..:: تقرير برائحة القهوة البيضاء الماليزية ::..

ام جسومي · 15-12-2016, 01:22 AM

:: جزء المولات التي تمت زيارتها ::

في سيلانجور :
1- مول البيراميد
2- مول ioi city
في بينانغ :
1- جيرني بلازا
في كوالا :
1- سوريا مول
2- التايمز سكوير
3- البافليون

التفاصيل :

١- مول البيراميد :

مكان رائع للتسوق ، تصميمه شويه يلخبط ، بس رائع اكثر مول حبيته ف ماليزيا ،،
يمكن عشان خمس ايام متتاليه نروح له واخر يوم كمان روحنا له ❤
المحلات متنوعه فيه ( الغاليه والرخيصه والوسط )
مجموعه كبيره من المطاعم
خدمه استئجار عربيه اطفال stroller ( امام بوابه الدخول مباشره ، بجانب ستار بكس )
به صاله تزلج كبيره في الدور LG1

اكثر قسمين رائعين بهالمول :
١- asian avenu - الدور F
٢- مراكش - الدور LG2

( القسم الاسيوي )

في اعلى دور ( رهيب ويجنن اشتريت منه اشياء كثيره ، زي ارواب للبيت اللي تجيكي فيري سايز
مررا كيوت واشكال تجننن كثيره لازم تدوروا عليها ، سامحوني ما اعرف اش اسم المحل بس هوا محل يبيع ملابس داخليه وبيجامات للبيت ، كان عرض تشتري روبين ب ٤٩ رنجت ، المهم انا قضيت المحل كله من عنده ليا ولاخواتي هههه ) ترى القسم الاسيوي مو مرا كبير يعني حتخلصوه بسرعه ..
وكمان عندهم محل يبيع نظارات تقليد بس والله جودتها مررا ممتازه ب ١٥ رنجت ي بلاش
الكواليتي جدا ممتاز ..
اقلكم القسم الاسيوي كله ادخلوا محل محل وفتشوا في كل شي حتلاقوا اشياء مررا حلوووا كثييييييييييير
فيه محل يبيع كفرات لجوالات الايفون جدا جميله
الكفر الواحد ب 25 وتشتري اثنين 45 نسيت اصور المحل بس معروف اول ماتدخلوا القسم الاسيوي على يدك اليمين كل المحل كفرات للايفون فقط ..

فيه محل يصمم لكم اسمكم او اي شي تبغوا تكتبوا على لوحات السياره بالشكل واللون اللي تحبوا
وكدا هذا كل شيء لفت نظري عن القسم الاسيوي ..

( قسم مراكش ) الدور : LG2

اول شيء في قسم مراكش ، لازم لكل سيدة او رجل تروحوا هذا المكان الخطيييييير الرهيب ..
هو عباره عن تنظيف القدم زي البديكير والمانيكير ، بس ينظفوا لك رجلك من الجلد الميت ..
<< والله شوفوا عن تجربه ليا الحين شهرين من يوم ماسويته ولسا رجولي ناعمه نعومه
ماعمري حسيت بهالنعومه المستمرة كذا ..
يعني محلات البدي كير اللي في الصوالين يقعدوا يسولك رجلك قرابه العشر دقايق بالكثير ..
هذا المحل عندهم ادويه وكريمات عجيبه جلست تخرج جلد ميت من رجلي نص ساعه ..
لاتنفجعوا ترى رجلي جدا جدا نظيفه ومهتمه فيها اكثر شيء ،،
انا جالسا مصدوووومه طول الوقت من اللي يخرج من رجلي ...
المهم وصف المحل :
حتلاقوا محل ينظفوا الاقدام بالسمك ، هوا هذا ادخلوا عندهم وقولوا لهم ابغى علاج للقدم ..
معليش ما اني عارفه اسم المحل بس على طول حتعرفوا لانه عندهم حق السمك .. مايضيع المكان ...
السعر :
370 رنجت بعد الخصم عندهم عرض وقتها ، تقول لي كان ب 600 رنجت ..
المهم جربوه وماحتندموا ان شاء الله ..
حتى يسولك وجهك وركبك ويداتك أي منطقه تبغي تفتحيها قوليلهم يسولك علاج لها ..
الزبده ( هذا المحل اذا رجعت ماليزيا ان شاء الله حزوره باذن الله )
بس افضل انهم يسوولكم العلاج في الايام الاخيره لكم في السفر ..
انا غلطتي سويته في ايامنا الاولى بحكم وجودنا في سيلانجور ف اول الايام ..
وباقي الايام كلها مشي وتعب فتعبت رجلي من المشي .. بس لمن رجعت من السفر سويت لرجولي صنفره بسيطه واعتنيت بيها بالكريمات اترطبت وفي الحين مرا تمام ،، بس من جد رجولي فرق كبير للان اشعر به .. << لاتنسوني من دعواتكم الطيبه ..
بالذات الرجال اكيد رجولكم منتهيه ههههه لازم تجربوا هذا العلاج ..
صورت لكم صور الكريمات

