بعد التحية والتقدير للأحبة أعضاء وزوار المنتدى الرائع..
أتشرف بكتابة تقريري الأول عن مدينة "كيب تاون" في منتدى المسافرون العرب، أو ممكن أقول يومياتي المتواضعة، لأنه لا يرقى أن يكون تقرير، مجموعة أيام فيها ذكريات عن أماكن، ومواقف، ومشاهدات حبت أنقلها لكم هنا، في المنتدى الرائع اللي يجمع نخبة مميزة من الأخوات والإخوة الكرام، اللي استفدنا منهم وخبرتهم في معظم رحلاتنا، فلهم منا كل الدعاء والشكر والتقدير..

كيب تاون
رحلة الأيام الستة من 29 يوليو حتى 4 أغسطس لجنوب إفريقيا، وتحديدا مدينة "كيب تاون" الفاتنة، الرحلة كانت مفاجئة، دون تخطيط مسبق، يعني كانت قبل الرحلة بعشرة أيام تقريبا، الحقيقة كنا محتاجين سفرة سريعة تغيير جو، والابتعاد عن الضغوطات، فكرنا في مدن ما سبق زرناها، خاصة المدن الساحلية مثل أنطاليا، شرم الشيخ، المالديف، بالأخير شفنا إن كيب تاون بتكون خيار جيد، وإضافة كونها بالقارة الإفريقية اللي ما سبق زرنا فيها إلا مصر الحبيبة بس، والأجواء باردة لأن عندهم فصول السنة مختلفة، صيفنا شتائهم، والعكس بالمثل، إضافة إلى أن جنوب إفريقيا بدون فيزا، وقارة غامضة بالنسبة لنا، وبعد التشاور مع المدام قررنا تكون الوجهة كيب تاون.

الاستعداد للسفر
بديت البحث عن الخطوط المناسبة للحجز وأقارن الأسعار، الحقيقة الخيارات ما كانت كثير، حصلت رحلات على "القطرية"، و"الاتحاد"، و"الإثيوبية"، وكانت الأسعار متقاربة بشكل كبير، و"السعودية" اعتقد تروح على جوهانسبرغ بس، والفرق كان في الترانزيت، كانت في خطوط الطيران الخليجية مدة الانتظار ساعات طويلة، بس في "الإثيوبية" ساعات انتظار أقل بكثير في "أديس أبابا"، في الذهاب كانت ساعة بس، والإياب ثلاث ساعات ونصف في جوهانسبرغ، ثم أديس أبابا ساعتين، توكلنا على الله، وتم الحجز على "الإثيوبية" بسعر 3.060 التذكرة الواحدة لشخصين لي والمدام، بخط سير ذهاب (الرياض، أديس أبابا، كيب تاون)، والإياب (كيب تاون، جوهانسبرغ، أديس أبابا، الرياض).

بعد الانتهاء من حجز تذاكر الطيران، بدينا رحلة البحث عن الفندق المناسب، ووقع الاختيار على فندق "حياة ريجنسي"، 6 ليالي، وكان إجمالي سعر التكلفة 2500 ريال تقريبا، والحجز كان من خلال موقع "بوكينغ"، والمبلغ يعتبر جدا معقول بالنسبة لفندق خمس نجوم، و6 ليالي، الفندق كان رائعا حقيقة بكل المقاييس، موقعه كان في وسط المدينة تقريبا، فخم، متوسط الحجم، خدمته كانت ممتازة، موظفينه بشوشين وخدومين جدا، خاصة موظف في الاستقبال كان اسمه أبو بكر الله يسعده من أول دقيقة وصلنا للفندق مبتسم جدا، ويعرض المساعدة في التعريف بالمدينة، وعمل الحجوزات لأي مزار أو جهة نبيها.

مع حجز الفندق بديت أبحث عن السيارة المناسبة، ووقع الاختيار على شركة "فيرست 1" من خلال موقع "بوكينغ" أيضا، حجزت السيارة مدة خمس أيام، حبيت أرجعها قبل رجعتي بيوم، بعدا عن أي تأخير أو تعقيد ممكن يقابلني، وبالفعل حجزت السيارة بسعر اعتبره ممتاز 666 ريال ل5 أيام، والاستلام والتسليم يكون من مطار كيب تاون.

