سياحة عائلية في اورلاندو الأمريكية - الصفحة 11

أبو سعود Q8 · 16-03-2015, 02:18 AM

اقتباس : المشاركة الأصلية كتبت بواسطة fanda

لأول مره احس انه ديزني ما تستاهل العنوه اذا قارناها بباقي المدن الترفيهية الي ذكرتها قبل

هل فنادق ديزني توفر ميزة الدخول للألعاب طول مدة الاقامه ؟!

لا يا أم ريم ديزني تستاهل العنوه لكن مو كل المدن
بس مدينة انيمال كنقدوم الي مو حلوه أما باقي المدن حلوين ويستاهلون الزيارة
ان شاء الله لما أكمل ياقي الاجزاء راح تشوفينهم وتعطينا رأيك

أما بخصوص الفنادق ، فللأسف ما عندي فكرة عنهم لأني ما جربت وسكنت فيهم
ياريت لو في أحد من الاعضاء جرب يسكن بفنادق ديزني لاند يقولنا عن عروضهم وخصوماتهم للمدن

تحياتي

missq8 · 15-03-2015, 11:15 PM

يعطيك العافيه بوسعود شكلنا ثقلنا عليك وعيلناك السموحه

خلك على ائل من مهلك

عاد كنت حدي مختبه على دزني كانت حيشتني طفوله متاخره شكلي بحول على السوقه شنو هالاسعار نار و شرار

شفت الاسعار قبل في ابلكيشن الايفون قلت لا اكييد بوسعود ماخذهم ارخص من فزت اورلاندو لا تستعيلين و تشترين

أبو سعود Q8 · 16-03-2015, 02:25 AM

اقتباس : المشاركة الأصلية كتبت بواسطة missq8

يعطيك العافيه بوسعود شكلنا ثقلنا عليك وعيلناك السموحه

خلك على ائل من مهلك

عاد كنت حدي مختبه على دزني كانت حيشتني طفوله متاخره شكلي بحول على السوقه شنو هالاسعار نار و شرار

شفت الاسعار قبل في ابلكيشن الايفون قلت لا اكييد بوسعود ماخذهم ارخص من فزت اورلاندو لا تستعيلين و تشترين

الله يعافيج أختي
لا عادي ما ثقلتوا علي ولا شي

مدن ديزني لاند حلوين بس عيبهم ان تذاكرهم غالية لو بتخصصين لكل مدينة يوم كامل
ومدينة مملكة الحيوانات بايخه والله ما عجبتنا ، مستواها أقل من حديقة الشعب !!
بس باقي المدن لا والله حلوين ويستاهلون الزيارة والاستمتاع فيهم
إن شاء الله لما أخلص من أجزاء باقي المدن راح تحكمين عليهم عدل
المهم لا تروحين السوق من أول الايام ترى بتطيرين الفلوس كلها من حلات بظاعتهم ورخصها مقارنة بالكويت

تحياتي

أبو سعود Q8 · 16-03-2015, 01:52 AM

ديزني هوليوود ستوديوز

Disney's Hollywood Studios

مدينة العاب ترفيهية جميلة جدا
متخصصة بالأفلام التي صنعتها استوديوهات ديزني في السينما الأمريكية
وطبعا أغلب هذي الأفلام عبارة عن افلام أنيميشن ( كارتون ) أو افلام عائلية بحت
لذلك الالعاب ستكون على هذي الشخصيات الي صنعوها في استوديوهاتهم

تعالوا ندخل المدينة ونشوفها أكثر عن قرب

( نسيت أذكركم ، لازم تحتفظون بتذاكر الدخول معاكم طول الوقت )

(مو أول ما تدخلون ترمون التذاكر لأنكم بتحتاجونهم للدخول إلى كل مدينة وأيضا تحتاجونهم للفاست باس )

هذي بوابة الدخول

تلاحظون بالصورة الديكورات الخارجية للمحلات
كأنها في منطقة هوليوود بمدينة لوس انجلوس

الشخصيات المضحكة منتشرة بكل أرجاء المدينة

بعد دخولكم للمدينة انصحكم بالتوجه إلى جهة اليمين

المدينة هذي فيها العديد من الألعاب بعكس المدينة السابقة ( مملكة الحيوانات )
لكن أفضل وأحلى وأروع الألعاب في مدينة هوليوود ستوديوز هم لعبتين
هذي أول لعبة منهم وهي

فندق برج هوليوود

The Twilight Zone Tower of Terror

تعالوا معانا ندخل إلى اللعبة

( طبعا ما دخلنا على طول لأن ازدحام شدييييييييييد ، لذلك استخدمنا طريقة الفاست باس وتجولنا بالمدينة لغاية ما حان دورنا المكتوب بوقة الفاست باس للدخول إلى اللعبة
لذلك نصحتكم بالتوجه جهة اليمين من البداية عشان تاخذون كرت الفاس باس للعبة هذي واللعبة الي وراها لأنهم من أهم وأحلى وأقوى الألعاب بالمدينة كلها
ولأنهم مزحومييييييييييييين جدا جدا بالناس ، فالافضل أخذ كرت الفاس باس من البداية ثم تتجولون بالمدينة لغاية ما يحين دوركم للدخول للعبة
وهذي نصيحة اقدمها لوجه الله والي ما يبي يلتزم فيها على راحته )

