اليابان .. الحُلم الذي اصبح حقيقة + يوم ونصف في كوريا - الصفحة 2

bashayr · 23-08-2017, 07:54 PM

اقتباس : المشاركة الأصلية كتبت بواسطة Abdulmo7sen

تقرير احترافي ما شاء الله
متشوق للجزء الثاني واتمنا ينزل بأسرع وقت
لإننا مسافرين لليابان بعد بكره
والحماس وصل لحد الانفجار

ماشاء الله تنبسطو يارب وترجعو بالسلامه.. شكراً لردك وبإذن الله ✨

Prince Kytu, فيصل و توبليرون معجبون بهذا.

فيصل · 04-09-2017, 09:03 AM

اقتباس : المشاركة الأصلية كتبت بواسطة Abdulmo7sen

تقرير احترافي ما شاء الله
متشوق للجزء الثاني واتمنا ينزل بأسرع وقت
لإننا مسافرين لليابان بعد بكره
والحماس وصل لحد الانفجار

توصل بالسلامه
لا تنسي تثري البوابه بحاجه عن أي معلومه عن اليابان والسكن كذلك

Prince Kytu و توبليرون معجبون بهذا.

bashayr · 29-08-2017, 10:28 PM

السلام عليكم
نكمّل الجزء الثاني ...

يوم 3 يوليو عملنا check out وخرجنا لمطار Haneda حتى نروح لـ Sapporo
تفاصيل الرحله كالتالي :
الذهاب 3 يوليو من مطار haneda الوصول لمطار New Chitose
العوده 6 يوليو من مطار New Chitose لمطار Haneda بطوكيو
الخطوط SKYMARK اليابانيه

وطريقه الحجز وقتها كلمت المسافر فـ بلغوني انه مافي امكانيه لحجز رحلات داخليه دوليه وحجزت عبر موقع opodo
السعر للـ 4 اشخاص2621.89 وعموله الموقع 594 :
مستقبلاً تقدرو تطّلعو فقط على الرحلات المتاحه في الموقع وتحجزو من موقع الخطوط نفسها وراح يكون ارخص بحيث أنه مافي عموله
بالنسبه للرحله كانت بدون شنط فقط حقيبه العمل وكان من موقع opodo خيار انه نضيف سعر لكل راكب حتى يكون معانا شنط مايتعدا وزن الشنطه الوحده 20 كيلو وهذا اللي لازم تنتبهو له وقت الحجز

من الطريق لمطار هانيدا

موقف حصل معانا :
لمن كنا بالقطار قابلت يابانيه وكنا نتكلم معاها لمن قربنا من المطار سالتني عن أي terminal راح ننزل ووقتها ماركزت وصرت افتح اوراق الحجز واقولها اسم الخطوط وماهي عارفه كمان ف كان واحد جالس جنبنا كمان الا قال انتو terminal 1 وورانا جواله طلع يبحث معانا من لما اتكلمنا وساكت .. نزلنا ونزل هوا معانا لانه راح يروح لنفس الوجهه بس على خطوط ثانيه ووصّلنا لعند مكان الخطوط حقتنا شكرناه وراح لطريقه والحمدلله اللي انتبهنا باللحظه المناسبه

في المطار كانت الاجراءات سريعه وماطولنا
لاتيه ماتشا وحبيت الطعم

المطار كان فيه طاولات على جنب للي معاهم لابتوبات ومتوفره شواحن ويبغو يشتغلو براحه

الطياره ماكان فيها وجبه مناسبه كمان واعتذرو وأخذت دايفوكو بالشمام ( كان وقتها موسمه لانه بكل مكان ) + كتكات وبعد مااتاكدنا من المكونات اكلناها

أول ماوصلنا hokkido كان مطر
ركبنا باص بسعر 1200 ين للشخص الواحد وراح يوقف في سابورو قريب من منطقتنا ( 10 دقايق مشي )

