حيا الله الجميع وخاصة رواد ومتابعي بوابة الكويت .gif "(125)")
في تاريخ 23-3-1436 هـ - 14-1-2015 م وبالتحديد في اجازة منتصف العام الدراسي حبيت اطلع انا والمدام سفرية خفيفة لاحد الدول القريبة بدون الاولاد الله يصلحهم ، يعني ابو 4 او 5 ايام ..
وين نروح ؟
مكة بس التوسعة في الحرم لسى ما خلصت وزحمه ،، خاصة اننا رحنا قبل فترة قريبة ولا استمتعنا بمكه واجوائها الروحانية بسبب الزحمه فقلنا نخليها لما تنتهي اعمال التوسعة ويفتح المطاف بالكامل
طيب دبي .... اممم دبي غالية ومشوار بالسيارة ورايحين لها كثير
قطر امممم ما زرناها قبل وحسب ما سمعنا انها في بدايات التطور وماشيه على خطى دبي ،، لكن يقولون الاجواء فيها هادية ولا فيها اكشن
امممم الكويت ... الكويت اقرب بالسيارة والجو مناسب والديرة حيه حسب ما نسمع ..
قطر او الكويت ... قطر او الكويت
وفي الاخير قررنا نروح لدانة الخليج .gif "(127)")
طبعاً ما كان في بالي اسوي تقرير ولا اخذت الكاميرا نهائياً ولا استخدمنا النت الا في الفندق لسبب اننا حابين تكون الرحلة استجمام والبعد عن الالتزامات العائلية وننحاش شوي من التقنية والاجهزة الذكية .gif "(158)")
.
لذلك راح انزل بعض الصور اللي اخذتها بالايفون ونشارك البوابة بهالموضوع اللي لعله يشفع لنا عند حبايبنا في بوابة الكويت ويعذرونا على القصور بسبب عدم التخطيط .
جهزنا اغراضنا وشيكت على السيارة .. وخزنت في القارمن احداثيات المواقع السياحية في الكويت . وتوكلنا على الله مع شقة النور ..
طبعاً انطلقنا من ديرتنا (عودة سدير ) واخذنا طريق المجمعة ومنها لحفر الباطن الى منفذ الرقعي والاجواء في هالفترة كانت خيال .... غيم ومطر وبراد
صورة من الطريق
وصلنا الحدود وتمت الاجراءات بسهولة ويسر ودخلنا الكويت ..
طبعاً عندي حجز في فندق لاقونا في السالمية واللي حسب ما قريت انها افضل الاماكن من حيث الموقع والمرافق السياحية .
وقطعنا تقريباً 100 كيو على ما وصلنا للدايري ومنه الى السالمية وعلى الظهر صرنا في الفندق ..
اول الانطباعات عن الكويت اني ما حسيت اني طالع من السعودية ..
نفس الشوارع ونفس التنظيم حسيت اني في الخبر او شي زي كذا .
طبعاً غير احساس اني في بلدي وبين اهلي ..
وصلنا الفندق واستلمنا الغرفة وهذي اطلالتها وتظهر منطقة المارينا وشارع الخليج العربي والبحر
الفندق جيد بشكل عام ونظيف وموقعه ممتاز .. حجزي كان سويت لاني قريت في التقييمات في بوكنق ان الغرف ضيقة شوي .. والحمد لله توفقنا فيه بالرغم من ان الافطار محدود .
طلعنا نتغدى وقالوا لنا الشباب في الرسبشن ان مطعم فريج صويلح حذفة عصا عن الفندق ورحنا له ..
دخلنا المطعم زحمه شوي وجلسنا انتظار الى ما جانا الدور وتغدينا الحمد لله ... المطعم سمعت عنه كثير وفكرته حلوة لكن يحتاج تطوير شوي في الجلسات والاكل .
صورة للمطعم من برا
راح اذكر الاماكن اللي زرتها مع بعض الصور
الاسواق رحت الافينوز واللي اعده من افضل اسواق الخليج بدون مبالغه ..
رحت للمباركية وجداً اعجبني لاني احب الاسواق الشعبية .
رحت لسوق شرق جيد .. والمارينا مول جيد .. وكنت بروح لمول 360 لكني الغيته من القائمة ورحت للافينوز مره ثانية لانه يستاهل
رحت للمركز العلمي .. جميل ومناسب اكثر للاطفال
رحت لمنطقة المارينا الصباح كله كفيات ومطاعم رايقه عالبحر
صور منها
فيه اماكن زرناها لكن للاسف ما صورت فيها .gif "(59)")
قبل لا اختم الموضوع حبيت اقول ان المسلسلات الكويتية للاسف لها دور كبير في تشويه سمعة الكويت واهلها .. الصراحة كنت راسم فكره عن الكويت ولما زرتها طلعت غلط والبلد محافظ والناس غالبيتهم محافظين ما ادري ليش اللي يسوون المسلسلات يصورن للمشاهد اشياء غير صحيحه !!
صحيح ان رحلتنا سريعة لكن الناس تعاملها طيب ولا مرت معنا مواقف مزعجة ... الا موقف واحد لشاب كويتي الله يهديه في مطعم فريج صويلح جاي وسط العوائل معه وحده اجنبية ما ودي احط في ذمتي شي لكن من لبسها وشكلها تحس انها من بنات الليل .. شكلها ولبسها مقزز والناس تضايقوا من تواجدهم الله يهديهم .
هذا اللي عندي وارجو تعذروني على التقصير .gif "(39)")
22-05-2015, 02:05 AM
بعض الصور والسوالف من زيارتي للكويت 2015 
العرض الشجري
المواضيع المتشابهه 