ماشاءالله رحله سعيدة وان شاءالله تتكرر دايما
نشكر جهودك في ذكر تقرير عن سفرتكم
نصايح جميله ومعلومات مفيده

الوصول لمطار أديس أبابا والأجواء كانت رائعة


وهنا لحظة وصولنا كيب تاون


بعد استلام سيارتنا وبعد خروجنا من المطار








مواقف السيارات كانت في بيدروم الفندق


الورود كانت في استقبالنا في الفندق لحظة الوصول



اليوم الثاني
يوم جديد، غيم ومطر خفيف، أجواء مذهلة، الله يا حلو منظر حي "بو كاب" من بلكونة الغرفة وألوان البيوت،




الجبل حلو شكله مع الضباب البديع، 🌧️نهاية الجبل ما نقدر نشوفه من الضباب، ✌️اليوم بنروح لزيارتين حسب اتفاقنا، الأول كان "شاطئ البطريق"، والثاني كان "حديقة النعام"، وبنقضي باقي اليوم نتمشى في كيب تاون وضواحيها، حبينا جولات السيارة مع أجواءهم وطبيعتهم الخضراء،





شفنا بضواحي المدينة بيوت قديمة بمنطقة كبيرة بضواحي كيب تاون واضح منطقة فقراء، نزلنا نفطر وللأمانة كل شيء حلو بالفندق إلا فطوره الله يديم النعمة ويحفظها يا رب من الزوال، ما كانت الخيارات كثيرة عندهم، مع إن العوائل الخليجية موجودة بكثرة بالفندق إلا أنه ما فيه أطباق تناسبهم،



وبحكم سفرات سابقة في كل سفرة أحب أخذ معي معلبات بسيطة قبل أسافر احتياط، لأني سبق وجربت فطور بعض الفنادق في دول زرتها وما جاز لي، ما كان فيه عندهم بحياة ريجنسي إلا الأومليت، وباقي الأطباق مو مناسبة، القاعة اللي فيها الفطور بالفندق كانت متوسطة الحجم تميل للصغر بدون إطلالات، لكنها مرتبة، خدمتهم جيدة، بعد الفطور ربطنا الأحزمة 🚖وتوجهنا لخليج البطاريق، حبينا نصبح عليهم مع الأجواء الحلوة، كانت المنطقة واسعة، المواقف متوفرة ومجانية، نزلنا وقصينا تذاكر الدخول، ولا حظنا ما فيه ناس واجد أول ما دخلنا، كان قدامنا اثنين أوروبيين شباب، وعائلة إماراتية بس، وما شفنا ولا بطريق، ولا واحد تلفتنا ندور عليهم والله ما فيه، وكان في بداية الشاطئ حصى كبير وطوله يمكن من مترين لثلاثة حصى أملس، في اللحظة هذي قررت المدام تضحي فيني، 👩🏻‍✈️قالت تسلق الحصى اللي على الشاطئ وتشوف دورهم، قلت بس الحصى ضخم، وما فيه شيء أمسكه عشان اتسلق، قالت أقول يالله، قلت طيب ترى برد، المشكلة لو طحت على أطرافي في هالبرودة بتكون الطيحة ترى كايدة، قالت تسلق بس لا يضيع الوقت، قلت يالله أجرب، بصراحة انصدمت فيني ما توقعت بتسلق بسرعة ورشاقة، حتى هي انبهرت من مهارتي، 👀المهم بعد ما طلعت تلفت ما فيه بطريق، بس أشوف من الجهة الثانية ناس كثير متجمعين على حاجة مرتفعة وخشبية، ومدري وش قاعدين يشوفون، وأنا نظري متوسط والنظارة مو معي، قلت شكل البطريق في الجهة الثانية، لأن العالم كلها هناك، هنا ما فيه أحد، ونزلت ورحنا للجهة الثانية، هو كان فيه أصلا أول ما تدخل جهتين تروح سيده، أو يسار تطلع درج وتنزل مع الجهة الثانية، إحنا رحنا مع الجهة الخطأ يعني سيده عشان بس أتسلق الحصى، المهم رجعنا للجهة الثانية وطلعنا الدرج، ولما طلعنا فوق كانت المنطقة مليانة ناس، ووناسة، وقروبات، وبدينا نشوف البطاريق من بين الأشجار تطلع واحد ورى الثاني، وكل ما نزلنا أكثر للشاطئ زاد الهواء والبرد، وكثروا الناس والبطاريق، كان المكان صراحة جميل، 👋منظر البطاريق، وحركاتهم عجيبة سبحان الله،