أول ماوصلنا Sapporo رحنا لمحل ramen قريب من فندقنا اسمه halal ramen susukino
اول مادخلنا صارو يرحبو فينا واعطونا المنيو الحلال وكانت 4 انوع رامن + جيوزا ( زي المنتو حشوه جوتها لحم وطعمها لذييذ مره )

اخذنا طبق رامن كبير + 2 جيوزا
كان الطعم لذييذ لكن الجيوزا سبايسي للي مايحب الاكل الحار

كان وقتها الساعه 6 المساء ورحنا للفندق Tmark hotel الفندق فيه موظفين يتكلمو انجليزي ووحده كانت تتكلم معانا شويه عربي ( تقول صحبتها عربية وعلمتها كلمات ) اجمالي السعر لـ 3 ليالي 2956 ريال
اجراءات الدخول كانت سريعه والجناح كان عباره عن غرفتين ( غرفه فيها سريرين + غرفه فيها فوتونات + المويا في المغاسل من جبل قريب وصالحه للشرب )
مساحه الغرف في الفندق واسعه والمكان حولينه هادىء جداً
يعيب الفندق ان حولينه اماكن مظلمه ومافي انارات ومن وقت ماتغرب الشمس ينتشرو جماعات يدخنو ويجلسو بتجمعات لكن كل واحد في حاله وماشفنا منهم شيء

بعد ماارتحنا شويه نمنا لانه من الصباح عندنا رحله لـ furano

يوم 4 يوليو ( Furano )
كانت الخطه نروح بالقطار ونرجع لكن بعد مارجعت لجدول القطارات آخر قطار يخرج من فورانو 3 الظهر تقريبا
كان الخيار الثاني نستأجر سياره لكن بعد البحث في مواقع تأجير السيارات كانت القيمه مايقارب 1500 ريال والطرق السريعه لها رسوم حسب ماقريت ولازم قبل مانرجع السياره نعبي البانزين كامل
فـ بدأت اشوف ايش الاماكن اللي نبغا نروحلها وانحصرت في ( مزارع – مصنع الجبن والحليب )
فـ لقيت اختي موقع يعمل نشاطات في اليابان ورحلات سياحيه ولقيت منها رحله تخرج من سابورو لفورانو بالباص مع مرشد سياحي وخط سيرها زي مانبغا وحجزتها من قبل شهر من الرحله ( لانه اوقات مابتكون فيه رحلات متاحه )

هذ الموقع Veltra https://www.veltra.com/en/ ( في هذا الموقع رحلات لعدّه مدن في اليابان ودول اخرى ممكن تستفيدو منه )

اسم الرحله : Highlights of Furano and Biei Full Day Bus Tour from Sapporo والسعر لـ 3 اشخاص 821:56 ريال شامله المواصلات والارشاد السياحي ( كاتبين شامله الغداء ورسلتلهم ايميل استفسر عن نوعيه الاكل واعتذرو انه بالغلط والرحله ماتشمل وجبات بس ماشالوها للآن من موقعهم )

كانت الخطه انه الانطلاق8:50 دقيقه في فندق Hotel mystays premier Sapporo park ونكون موجودين قبل الموعد بـ 10 دقايق
اللي صار انه خرجنا من 8:30 من الفندق حقنا والفندق الثاني قريب مايبعد الا 9 دقايق مشي
بعد المشي على الجي بي اس الساعه 8:45 اتضّح أنه يخبط وحاولت اتصل عليهم ابلغهم بالتأخير ولو راح يمشو نجدولها على بكرا لان الباص يخرج كل يوم ومارضي الخط يمسك معايا
فقلنا بنروح ونكلم نفس الفندق لو عندهم فكره عن مكتبهم السياحي او فيه مندوب للشركه عندهم وكنا نحتاج 15 دقيقه علبال مانوصل
واحنا قريب الساعه 8:55 اتصلو عليا وكنت اقولهم اني جايه وممكن نجدولها على بكرا بس اتخيلو انتظرونا لمن وصلنا 9:01 وركبنا الباص

من الطريق

كيكه بالشمام اخذتها من السوبر ماركت

خطه السير زي ماهي موضحّه

في البدايه وقفنا عند سوبر ماركت كبير وكان معانا 20 دقيقه واسمه Sunagawa Hignway Oasis

