رحتلي الى نيوزلاند اغسطس 2016 New Zealand

ali pontiac · 16-09-2016, 05:03 PM

هذي التقرير تكملة لرحلتي الإستراليه
v
v
v

http://www.arabtrvl.com/vb/t21696.html

توجهنا الى مطار سيدني وكانت رحلتنا على طيران الإمارات الى اوكلاند وكانت الطائره ايرباص A380 شبه خاليه، بصراحه هندستها خيال الطائره هادئه جدا مقارنة بالوحش البوينق 777

وصلنا مطار اوكلاند، نيوزلاندا عندهم نظام مشدد وفي اشياء ممنوع تدخلها مثل بعض الأطعمه و الفواكه واشياء اخرى، موظفين الجوازات طلبو تفصيل كامل للرحله ، واهم شي عندهم حجز السكن و تذكرة الخروج، ولكن كانت اسألتهم كثيره مثلا عن مكان العمل و الراتب واشياء اخرى وبعد 40 دقيقه من الأسأله والإنتظار عطونا الأذن بالدخول

توجهنا لمحل شركة اتصالات Spark الشركه الأولي للإتصالات في نيوزلاند، سعر الشريحه 50 دولار نيوزلندي

واستلمت السياره الأجار من مكتب Thrifty

الخطة في نيوزلاند يومين في اوكلاند
يومين في روتوروا لزيارة المدن الأخرى القريبه
واخر يوم الرجوع لإوكلاند

AUCKLAND

يوم الوصول - اليوم الأول

وصلنه الفندق واهوه Ascotia of Queen الفندق جدا جدا متواضع وصغير سعر الليله 26 دينار بحريني

هذي الغرفه فقط مجرد سرير، جدا جدا صغيره ولكن تفي بالغرض للفتره القصيره وكانت نظيفه

الإطلاله من النافذه

مواقف السيارات عليها رسوم بمبلغ 25 دولار لليله

اثناء الـ Check in الموظفه الصينيه قالت لنا انه موقع Booking ماخصم منكم وعليكم دفع ليله واحده !! قلت لها انه حاجز من Agoda ودفعت المبلغ كامل ، وعندي حجزين حجز لتاريخ 17 و 18 وحجز تاريخ21

نفس الليله راسلت بوكنق و اقودا واتضح فعلا ما انخصم مبلغ تاريخ 18 !! ماعرف ليش صارت هذي اللخبطه وليش اقودا خلو بوكنتق يسوون الحجز عنهم !!!

طلعنه نمشي

اعتقد انه مجمع وفيه سينما

هذي الأثنين ماعرف بأي لغه كانو يطبلون ويغنون

لفتت انتباهي اللوحه الخضراء جنب اسم هذي الفندق مكتوب عليها new zealnd owned & operated

هذي فندقنا

مطاعم مقابلين الفندق

اخذنا بيتزا بالقطع من مطعم Sal's السعر 29دولار

برج اوكلاند

مبنى الـ Ferry وتحته مقاهي ومطاعم

هذي نهابة اليوم الأول، بصراحه بعد ملبورن و سيدني مستواهم عندي افضل واحلى بكثير من اوكلاند، هل بتغير الشعور ؟؟ خلوكم متابعين

يتبع

،،،

آخـــرفـــرصـــة, درجه سياحيه, فارس من خيال و 9 آخرون معجبون بهذا.

نبضة ملائكية · 16-09-2016, 09:50 PM

متابعة بحماس
خصوصا أني ما قدرت أزور لا ملبورن و لا نيوزيلندا
نبي نعرف رايك هل تستحق الزيارة!

آخـــرفـــرصـــة, درجه سياحيه, فارس من خيال و 4 آخرون معجبون بهذا.

آخـــرفـــرصـــة · 16-09-2016, 10:11 PM

بداية حلوة يا علي

نيوزلندا تختلف تماماً عن استراليا
الحياة فيها أهدأ و الناس أقل
بس جميلة من روتروا و أنت طالع
خاصة قيادة السيارة فيها

متابعين معاك

درجه سياحيه, فارس من خيال, ali pontiac و 4 آخرون معجبون بهذا.