جلسنا تقريبا ساعة بالمكان، بصراحة منظر البحر والأجواء تحفزك تطول أكثر، بس قلنا نبي نروح مكان ثاني، بس قبل دخلنا متجر يبيع تذكار وخذينا منه للذكرى، وتوثيق لرحلتنا للمدينة حاجة نحرص عليها لكل مدينة نزورها من سنوات، بعد كذا قلنا بنروح لحديقة النعام نشوفها، وإحنا طالعين من شاطئ البطاريق ونتفرج على المكان والبيوت ومنظر الشارع سبحان الله طاقة إيجابية، سعادة وانشراح صدر الله يديمها علينا وعليكم يارب، خاصة مع الصباح وسيارتك معك أحلى شيء،





قلنا الحين حديقة النعام، والميزة إن المسافات بين المزارات تكون في العادة بعيدة يعني من 40 دقيقة إلى ساعة تعطيك فرصة تتمشى أكثر، وتتفرج على المدينة وضواحيها وتجلس بأي مكان يعجبك وتصور فيه، وكنا نوقف على الطريق عند أي مكان حلو يعجبنا ويا كثرها بكيب تاون، المنطقة اللي فيها حديقة النعام رائعة، تشوف طبيعة خضراء على مد النظر، يعني ما فيه بنيان أو بيوت، كأنك تشوف حدائق الشاي اللي بدول آسيا، وصلنا وبرضوا المواقف مجانية، وكانت بكل مكان مجانية إلا المولات حسب ملاحظتي، المهم الناس اللي بالحديقة كانوا كلهم من الربع عوائل خليجية الله يحفظهم، نزلنا قصينا التذاكر، الحديقة ما كانت كبيرة بالشكل اللي توقعناه، المدام انبسطت كثير على البطاريق، وجاء الحين دور النعام عاد، أول ما خذيت التذاكر سألت وين أروح المدخل وينه وجهوني بس، 💪أشرت  الموظفة على باب كان مغلق، المهم فتحت الباب أنا والمدام إلا واحد قاعد يتكلم وواضح أنه يشرح للمجموعة أو بمعنى أدق القروب اللي معه، وقال لي لحظات انتظر، قلت لزوجتي هذا مرافق أو بالأصح مرشد، وإنا مو محتاجين أحد يشرح، بنتفرج على الحديقة ونصور ونمشي، انتظرنا تقريبا عشر دقائق، كلمت واحد من الموظفين قلت أقدر أدخل لأني مو محتاج أحد يشرح، أو بالأصح بالنسبة لنا ما نبي أحد يقدم نبذة تاريخية عن النعام، وإنجازاتهم مع احترامي للنعام طبعا، قال تقدر بس ما أنصحك، دخلنا وشفنا نعام أشكال وألوان، كبار وصغار، وبيض نعام حق الشكشوكة للي يبي يجرب، بس منظرهم عجيب النعام تبارك الله أحسن الخالقين، والمدام تضايقت لما شافت الناس تركب على ظهر النعام رحمتها وطفشتني وهي تردد حرام ليش يسون كذا، 😪قلت لها النعام قوي، وفيه ميزة قوة الظهر، ولو يبي يسبقنا وهو شايل له ثلاثة أوادم وإنا بسيارتنا يقدر يسبقنا فكينا بس، 🫤بعد تقريبا ساعة من التنقلات داخل الحديقة، والاستمتاع بمنظر النعام والناس سعيدة داخل الحديقة،





قررنا نطلع نتقهوى بمكان حلو ويازين الكابتشينو عندهم، مع زخات المطر الخفيفة 💧اللي من الصباح شغالة، توقف وترجع تمطر، وكل الأماكن الرومانسية حقت الروقان والريلاكس في كيب تاون عند المدام تختار كل يوم مكان أو اثنين نطلع نجلس فيها،

















دائما مقاهي بإطلالات حلوة بضواحي المدينة، بس للأسف ما احتفظ بأسمائها، وبعد كذا قررنا وإحنا راجعين نتعشى في مطعم الأسماك المشهور "أوشن باسكت"، كان المطعم زحمة كثير، وسمعته جيدة، جلسنا نتفرج ع المنيو، طلبنا صحن أسماك فيه أنواع كثيرة، وطلبنا معه سلمون، ومن وجهة نظري المطعم كان جيد، بس توقعته حسب كلام بعض الأخوة الكرام أفضل من كذا بكثير، يعني مقارنة بمطاعم بحرية جربتها في دول ثانية اعتبره أقل منهم، ولكن طبعا الناس أذواق، اللي يعجبني ممكن ما يعجب غيري، ولكنه في العموم كان جيد، وأسعاره معقولة، ويستحق الزيارة بعد، مع انتهاء وجبة العشاء، توجهنا للفندق وبانتظار يوم جديد.

