلع لزون مختلف استعمل الباص والاكل ممكن وجبة ب 2 باوند وممكن ب 50 باوند وماتبعك بعد ام 50
حصلت جداول كثير للسياحة ، لكن خايف أفوت أماكن جميلة لإن أيامي قليلة .
فيه مواضيع بالاماكن المشهوره مره وشف وفيه بعد انا حطيت موضوع عن مدام توسو و عين لندن وكامدن وفيه اماكن كثيره وحلوه واذا انت تحب المشي علمنا نسوي لك مسارات مشي حلوه مره تروح معها احيانا .. ولاتنسى الهايد بارك بيصير فيه مهرجان بوقت جيتك
* هناك هل تستخدمون فيزا مسبقة دفع ولا بطاقة الصراف العادية < صرافتي بنك ساب " البريطاني "
كلها تمشي
* متى أخرج من الفندق ومتى أرجع له < لإني ماني عارف الوضع في الليل والى الساعة كم بالضبط .
- الوضع امان بكل الاوقات بس النهار جميل وكل شي فاتح والليل حلو بس بعض الاماكن ماتصير مناسبة والليل يعني بعد الساعه 7 مساء لان يحسبون بالساعه هنا وتقفل المحلات من 7 بلندن تقريبا صيف او شتاء وبالصيف يكون نهار وبالشتاء يكون صلينا العشاء لنا ازود من ساعه
* ونصايحكم العامة ( أبيها سفرة العمُر ) - عشان بعدها برتب للزواج خلاص
يقولون ..ولكن سيد قومه المتغابي ... حلو احيانا تسوي نفسك مو فاهم شي وماعليك من الناس .. لان احيانا يحاول احد يجرك لحديث سياسي او ديني فخلك منهم ذولي وخلك مع هدفك الاساسي انك جاي تتمشى ولا تسمح لاحد يخرب جوك واستمتع بوقتك قد ماتقدر واستمتع بالمكان اللي يعجبك ولا يصير هدف عندك انك تزور اكبر قدر من الاماكن

وعليكم السلام ورحمة الله وبركاته
مشاركتي فوق ان اعجبتك فالحمد لله وان مااعجبتك فلا تزعل وهذا حد معرفتي ... والله يمهل لك وييسر امرك وامر زواجك

Kladiio · 09-11-2015, 11:59 AM

تسلم على ردك ، وشكراً ع صبرك .
أي أعتبُر إقتصادي وأحب المشي كمان .
فما فارق معي لو أمشي 15 كيلو بس جو حليو وناس تفتح النفس
ما برجع

وجهات أوروبية · 09-11-2015, 11:09 PM

اقتباس : المشاركة الأصلية كتبت بواسطة Kladiio

السلام عليكم ورحمة الله - مساء النور .
أستفدت كثير من مشاركتكم ، الله يسعدكم

طبعاً قررت هالسنة أسافر وللإسف ما حصلنا رفيق للرحلة للآن
لكني صامل بإذن الله ب زيارة لندن لوحدي .

وعليكم السلام ورحمه الله وبركاته
مساء النور والسرور

انا موجود انفع اكون رفيق للرحله سفره مجانيه صح ههههه

منور اخوي وراجع لك ان شاء الله

وماقصر مميزنا ابوعبدالله جزاه الله خير

ابو عبدالله · 11-11-2015, 11:17 PM

اقتباس : المشاركة الأصلية كتبت بواسطة Kladiio

تسلم على ردك ، وشكراً ع صبرك .
أي أعتبُر إقتصادي وأحب المشي كمان .
فما فارق معي لو أمشي 15 كيلو بس جو حليو وناس تفتح النفس
ما برجع

الله يسلمك ويعافيك
تمام عليك
بالنسبة للسكن انا ماسبق سكنت بلندن لان قريبة مني فما احتاج للمبيت فيها ... بس ممكن الشباب مايقصرون هنا واشوف لك مكان حلو ورخيص ..
باقي الشغلات بابدا معك من الاحد ان شاء الله لاني بكره مسافر عشان نمخمخ لك على مسارات وطبعا اكيد بإشراف ابو سعد وبقية الرائعين من المشرفين والخبراء ....