هذي اللعبة من الداخل

ترى اللعبة عبارة عن لعبة رعب

ولكنها لعبة عجيبة وحلوه وتستاهل التجربة

هذا محل تذكارات اللعبة راح تمرون عليه بعد انتهائكم من الخرعه

وهذا شكلها من الخارج على الجنب

هذا مكان الفاست باس

أما اللعبة الثانية الجميلة والحلوه والرائعة في مدينة ديزني هوليوود ستوديوز فهي لعبة

القيتار

Rock 'n' Roller Coaster

طبعا اسم القيتار مو اسم اللعبة لكن لأنها مشهورة بمجسم القيتار لذلك الكل يسميها لعبة القيتار

يالله تعالوا ندخل ونجرب اللعبة
هذي اللعبة من الداخل

وهذا محل تذكارات اللعبة

هذيله اللعبتين بالقرب من بعض ولا تنسون تجربونهم لأنهم من أحلى الالعاب في المدينة
إذا ما لعبتوا اللعبتين هذيله ما كأنكم دخلتوا للمدينة !!

خلونا نكمل باقي المدينة

في منظر شفناه بالسفرة الأخيرة وهو منظر مؤسف

تشوفون بالصورة أمامكم قبعة ميكي ؟

هذي من أهم وأحلى رموز مدينة ديزني هوليوود استوديوز لكن للأسف بسفرتنا الأخيرة كان هذا المجسم العملاق مكسور

يمكن بيسوون له تصليحات أو ترميمات ؟؟
الله اعلم بس حسافة على شكله
هذي صورته من السفرة السابقة شوفوا شلون حلو شكله قبل ما يكسرونه

المهم خلونا نتمشى بالمدينة الحلوه هذي
والصور تتكلم عن نفسها

الله يحفظهم

الاستعراضات بالشارع تشوفونهم
بدون موعد مسبق ولا شي على طول تلقونهم جايين ويستعرضون ويغنون ويفرحون الجمهور والزوار بحركاتهم وأشكالهم وضحكاتهم

هذا مكان عرض انديانا جونز دخلناه بالسفرة الأولى

مممممممممم ما عجبنا وايد !!
بس دخلوه يمكن يعجبكم ؟؟؟

شوفوا هذي العمارات

كلها مرسومه رسم وليست مباني حقيقية !!

Muppet Vision

هذي اللعبة ما دخلتها لكن العيال دخلوها بروحهم !!

هذي لعبة

ستار وورز

Star Tours

هذا الآلي يمثل مجسم للعبة بالخارج

يالله تعالوا ندخل اللعبة

وهذا محل التذكارات الخاص بالعبة

هذا عرض ستار وورز وهو بجانب لعبة ستار وورز

حلو العرض للأطفال راح يحبونه

هذا مثل المتحف

Academy of Television Arts and Sciences Hall of Fame Plaza

هذا مكان التدخين
يا حلاته من مكان

المفروض ان هذي الشخصيات يحبونها ويتوافدون عليها الاطفال
لكن الي شفناه ان الكبار كان عددهم أكثر من الاطفال عند هذي الشخصيات ولذلك للتصوير معهم ولأخذ توقيعهم !!!!
هههههههههه
والله شي يضحك

ما شاء الله عليهم

The Great Movie Ride

هذي اللعبة تتكلم عن الافلام
من القدم وحتى الوقت الحالي شلون صنعوهم وشلون ينتجونهم والخدع السنمائية و و و
كل هذا بتشوفونه وانتم راكبين باللعبة
حياكم معانا

الممثل المشهور كلينت استوود

طرزااااااااااااان

بس خلصت اللعبة

جذي أكون خلصت معاكم من تغطية كااااافة أرجاء المدينة مع كافة أو أغلب العابها سواء للكبار أو للصغار
المدينة مو كبيرة وايد ، لكنها تحتاج لوقت مو أقل من 3 ساعات للاستمتاع فيها واللعب بألعابها

والحين يالله خلونا نطلع من المدينة
وهذا يويو أول واحد بيطلع

رأيي الشخصي :