اشتريت علبه تشيز كيك والمكونات كلها من فورانو زي مابلغتني الموظفه وحبيت طعمه وسالتها عن صلاحيه العلبه وطلع شهر

السوبر ماركت كبيير جداً وفيه قسم لمنتجات الحليب والفواكه كلها من محاصيل المزارع القريبه

قسم للنباتات

قسم للتذكارات والهدايا واعتقد أن هذي شخصيه المدينه ( في اليابان كل محافظه تقريبا او مدينه تكون معروفه بشخصيه خاصّه فيها وترمز لها )

أول ماوصلنا فورانو

اتوجهنا لاول مزرعه وكان الوقت المسموح فيها 70 دقيقه واسمها Shikisai no Oka

كانت المزرعه اقل ازدحام واول ماندخل المحلات منتشره عاليمين واليسار وبعدها حقول فقط
بعد مامشينا نص ساعه تقريبا رجعنا نتسوق من المحلات
كانو يبيعو ذره من انتاجهم وكانت ألذ ذره ذقتها فعلا طعمها غييير وندمت انه مااخذت ثانيه لانه اتوقعت الاقي في المزرعه الثانيه بس طلع مافي

هذا محل الذرة

كان وقتها موسم اللافيندر فأخذنا صابون باللافيندر برضو من انتاجهم + كوكيز + كيك اسفنجي وكلها لذيذه فعلا
كان عند البوابه مكان مخصص للدبابات وكل لفه 15 دقيقه + اطعام حيوانات اللاما ولضيق الوقت ماقدرنا نجرب منهم شيء

بعدها خرجنا بالاتجاه للمزرعه الثانيه Farm Tomita واللي كانت اكثر شهره بين الناس وازدحامها شدييد جداً والمزرعه حجمها اكبر والمحلات منتشره بكل جهه عكس المزرعه السابقه وكان الوقت المسموح فيها 80 دقيقه

اول مادخلتها جذبني ايسكريم باللافيندر واخذت منه ومره طعمه جميييل

وكان جنبه محل كل اشياءه لافيندر ( صوابين – كريمات – فواحات – عطور – حتى مناديل واوراق ودفاتر برسمات لافيندر ... الخ )
آخذنا عطرين واحد مركز وواحد خفيف وبعدها كملنا على الحقول والمحلات
وفيه محل حلويات آخذنا منه بودينع ونوع حلى مااعرف اسمه
كانو يبيعو تذكارات – منحوتات – شتلات لنباتات متنوعه – غير المحاصيل من رز – شمام – طماطم – اجبان واتمنيت لو نقدر نشتري منها بس صارت الاكياس كثيره وماراح نقدر نشيلها كلّها

يبيعو شمّام عالي الجوده وينباع في صناديق خاصه وواحد صغير بعد ماحولت العمله طلعت قيمته 20 الف ريال !!!
( الفواكه مُتعارف عندهم انهم يهدوها وتوصل لمبالغ عالية ويحطوها في صناديق فاخره جداً )

من الطريق

بعدها اتوجهنا لمصنع الجبن Furano Cheese Factory 30 دقيقه

وأعطونا وقتها ايس كريم حجم عادي مجاناً لكل شخص
أول ماندخل المصنع نشوفهم وهما يصنعو الجبن وفيه درج فوق يبيعو المنتجات وفيه عينات للتجربه + كمان يبيعو معدّات صناعه الجبن + اواني واكواب وعلى الجهه الثانيه حاطين صور ومعلومات عن المكان وكيف أول مابدأو صناعتها

جبنه بحبر اسود مااعرف ايش هوا بس مااستسغنا الطعم مره كان حامض ومر في نفس الوقت
النوع الثاني من الجبنه كان مالح بزياده

اخذنا حليب وخرجنا نآخذ الايسكريم
كان جنبه محل بيتزا وشكله مشهي مره بس لما رحنا اعتذر وكان يقفل من 4 ووقتها كانت 4:30
دخلنا محل الايسكريم واخذنا 2 واحد بالشمام وواحد بالحليب وحبيت الشمام اكثر

