سياحة عائلية في اورلاندو الأمريكية

أبو سعود Q8 · 04-03-2015, 10:46 PM

السيارة :

انا أؤيد وبشده ما قاله بعض الاعضاء والمشرفين بأن أمريكا بدون سيارة ( بدون ما تأجرون سيارة ) ما تسوى !!
يعني السيارة ظرورية جدا جدا جدا في امريكا ، طبعا مو بكل الولايات مثلا بنيويورك ما تحتاجونها لكن بأغلب ومعظم الولايات السيارة ظرورية جدا جدا
لذلك بكل سفراتي كنت استأجر السيارة واستلمها على طول من أول ما اوصل بالمطار وأيضا بعد ما أخلص منها اسلمها بالمطار وارجع للكويت
في واااااااايد شركات لتأجير السيارات ، يمكن البعض يرتاح لشركة معينه أو البعض يكون مشترك مع شركة معينه بنظام الأميال والنقاط
بالنسبة لي جربت أكثر من شركة خلال سفراتي ( 5 شركات ) والي ارتحت لهم وأوصي فيهم هما شركتين
شركة ناشونال وشركة الامو ( رأيي الشخصي )
مثلا بالسفرة الأخيرة أجرت من شركة ألامو أكبر أنواع السيارات الي عندهم وعند استلام السيارة عطوني سيارة سوبربان ( التاهو الكبير الحجم ) جديده موديل 2015
تكفي لأكثر من 7 أشخاص وعدد كبير جدا من الشنط والأمتعة
كانت كاملة المواصفات ( نوعها ال تي زد LTZ ) وعجبتنا كلنا وخصوصا اليهال ( لأنهم جننوني بحوستهم داخل السيارة )
من مواصفاتها انها جديده ، كشناتها من الجلد ، اضواء LED خلفية وأمامية + أضواء نهارية LED ايضا
كاميرا خلفية مع حساسات ( سنسرات ) أمامية وخلفية ، فتحة بالسقف ، يمكن 6 مداخل أو أكثر لليو اس بي والأواكس
تشغيل عن بعد ، مقاعد منفصله ، نافيقيشن ( جهاز ملاحة منها وفيها ) وغيرها من المميزات
أجرتها لمدة 17 يوم بسعر 693$ دولار وهو ما يعادل 200 دينار تقريبا

يعني بحدود 12 دينار كويتي يوميا

هذي السيارة الي أجرتها

فاضية تنتظر الجناط

وهذي الحب كانت صافطة
يبيله سفره شبابية ونأجرها ....... ولا شرايك يا أبو حور

تفضلوا هذا موقع يبحث لكم عن السيارة في اغلب الشركات المشهورة
ويقارن بينهم من ناحية السعر والخدمات كالتأمين وغيره من الأمور
Billiger Mietwagen, Beste Preise Garantiert, Buchen Sie Heute! - rentalcars.com
بالنسبة لي دائما أحجز منه سواء لأمريكا أم غيرها من البلدان
وأسعاره رخيصة جدا مقارنة بباقي المواقع

ايضا في موقع ثاني نفس فكرته
Booking Car

وأسعاره مرات تكون ارخص من الموقع الأول ، لكن عيبه ان ياخذ فلوس بعملة اليورو !!

السكن :

تتميز اورلاندو بتوفر عدد كبير جدا من المنتجعات السياحية المناسبة للعوائل ، وهذي المنتجعات تتيح لكم الاختيار ما بين الغرف أو الشقق أو الفلل والبيوت
بالنسبة لي ( لأن معاي أطفالي ) أفضل السكن في بيوت أو شقق أكثر من السكن في غرف بالفندق
وهناك اسعار البيوت رخيصة جدا مقارنة بباقي الدول وحتى لو قارناها بباقي المدن ، تضل اورلاندو رخيصة بالسكن ( بكل شيئ رخيصة )
راح أعرض لكم الشقق والبيوت الي سكنا فيها خلال السفرتين لكن ما راح اعرضهم كلهم ورا بعض
عشان ما تملون
بخليهم على أجزاء ، كل جم يوم أحط لكم السكن الي سكنا فيه ومميزاته وعيوبه وموقعه على الانترنت
مع العلم ان باقي الاعضاء والمشرفين مو مقصرين بصراحه وكاتبين أكثر من موضوع عن أماكن السكن في امريكا
الله يعطيهم العافية