- ثاني شيء محل المساج المعروف ( arokaya huose ) الدور : LG2
انا وابو جاسم سوينا فيه مساج للاقدام فقط ممتاز جدا ، لنصف ساعه فقط بـ 80 رنجت انا وابو جاسم سعر واحد يعني هوا بـ 40 وانا بـ 40 رنجت .. طبعا اتمنيت اني اسوي كل يوم مساج ،،
بس للاسف ماكل مايتمناه المرء يدركه خصوصا ومعاك بزرانك ...
<< طبعا ماححكيكم كيف تجربة المساج كانت
والاثنين حقوني ماشاء الله تبارك الله عليهم كانوا جدا هاديين .
اصلا كويس ماطردونا من المكان ...

المهم : الخطه للامهات والاباء عند المساج ، كالتالي :
واحد يمسك العيال والثاني يدخل . وهكذا بالتناوب ..
<< مدري اش اللي خلاني انا وابو جاسم ندخل مع بعض .. هههههههه
طبعا نصف ساعه اقل شيء ،، وترا نصف ساعه ماهم كاتبينها في قائمه الاسعار ،
عندهم الاسعار تبدا من ساعه الى ساعتين وهكذا ...
وعندهم غرف مقفله للنساء المتحجبات ،، يعني مجهزين لكم الجو بس تعالوا لهم .. مستنينكم ....

اما في محل اخير موجود في المول

وانتوا تمشوا حتلاقوه مدري وين مكانه بالضبط
غالي على قلبي جدا جدا ههههه اسمه miss t

حتلاقوه فيه شنط كيوت وشنط مدرسيه وكل انواع الشنط حتى شنط سفر لاغراض الحمام تلاقوها عنده ،
وفيله كمان حافظات مويه حار على اشكال كيوت وتجنن تنفع للي عندها بيبي ،
اقلكم هذا المحل روحوا عنده وسلمولي عليه ، دخلته ست سبع مرات
اصلا اول ماحتشوفوا حيأسركم من اول نظرة
<< كلامي للحريم طبعا والبنات .. حتفهومني اذا شوفتوه
كويس اني صورت كم صوره لاخواتي عشان يختاروا لهم كم شنطه هديه .. حوريكم هيا

سامحوني اطلت عليكم ،،
بس هذا اكثر شيء مميز وعجبني في هالمول ..

ايوا لحظه افتكرت محل مميز كمان ،،
ابو جاسم طاح عنده ، هوا محل سوبر هيرو ،، هذا المحل موجود في البافليون ،،
وموجود في البيرامييد ..
ابو جاسم اشتراله بلوزه سوده فيها علامه سوبر مان في الوسط بس لون العلامه ازرق مموج بالاسود وميزتها
مضيئة في الظلام ، يعني لو كنت في مكان مظلم تنور العلامه باللون الازرق جمييييييله مرا حبيتها
.. بسعر 150 رنجت او بـ 190 رنجت اتوقع كدا رهيييييييييييبه البلوزه صراحه ..
انا ف البدايه ماكنت متحمسه اننا نشتري من هناك ،، بس عاد اتوفق في الاختيار الجميل ،،
مستحيل تلاقي تقليد من هالبلوزه ..