بعدها خلاص راح نرجع لـ Sapporo
آخر 15 دقيقه وقفنا فيها كانت عند مكان جنّه الله في ارضه ( مساحات شاسعه باللون الاخضر وحديقه كلها ورود وفيها نباتات وكان شكلها خرافي والجو كان بارد )
دخلنا السوبر ماركت وأخذنا مويا لانه مانحتاج شيء ثاني وبعدها اتمشينا في الحديقه لما انتهى الوقت

رجعنا تقريبا 7 او 8 المساء ماافتكر بس كانت رحله مره جميله والمرشده يابانيه وتتكلم شويه انجليزي وكانت الرحله مريحه من ناحيه التنقلات وحتى لمن كنا بالباص لاحظت انه مافي باصات تتحرك كثير فااعتقد انه التنقلات بين الاماكن راح تكون صعبه او جدول الباصات راح يتحرك مرات محدده باليوم

لما وصلنا سألنا الفندق عن اقرب محل فيه غسالات بالعملات لان وقتها الفندق ماكان فيه خدمه الغسيل والتجفيف
ووضحولنا اقرب محل يبعد 5 دقايق مشي
بس لما رحنا له كان سعره جداً مختلف عن اللي بطوكيو غسيل وتجفيف بـ 1000 ين أو 800 ين حسب نوع الغساله
وكانت هيا المتاحه وأخذنااها ورحنا نتمشى علبال ماتنتهي وبكذا انتهى اليوم

يوم 5 يوليو
رحنا لمركز تسوق Tanukikoji وقضينا فيه اليوم كامل

هذا المطعم اللي اتغدينا فيه

صورت كل شيء ماعدا الاطباق ( كانت ذرة مشويه – اخطبوط – سمكه مشويه )

الساعه 5 قررو يرجعو كلهم وانا لسا كان فيني طاقه فـ استأجرت دراجه من porocle ورحت لحديقه Odori park وجلست ساعتين ورجعتها لهم
طريقه الحجز انه تروحو لمكتبهم وكان قريب من مركز التسوق 6 دقايق مشي وتعبّو استماره ويكون معاكم جواز السفر والعمر فوق 18 بعدها يعطوكم بطاقه تقدرو تستخدمو فيها الدراجه لمدّه يوم أو نص يوم حسب اختياركم وآخر موعد ترجعوها 9 المساء ولهم أكثر من موقع في سابورو وتقدرو ترجعو الدراجه في أي موقف لهم قريب منكم مو شرط نفس اللي اخذتو منه الدراجه ووقتها اخذت حق نص يوم بقيمة 19 ريال تقريباً
طريقتها انكم تمررو البطاقه عند الدراجه اللي اخترتوها وتطلع ووقت ماترجعوها نفس الشيء تحطو الدراجه أول وبعدها البطاقه وتتثبت وجنب المواقف فيه صندوق صغير ترجعو فيه البطاقه وكمان يعطوكم بروشورات عن طريقتها وموضّحه بالصور

بعد اللف الطويل حسيت بجوع ورحت ادور أكل وكان فيه كافي حفظت اسمه في خريطه قوقل قريب من موقعي لكن لما بديت اروح لاحظت الطريق ظلام وبديت أدخل من دخلات مافيها ناس كثير والمكان مايريّح وناس تدخن ولأني لوحدي رجعت ورحت لمحل الرامن اللي قبل وطلبت جيوزا وفالاخير رجعت للفندق

الفندق فيه مكائن لبيع الايسكريم والمشروبات

يوم 6 يوليو عملنا check out ورحنا بإتجاه موقف الباص عشان نروح للمطار ومن هنا بدينا نحس بالتعب لان الشنط بدأت تثقل وتتعبى
لما قربنا من المكان بدأت الخريطه تخبّط ( وهذي صارت لنا بشكل متكرر اكثر من مره بحيث أنه المؤشر يعلّق ويبدا يلفلف فكل اتجاه ودخلنا محل كأنه لصناعه الكيمونو أو تأجيرها ) وسالناهم وخرجت وحده معانا تورينا الطريق وكان على بعد شارعين وراحت معانا ووصلتنا الين الموقف تبع الباص

فالاخير وصلنا للموقف وجاء الباص ودانا للمطار ومنها لمطار haneda وكان الوقت عصر في طوكيو
وحأكمل الباقي في وقت ثاني بإذن الله ..