وازيدك من الشعر البيت ... الاسبوع الماضي نزل سنو بلندن يعني يمكن يطلع حظك حلو وتضبط معك

Kladiio · 12-11-2015, 08:59 AM

بانتظاركم بالتفصيل الممل
الله يسعدكم

MOHANAD · 13-11-2015, 05:04 AM

اقتباس : المشاركة الأصلية كتبت بواسطة Kladiio

السلام عليكم ورحمة الله - مساء النور .
أستفدت كثير من مشاركتكم ، الله يسعدكم

وعليكم السلام ورحمة الله وبركاته مساء / صباح الخير

طبعاً قررت هالسنة أسافر وللإسف ما حصلنا رفيق للرحلة للآن
لكني صامل بإذن الله ب زيارة لندن لوحدي .

طبعاً أول سفرة ليا في آوربا
وحاب أستفيد منكم في شغلات كثيرة

مابقولك خذني معك توني راجع + ميزانيتك ما تسمح لشخصين الا اذا بنحطم الرقم القياسي فالاقتصاد
تذكرني بأول سفريه لي ما فيه خوي و اول مره فحياتي اسافر
وتوكلت على الله ورحت لحالي والى يومك هذا وانا لحالي رايح جاي على بريطانيا والوضع ولا احلى ، وخليك على صملتك لا يردك شي

واذا فاضي تفضل

http://www.arabtrvl.com/vb/t10291.html

* ميزانيتي تقريباً شاملة التذاكر والسكن ( 20 ألف )
< هل هي كافية ولا مبالغ فيها ولا قليلة !

* أيام سفري بتكون من يوم 19 ديسمبر إلى 28 ديسمبر ( بينهم 8 أيام بتمشى فيها )
* أبي توزيع صحيح للميزانية

ميزانيتك ولوحدك وعلى ١٠ ايام حلوه بما انك اقتصادي وتحب المشي
بالنسبه لي بتكفيني وزياده زي وضعك بالضبط
اتوقع ارخص طيران على البريطانيه رايح جاي ب ٢٥٠٠ ريال سعودي
يبقى معك ١٧٥٠٠ وزعها علي سكن ومواصالات واكل وتذاكر لبعض الاماكن السياحيه الي تحتاج تذاكر ،
وفيه سكن الغالي وفيه الرخيص لو تدخل بوكنج وتمخمخ نص ساعه بتطلع الفندق الي تبيه وعلى الميزانيه الي تبغاها
واذا بتستخدم مواصالات الاندرقراوند او الباصات تاخذلك بطاقة اويستر ب ٢٥ باوند لمدة اسبوع
لزون ١ و ٢ بما ان اغلب الاماكن السياحيه فيه

* إختيار منطقة أو فندق جيد للسكن

عندك المنطقة الي قرب الهايدبارك مليانه فنادق الرخيص والوسط والغالي
بادنغتون - كوينزوي - بايزووتر وكل منطقة فيه اندرجراوند وعندك محطة كبيره الي هي البادنغتون
وعندك نايتسبريدج - ويستمنستر

* ودي أروح لمانشستر لزيارة نادي مانشستر ليوم واحد تقريباً يوم 26 ديسمبر < البوكسنق دي
< فماني عارف وش النظام والطريقة للذهاب + حجز تذاكر المباراة
وهل أسوي شيك آوت من فندقي أو لا !

اذا بتاخذ القطار بدري الصبح يمديك تروح المسافه تقريبا ساعتين ونصف من لندن الى مانشستر
تروح تاخذ جوله فالملعب وتمر المتجر وترجع بنفس اليوم
وما ادري هل تقصد بتحضر مباراه ؟ يعني فيه مباراه بنفس اليوم ؟
اذا فيه مباراه ووقتها متاخر بتكون السالفه متعبه شوي عليك
ولو تتحمل عادي اطلع الصبح خذلك جوله فالملعب واحضر المباراه
وارجع ارتاح وما يحتاج تسوي تشك اوت من الفندق اذا ناوي روحه على السريع لمانشستر
واذا فيه مباراه احجز تذكره لك من الحين اذا متاح عن طريق الانترنت وريح راسك لان بعض المبارايات تكون التذاكر مباعه وما تلقاها الا فالسوق السوداء وغاليه جداً

* كم المصروف اليومي ، شامل الأكل والمواصلات و الأماكن السياحة
" مع العلم أكلي غالباً بيكون فاست فود "
حصلت جداول كثير للسياحة ، لكن خايف أفوت أماكن جميلة لإن أيامي قليلة .

