المواصلاتـــــ
---------
بعد ما خلصنا من حجوزات الطيران والفنادق تبقى لنا الجزء الأخير من الحجوزات وهو المواصلات البرية:
استئجار السيارة في لنكاوي, والباصات في بينانغ وكاميرون, ومشوار الأوتلت من كوالا إلى جوهر والعودة.
إستئـجـــار السيـــارة
# كما تعرفون القيادة في ماليزيا هي من اليمين, وبودي أن أتحدث قليلا عن تجربتي الأولى بالقيادة من اليمين في جنوب افريقيا قبل 3 سنوات. أذكر إني كنت متردد فيها قبل السفر إلى هناك وهل الموضوع يسوى ولا مايسوى والأمر يتعلق بقيادة سيارة ماهو لعب ولكن تشجيع الأعضاء جزاهم الله خير في قسم جنوب افريقيا من اللي خاضو التجربة, وأحد أصدقائي اللي جرب الأمر, وكذلك زميل عمل نيوزلندي صار له فترة طويلة في السعودية ومتمرس في القيادة بين اليمين واليسار, كان متعود على القيادة من اليمين في بلاده, وفي السعودية من اليسار, ويرجع بلده أو بريطانيا في الإجازات يقلب يمين, وزار جنوب افريقيا عدة مرات وقال بتلاحظ إن الموضوع ماراح ياخذ معك أقل من نص ساعه حتى تتعود, مجرد في البداية اتبع السيارات اللي أمامك وبعدين تسير الأمور بشكل طبيعي.
توكلت على الله ورحت كيب تاون في جنوب افريقيا وهي مدينة زحمتها متوسطة وقعدت الأيام الأولى اركب التكاسي والباصات واراقب الوضع, وبعدها استأجرت سيارة وعلى ماقال الرجال نص ساعه أو أقل وبدأت الأمور طبيعية, تجولت في البلد ورحت إلى جوهانسبرغ الأكثر زحمه واللهم لك الحمد الامور زي العسل. اتبع من أمامك في البداية وما يحتاج تتهور انت جاي اجازة ولا وراك شي مستعجل عليه "وفي التأني السلامه".
وحتى اختصر الكلام لمن يبالغ في القلق: من يعرف قيادة السيارة يستطيع قيادتها سواء من اليمين أو من اليسار.
# طبعا قبل أن أجزم بالقيادة هناك "وماخاب من استشار", بحثت وقريت لأكثر من عضو في القسم عن تجاربهم في لنكاوي والحمدلله الكل كان يشجع. # بالنسبة لي كانت ثاني تجربة, بالنسبة لأخوي كانت أول تجربه وكان معه سيارة مستقلة طول فترة بقائنا هناك, سألته كيف تقيم التجربة, قال اول عشر دقايق والحمدلله الامور تمام. # الأمر يستحق التجربة خصوصا لمن زار لنكاوي سابقا وبالتالي يعرف الجزيرة وبساطتها وحتى من يزورها أول مرة كما هو الحال مع اخوي اذا بتتعامل مع الأمر كتجربة سفر ممتعه, و Google Maps شغال زي الحلاوة حتى القارمن ما أخذته معا, نزلت الخريطة في قوقل ماب offline map لكن ما احتجتها في القيادة لأن البيانات كانت شغالة معاي على طول, وبعد يومين أو ثلاثة كنت قليل اطالع فيه لأن لنكاوي تدل فيها بسهولة. # الشوارع الواصلة بين اجزاء لنكاوي والمزارات السياحية كلها خطوط مزدوجة (رايح جاي), والدبابات فيها اكثر من السيارات, ولابد تشوف لك دبابين ولا ثلاثة يصدمون في السيارات لأنهم دايم طايرين ولايحاسبون للسيارات لما تهدي .. يتهاوشون ابودقيقة دقيقتين وكل واحد يكمل طريقه. # بالنسبة للحجز, اول ما حجزت الفيلا تواصلت مع راعيتها وسألتها عن حجز السيارة قالت لاتشيل هم, مايحتاج تحجز من النت تعال المطار وتلقى على كيفك. وقرأت نفس الكلام في تجارب الأعضاء. # السيارات في لنكاوي رخيصه بسبب عدم وجود الضرائب. السيارات الصغيرة والمتوسطه موجودة اشكال وألوان . حاولت اكرر الأمر في كوالا كنت افكر استأجر سيارة بنفسي واطلع لجوهر اوتلت لكن لقيت الأسعار أغلى بكثير بالإضافة إلى رسوم الطريق والموضوع يتطلب ترتيب وحجز مسبق ونا كنت أحاول احجز قبلها بيومين فقط لذلك الغيت الفكرة. # الوقود بسعر 1.7 رنقت تقريبا للتر.