Prince Kytu, ali pontiac, AL Tunaiji و 4 آخرون معجبون بهذا.

Prince Kytu · 30-08-2017, 12:24 PM

وعليكم السلام أختـي
جزء رائع واستفدت منه وعرفت أماكن ما زرتها من قبل
خصوصاً مصنع الجبن شكله ممتع وإن شاء الله لي زيارة له بالمستقبل

مطعم الرامن هذا خرافي تمنيته يكون بمنطقة قريبة نفس طوكيو أو أوساكا لكن للأسف موجود بـ سابورو البعيدة
وبالنسبة للمزرعتين أي وحدة فيهم كانت الأفضل ؟
ويعطيج العافية أختـي على التقرير الجميل
متابع

AL Tunaiji, فيصل و توبليرون معجبون بهذا.

bashayr · 30-08-2017, 08:22 PM

اقتباس : المشاركة الأصلية كتبت بواسطة Prince Kytu

وعليكم السلام أختـي
جزء رائع واستفدت منه وعرفت أماكن ما زرتها من قبل
خصوصاً مصنع الجبن شكله ممتع وإن شاء الله لي زيارة له بالمستقبل

مطعم الرامن هذا خرافي تمنيته يكون بمنطقة قريبة نفس طوكيو أو أوساكا لكن للأسف موجود بـ سابورو البعيدة
وبالنسبة للمزرعتين أي وحدة فيهم كانت الأفضل ؟
ويعطيج العافية أختـي على التقرير الجميل
متابع

اهلا وسهلا
مصنع الجبن راح تنبسط فيه خصوصاً لو جيت وقت ابكر حتى تجرب البيتزا اللي من صنعهم شكلها كان شهي جداً 😍
المزارع كلها انصح بزيارتها
الاولى هادئة وتقدر تتأمل الحقول وتتمشى براحة ومافيها ازدحام كثير ويعيبها قل المنتجات اللي يبيعوها لكن المزرعه الثانيه المحلات اللي فيها متنوعه وتقدر تشتري كثير من منتجات المزرعه لكن يعيبها الازدحام حتى وقت مابتدخل للحقول تضطر اوقات تنتظر حتى تعدّي وبنظري ماتقدر تتمشى براحه ولازم تمشي سريع عشان اللي وراك يلحق يشوف
بس مااعرف لو اوقات بتكون فاضيه لكن واضح انها شعبيه حتى الباصات فيها كانت اكثر من اللي قبلها👍

Prince Kytu, فيصل و توبليرون معجبون بهذا.

ali pontiac · 31-08-2017, 04:45 PM

ماشاءالله باين عليك زايره اليابان من قبل و عارفه كل شي فيها

اول مره اعرف بهذي المناطق الي زرتيها.

متابع.....

Prince Kytu و توبليرون معجبون بهذا.

bashayr · 31-08-2017, 09:28 PM

اقتباس : المشاركة الأصلية كتبت بواسطة ali pontiac

ماشاءالله باين عليك زايره اليابان من قبل و عارفه كل شي فيها

اول مره اعرف بهذي المناطق الي زرتيها.

متابع.....

اهليين، حقيقةً هذي زيارتي الاولى لليابان وبإذن الله تكون مقدمة للزيارات الجايه
الاماكن السياحية اغلبها استفدت من تقارير ومشاركات اللي ذكرتهم في بداية التقرير وغيرهم الكثير من اللي ما اسعفتني الذاكرة بتذكرهم ولهم جزيل الشكر على مجهوداتهم لتسهيل رحلتنا وغيرنا الكثير 👍✨
شكراً لمتابعتك وبإذن الله تستفيد..

