ستوكهولم ... عاصمة السويد بقلم احلى من العقد - الصفحة 2

فريق التطوير · 30-05-2015, 06:44 AM

ووصلنا لين شباك التذاكر وكانت الاسعار تختلف للراشدين سعر و للطلاب سعر مخفض والاطفال ببلاش وهاي لستت الاسعار

الكبار بـ 130 كرونا
الطلاب بـ 100 كرونا ولازم تراوونهم اي اثبات مثل كرت الجامعه
الاطفال من سن 18 وتحت ببلاش

وللمزيد من المعلومات ادخلو الرابط

http://www.vasamuseet.se/en/

اما الان بقولكم قصة المتحف ..

يعتبر المتحف اكثر المتاحف زيارتاً في الدول الاسكندنافيه

و خصص هالمتحف للسفينة فازا وقصة هالسفينه الله يسلمكم كالتالي

سفينة فازا تعتبر اقدم السفن المعروضة في المتاحف وهي الوحيدة الباقية من سفن القرن السابع عشر والي محتفظة ب 95% من شكلها الاصلي.

بتاريخ 10-8-1628 م انطلقت سفن حربية ملكيه عديدة من ميناء ستوكهولم وكانت سفينة فازا الجديدة هي اكبرهم واجملهم .. وعندما تحركت السفينة قليلا للخروج من الميناء هبت ريح غيرت مسار السفينة وتم تدارك الموضوع وعادت السفينة لمسارها .. وثم هبت ريح اخرى قلبت السفينة و دخلت المساه من نوافذ السفينة الى داخل السفينة مما ادى الى غرقها بعد 10 دقائق فقط من اول ابحار لها ..

خلونا نشوف صور للسفينة ..

كتيب ارشادي مجاني

ويوجد العديد من العروض السمعيه والمرئية الي تشرح ماحدث للسفينة ودخلنا اول عرض كان باللغه السويديه لكن الترجمه بالانجليزي وكان هناك عرض اخر بالانجليزي بس ماحبينا نضيع وقت وننطر ..

وهالعرض جميل جدا كانه فلم عن السفينه يراوونا شلون تحركت السفينة وشلون غرقت وشلون لقوها

خلوني اقولكم شلون لقو السفينة .. الله يسلمكم في عام 1956 تقريبا تم اكتشاف السفينة بالصدفة وتمو يحاولون يطلعونها من الماي بدون مايخربونها او يكسرونها و في عام 1961 قدرو يطلعون جزء منها وشوي شوي قدرو يطلعونها كامله وتمو محتفظين فيها في مكان خاص لحمايتها من التلف لين عام 1988 وبعد ذلك تم فتح الابواب للزوار لمشاهدتها من 3 طوابق مختلفة ومشاهدة النقوش الجميله عليها من قرب دون لمسها طبعا ..

كانت مؤخرة السفينة منقوشه بالذهب وملونه بالوان زاهيه

هاي مجسم يبين شلون كانت السفينة الغارقة فازا غارقة تحت الماء وغاطسه وسط الرمل وفوقها السفينه الى كانت تحاول انتشالها

وهاي كان لبس الغواص في الخمسينات الي اكتشف السفينة

في اليوم الي ابحرت فيه فازا تجمعو كل الناس عشان يشوفون هالسفينة الرائعه وهي تبحر

ولما غرقت السفينة انتشرت الاشاعات في البلد ان هناك لعنة كانت تلاحق السفينة فغرقتها والي قال ان السفينة كان عليها شيطان فغرقت

بشكل عام .. السفينة كبيرة وجميلة وكأنها اسطورة وقصتها من عالم الخيال

يتبع ..