تعتمد عليك بالنسبه لي ما تكلف وما اعرف اجاوب على هذا السؤال حتى لنفسي

و بتكفي الايام وزياده
شوف الآماكن الي قريبه من بعض وخليها فيوم وهكذا
ويمديك تغطي جميع الاماكن السياحيه المهمه في لندن اذا نظمت جدول للاماكن القريبه من بعض بترتاح وتنبسط

* هناك هل تستخدمون فيزا مسبقة دفع ولا بطاقة الصراف العادية < صرافتي بنك ساب " البريطاني "

بتكون الشغله مكلفه لو عن طريق بطاقة الصراف لان بتمر فتحويل من عمله لعمله من غير عمولة الدفع - واستفسر من البنك عن الشي هذا ،

عن نفسي بطاقة مسبقة الدفع وتريح راسك تحط كل يوم مبلغ معين فيها عن طريق التحويل او مبلغ معين مره وحده

* متى أخرج من الفندق ومتى أرجع له < لإني ماني عارف الوضع في الليل والى الساعة كم بالضبط .

الفنادق عادي ما عندها مشكله اطلع من الفجر ولا ترجع الا الفجر فيه بعض الفنادق يكون الباب الخارجي مقفل كسيفتي وتفتحه عن طريق كود يعطونك او ببطاقة غرفتك او عن طريق زر تضغطه يردون عليك تقول غرفتي الرقم الفلاني ويفتحون الباب تعتمد من فندق لفندق
وبشكل عام اطلع الصبح الساعه ٨ ومعك لين الساعه ١٠ وبعدها خلاص تهدا الشوارع وتقفل اغلب المحلات من بدري

* ونصايحكم العامة ( أبيها سفرة العمُر ) - عشان بعدها برتب للزواج خلاص

نصيحه وحيده استمتع قدر المستطاع
( اطلع استكشف غامر عيش لحظتك
لا تخلي الفندق الا للنوم والشور وبس )

ما قصر ابوعبدالله ولا يهون مشرفنا qa6ar911
واتمنى اني افدتك لو بالقليل ، رحلة سعيده

وجهات أوروبية · 13-11-2015, 11:16 PM

مرحبا اخوي ماقصرو الاخوان ابوعبدالله ومهند جزاهم الله خير

بالنسبه لمانشستر تقدر تروح وترجع بنفس اليوم
طبعا روحتك ورجعتك حسب وقت المباراه ياريت تعطينا وقتها عشان نعرف يمديك ترجع بنفس اليوم او تاخذ لك ليله هناك وترجع يوم ثاني

بالنسبه للمصرف لازم بقدر المستطاع توفر بالتذكره والفنادق
انا شفت مجموعه فنادق اختار واحد منها :

1- فندق ستراند
موقعه حلوه قبل كم شهر كنت اتمشى صوبه منطقه حيه وفيها حركه
بس مش قريبه من اكسفورد وشارع العرب
لكن الفندق قريب من اهم اماكن لندن وتقدر تروح لها مشي
خلف الفندق كوفنت غاردن
على نفس الشارع ساحه الطرف الاغر
واما الطرف الاغر تقدر تروح لساعه بغ بن
والجهه اليمنى تقدر تروح لقصر باكنغهام
وسعره مناسب نوعا ما
يعيبه فقط حجم الغرف صغيره

Booking.com: ظپظ†ط¯ظ‚ ط³طھط±ط§ظ†ط¯ ط¨ط§ظ„ط§ط³ - ظ„ظ†ط¯ظ†, ط§ظ„ظ…ظ…ظ„ظƒط© ط§ظ„ظ…طھط*ط¯ط©