هذا الحصى اللي تسلقته في شاطئ البطاريق







اليوم الثالث
ثالث يوم كان غريب وعجيب




قررنا نروح فعاليات كثيرة نشطب على أكبر عدد ممكن من المزارات، بس كنا غير محظوظين، قلنا بنروح اليوم لثلاث فعاليات، "الزحليقة"، "جبل الطاولة"، و"حديقة الأسود"، وإذا ساعدنا الوقت نروح لمول "كانال ووك"، بعد الفطور توكلنا على الله واليوم الثالث مثل اليومين الماضيين سحاب مع أمطار بس كل يوم يكون المطر أخف، والغيوم أقل بشكل تدريجي 🌩️بس كان فيه سحاب ومطر خفيف، مع نسمة هواء جميلة،



حبينا نروح أول حاجة للزحليقة، فيه لفة، وثلاث، ويمكن خمس نسيت، اخترنا ثلاث لفات لكل واحد، المكان كان يعج بالعوائل الخليجية بس يعني ما كان فيه أجانب إلا بالنهاية جت عائلة أوروبية، قصينا التذاكر، وكانت أسعار كل المزارات في كيب تاون متوسطة بالنسبة لي، الزحليقة سبق جربناها قبل سنوات في انترلاكن، وأذكر ما كانت متعبة، بس لما جربت اللي في كيب تاون بصراحة كانت متعبة، 🌝رجلي وظهري تصلبوا بعد أول لفة، بس بيني وبينكم كانت الدعسة حقتها حلوة، أنا بالأول وخليت المدام وراي، وأول ما جت الفرصة حاولت أغلق الطبلون عشان تشوف المعزبة كمية المهارات، 🤙بصراحة اللعبة ممتعة، تتقمصون شخصيات "بيتر، وهايدي"، ولو دقائق بس،








بعد اللفة الأولى قلت للمدام أنا تعبت والله، شوي أريح وبعدين نأخذ اللفة الثانية، وقلت ياليت خذيت وحدة بس كانت بتكفي، كانت "الزحليقة" شوي زحمة، يعني توقف بالطابور خمس دقائق إلى عشر تقريبا عشان يجيك الدور، بعد ما خلصنا جلسنا بالمكان نتفرج على اللعبة والناس اللي تفرفر، بعدها قررنا المكان الثاني اللي بنروح له "جبل الطاولة"، وبالفعل توجهنا له، لكن لما وصلنا بلغونا إن التليفريك تحت الصيانة، يعني تشوف المطل من منتصف الجبل تقريبا، وبلغونا إنه ما راح يفتح إلا بعد أسبوع تقريبا يعني بعد رجوعنا، 😥تمنينا نطلع ولكن ما يندرى وين الخيرة، لما شفنا المطل البديع على المدينة قلنا بعد كذا بنروح نتقهوى بمكان حلو، ونتمشى بضواحي المدينة، لما وقفت السيارة ونزلنا لمقهى في حديقة فندق كان خارج المدينة تقريبا وكانت المواقف فاضية، بس بعد ما رجعنا لقيت راعي سيارة موقف قريب مرة من بابي سيارتنا ويالله قدرت أركب، وضرب بابي في سيارته، وبعد ما شغلت السيارة وربطنا الأحزمة كان المزار الثالث اللي بنروح له هو "حديقة الأسود"، 💪بس يبدوا إن الأسد قرر يجينا وإنا بالسيارة 🥺 مستعجل يشوفنا أكثر من نشوفه،

فجأة هجم الأسد


👌 بعد لحظات من ركوبنا السيارة وتونا رابطين أحزمة الأمان، إلا فجأة واحد يضرب في دريشة السيارة ضرب عنيف، طلع الأسد بدري، 😂 فتحت باب السيارة إلا يهاوش يقول ضربت سيارتي ببابك، وشف بويت سيارتي انقشعت شوي، المهم أنا نزلت واعتذرت قلت إنت موقف قريب وما عطيتني فرصة أركب واعتذرت له ثانية وثالثة وهو مصر يهاوش، هنا المدام فقدت أعصابها وهي داخل السيارة وانطلقت، بس حقيقة ما حبيت الموقف قلت يابنت الحلال فكينا منه، بنشب معه وبتخرب سفرتنا كلها عشانه كيفه، وختمت المدام النقاش بعد ما ركبت وركب هو سيارته بكلمة "جعله المرض روعني"، 😁 بعد الأكشن اللي صار قلنا على خطتنا بنروح "حديقة الأسود"، والمدام كانت تكتب كل عنوان من وصولنا كيب تاون كنا نروح له عن طريق "قوقل ماب" والجوال معها تحدد مسارات الطريق وأنا أسوق، الغريبة إنه بعد وصولنا للعنوان ودخولنا للحديقة تفاجأنا بوجود قرود كثير، التفت على المدام قلت إنتي متأكدة إن هذي حديقة الأسود، اللي أشوفه قرود أشكال وألوان، كبار وصغار، قالت إيه العنوان مطلع نفس المكان هذا بس يمكن الأسود بآخر الحديقة، قلت لا تضيعين علينا اليوم ترى ما استفدنا منه وقدامنا وقت قصير، جبل الطاولة وما طلعناه، ثم تهاوشنا مع الأشقر، والحين دخلنا حديقة ما نبيها، قالت متأكدة، قلت يالله نروح نهاية الحديقة ما لقيت أحد أسأله، ومشينا مالقينا ولا أسد، قلت خل بس نطلع الهوشة ضربت إعداداتك 😂