سوبر ماركت كبيره جدا فيها كل شيء تبغوه في الدور LG1
هذي صورتها اتسوقنا منها مرتين تعتبر نوعا ما غاليه

انصحكم ببقاله ( سفن الفن ) ارخص شيء وحلوا متوفر فيها كل شيء ..
ويوجد في المول محلات كثيره خاصه بكراسي المساج
ومحلات كثيره خاصه لاغراض الرحلات وتسلق الجبال والسباحه

اما اللي ماعجبني في هالمول :
- ماعندهم محلات للاطفال كثيره

2- مول ioi city

هذا المول توجهنا اليه بعد الانتهاء من جوله مسجد بوتراجيا ،، وذلك لقربه من منطقه بوتراجيا ..
المول رائع جدا ومرتب ومنظم ويشرح الصدر كبييير جدا وهاديء ومافيله سياح او عرب ،
ومليااااان محلات اطفال زي مذركير والتعليم المبكر وكثييره محلات للاطفال
( بالنسبة لمذركير عندهم جدا غالي أغلى من اللي في السعوديه )
وعندهم دايسو كمان << ماعجبني دايسو حقهم ابدا ..
< احنا ف السعوديه الاسعار موحده عندنا كل شيء ب 7 ريال او اقل ،
هما الاسعار متفاوته بس طبعا رخيصه تعتبر

هذي العاب مرا رهيبه للاطفال

في بينانغ :

جيرني بلازا :

مول جميل ومرتب ووسيع ويفتح النفس صراحه ، يوجد به جميع الماركات الرياضيه والنسائية والاطفال والماركات العالمية الفخمه الغالية ..
احنا دخلنا هذه المحلات اللي افتكرها ( تويز ار اص << ارخص من اللي ف السعوديه اشتريت هدايا منه ..
ودخلنا كروكس حق الجزم رهييييبه عروضهم ، تشتري قطعه والثانيه مجانا .. ودخلنا محلات الرياضة ، ومحل سكيتشرز غالي جدا جدا جدا عن اللي ف السعودية .
ومحل كاث كاديتسون << جميل هالمحل جمال اكيد غني عن التعريف
المهم كانوا مسوين تخفيضات 60 % وقتها
<< وجلس ابو جاسم وجسومي عند باب المحل يستنوني اخرج ماني قادره اخرج منه ههههه ..
( الكشكات اللي وسط المول جميلة بضاعتهم )
ايواا ومليان عندهم محلات نظيفه ومرتبه حق المساج والصحة ...

محل جزم جميل جدا ( وانتم بكرامه )

بامكانكم تتفرجوا على جميع المحلات من رابط الموقع .. قبل ماتروحوا المكان هذا ...

موقع المول :
Kids | Fashion | Gurney Plaza

الصراحه جدا اتمنيت اني ازور مول الكوينسيبي بس ماكان عندنا فرصه اننا نزوره ..

في كوالا :

- سوريا مول :

مول زي أي مول تاني فيله جميع الماركات العالمية ..
اتعجبت جدا انه في احد هنا ف المنتدى كان كاتب انه مول رخيص اسعاره ..
بس العكس والله كل المول به كل الماركات العالمية واسعارهم مرتفعه ..

يعني احنا صراحه ما اشترينا شيء منهم غير محل لاكوست كان مسوي تخفيضات على الشنط ..
يعني اذا منت ناوي تشتري من الماركات وكذا لا تتعب نفسك تزور هالمول ..

انا يعجبني المول اللي يكون متنوع في اسعاره ..

