رحلة أوروبا - شتاء 2019

Abu Sultan1111 · 21-11-2020, 07:38 PM

ونكمل ...

بمجرد وصولنا إلى برنغ بقينا نتمشى في القرية إلى أن كل اللي في القرية عرفوا أنه فيه سياح في بيت جارهم أيخر ههههههه

هذا سطح الجراج بجانب المنزل ، ممتليء ثلج ، هنا فيه تراس وعدة شواء استخدمناها في ربيع 2017 ولكن بسبب تراكم الثلج ما فيه مجال نستخدمها .

منزل العطلات مجهز بكل شيء تقريباً ، فيه ماكينة قهوة وهذا شيء أحبه كثير

وفيه كرسي يتعدل بشكل كهربائي ، جميع التجهيزات اللي في البيت راقيه

الذهاب إلى انترلاكن في المساء كان بشكل يومي

وفي صباح اليوم الثاني ، التمشية في القرية أول شي اسويه بعد الفطور

بعدها ذهبنا إلى قمة غلوغوس Glogghüs تبعد عن برنغ بحدود 15 كيلو فقط ، التزلج والغداء كان هناك . التزلج في غلوغوس كان على الزلاجات Sledge وطبعأً أنا أرافق الأولاد فقط لأكون معهم وما أٌقصد التسلية أبدأً

بعد ما أخذنا الزلاجات وقفنا أمام مسار التزلج وخلفه مباشرة المطعم والناس جالسين بأعداد كبيرة وأنا منحرج لأنه لو طحت كلهم بيشوفوني والأولاد نزلوا ولازم ألحقهم وشوي أجلس على الزلاجة وشوي أقوم عنها واطالع للناس الجالسين خلفي مباشرة ، وقلت بنفسي هذولا أوروبيين كل واحد في حاله ما دروا عني بنزل وخلاص وأول ما تحركت الزلاجة سمعت صوت قوي من كل الناس الجالسين "هييييييييه" وتصفيق وانا نازل منحرج وطبعاً ما فيه مجال اطالع وراي اشوف وش السالفة طلعوا كلهم يراقبوني يشوفوني انزل أو لأ ... الغريب أن الصوت جاء من عشرات مستحيل كلهم يعرفون بعض علشان يتفقون على الحركة هذي .... اختلط الأحراج بالخوف واقول بنفسي ما راح اطيح واخليهم يضحكون علي ومع أول منعطف زحفت خارج المسار طارت القفازات مني لأني كنت ابي اتمسك بأي شي .... طالعت فوق كانت المسافة بعيدة ما فيه مجال أشوف أحد أخذت القفازات وتأكدت أن جوالي بجيبي ورجعت أكمل التزلج

اللي لاحظته في هذي القمة أن مسار التزلج في البداية منحدر وفي بعض الأماكن تضطر تمشي وبعدها تجي منحدرات قوية لازم تطيح من الزلاجة وبسبب أنه أحيانا نمشي وأحياناً نتزلج فكيت الحبل اللي يربط الزلاجة بالساق والأولاد سبقوني وأنا طحت وراحت الزلاجة عند بيت بمنحدر قريب وقفها الشجر اللي عند البيت ونزلت اجيبها ويطلع لي كلب من البيت وكل ما أقرب خطوه يقرب أكثر كأنه يقول إذا رجال تعال قرب ، وقفت أنا والكلب يمكن ربع ساعة أقرب وهو يقرب واذا نبح رجعت خطوة وهكذا إلى أن شافني شايب عند بيت مجاور ويكلمني من بعيد ما قدرت أعرف هو يتكلم انجليزي أو ألماني الظاهر أنه كان يقول لي رح خذها لا تخاف وأنا أقوله (إش كان نيشت - إش كان نيشت) يعني ما أقدر وما أدري هو يسمعني زين أو لأ ، جلس الرجل وقعد يراقبني وأنا تشجعت لأنه في أحد قاعد يشوف المشهد على الأقل وشوي شوي إلى أن وصلت للزلاجة وأخذتها وقعدت أصعد على أربع قبل لا تصيب الكلب نوبة شجاعة ويلحقني وصلت منحدر التزلج بعد جهد وتعب... كان من المواقف اللي ما أنساها.

أكملت التزلج وبعد فترة لقيت الأولاد ينتظروني عند مفرق طرق ويقولون لي إذا تأخرنا كذا لا تنزل معنا مرة ثانية

قعدت اطالع في مفرق الطرق وما كان معي خريطة واخترنا طريق واستعدينا ننزل معه وبنفس الوقت مروا ناس يتزلجون وأخذوا الطريق الثاني ، قلنا نلحقهم أكيد التلفريك بهذا الأتجاه ونتزلج وراهم إلى أن نزلنا في قرية صغيرة ونطالع ما فيه تلفريك وشوي جت سيارة وأخذوا الناس اللي لحقناهم وقعدنا حنا نطالع لبعض وسألت واحد عن مكان التفلريك وقال امش مع هذا الطريق (صعود) مدة 20 دقيقة ويجيك التلفريك على يدك اليسار .... ياحبيبي مشي 20 دقيقة صعود واسحب مع زلاجة .... ما كان فيه حل ثاني مشينا إلى أن وصلنا مكان التلفريك ولما رجعنا كان هذا كله استغرق منا بحدود الساعتين من وقت نزولنا ، تغدينا في القمة وبعدها نزلنا مرة ثانية لكن هذي المرة أخذنا المفرق الثاني لأنه يوقف عند التلفريك

في الليل كان التجول في انترلاكن

في صباح اليوم الثالث ، وبعد الفطور والقهوة والتمشية في القرية اتجهنا إلى انترلاكن وكانت الخطة أننا نطير بالبراشوت.

هذا منظر الصقيع على قزاز السيارة

هذي البنت كانت تطير معها المدام في سفرات سابقة ،

أفراد العائلة اللي تنطبق عليهم شروط الطيران بالبراشوت أربعة .... طلعنا إلى قمة الجبل ، تعرفون محطة القطار في وسط انترلاكن بجانب النهر ، هذا الجبل يقع أمامها مباشرة . انقسمنا قسمين قسم يطلع بالباص إلى الجبل وقسم يبقى على الجلسات مقابل النهر يشاهد نزولنا .

يتبع ....

AL Tunaiji, توبليرون, q8ya metnaqla و 1 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلة كازخستان صيف 2019	دار الظبي	بوابة الدول الاخرى	24	01-06-2022 02:52 PM
رحلة أوروبا - شتاء 2020	Abu Sultan1111	بوابة المانيا	36	21-11-2021 12:06 PM
رحلة تركيا 2019	ابو ماريا	بوابة تركيا	48	01-02-2021 02:45 PM
رحلة لعدة دول في أوروبا	Bu Rashid	البوابة السياحية	14	01-03-2020 08:38 AM
محتاج جدول رحلة شتوية ل أوروبا وخصوصاً ألمانيا	الفيصل	بوابة المانيا	3	06-12-2017 07:04 PM