2- نورفولك تاورز بادينغتون
هالفندق قريب من محطه بانديغتون للقطارات
ومشي تقريبا خمس دقايق الى اجور رود
ويوجد مغسله ملابس قريب من الفندق وبعض المحلات

Booking.com: ظپظ†ط§ط¯ظ‚ ظ†ظˆط±ظپظˆظ„ظƒ طھط§ظˆط±ط² ط¨ط§ط¯ظٹظ†ط؛طھظˆظ† - ظ„ظ†ط¯ظ†, ط§ظ„ظ…ظ…ظ„ظƒط© ط§ظ„ظ…طھط*ط¯ط©

والافضل اخوي تاخذ لك بطاقه الاويستر وقت الوصول للمترو والباص راح تحتاجها
سعرها لمده اسبوع تقريبا 37 باوند
وفي ها الاسبوع تركب الباصات والمترو بأي وقت

خلص حجوزاتك والجدول لاتحاتيه راح تزور كل الاماكن الي في بالك راح نرتبه لك ان شاء الله تطمن

بالتوفيق ان شاء الله

Kladiio · 15-11-2015, 06:40 PM

أهلين باللندنيين .
الصراحة ، ما كنت متوقع هالتفاعل والجدية - ممنون لكم والله .

الحين على وشك أحجز التذاكر ان شاء الله هالاسبوعين - الفيزا صارلها ١٠ أيام
أتوقع تطلع ان شاء الله هالأسبوع أو بالكثير الأحد القادم ـ ٢١ نوفمبر .

وعسى تطلع بالقبول بعد احداث باريس

المهم الصراحة لعب في راسي واحد من الشباب .
رحلتي كانت من يوم ١٩ ديسمبر إلى ٢٨ ديسمبر
ف كان يقولي حرام تضيع لندن في بداية السنة - بيكون يوم ما ينسٌى
لإن يوم ٢٥ ديسمبر بتجلس في البيت - الدنيا كلها مقفلة .

ف ترددت والله - طبعاً أنا برصيد اجازاتي ١٢ يوم من غير خميس وجمعة .
ف أقدر أجلس تقريباً ليوم ٢ يناير .

لكن خوفي فقط من الميزانية - تنتهي وأتوهق
فقلت بفصلها قدامكم والباقي عليكم يالخبرة

زي ما قلت لكم ( ٢٠ ) ألف ، لكن تفصيلها كذا .
- ٢٠٠٠ " شراء ملابس شتوية قبل السفر " .
- ٦٠٠٠ " الفندق " . ( ٧٢٠٠ إذا جلست لـ بداية السنة )
- ٣٠٠٠ " التذاكر " .
- ١٠٠٠ " حضور مباراة ارسنال - السيتي " < وماني عارف للحين كيف أحجزها .
- ٨٠٠٠ " الباقي " ( ٦٨٠٠ ) " خصمت زيادة الفندق " < لو بجلس لـ نهاية السنة .

طبعاً مدري وش بيكون جدولي في يومين السفر - اللي هي ١٩ ديسمبر واليوم الأخير .
مشكلتي هي في المصروف اليومي ، اذا على التنقل - بسيطة كرت ايسترو
لكن يجي في بالي الأماكن السياحية + أكلي . < مع انه وجبات سريعة .

ف هو السبب اللي بيخليني أمدد أو لا .
١٩ ديسمبر : السفر من المملكة لـ لندن
٢٠ ديسمبر : الأحد
٢١ ديسمبر : مباراة ارسنال - السيتي " لندن ".
٢٢ ديسمبر :
٢٣ ديسمبر :
٢٤ ديسمبر :
٢٥ ديسمبر : يقُال أن هاليوم تقضيه في البيت - لـ إغلاق كل شيء .
٢٦ ديسمبر :
٢٧ ديسمبر : الأحد
٢٨ ديسمبر :
٢٩ ديسمبر : المفترح الأول لـ يوم العودة .
٣٠ ديسمبر :
٣١ ديسمبر :
١ يناير : " المفترح الثاني لـ يوم العودة .