Prince Kytu, فيصل و توبليرون معجبون بهذا.

كتكات783 · 02-09-2017, 12:55 PM

الله عليك ... الله عليك ... يابشاير

من البداية ( الجزأين ) استشعرته تقريراً سيُخلَّد بالذاكرة .. كُتِبَ باحترافية ..

التفاصيل هي من تضفي على التقرير جمالاً وقوةً .. بوركت يمينك .. وما تثبيته إلا دليلاً ..

استمري على هذا النهج .. وثقي بأن التعب آخره ثمرات تستحق ..

دوماً هنا بانتظار إطلالةٌ جديدة ..

Prince Kytu, فيصل و توبليرون معجبون بهذا.

bashayr · 02-09-2017, 02:31 PM

اقتباس : المشاركة الأصلية كتبت بواسطة كتكات783

الله عليك ... الله عليك ... يابشاير

من البداية ( الجزأين ) استشعرته تقريراً سيُخلَّد بالذاكرة .. كُتِبَ باحترافية ..

التفاصيل هي من تضفي على التقرير جمالاً وقوةً .. بوركت يمينك .. وما تثبيته إلا دليلاً ..

استمري على هذا النهج .. وثقي بأن التعب آخره ثمرات تستحق ..

دوماً هنا بانتظار إطلالةٌ جديدة ..

اهلييين.. شكراً لردك اللي مرة فرحني 😍 ،، وسعيدة بإنه التقرير نال على استحسانك وبإذن الله يستفيدو المسافرين منه 🌸

Prince Kytu, فيصل و توبليرون معجبون بهذا.

فيصل · 04-09-2017, 09:16 AM

وعليكم السلام ورحمة الله وبركاته
حلو ذكر تجربتك مع المسافر للأسف البعض لما تدفع ينساك
الحمدلله لحقتو علي رحله دبي
زين بما أنه يوم ونص ليش أخذتي المودم حق 3 أيام هل هي أقل مده
ما قريتي في بوكينق ان التوصيل مجانا للفندق من المطار
جميل هالفندق كل شيء مجانا مويه توصيل
ما شاء لله خدمه جميله من الفندق حقيقه والحمدلله وصلت الشنط
جميل تعاملهم بالطائره بخصوص الوجبه
1090 ريال للمودم ألا ترين أنه كثير المبلغ
هل لا يوجد شريحه بيانات مفتوحه
ايام الاجازه للدوله السائح يتضايق حقيقه بسبب كثافة تواجدهم بالأماكن السياحيه غالبا
سعر الأكل البحري رخيص
كذلك سعر القطار
اغلاق المحلات بدري كان مغلق لكم أم لا
جميل تجربه العربه
جميل خدمة الشعب حقيقه
الانتباه جميل لأي مبني
انواع الشاي غريبه اتذكر دائما تقارير البرنس

الاماكن المظلمه عند الفندق لو ما كان يعملوا شيء احسه موحش للعائله او المسافر بمفرده
غريبه كاتبين شامله الأكل وأعتذروا ولا شالوها
انتظارهم لكم حقيقه محل تقدير
مبلغ عالي مره للفواكه
أحس الوقت للرحله ما كفاكم سريع سريع
جميل والله تجربي الدراجه
ما شاء الله عليك بشاير
جميل ما كتبتي متابعين بشغف

Prince Kytu, ali pontiac و توبليرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
باقي سنة ونصف من مدة فيزا اميركا السياحيه	blue@sky	فيزا امريكا	6	29-10-2017 03:38 AM
تطوير منطقة الأهرامات ...مشروع الحلم الذي أصبح حقيقة	تونسية متنقلة	بوابة مصر	13	21-05-2016 12:47 PM
أسئلة دقيقة..	نوح	بوابة اثيوبيا	5	04-06-2015 03:57 PM
اليابان البلد الذي لايضيع به شيئا ( المفقودات )	وليد عنبه	البوابة السياحية	28	06-05-2015 11:29 PM