نكمل الجولة في Çamlıhemşinوما حولها




الفندق: Dere Hotel
نوع الغرفة: غرفة رباعية
مجموع التكاليف ليومين شامل الافطار: 95 دينار بحريني



تقييمي للفندق: 9 من 10
الايجابيات: الفندق موقعه رائع على نهر جار وتسمع خريره طول الوقت, الغرفة رائعة وواسعة ونظيفة, الموظفين ودودين وخدومين, طعام العشاء كان لذيذ.
السلبيات: طعام الفطور بسيط جداً وغير متنوع- لا يوجد مصعد والدرج ملتوي ويمكن يكون صعب شوي على كبار السن.


رحنا للغرفة وكانت من أجمل الغرف اللي سكناها طول الرحلة.. كانت فسيحة وشرحة للنفس..وكلها مصنوعة من الخشب.. وفيها بلكونة صغيرة خارجية مطلة عالنهر مباشرة.. وباب البلكونة مخلينه يابس عشان ما يفتحونه الأطفال بسهولة..

الغرفة من الداخل






وضعنا أغراضنا ونزلنا للعشاء في المطعم.. في هذا اليوم اكتشفنا ال muhalama هذي الأكلة اللي عشقناها.. وهي عبارة عن جبن مع طحين الذرة.. وتشبه فوندو الجبن السايح.. وجربناها في عدة أماكن لكن في هذا الفندق كانت الأحلى..



اطلالة الغرفة على النهر










اطلالة من جهة ثانية



بنتي تستمتع بالإطلالة ربي يحفظها





استيقظنا على صوت خرير النهر سبحان الله!! ونزلنا للفطور.. الفطور بسيط وأصنافه قليلة لكن كان طعمه لذيذ وطازج..


الفطور



العاملين البشوشين في الفندق مع البنات.. ماشاءالله عليهم قمة في التعاون والأخلاق



خرجنا نتجول في المنطقة ..

المنطقة خلف الفندق



وبعدها توجهنا إلى آيدر.. المسافة قصيرة جداً حوالي 14 كلم فقط من فندقنا.



كوخ جميل مررنا عليه في الطريق.. الله يبارك لأصحابه ويرزقنا مثله يا رب










كان الجو رااائع وبارد ماشاءالله.. وكان المكان زحمة شوية لأنه كان يوم أحد .. ولاحظت أنه الشعب ماشاءالله عليه يحب الرحلات والكشتة خارج المنزل..

وقفنا مقابل الشلال وكان المنظر يأخذ الألباب.. اللهم ارزقنا الجنة



بعدين صار ضباب ونزلنا قبل ما يشتد الضباب أكثر.. ورجعنا لجاميلهميشن.. المسافة قصيرة بينهم..

[IMG][/IMG]


وقالي بوحمزة ودج بمغامرة.. دخلنا في شارع فرعي على الشارع العام المقابل للفندق.. وكان طريق جبلي .. مع السياقة شفنا روحنا وصلنا مكان عالي.. ولكن الطريق فجأة انتهى بوجود بيت خاص.. فرجعنا..





هذي نهاية الطريق وشوفو اطلالة البيت كيف ماشاءالله ربي يبارك لهم فيه






ولكن هذي الشي ما وقفنا ورحنا مدخل ثاني وهل المرة وصلنا مكان أعلى من اللي قبل..

وشفنا سيدة عجوز ماشاءالله نشيطة معاها المنجل تعدل الزرع اللي جنب بيتها.. نزلت النافذة أكلمها.. تضحك علينا تقول انتو شنو جابكم هنا !!! ههههه ماشاءالله عليها مرحة ومعاها حفيداتها..


عطيتها تمر وماء زمزم فرحت كثييير.. طلبت أصورها بس ما رضت ولكن صورت حفيداتها الجميلات ماشاءالله..



بصراحة المكان اللي ساكنين فيه يخرع.. لو كنت أنا عايشة هناك بقفل الباب بسلاسل عشان ما يطلعون العيال.

الصورة من عند بيت العجوز



وبعد هالمغامرات الجميلة رجعنا لآيدر لتناول طعام الغداء هناك.. واخترنا مطعم zumrut لانه قريبتي مدحته لي.. وبالفعل مطعم راائع ويطل على الشلال.. وصاحب المطعم زوجته وبنته يشتغلون معاه في المطعم.. وتعرفت على بنته وطلع المطعم على اسمها وللآن أتواصل معاها.. ويوم جابوا الأكل كان ممتاز ولذيذ..

الاطلالة الجميلة على الشلال



هنا الضباب أو السحاب غمر المكان بعد فترة بسيطة من جلوسنا













وعند الخروج سألت زوجة صاحب المطعم عن طريقة عمل muhlama فمسكتني من ايدي وودتني المطبخ .. وتراويني المقادير وبعدين امامي قامت تسوي الطبخة جزاها الله خير .. والله حبيتها هالعائلة الطيبة ماشاءالله.. وأبشركم عملتها الطبخة كم مرة في البحرين وضبطت الحمدلله..

بعدها طلعنا وكانت تمطر بقوة.. فما قدرنا نكمل التمشية في آيدر.. فطلعنا منها.. وفي الطريق توقفنا في أحد المقاهي اللي على النهر لشرب الشاي وتدفئة انفسنا.. وبوحمزة الله يحفظه استغل الفرصة للتصوير..


















بعدها رجعنا للفندق .. كانت الليلة الأخيرة لنا في هالمنطقة وتمنينا لو زدنا عدد الليالي إلى 3 أو 4.. لأنه المكان رائع وما ينشبع منه ومن جماله.