فريق التطوير · 30-05-2015, 06:47 AM

في الصورة القادمة نشوف مجسم السفينة وهو مائل من هبوب الرياح المفاجئة والي تسببت بدخول الماء داخل السفينة

وهني مجسم المرأة الي تتحدث عن الشائعات الخاصه بغرق السفينة

يوجد عرض يبين بالتفصيل سبب غرق السفينة وكيفية غرقها بالضبط وهناك عرضين بالانجليزي والسويدي

وبعد ماخلصنا جولتنا في المتحف وعند باب الخروج يوجد معرض للهدايا التذكارية

ولما طلعنا من المتحف كانت السحب السوداء قادمة لنا بقوه والمكان كان من ضرب الخيال من جماله

وكانت خطتنا الذهاب الى متحف نوردك الي فيه يعرضون حياة الفايكنج بس للاسف صارت الساعة 5 ومامدانا لان اغلب المتاحف تسكر الساعة 5 ... فتمشينا لين الباص المكشوف عشان نركبه ونرجع

يوجد قطار صغير ياخذكم بجوله في هالمنطقة الي فيها العديد من الفعاليات

وهاي مطعم اذا حابين تاكلون سناك

وهاي متحف فازا من بعيد

ووصلنا الباص

وطق مطر قووووووووي بس اشوه الباص يتسكر من فوق و تمينا ندور في الباص لين وصلنا لفندقنا

بدلنا وصلينا وردينا طلعنا جهة الاسواق

وقررنا ناكل بنفس مطعم امس .. مطعم الستيك
واليوم اخذنا لنا سلطه من بار السلطه

وهاي اجواء المطعم

واليوم طلبت برجر احلى من الستيك

وهاي جلسات خارجيه للي حاب

وعقب المطعم قررنا نرجع الفندق مشي .. وشكل ماقلت لكم ان البلد فيها مهرجان موسيقي وهاي احد الفعاليات الي توقفنا عندها ..

وثم كملنا طريقنا للفندق وكل شوي ندخل محل من محلات الهدايا

و انتهى هاليوم ... والقاكم في يوم جديد

فريق التطوير · 30-05-2015, 06:48 AM

اليوم هو احد اكثر ايام ستوكهولم نشاطاً وحيويتاً ...

بدينا اليوم من الصبح بدون مانتفطر ركبنا التاكسي الى ملاهي تيفولي غرونا لوند وطبعا مافطرنا عشان مانرجع وماتلوع جبدنا في الالعاب خخخخ

وصلنا للملاهي

ورحنا نقص تذاكر الدخول

وطبعا كل امورنا عالسريع يعني لانطره ولاشي الطابور قصير ويمشي بسسسرعه وسعر تذكرة الدخول للكبار ب 100 كرونا وانا قصيت لشخصين وطبعا بتستغربون ليش بس شخصين ... لان احنا نظام كل واحد يدفع حق نفسه خخخ الا الاطفال والي مايشتغلون خخ

ودخلنا للملاهي

في البداية الالعاب كلها العاب اطفال الي ماتصلح لنا

بس تصلح للي عندهم اطفال صغار

والمكان كله جميل اشجار والوان واليوم كان مشمس

ووصلنا لين هالبوابة

وبالصدفه شفنا مكينة للتذاكر وسالنا هل لازم نقص تذاكر .. قالو لنا نعم هناك تذاكر لركوب كل الالعاب وهناك تذاكر لالعاب معينه وتذاكر لعدد محدد من الالعاب مثل 4 العاب فقط .. و تقدرون تقصون التذاكر هاي يا اما بالطابور من الكاونتر او من الجهاز ... اخترنا ناخذ تذاكرنا من الجهاز لان ماعليه زحمة

و خذنا باس ليوم كامل كثر مانبي نلعب وماتذكر بكم

وهالاسويرة في منها الوان اللون البرتقالي يعني لكل الالعاب لطول اليوم .. وفي الوان ثانيه حسب التصنيف ويكفي انكم تراوون الموضفين على الالعاب قبل ماتدخلونها وبيدخلونكم على طوول

كشك حلويات .. وتنتشر الاكشاك في كل مكان الي يبيع حلويات والي يبيع وجبات خفيفه والي يبيع قهوه وغيره

واتجهنا الى هالبوابه لنعبرها لان الالعاب الي ورا هالبوابه تبين كبيره مب مثل العاب الاطفال الي عند المدخل