فارس من خيال · 17-09-2016, 04:32 AM

رائع علاوي من سيدني الى اوكلاند حلو التغير وزيارة بلد ثاني في نفس الرحلة
اجراءات الجوازات بصراحة معقدة مع ان في رحلتي والله ماسألني إلا سؤال واحد هل انت سائح قلت له نعم وختم جوازي وطلعت

زي ماقال ابوغسان اوكلاند هادئة وكمان وقت زيارتكم لها مافيه زحمة لو بالصيف بتشوف زحمة اكثر

يعطيك العافية ع هالتقرير الجميل من البداية باستراليا وصولاً الى اوكلاند وننتظر الاجزاء الباقية

ali pontiac, PrinceOfPersia, فيصل و 3 آخرون معجبون بهذا.

ali pontiac · 17-09-2016, 11:10 AM

AUCKLAND

اليوم الثاني

خطة اليوم الثاني الإفطار و والمشي صباحا في المدينه و الذهاب الى حديقة Cornwall park و Mount Eden و حديقة Auckland Domain

الجو في الصباح كان بارد

وجهتنا كانت Elliot Stables مبنى قديم وفيه داخله مطاعم متنوعه

صور من الداخل

كلام صحيح

الكافيهات مسكرين وفقط اثنين الي فاتحين وتفطرنه عند واحد منهم اسمه Reslau

سندويش سلطة الأفكادو

قبل السفر كنت ابحث عن مطاعم في نيوزلاند حق اسوي لستة مطاعم، بس النيوزلندين اكلهم بسيط وسلطات ومع ذالك هم في المرتبه السابعه في العالم لمعدل السمنه !!

سعر الفطور 29 دولار

صور المكان من الخارج

ارتفعت الشمس واعتدل الجو، و تمشينا على المنطقه البحريه

اكتفينا بهذي القدر من المشي وقلنا نرجع حق ناخذ السياره وننطلق للحدائق، واحنا نتمشى شفنا هذي المبنى واتوقع انه مصرف او مكاتب شركات

محل هدايا اعجبني فيه هدايا اعتقد من الي فات من عيد الأب

اخذنا السياره و وصلنا الى Cornwall park الحديقه كبيره و التنقل داخلها بالسياره

نفس الي في اعلان جبنة بوك

يدور مشاكل

هذي اسمه المكان داخل الحديقه اسمه One tree hill و المكان مرتفع ، ورحنا فوق بالسياره وفيه مواقف سيارات

وهذاك Mount Eden بنتجه له بعد هذي النقطه

وهذي السياره، كنت مأجر كامري وعطوني هذي الهايلاندر بدالها لأنه الكامري ماكانت متوفره

توجهنا الى Mount eden

كان في يوم من الأيام فوهة بركان

قبل شوي كنا هناك

مرقش

طريق العوده لمواقف السيارات

وكانت الوجهه الثالثه Auckland Domain

هذي متحف الحرب في الحديقة Auckland War Memorial Museum

وهذي محمية وروود و نباتات Domain wintergardens

دخلنا هذي المكان وكان حار وجدا رطب ذكرني في جو البحرين مهيأ حق النباتات الأستوائيه خذت صورتين وعلى طوول طلعت

حدائقهم كبار الي نشوفه منهم فقط جزء بسيط، بعدها توجهنا شارع ponsonby road وفيه مطاعم متنوعه وافضل بكثير من منطقة الـ CBD

هذي مجموعة مطاعم داخليه Ponsonby central

وصار الإختيار على هذي المطعم المكسيكي

وبعده اخذنا جيلاتو من هذي المحل الي جنبه

وهذي كانت نهاية اليوم الثاني في اوكلاند

يتبع،،،

درجه سياحيه, آخـــرفـــرصـــة, PrinceOfPersia و 7 آخرون معجبون بهذا.