بسفرتي الأخيرة سكنت ببيت مؤلف من دور واحد ، لكن مساحته كبيرة جدا جدا وسعره رخيص جدا جدا
أجرت البيت من موقع بوكنق المعروف لأن سعره في بوكنق أرخص من سعره بموقعهم الرسمي
تفضلوا هذا موقع الشركة الرسمي على الانترنت
Homes4uu - Orlando Vacation Homes & Vacation Rentals

البيت كان موجود بمنطقة بعيده عن المعمعه ( بعيده عن السنتر ) لكن موقعه كان في مجمع سكني أو بين عدة بيوت خاصة للتأجير
كانت هناك بوابة حديدية وفيها رقم سري للدخول إلى هذا المجمع وذلك للمزيد من الأمن والأمان وهذا شي ممتاز
يتألف البيت من اربع غرف نوم ( وحده منهم ماستر مع حمام خاص فيها ) وتكرمون حمامين وصالتين ومطبخ مجهز بالكامل
وبلكونه وحمام سباحة خاص ومعزول عن الجيران
أيضا كان هناك كراج وفيه بعض الألعاب مثل البلياردو والبيبي فوت وغيرها
وغرفة صغيرة للغسيل ( فيها غسالة ونشافة )
الانترنت كان مجاني وسريع جدا جدا ومتوفر للبيت موقفين للسيارة
هذي بعض الصور للبيت

هذا الفريج أو الحي الي ساكنين فيه

هذي غرفة النوم الرئيسية

فيها منزع للملابس

وهذا تكرمون حمام غرفة النوم الرئيسية

هذي غرفة من غرف اليهال

وهذا حمامها تكرمون

هذي أحدى الصالات

طاولة الطعام

وهذي الصالة الثانية

وهذا المطبخ

هذي غرفة ثانية من غرف اليهال

مجهزة بالألعاب

وهذي غرفة اليهال الثالثة

هذا الكراج وفيه الالعاب الي قلتلكم عنهم
جدا مسلي البيت

هذي غرفة الغسيل

وهذي البلكونة

وهذا حمام السباحة مع الجاكوزي

مثل ما ذكرت بالسابق إني استأجرته من موقع بوكنق لمدة 8 ليالي ( 9 أيام ) بسعر 788$ دولار
وهو ما يعادل 226 دينار كويتي
يعني تقريبا 28 دينار بالليلة الواحده

بالنسبة لي أشوف السعر رخيص جدا خصوصا مع كل هذه المميزات ومساحته الكبيرة
( للعلم البيت في بوكنق كان مخصص لعدد 8 اشخاص ، يعني واسع وكبير ويتحمل اشخاص زيادة )

العيب الوحيد بالبيت ان مكانه شوي بعيد عن السنتر ، لما استأجرته كان مكتوب عليه ان موقعه قريب من الدزني لاند لكن بالواقع كان يبعد تقريبا 15 ميل عن ديزني

تذاكر الأماكن السياحية :

تتوفر التذاكر للمدن الترفيهية والأماكن السياحية في اورلاندو بكل مكان تقريبا
ممكن بالفندق الي ساكنين فيه انه يوفر لكم هذي التذاكر وبعض الفنادق في اورلاندو عندها خدمة التوصيل المجاني لبعض المدن الترفيهية
وممكن ان تقطعون التذاكر من المدينة نفسها عند بوابة الدخول
وممكن ان تلقونهم موجودين بأحد الأكشاك الموجودة في الشوارع المشهورة مثل شارع الانترناشونال درايف أو حتى في وول مارت
أماكن كثيره وعديده توفر هذي التذاكر
لكن بالنسبة لي شخصيا لقيت مكان يوفر لي هذي التذاكر بسعر ارخص من جميع ما سبق ويعطيني عروض تسويقية لبعض المدن والأماكن الترفيهية
وايضا يعطيني عناوينهم للجي بي أس ولو احتجت اي سؤال سياحي كانوا يردون علي بالشرح الوافي والكافي
هذا سلمكم الله محل متخصص ببيع هذه التذاكر واسمه