وفعلا دخلنا الى عالم الكبار ... والعاب الكبار الحلوه

اول لعبه شدتنا وتوجهنا لها هي المراجيح الي تاخذنا الى الاعلى وتدور ... شفنا ستوكهولم كااااااااااااامله من فوق من كثر ماهي عاليه و فعلا لعبه راااائعه تستحق التجربه وطبعا كان المكان بارد وفيه هوا فكانت افكار شيطانيه اتجي في بالي لو مثلا الدورفه انقطت بتلف فيني في الهوا وباطيح في مكان ما ... ومايحتاي اقولكم صادنا مثل الروع من عقب بوكت كله نخاف نطيح ... واختي مسكينه في هاللعبه قامت تدمع عينها من الخوف بسبب احداث بوكت والبطبطه بس كنا لازم نكسر حاجز الخوف وفكرة ان كل شي مب امن وممكن نطيح وممكن ينقص الحبل .. بس كانت احلى لعبه هي ماتخوف بس احنا كنا متروعين ..

وبعد ماكسرنا حاجز الخوف انطلقنا لباقي الالعاب بكل قلب قوي

الالعاب عامتاً ممتعه وحلوه وايد والزين في الموضوع ان المكان حي لكن فترة الانتظار جدا بسيطه فكنا ندخل ونلعب بسرعه

هاللعبه اخواني لعبوها بس انا مالعبتها اكرهها احس ان جبدي بتنقطع منها تنزل فجأه والواحد غافل الي ركبوها يقولون في ريال يتكلم ومايمديه يكمل كلامه وهم غافلين الا اللعبه تهوي مره وحده .. لعبنا من قبل نفسها في اماكن ثانيه بس هاي كانت الاشد مكراً خخخخ

توجد العديد من قطارات الموت المختلفه في المسار و في القوه في منها الي يصلح للكبار والصغار الكبار وفي منها للكبار فقط

بينما كنا ننطر في طابور هاللعبه

الا اشوف بنت شقراااااااااااااااااااااااااا من شقارها شعرها لونه ابيض .. وشفت القمل يلعب في شعرها وهي كأنها خبله تحك تحك تحك والقمل يطلع ويدخل وكل قمله اكبر من الثانيه .... والمشكله امها وخواتها جمبها بكل بساطه ... ياجماعه رشو راسها مبيد حشري ... وكنا خايفين تعادينا ... بس مسكينه فضيحه الشقار طلع البلاوي خخخخخ

وشفنا لعبة بيت الاشباح .. وشفنا الاطفال الي صافين فيها اكثر من الكبار قلنا يالله ندخل منها نرتاح ومنها نتفرج عالاطفال وهم خايفين خخخخ

بس مساكين الاطفال اكتشفت انهم صج ابرياء يخافون من صجهم من هالخرابيط

وعقب ماطلعنا كنا خلاص وصلنا مرحلة من اليوع ان احنا ناكل فقررنا ناخذ لنا سناك من فش اند جبس

كان الطابور طويل وعليه زحمه ... فقلنا دام ان الساعة 1 ونص الظهر خلونا نروح نتغدا مره وحده وتقريبا لعبنا اغلب الالعاب .. فطلعنا من طابور فش اند جبس وقمنا ندور مطعم

و المهرجين منتشرين في الحديقه وجدا حبوبين ويسوون حركات لطيفه

وعقب ماطلعنا من الملاهي كان جدام باب الدخول مجموعة مطاعم قررنا ناكل في واحد منهم وعقب مادرنا عليهم قررنا ناكل في هالمطعم

الموظفين كانو مكس اتراك على لبنانيين على مغاربه

نبذه من طلباتنا .. فش اند جبس

وانا طلبت برجر دجاج

بشكل عام الاكل ينبلع بس مب لذيذ ..

وعقب ماكلنا خذنا تاكسي وردينا للفندق ... نرتاح لنا شوي وعقب ننطلق لوجهتنا الجديدة

يتبع ..

فريق التطوير · 30-05-2015, 06:50 AM

بعد ماريحنا في الفندق طلعنا من الفندق الساعة 6 المغرب عشان نلحق على الرحلة المحجوزة مسبقاً

وهي رحلة سفاري لمشاهدة الحياة البرية الليليه في براري ستوكهولم ..