* يمكن أدبر ٢٠٠٠ ، في حال نصايحكم .
* أحس الأيام ماهي كافية لـ زيارة كل الأماكن .
* مانيب عارف متى الوقت المناسب أزور مانشستر - والأندية فيهم .
* ودي أعرف المصروف اليومي ، لو عرفته بتزبط معي ويصير ما أتجاوزه في اليوم .
* خليت حجز الفندق - يبدأ من ٢٠ < قلت يمكن وقتها أكون في الطيارة لسا < والخروج يوم ٣١ ديسمبر .
" يعني يمكن يبغالي أدور تذاكر طيران في وقت الدخول والخروج هذي .

- بعد ما نتنهي من تنظيف الأوراق الأخيرة - ببدأ أرسم الجدول / وأحدد الأماكن اللي بزورها < طبعاً سوى

MOHANAD · 17-11-2015, 12:11 AM

هلا فيك شوف بسولف معك شويتين وبطول شويتين وكأننا جالسين مع بعض مو فمنتدى
و افا عليك الاعضاد هنا كلهم فيهم الخير والبركه ونحب نعين ونعاون

شف بغض النظر عن الحسبه والتكاليف احسك ضايع ومثل وضعي تماما يوم رحت اول مره الى لندن ،،،

والفيزا بالعاده في غير الموسم تاخذ ٣ ايام وان شاء الله تساهيل وتطلع الفيزا
انا نهاية الاسبوع هذا يكون وضعي مثلك بقدم على خمس سنوات فيزا و تساهيل بإذن الله ،،،

شوف كنت بقولك من اول بس قلت خليك على تخطيطك ولا الخبطك ، لو تبي وقت حلو خلي الرجعه ٢ جانيوري اذا امكن ، منها تدخل فالثقيل اجواء الكريسمس واحتفالات السنه الجديده ما تفوت شي ،

وحط فبالك قبل تغير التواريخ ان راس السنه يوم ٣١ ديسمبر اغلب الفنادق يصير اسعارها دبل يعني الغرفه المفرده الي قيمتها ٣٠٠ ريال او اقل يوم ٣١ تحصلها ٩٠٠ ريال وانت طالع ، فحاول تقارن الاسعار وتشوف الزين ،اذا الرخيص صار غالي انا اقول روح ففندق مرتب احسلك لان بعض الفنادق الحلوه ما يدبلون السعر لانو من الاساس مدبل وتقدر تشوف هذي الفندق سكنت فيه راس السنه الي راح وقريب من الاحتفالات الي بتكون كلها عند البق بن ولندن آي

http://www.arabtrvl.com/vb/t3022.html

وبخصوص ميزانيتك نصيحه اخويه مدامك طالع لحالك خليك اقتصادي يعني شوفلك ملابس بسعر معقول ولا تكثر ملابس لانك عزابي وفلندن محد يطالع فالثاني من الزحمه كل واحد بيخلص شغله ويمشي ،،
يعني نقول ٢ جينز و٤ تيشيرت و ٢ بلوفر وجكيت واذا تحب القفازات خذلك صدقني بتدعيلي راح تفقد الاحساس بيدك الجو جدا بارد ،،،

وانت احسب حق السكن والطيران الباقي انت تتحكم فيه اذا وصلت هناك وصدقني بتكفيك فلوسك انا اكلمك من عزابي لعزابي

علشان اشجعك توني راجع من بريطانيا جلست تقريبا ١٠ ايام ورجعت وحسبت صرفيتي من تذاكر قطارات وطيران وسكن واكل وشرب وتمشيه
طلعت بحدود ١٠ الاف واقل بكثير بما اني ما اكلت كثير بس قلت ارفع المبلغ لل ١٠ الاف لان ما حسبت حق الاكل والشرب مو فاضي احسبها الصدق اهم شي الوناسه
فتعتمد عليك انت الي تقدر تخلي فلوسك تكفيك وتقدر تخليها ما تكفي