رأي في هالمول : ماحبيته وحتى تصميمه مو مريح للتسوق ..

في هذاك اليوم اللي زرنا فيه هالمول في الساعة 1 ظهرا ..
نلاحظ انا وابو جاسم شيء غريب ف الناس ..
كلهم لابسين تيشيرتات صفراء اللون ..
اش السالفة ي ابو جاسم ؟؟!! وكل مالهم بيزيدوا وبيزيدوا اكثر واكثر ..
ماعلينا فيهم جلسنا اكلنا وشبعنا الحمد لله وجينا نبغا نخرج .. يا الله اش هذا المنظر
حشووود من الناس شيء مو طبيعي اول مره في حياتي اشوف الكم الهايل من البشر كذا ...
الا والله زي كانكم في الحج ..
في هذيك اللحظه انا وابو جاسم رجولنا تتصافق في بعض ،،
هههههه صراحه اترعبنا محنا عارفين كيف نرجع لموقف سيارتنا ..
وقوقل ماب حضرته يعلق في هذيك اللحظة ويا الله كيف نسوي ..
احنا خايفين على اولادنا اكثر شيء ..

يعني تخيلوا أمم وشعوب وقبائل بتدخل المول واحنا نمشي عكس الاتجاه لهم عشان نبغا نخرج
ولمن خرجنا انصدمنا من المنظر وعلى طول وقفنا على جنب نسال الامن كيف نروح الاكواريوم
<< لانه سيارتنا جنب الاكواريوم واقفه ..
فعلى طول وصفوا لنا على نفق من داخل مول سوريا متصل بالاكواريوم ..
<< يالله على الجمال وربي اهنيهم من كل قلبي على انفاقهم الخطيره هذي ..
<< اول مره ادخل نفق لهم في ماليزيا وعن جد شيء جميل ورائع ..

كان النفق فاضي وفي غضون خمس دقايق الا ونحنا في الاكواريوم والحمد لله ع السلامه ياااارب ..
والله كان شيء مرعب الله لايوريه لاحد ..
وطلع التجمع هذا مظاهرة ضد رئيس ماليزيا ..

وهذا رابط الخبر
https://arabic.sputniknews.com/world...7%D8%B2%D9%82/

2- التايمز سكوير :

مول كبير جدا احنا رحنا اليه عشان الاوت لت ،،
المهم بعد مالفينا السوق كله اكتشفت انه مايسوى صراحة ..

احنا اصلا كنا متوجهين الى الاوت لت اللي بجانب المطار ( ميتسيو اوت لت )
وكان يبعد عن فندقنا 45 دقيقه والله مدري من الارهاق والمشاوير الطويله اتكاسلنا اننا نروح له ،،
فقلنا يلا نروح اوت لت التايمز سكوير ... وياريتنا رحنا اللى بجانب المطار يمكن يطلع احسن من هذا ..

تقريبا كله محلات عاديه تقليد ومحلات شعبيه فاتحين في المول ..
يعني البضاعه جدا رخيصه ،، لقينا جزم رياضيه تقليد اديداس ونايك ب 20 رنجت وهكذا ..
انا على بالي محلات ماركات فخمه مسوين تخفيضات ..

بس خاب ظني وما عجبنا شيء وراح علينا هذا اليوم ع الفاضي ...

3- البافليون :

مول كبير جدا فخم فخامه ترتاح نفسيا فيه .. بس كله ماركات غاليه جدا ..
( طبعا الماركات تلاقوها هناك اغلى من اللي ف الخليج )
وفعلا فما اشتريت شيء من هناك واتمشينا ف البافليون وراح وقتنا ع الفاضي كمان ..
كنت اتمنيت اننا ندخل احد الكافيهات او المطاعم ،، بس وقتها كنا متغدين وشبعانين ..
بس ابو جاسم دخل محل السوبر هيرو اللي ف البافليون ...

الظاهر ما اتوفقنا في الاسواق بس ان شاء الله السفره الجايه حخطط للمولات بشكل دقيق عشان لا يروح وقتنا على الفاضي ....