حجزت الرحلة من هالموقع

http://www.stockholmadventures.com/

وهي شركة مرموقه (( مرموقه ولا مرقوقه )) في مجال الجولات السياحية في ستوكهولم وتقدم رحلات لمختلف الاعمار ..

جولتنا كانت لمن هم فوق ال 11 سنه لكني راسلت الشركة وقلت لهم ان عندنا بنت عمرها 3 سنوات حابة تشوف الحياة البرية في ستوكهولم هل بتسمحون لها تجي .. فوافقو وقالو مافي مشكله خليها تجي ..

سعر الرحلة للكبار 630 كورونا مايعادل 63 يورو للشخص

والصغار والطلاب 400 كورونا مايعادل 40 يورو للشخص

كان موعد بدء الرحلة هو 7 مساءاً لكن نقطة التجمع في امام مدخل فندق Scandic Sergel Plaza Hotel
وهالفندق قريب من فندقنا رحناه مشي في اقل من 10 دقايق وصلنا .. لكنهم موضحين في التذاكر ان لازم نكون موجودين هناك قبل الساعة 7 عالاقل بربع ساعه ..

وصلنا لين نقطة الالتقاء وماعرفنا وين نشوفهم رحت سألت رسبشن الفندق قالو لنا تلقون الموظفة التابعه للشركة عن الباب .. قمت اتصلت بالرقم الي بعثوه لي بالايميل وقالت لي احنا في الباص الي مكتوب عليه ستوكهولم ادفانتشر ... الي خلاني اتلخبط اني كنت متوقعه الرحلة بتكون في فان او باص صغير ماهقيتها في باص يسع مليون راكب خخ وركبنا الباص ..

وجدام الفندق كان فيه خيام ومشاوي وموسيقى تبع المهرجان قلنا بعدين واحنا راجعين بنمر عليهم

وعلى الساعه 7 مساءاً مشى الباص وبدينا نبتعد عن وسط مدينة ستوكهولم واحنا ماشيين شفنا معرض ايكيا .. وللعلم توجد باصات خاصة من والى معرض ايكيا و مدينة ستوكهولم ..

بدت مظاهر المدينة تختفي وتظهر لنا مظاهر الحياة البرية

هالمنطقة هي محمية طبيعية في السويد ..

وبعد رحلة مدتها نصف ساعة تقريبا توقف الباص ونزلنا كلنا مع المرشدة ووقفنا امام هالخريطه وقامت تقول لنا عن الاماكن الي بنزورها وكل مكان اش فيه

وبعد ماشرحت لنا ورحبت فينا قالت تعالو معاي اضيفكم على الطريقة السويدية ومشينا معاها بين الاشجار في ممر ضيق

ووصلنا لي مكان فيه قعدات حلوه للشوي وعمل بكنك وللغداء او العشاء وسط الغابة

جاب السواق للمرشدة كيس وطلعت منه مافن كيك وحطته على الطاولة وقالت كل واحد ياخذ الي يعجبه ..

و عطونا شي يشبه الابريج بس هو قلاس وصبولنا فيه قهوه .. والقهوه مهما حطيتو فيها شكر تتم مررره ومب حلوه كنت اتغصبها

هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 611x815 .

الكوب مكتوب عليها ستوكهولم ادفانتشر اسم الشركه وعقب ماخلصنا شرب غسلو الاكواب وعطونا اياها هديه تذكاريه

يوجد في المكان كوخ صغير ممكن الجلوس بداخله وامام الكوخ بتشوفون واحد شايب واقف هالشايب خبيث ... مره تأخرنا لان عندنا طفله ماتقدر تمشي بسرعه وكلهم وصلو الباص الا احنا نمشي بالعدال عشان الطفله قام سأل المرشده وقال لها ليش مانروح عنهم هم تأخرو .. قالت له احنا مانترك اي احد ونروح عنه عيب احنا جايبينهم واحنا مسؤلين عن كل شخص في الرحلة لهالسبب وقت نهاية الرحلة مفتوح ومامحددين وقت .. والله طيبين

وهاي نظرة عالمكان والشمس على وشك الغروب

يتبع ..