# عند وصولي لمطار لنكاوي الصغير كان مافي غير رحلتنا واول ما تدخل الصالة الوحيدة لقينا اكشاك التأجير يمكن فوق 20 واحد والكل ينادي الزين عندي ياولد. الاكشاك كانوا يعرضون التأجير بخصومات تصل إلى 50% وعلى كلامهم انه مايعتبر موسم ضغط low season وسألت أحد السائقين في كوالا لاحقا قال ماراح تلقى هذي الاسعار وقت إجازات المدارس الماليزية (نوفمبر وديسمبر).
# لست بحاجة إلى رخصة دولية, الرخصة السعودية كانت كافية حيث يوجد عليها الإسم بالانقليزي.
# اتجهت لأحدهم وقلت ابغى سيارة صغيرة وسيارة وسط لـ 6 اشخاص لمدة 6 أيام, قال كله موجود, عرض علي سيارة صغيرة قال هذي بـ 500 رنقت لـ 6 ايام قلت هذي كبيرة, ابغى اصغر, ووراني وحدة قال هذي بـ 430 واتفقنا على 400 (اليوم بحدود 66 رنقت). من الممكن تتجه للمحلات الأخرى عشان تقارن بين الأسعار وربما تحصل على أسعار أفضل لكن شخصيا شفت السعر مناسب وتوكلت على الله. طلب 100 رنقت تأمين وسلمني إيصال عليه. ومع العقد يسلمك كرت الإتصال فيهم وهذا ضروري تحتفظ فيه.
# طلبت كرسي طفل وتوهق قال خليني اشوف اذا المحلات الثانية عندها, ولقى عند احد المحلات ويحسبون اليوم بـ 10 رنقت (6 أيام = 60 رنقت) ولما جيت استلم السيارة أمام البوابة انتظرت اكثر من 5 دقايق عشان الكرسي واخرتها جابو لي كرسي مغبر وحالته حالة ولايناسب عمر 8 شهور, سألتهم عندكم غيره؟ قال لا ,قلت خلاص ابكنسله ولا كان ودي لكن ما باليد حيلة, واتصلت على اللي أجرني في المكتب قلت كنسل الكرسي قال اوكي بيجيك واحد يعطيك الـ 60 رنقت, انتظرت دقايق وجا صاحبنا رجع لي الفلوس.
# السيارة تستلمها جاهزة أمام البوابة اخذت لفه حولها وشيكت القزاز اذا فيه أي كسر وكانت جديدة وامورها تمام لكن ما يمنع لو استلمتها تصورها من جميع الجهات احتياطا إذا فيها أي آثار تصادم أو احتكاك.
# وقت الحجز طلبت منه كذلك تأمين سيارة أخرى تشيل 6 أشخاص مع حقائبهم بالراحة وتكون جاهزة في وقت وصول رحلة بقية العائلة بعد 3 ساعات , وراني سيارة في الكتالوج واتفقنا على 500 رنقت لـ 6 أيام لكن قال كلمني قبل وصولهم بساعه عشان اتأكد انها موجودة ماحد استأجرها أو اجيبها لك من الشركات الثانية, نسيت اكلمه لأني رحت استلمت الفيلا وطلعنا نقضى أغراض البيت واستكشاف المحلات اللي في المنطقة ومر الوقت إلا اخوي يتصل قال حنا وصلنا قلت اجل روح لثاني محل في الاكشاك حقت التأجير اسمه عزمي .. راح ومالقى السيارة لكن زي ماذكرت الأكشاك على قفى من يشيل لقى عند محل ثاني بنفس السعر.
# مرور لنكاوي ينطبق عليهم المثل حاميها حراميها. لذلك عند استلامك للعقد هناك كرت للتواصل مع الشركة يدبسونه في العقد, احتفظ به لأنك قد تحتاجه إذا تم إيقافك من المرور في نقاط تفتيش عشوائية حيث يحاولون اختراع مخالفة لم تقم بها من أجل المال لإخلاء سبيلك. لاتنزل من السيارة, لا ترتبك, فقط تواصل مع الشركة وهم يجون يخلصون امورهم بينهم. سأروي تفاصيل الموقف اللي حصل لي في جزء لنكاوي انشالله.
# تسليم السيارة قبل رحلة المغادرة كان سريع رغم اني كنت مضيع عقدالإيجار (قبل ما اطلع من البيت شلت كل الاوراق و الاغراض اللي في السيارة وشكله راح مع الاوراق وسط الشنط), لكن عندي رقم الموظف اللي أجرني واتصلت فيه وارسلي واحد أمام بوابة المغادرة وشيك على السيارة قال تأكد من الورقة قلت للأسف ضيعتها, اتصل على مكتبهم وقال خلاص اوكي ورجعلي التأمين 100 رنقت.
التعديل الأخير تم بواسطة Fahd ; 21-09-2016 الساعة 03:52 PM 
1114الاعجاب
22-09-2016, 10:50 AM
العرض المتطور
المواضيع المتشابهه 