آخـــرفـــرصـــة · 17-09-2016, 11:05 PM

ما شاء الله مريتوا على معظم معالم اوكلاند

بالطبع هي تعتبر صغيرة مقارنةً بسيدني و ملبورن

لابد في اوكلاند أو نيوزلندا عموماً من سيارة

و زين الشركة أعطتكم السيارة هذي لأنها أفضل

PrinceOfPersia, فيصل, توبليرون و 1 آخرون معجبون بهذا.

ali pontiac · 19-09-2016, 12:24 AM

اقتباس : المشاركة الأصلية كتبت بواسطة آخـــرفـــرصـــة

ما شاء الله مريتوا على معظم معالم اوكلاند

بالطبع هي تعتبر صغيرة مقارنةً بسيدني و ملبورن

لابد في اوكلاند أو نيوزلندا عموماً من سيارة

و زين الشركة أعطتكم السيارة هذي لأنها أفضل

شكرا على مرورك بوغسان، البلد اصغر و الناس غير احسهم معزولين عن العالم تماما، ولاحظت كثرة الهنود (السيك) وعدد من الشباب السعوديين اعتقد انهم مبتعثين

وفعلا لازم سياره والتجول خارج اوكلاند في الأرياف لمشاهدة جمالها، اتوقع المدن الأخرى مثل ويلينقتون و كوينز تاون في الجنوب احلى.

فيصل و توبليرون معجبون بهذا.

PrinceOfPersia · 18-09-2016, 01:49 AM

ماشااااااااااااااء الله

تقرير رائع ومفصل وتصوير لايقل روعة
متابعين

ali pontiac, hearty, توبليرون و 1 آخرون معجبون بهذا.

ali pontiac · 19-09-2016, 12:27 AM

اقتباس : المشاركة الأصلية كتبت بواسطة PrinceOfPersia

ماشااااااااااااااء الله

تقرير رائع ومفصل وتصوير لايقل روعة
متابعين

شكرا لك عزيزي، و ان شاءالله باقي التقرير يعجبك ولا تنسى تقرأ بداية التقرير الي يبتدي من ملبورن في القسم الإسترالي

توبليرونمعجبون بهذا.

ali pontiac · 19-09-2016, 02:20 AM

في هذي اليوم كان البرنامج زيارة قرية الهوبتون HOBBITON MOVIE SET الي مثلو فيها فلم HOBBIT و فلم Lord of the Rings

في اليوم الثاني اذكر في الليل وكنت اتوضئ للصلاة كانت زوجتي تتصفح مجلة سياحيه لنيوزلاند اخذناها من المطار، قالت لي قرية الهوبت مايصير نروح لها بروحنا لازم مع تور ، وانه كنت متوقع انهي مكان مفتوح ودخوله برسوم، قلت لها طيب هل شركات سياحيه تنظم للزيارة المكان قالت لا هم نفسهم ينظمون التور، قلت اكيد مافي مجال للتور و عندهم اكتفاء

وانه من قبل الرحله من الصدف العجيبه و البحث في انستقرام عن صور الهوبيتون لقيت حساب اخوي فارس من خيال وسألته في الأنستقرام عن التور ورد علي جزاه الله خير، وكان ترتيبه عن طريق الفندق

دخلت موقع الهوبيتون
V
V
V
Hobbiton Movie Set Tours > Home

واخترت التاريح و الوقت ، والحمدلله كان فيه مجال ل17 سائح، للجوله و على طول حجزت، سعر التذكره 79 دولار للشخص

MATAMATA - OKAUIA -ROTORUA

اليوم الثالث

من الصباح عملنا Check out و انطلقنا متجهين الى مدينة ماتاماتا الي فيها قرية الهوبيتون وتبعد عن اوكلاند تقريبا ساعتين

في الدرب شفنا لافتة مكتوب عليها آيسكريم طازج بعد 500 متر خففت السرعه و وصلنا وكانت بقاله في الدرب

دخلنا بكل حماس بس كان الآيسكريم شكله مايشجع و ماكان طازج باين عليه صاير له اسبوع وطلعت بكاكاو

وصلنا ماتاماتا

وهذي مكتب الأستقبال و محل هدايا و تذكارات

عطيتهم رقم الحجز، وقالو اذا حاب تروح مع التور الي بينطلق الآن تقدر، وقلت افضل حق نكسب وقت، اذا ماكنت غلطان كنت حاجز التور الي يبدأ الساعه 10:15 ورحنا مع تور الساعه 9:30