فريق التطوير · 30-05-2015, 06:51 AM

بعد ماخلصنا اكل وشرب قهوه قمنا نتمشى في المكان ونشوف المنطقة بصراحه المكان حلو وايد للتخييم

وبعدين بدينا رحلتنا داخل المحمية الطبيعه و مشينا وراء المرشدة

ووصلنا لاول منطقة وهي مقبره قديمة جدا

وهاي المرشدة تشرح لنا الناس الي كانو اهني وتاريخهم وشنو كانو يشتغلون وقالت من الواضح ان المكان كان فيه خنازير بريه وفي احتمال ان احنا نشوفهم لان الارض كانت محفرة .. بس ماشفنا خنازير بريه

وبعدين مشينا لين الباص عند الشارع الرأيسي وكملنا مشي

ووقفنا عند صخره قديمة جدا منقوش عليها رموز لها معنى نسيت شنو المعنى بس هالصخره من ظمن المحميه وهي اصليه بس الخطوط الحمراء كانت موجوده وباهته هم قامو ارسمو فوقها بصبغ النحاس عشان تبين

المكان كله هادئ حولنا بستثناء اصوات الطيور والهوا

وركبنا الباص واتجهنا لاماكن تواجد حيوان الرنه الي هو غزال بس قرونه كبيره عشان نشوفه ونشوف أي نوع اخر من الغزلان

شفنا كم واحد بس بعااد ماطلعو بالكيمره بس كنا نشوفهم بالمنظار

شوفو الدوائر الصفره هاي داخلها غزال الرنه

ماصورت وايد لان الصور ماتبين في الكيمره عدل

هاي باصنا

وهناك داخل الدائرة الصفره حيوان ثاني

وغربت الشمس ... شوفو وراء الاشجار فيه بحيرة ممنوع السباحه فيها او الصيد او ركوب المراكب فيها لانها مخصصه فقط ومحميه لتمد اهل ستوكهولم بالماء فيبون الماء يتم نظيف

و توقف الباص امام بحيرة اخرى وكان الجو بااارد وخلاص الدنيا ظلمت

وجدام البحيره فندق حلوووو وفخم ماقدرت اعرف اسمه

وهاي البحيرة وكان في صيادين اتراك يصيدون سمج

البحيرة هااااااااااااااااديه وحلوه وكبيره

المكان بالليل جدا جميل وموحش بنفس الوقت

وبعد ماقضينا وقت جميل جدام البحيرة عدنا للباص

وعدنا لستوكهولم ...

فريق التطوير يتمنى لكم رحلات ممتعة

فيصل · 30-05-2015, 04:36 PM

الكاتبه الرائعه الغائبه الحاضره أحلي من العقد

قرأنا تقريرها حقيقه وعاودنا قرائته خاصه قصه السفينه فازا

ما يعجبك في تقاريرها الصراحه

شكرا لكم

اوروبا عشقي · 31-05-2015, 12:03 AM

حبيبتي احلى من العقد كثيررر اشتقت لمواضيعها واتمنى تواجدها مواضيعها لها نكهه خاصه لاتمل ابدا لونقراها مليون مره والف الف شكر لانك نزلت هالتقرير للمبدعه عش عش خصوصا اني افكر في السويد وهالتقرير من المبدعه احلى من العقد هو اللي بيعطيني انطباع اذا اروح لها او لا الف شكر مره ثانيه ويارب نرجع نجتمع كلنا مع بعض

فارس من خيال · 11-06-2015, 04:29 AM

تقرير جميل ورائع من كاتبة مميزه كاختنا احلى من العقد
الله يرجعها بالسلامة وشكرا لفريق التطوير ع النقل الجميل

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
بوكت ... رحلة سريعة لكن ممتعة بقلم احلى من العقد	فريق التطوير	بوابة تايلند	61	09-08-2019 02:37 PM
ايسلندا ... اجتماع البراكين بالثلوج بقلم احلى من العقد	فريق التطوير	بوابة اسكندنافيا	34	18-02-2016 08:57 AM