ملاحظه مهمه :

أثناء تخطيط للسفر ..
قبل ماتقرر انك تضيف هذا المول في قائمه المولات لديك .. !!
فكر هل انت مسافر للتسوق ولا للسياحه ؟!!
اكيد الاثنين بس ايش الاغلب .. ايش اللي حاط عليه ميزانيه اكثر .. !!

تيب هل تبغى المحلات الغاليه جدا ولا الرخيصه جدا ..؟؟؟؟؟

هل تبغى تشتري فقط من الاوت لت .. !!

او عادي من أي مكان مايفرق معاك ..!!

اذا جاوبت على كل هذي الاسئله حتتضح معاك الرؤيه وتوضح الخيارات امامك ..!!
وبعدها تقرر هل هذا المول يستاهل اروح له واضيع وقتي فيه ولا لا ..

مثال على نفسي :
لانه انا اتضح لي انه انا مطلبي من التسوق فقط
( ابغى اشتري من الماركات اللي مسوين تخفيضات تستاهل يعني اوت لت محترم
( زي اللي تشتري جزمه اديداس اصليه والثانيه مجانا زي كذا حلو )

يعني الهدف من زياره المولات :

هو التسوق الذكي يعني ما ابغا اضيع فلوسي في شيء الاقيه في بلدي ارخص من عندهم

ولا ابغى اضيع فلوسي على اشياء رخيصه جدا و مالها داعي وماحتعيش اصلا ..

فالمولات اللي ححطها لكم تحت كانت معاكسه لرغبتي في التسوق وبالتالي ضاع الوقت ع الفاضي ...

البافليون : فقط ماركات غاليه وفخمه مرتفع الاسعار .. فقط الكافيهات عليها مدح كبير في المنتدى ..
التايمز سكوير : محلات جدا رخيصه وتقليد في تقليد .. وشوفت كمان محلات للماركات الغاليه ايضا ..
سوريا مول : ماركات في ماركات الاسعار مرتفعه جدا ،، ممكن تروح له عشان المطاعم ..
مجموعه كبيره من المطاعم السريعه والامريكيه .. شوفت مطعم ( تشيلز ) عندهم كمان ..
جيرني بلازا : توجد رخيصه و ماركات اسعار مرتفعه حتى قوتشي والشله المصونه موجود ومحلات للذهب والمجوهرات .. يشبه البيراميد قليلا .. زرناه 3 مرات
البيراميد : منوع فيه الرخيص جدا والغالي اكثر مول ممتع صراحه ..

الزبده اغلب المولات ما حققت لي رغبتي في التسوق .. فبالتالي تخطيطي للتسوق كان تجربه سيئه نوعا ما .. مو عشان كدا رجعنا للسعوديه ومعانا 3 الاف من الميزانيه

يمدحوا كثير اوت لت الموجود في جوهر بهارو .. ان شاء الله الفرصه القادمه حيكون هوا وجهتي الاولى للتسوق ...

واتمنى ما اتقلسفت كثير على راسكم ،،
بس من جد اعيدوا النظر في تخطيطك لاماكن التسوق .. لاستغلال الوقت والاستمتاع بالرحله ..

:: يتبــــع ::

بيبي فيس, قصة حب, فيصل و 6 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
كنا هنا (3) اروما كافيه ( نكهة القهوة ) جدة	آخـــرفـــرصـــة	بوابة السعودية	49	22-02-2017 10:15 AM
القهوة العربيه	kanari212	بوابة الامارات	1	13-02-2016 03:12 AM
منع شحن القهوة من اثيوبيا	فيصل	بوابة اثيوبيا	28	23-10-2015 04:11 AM
تقرير مصور وجولة في حديقة الحيوانات الماليزية Negara Zoo* " أبوناصر "	أبوعبدالله (الاسفار )	ماليزيا	13	21-07-2015 06:52 AM