فزت اورلاندو

Visit Orlando

هذا موقعة على الانترنت :
Orlando Hotels, Restaurants, Things to Do & Vacation Guide

وهذي بعض الصور للمحل

على سبيل المثال ، مدينة يونيفيرسال ستوديوز لو تشتري تذاكر دخول المدينة يومين تحصل على اليوم الثالث مجانا
ومدينة السي وورلد لو لو بتروح لها فقط بأيام الأسبوع وليس للويك اند ( غير صالحة بيوم السبت والأحد وهي عطلة نهاية الاسبوع في أمريكا ) تحصل على خصم 30$ من سعر التذكرة عن بوابة الدخول
( يعني تكون تذكرتك أرخص ب 30 دولار من سعرها الرسمي عند بوابة الدخول بالحديقة )
وحتى مدينة الملاهي بوش قاردن ممكن توفر من سعر تذكرتها 25$ لو بتروح لها بالأيام العادية ( غير صالحة للويك اند )
ولو كنتم مخططين على المدن الترفيهية المراد زيارتها تقدرون تشترون الباكج الخاص بالحدائق مجتمعة مع بعض
مثلا في باكج لمدينة السي وورلد + بوش قاردن + أكواتيكا ( مدينة ملاهي مائية تابعة للسي وورلد ) هذي المدن لو بتشترون تذاكرها كل وحده على حده من البوابة الرئيسية
بيكون سعر التذاكر مجتمعين 165$ دولار ، أما لو اشتريتوا البكج من فزت اورلاندو بيكون سعرهم 119$ دولار
في واايد خصومات للعديييييييد من المدن الترفيهية والأماكن السياحية وحتى العروض والسيرك وبعض المطاعم الشهيرة و و و و و و الخ
باختصار كل شي سياحي ممكن ان تحصل عليه بخصم أو عرض أو هدية مجانية عند شرائك من محل فزت اورلاندو
للمزيد من المعلومات الافضل لكم زيارة موقعهم الرسمي ، او زيارة محلهم عند وصولكم إلى اورلاندو وهناك راح يشرحون لكم كل شي بالتفصيل الممل
لكم حرية الاختيار
بالنسبة لي شخصيا تعاملت مع هذا المحل بالسفرتين وان شاء الله لو بزور اورلاندو مرة ثالثه أكيد بروح اتعامل معاه وأشتري منه التذاكر
وكما ذكرت بالسابق في أكثر من مكان ومحل وطريقة تقدرون تحصلون منهم على تذاكر الأماكن السياحية ، يعني مو شرط تروحون فزت اورلاندو
عشان لا تقولون اني قاعد أسويله دعاية
كل واحد حر بقراره لكني ذكرت هذا المحل من باب التجربة والنصيحة الأخوية لا أكثر ولا أقل

كل هذا كان مقدمة للتقرير
وبالأجزاء القادمة راح اتكلم عن الأماكن السياحية الي زرناها في اورلاندو

AL Tunaiji و الشعباوي معجبون بهذا.

مشاهدة نتائج الإستطلاع: ما هو تقييمك للتقرير لغاية الآن ؟؟
ممتاز	104	95.41%
جيد جدا	5	4.59%
جيد	0	0%
مقبول	0	0%
المصوتون: 109. أنت لم تصوت في هذا الإستطلاع

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رايحين اورلاندو ،، واحتاج مساعده	Hanadonh	بوابة امريكا	8	03-04-2015 03:18 AM
اورلاندو شهر 7+8	Mafio98	بوابة امريكا	6	18-03-2015 09:02 AM
شركه شحن في اورلاندو	Rainbow	بوابة امريكا	0	13-01-2015 09:38 AM