ودخلتينا عند القرود وإنا نبي الأسود، لو أمدانا على حديقة الأسود زين لأنها تسكر الساعة 5 العصر، سألت اللي عند التيكت قالت هذي حديقة القرود، الأسود بعيدة، دخلنا العنوان قبل نبي نتأكد منه عشان نتفرغ لباقي الفعاليات الأيام الثلاثة الباقية ووصلنا للحديقة، الغريب ما كان فيها أحد، أول ما وصلنا قالت البنت ترى قدامكم بس نص ساعة، قلنا ما يخالف نأخذ جولة ونشوف الأصناف الموجودة ونطلع، قالت أهم شيء لا تقرب لأن الأسد ترى لو قربت يهجم، قلت ما عليك أول ما يشوفني بينحاش، كانت الحديقة جميلة، بس ما لحقنا على فقرة الأكل حقتهم مع المدربين، شفنا الأسود واللبوات، وكان فيه نوع أبيض من الأسود واللبوات بنهاية الحديقة، جلسنا لحد ما طلعونا، سألت واحد من اللي يشتغلون قلت ليش المنطقة هذي فيها ذكرين ما يتضاربون قال لا هذولي إخوان،





المهم بعد كذا قلنا بنروح مول "كانال ووك"، فيه سباق سيارات جربناها في سنغافورة وكانت حلوة، المول كان بعيد كثير عن الحديقة أذكر، وحتى مدخله ما كان واضح بالنسبة لي، خذيت لفة طويلة عشان أقدر أوصل مواقفه، لما دخلنا المول كان كبير كثير، مو مثل فكتوريا أكبر بكثير، ولاحظت إن العوائل الخليجية في المساء تتواجد بالمولات، يعني اليومين اللي راحت بمول فكتوريا، واليوم هنا، يمكن برودة الجو كان لها دور، أو لأن المزارات في النهار بس وإحنا الخليجيين متعودين على السهر، أول ما وصلنا جلسنا بمقهى، بعد كذا تمشينا بالسوق، وتعشينا بكنتاكي، ثم بدينا نسأل عن مكان سباق السيارات، الغريبة محد عرف حتى اللي يشتغلون بالمول، إلا واحد حارس أمن قال لازم تطلعون من المول وتطلعون مع الدرج وبتكون مقابلتكم، وبالفعل حصلناها، خذينا ربع ساعة تفحيط، وأحسن شيء ما كان فيه أحد في وقتنا كان قبلنا فيه مجموعة محترفين، قبل تركب لازم طبعا تلبس لبس معين لسلامتك، وتحط اغراضك برى ما تكون معك بالسيارة، بعد انتهاء سباق الفورملا1 قررنا نرجع الفندق استعداد لليوم الرابع، بس قلت أول ما وصلت الفندق للحبيب أبو بكر أبي تحجز لي بكره بمطعم "جولد" قرينا عن المطعم والعروض الإفريقية اللي فيه وحبينا نتعرف على ثقافتهم ونشوف طقوسهم ورقصاتهم عن قرب، وحجز لي الله يسعده على الساعة 7.30 مساء، مدة العرض ساعتين، وبكذا ختمنا اليوم الجميل.

تقرير سريع وسفرة سريعة فيها كسرة روتين حلوه 👌🏽👌🏽

يا هلا ومرحبا فيك أبو وليد
بداية جميلة في كتابة التقارير السياحية

البلد ممتع وجميل
اختياركم للفندق رائع
ايجار السيارة رخيص جدا

اعتبرها بداية لاكتشاف البلد
لأن كيب تاون لوحدها تحتاج أسبوعين
للمرور على مزاراتها وتجربة الحياة فيها

أتوقع لكم عودة للبلد
ونشكرك على هذا التقرير الخفيف اللطيف