التور منظم ومع مرشد او يشرح ويتكلم عن القريه و الفلم

المكان ملك لعائلة الكسندر، الي تمتلك هذي المزرعه الكبيره، في عام 1998 جاهم المخرج بيتر جاكسون، واخذ من عندهم الأذن للتجول في المزرعه ومشاهدتها، وهم كانو مشغولين بمتابعة مباراة للعبة الـRugby ،قالو له خذ راحتك وسكر الباب معاك واخذ يتجول في المزرعه لمدة 4 ساعات وهم ناسيين موضوعه تماما، وبعدها بأربعة شهور جاهم اتصال من شركة New line cinema ، اتفق معهم المخرج انه يسكن في بيتهم للتصوير، وتم توقيع عقد مع عائلة الكسندر والإلتزام بالسريه التامه على المشروع، وقالهم اختارو تسكنون في اي مكان في نيوزلاند وتكاليفكم مدفوعه، بدأ انشاء المكان عام 1999 ، وبمساعده من الجيش النيوزلاندي واستخدام معداتهم الثقيله ، وعدد كبير من افراد الجيش شاركو في تمثيل الفلم، وصل عدد العاملين في موقع الفلم 400 شخص

والله اتعجب كيف شخص له قوه و نفوذ يخلي جيش بلد ثاني يشتغلون له

كل شي في هذي الصوره حقيقي ماعدا البطاطس الي على الطاوله

وهذي استراحه ويقدمون لنا مشروبات خاليه من الكحول

اول تور بدأ في القريه كان عام 2002، ويتوقع صاحب المزرعه راسل الكسندر انه التور بكون مستمر لمدة 50 سنه !!

وانتهى التور الرائع الي كانت مدته 3 ساعات، ورجعنا لمكتب الإستقبال في ماتاماتا

تمشينا شوي وشفنا مطعم تركي ودخلنا ناكل

انتهت الجوله في ماتاماتا، وتوجهنا الى منطقةokauia حق نشوف شلال wairere واهوه ارفع شلال في الجزيره الشماليه لنيوزلاند

الشلال من بعيد

وصلنا وفيه مواقف للسيارات
لمشاهدة الشلال لازم تمشي مسافة 45 دقيقه على طريق صعب شوي و وعر، ولمشاهدته اقرب تكمل مسافة 45 دقيقه اخرى، يعني 90 دقيقه طالع و 90 دقيقه نازل !

احنا فقط رحنا للإطلاله الأولى للشلال الي تبعد 45 دقيقه عن مواقف السيارات، الي معاه عائله واطفال مانصحهم بزيارة المكان ابدا، الدرب خطر و وعر ولكنه جميل ,وله متعه نفس الوقت ،والي يفكر يروح انصحه ياخذ معاه شنطة ظهر صغيره فيها ماء للشرب

وصلنا للمكان الأول لمشاهدة الشلال

ارتحنا شوي ورجعنا للنزول

وانطلقنا الى روتوروا الي تبعد عن الشلال مسافة ساعه واحده

واخيرا وصلنا الفندق وسوينا Check in الفندق اهوه Holiday inn rotorua

وهذي كانت نهاية اليوم الثالث

يتبع،،،،،

Haksa77, ملاك, آخـــرفـــرصـــة و 4 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
37 ليلة بين احضان الساحرة زيزا من 7 يوليو الى 14 اغسطس 2016	himzmz	ماليزيا	429	08-04-2018 07:38 PM
استلمت الجوازات وهنا خلاصة طلب فيزا بريطانيا اغسطس 2016	Nano	فيزا بريطانيا	9	30-01-2017 12:12 PM
رداً للجميل ... تجربتي مع شنغن المانيا اغسطس 2016	un33	فيزا	15	04-10-2016 12:00 PM
نبارك للجميع الترقيات الجديدة ( اغسطس 2016 )	ادارة المنتدى	أخبار واعلانات الأعضاء	33	24-09-2016 01:22 AM
شنغن المانيا 2 اغسطس 2016	مبتدأ	فيزا	6	18-08-2016 10:42 AM