وبخصوص يوم ٢٥ ديسمبر اغلب الاماكن السياحيه الي تدخلها و تدفع فيها تذكره زي لندن آي بتكون مقفله
من غير بعض المحلات بتكون مقفله وبعضها يكون فاتح ،بعض المحلات يكون مقفل من ٢٤ ديسمبر الى ٢٦ ديسمبر
لان اليوم الي بعد الكريسمس بيكون يوم البوكسنق دي فالبنوك وبعض المحلات يكون مقفل
لكن الحياة مستمره وكل الناس فالشوارع وبتحس ما فيه شي مقفل ولا تجلس بالعكس اطلع وانبسط تمشى روح حدائق ولا لفلف حوالين نهر التايمز اهم شي لا تجلس وتخلي اليوم يمر ضايع

مع العلم ان المواصالات بتكون محدوده وتقفل وسائل النقل العام مثل القطارات والباصات بدري خلال الكريسمس علشان اغلب الناس بيروحون يحتفلون فالمساء فـ إذا بترجع متاخر حط فبالك ان الرجعه كعابي

و من خلال الرابط الي تحت تقدر تشوف كل شي يصير وكيف بيكون الوضع في لندن يوم الكريسمس والنيو يير وكل المعلومات المهمه من حيث الاسواق والمواصلات

Christmas in London 2015: Essential Information - Things To Do - visitlondon.com

وبخصوص المباراه
ماعندي خلفية فالكوره ولا احبها بس الي اعرفه اكيد بتلقاء فموقع النادي شي عن التذاكر وكيف تشتريها وكيف تاخذ تذاكر اون لاين لو متوفره،،
و لا تروح وتضرب مشوار وتكون التذاكر مخلصه
او شوف منتدى النادي اذا فيه اي اخبار عن التذاكر

والتخطيط يالغالي يعتمد عليك، انت فضي نفسك شويتين واكتب الاماكن الي تبي تروح لها وتشوف انها تجلب انتباهك ،
وبعدها شوف قربها من بعض الي قريبه من بعض خليها فيوم واحد زيارتها وبتغطي اغلب الاماكن فوقت قياسي
وشوف المواضيع المثبته فيه مخططات وصور للاماكن القريبه من بعض استعين فيها وبتساعدك
وهنا موضوع بيفيدك
http://www.arabtrvl.com/vb/t1726.html

او شوف موضوعي ومخططي الملخبط
http://www.arabtrvl.com/vb/t10291.html

وحجز الفندق يعتمد على متى الوصول الى لندن
حط فبالك اغلب الفنادق فبريطانيا

تسجيل الدخول الساعه ٢ الظهر وتسجيل الخروج الساعه ١١ الصبح

وبخصوص يوم الوصول والعوده بعض الناس يفضل الجلوس والنوم والراحه من السفر وبعض الناس تفضل استكشاف المنطقه المحيطه بالفندق وبعض الناس زيي ما احب اجلس احب اطلع اوتمشى ولا كأني واصل من سفر حامي حامي

ويوم العوده يفضل خلاص ترتب الشناط وتخليه يوم استعداد للنفسيه للعوده لارض الوطن

وتاخذلك تمشيه خفيفه اذا معك وقت وتخلي فبالك انك تروح المطار بدري قبل الرحله ب ٣ او اربع ساعات ما تدري وش يصير

اتمنى لك التوفيق ولا تتردد

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
إستفسارات عن المانيا	kanari212	بوابة المانيا	6	05-03-2025 07:52 PM
استفسار بسيط بخصوص المصروف اليومي في لندن .. الى خبراء لندن !!	omar1987	اوروبا	7	05-10-2015 09:28 PM
بـلاد الـسـاموراي ( الــيــابــان ) - إستفسارات مهمة	خالد النصراوي	بوابة اليابان	3	21-09-2015 10:24 AM
(( إستفسارات عن ماليزيا صفحه خاصه للنساء ...))	AMOSHA_6	ماليزيا	13	12-08-2015 04:42 PM
إستفسارات شنغن أسبانيا للخبراء مهم الأجابة بأسرع وقت مشكورين	تــمــيــمــ	فيزا	7	15-07-2015 10:31 PM