مدينة هوليوود ستوديوز حلوه ، جيده جدا مو ممتازه
زينه وجميلة من ناحية الشكل والمباني ، العروض الي بالشارع حلوه
الشخصيات مناسبة للأطفال وفيها وايد شخصيات
فيها عدد قليل من الالعاب لكن المميزين فقط لعبتين ، باقي الالعاب مناسبين للأطفال أكثر من الكبار
طبعا ما تستاهل تخصيص يوم كامل لزيارتها لأنها مثل ما ذكرت مو كبيرة وايد لكن تستاهل الزيارة إذا كانت عندكم تذاكر الهوبر
انصح بزيارتها وبشده فقط إذا عندكم تذاكر الهوبر أما لو ما عندكم تذاكر الهوبر فما أنصح بتخصيص يوم كامل لزيارتها
الأفضل انكم تدمجون زيارتها مع مدينة أخرى من مدن ديزني لاند

وبعد ما خلصنا من مدينة ديزني هوليوود ستوديوز قررنا نروح المدينة الأخرى باستخدام طريقة أخرى للذهاب غير الباص
وهي طريقة الفيري أو بالزورق السياحي

خلكم معاي عشان نشوف باقي مدن ديزني لاند وبعدها تعطوني رايكم بمدن ديزني لاند كلهم

وإن شاء الله القادم أجمل

AL Tunaijiمعجبون بهذا.

فيصل · 16-03-2015, 06:57 AM

الاستديو اعتقد انه افضل للاطفال وممكن للكبار من خلال العروض
لكن يفرق عن باريس بكثير
خيرها بغيرها بزياره الحديقه علي الاقل زرتها علشان ما تقول ما زرناها

شارلوك هولمز · 16-03-2015, 07:36 AM

والله تقرير مرجع ودسم وكافي .. ماقصرت حبيبنا ابوسعود تسلم الايادي والله يحفظ لك الذرية

هولمز

أبو سعود Q8 · 18-03-2015, 12:54 AM

اقتباس : المشاركة الأصلية كتبت بواسطة شارلوك هولمز

والله تقرير مرجع ودسم وكافي .. ماقصرت حبيبنا ابوسعود تسلم الايادي والله يحفظ لك الذرية

هولمز

الله يسلمك أخوي عمار
شكرا على زيارتك للتقرير ومشاركتك فيه
والله يحفظ غاليك يارب

om dana · 17-03-2015, 01:59 AM

السلام عليكم
يعطيك العافية على التقرير الجميل.......... مجهود رائع و جبار وتقرير متعوب عليه.....الف شكر
انا متابعه تقاريرك من زمان وحابه اسأل بالنسبه للفنادق الثلاثه اللي سكنتهم في اورلاندو
ايش افضل سكن عجبكم بالنسبة لكم ؟ او اي اكثر واحد ارتحتو في؟

أبو سعود Q8 · 18-03-2015, 12:58 AM

اقتباس : المشاركة الأصلية كتبت بواسطة om dana

السلام عليكم
يعطيك العافية على التقرير الجميل.......... مجهود رائع و جبار وتقرير متعوب عليه.....الف شكر
انا متابعه تقاريرك من زمان وحابه اسأل بالنسبه للفنادق الثلاثه اللي سكنتهم في اورلاندو
ايش افضل سكن عجبكم بالنسبة لكم ؟ او اي اكثر واحد ارتحتو في؟

وعليكم السلام والرحمة
هلا اختي حياج الله بالتقرير والله يعافيج يارب
بالنسبة للسكن ، أكثر واحد عجبنا وارتحنا فيه هو البيت في منطقة كيسيمي
انا ليلحين ما حطيت صوره ولا شي
إن شاء الله بس أخلص من جزء ديزني لاند راح أحط لكم البيت وتشوفونه
تحياتي

juhema · 17-03-2015, 04:59 PM

تسلم عيونك ابوسعود ربي يبارك فيك ويحفظك انا عارف اني ثقلت عليك وغيرت خططك في كتابة تقريرك الف مليون شكر أبو سعود
رايي المتواضع وسامحني أبو سعود اعتقد والى الأن من خلال تقرير ديزني ان المدينة ممكن تكون مناسبة للأطفال اكثر اما بالنسبة لواحد مثلي عيالي كبار ما اعتقد ان ديزني مناسبة لهم
خصوصا ان تذاكر ديزني مبالغ في أسعارها وأيضا في اورلاندو فعاليات كثير في رايي افضل من ديزني
تقبل تحياتي وقبلاتي للأولاد ربي يحفظهم ويحميهم

مشاهدة نتائج الإستطلاع: ما هو تقييمك للتقرير لغاية الآن ؟؟
ممتاز	104	95.41%
جيد جدا	5	4.59%
جيد	0	0%
مقبول	0	0%
المصوتون: 109. أنت لم تصوت في هذا الإستطلاع

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رايحين اورلاندو ،، واحتاج مساعده	Hanadonh	بوابة امريكا	8	03-04-2015 03:18 AM
اورلاندو شهر 7+8	Mafio98	بوابة امريكا	6	18-03-2015 09:02 AM
شركه شحن في اورلاندو	Rainbow	بوابة امريكا	0	13-01-2015 09:38 AM