عسى لقيتوا سكن مناسب يا بو عبدالله

و كيف أسعار الايجارات هناك

عطنا علومك مشتاقين

-- المبتعث غير السائح وتجهيزاته للسفر تختلف من حيث فترة الاقامة ، الاقتصاد في الصرف ( يعني لاتفتحها كنك بترجع بعد اسبوعين او شهر ) ،الوزن المسموح لك به على الطائرة احسب وش بتاخذ معك بالضبط ولاتاخذ شي ماراح تستفيد منه لانك بتحتاج مكانه اشياء اخرى ( قهوه ، تمر ،هيل ) والباقي ترى موجود نفسه بسعر غويلي او له بديل محلي منافس وبنجي عليه في ثنايا الموضوع ان شاء الله
- قبل السفر تأكد من بطاقات البنك اذا كانت بتنتهي تجددها وتأكد من اي شي يستلزم وجودك خلصه بسرعه عشان ماتتعطل بعدين .
الاشياء اللي ممكن تعطي عليها وكالة لاخوك او شخص ثق فيه لاتتأخر (بيع سيارة ، تخليص معاملات لك ) وكل واحد اعرف بظروفه.
قبل التوجه للمطار يفضل للمبتعث تجهيز التالي لتسريع عملية تسجيله في الملحقية :
- سحب التعهدات له / لها وللمرافق من موقع الملحقية
ظ†ظ…ط§ط°ط¬ ط¥ط³طھظ…ط§ط±ط§طھ | ط§ظ„ظ…ظ„ط­ظ‚ظٹط© ط§ظ„ط«ظ‚ط§ظپظٹط© ظپظٹ ط¨ط±ظٹط·ط§ظ†ظٹط§ | UKSACB
طبعا ياخذ اللي يناسب وضعه
بعد سحب التعهدات يعبيها ويوقعها ويسحبها سكنر او يصورها بالجوال ويحفظها بجهاز اللاب توب او الجوال في مجلد يخصصه لاوراق الملحقية .
- صورة ملونة لبطاقة الاحوال
- صورة الفيزا.
- صورة قرار الابتعاث.
- اذا مبتعثه ومعها مرافق موظف تاخذ صورة اجازته .واذا مرافقها غير زوجها او ابوها صورة الوكالة له .
- اذا معه فيزا دراسية فيحتفظ بنسخه من القبول معه لان موظف الجوازت بيسأله عن القبول وبالنسبة للمرافق اذا هو تير4 فيبلغهم موظف الجوازات انه لازم يسجلون في الشرطة خلال سبعة ايام من تاريخ دخول الدولة ( شرطة المدينة اللي بيسكن فيها ) .
- جميع الاجهزة المحموله داخل كبينة الطائرة تكون مشحونه - قبل نطلع الطيارة مشونا بطريق ينزل تحت ونمر ببوابة تفتيش ويشيكون على الاجهزة الالكترونية ولازم تكون مشحونه وممكن تشتغل -
طبعا التفتيش قبل الاقلاع بعض الناس يحسبه بعد الوصول .
- جهز معك قلم لتعبئة كرت الدخول وهو مترجم يعني لاتشيل همه بس جهز عنوانك اللي بتسكنه مؤقتا هناك - اي حجز بيمشي حاله .
- اللي بيسافرون برا لندن :
السفر بالقطار جدا ممتع والقطارات على طول متوفرة تقريبا فممكن انك تسافر لوجهتك بالقطار وفيه اماكن عفش كثيرة مثل الطائرة ( فوق الكراسي فيه اماكن تخزين كثيرة وشبه فاضية تقريبا) بس يبقى عليك مشوار من المطار لمحطة القطارات ( محطة ليفربول سنترال) ومنها الى وجهتك ..( طبعا للي ما يبي يواعد احد يوصله ) .
هذي صورة للمكان بس صارت مسحوبه ويمكن اعدلها بعدين

-اللي يبي احد يستقبله ممكن يشوف موقع النادي السعودي لمدينته وبيلقى انهم حاطين رقم تواصل مع احد العرب هناك وانه موثوق وممكن يتواصل معه بالواتس اب ويتفق معه قبل الوصول بمده ....
وهذا موقع شبكة القطارات
National Rail Enquiries - Official source for UK train times and timetables
تختار الوجهة من (Liverpool Central [LVC]
وتكتب وجهتك وتختار الوقت المناسب لك وبتحصل اكثر من قطار وتختلف مدة الوصول حسب عدد التوقفات ...
طبعا التخطيط ممكن تخليه بعدين في رحلاتك في بريطانيا لان موظف التذاكر ممكن يساعدك ويشوف لك اقرب واسرع قطار وتحاسب عنده بالشبكة ( اذا فيزا انتبه ولازم تكون موقع عليها من الخلف ) اذا مو موقعه بيطلبون جوازك او بطاقة ثانية موقعه فعشان ماتدخل بدوامة وقعها من الان ... طبعا ممكن احد مايشيك بس الاغلب يشيكون على التوقيع
وماتحتاج الحين اويستر كارد ... اول ماتوصل للمحطه تروح لشبابيك التذاكر وتحجز وعلى قطارك اللي ماراح يتاخر ...
عشان توصل للمحطة هذي فراح تستعمل قطار الانفاق (المترو او التيوب على تسمية البريطانيين )
https://tfl.gov.uk/
وتقدر تحجز من اقرب محطة لك حسب صالة القدوم
بعد ماتوصل لمحطة المترو تروح لشباك التذاكر وتاخذ تذكرة الى محطة ليفربول سنترال
المترو غير مناسب للي معه عفش كثير وطبعا المبتعث غالبا اللي جاي اول مره فحدث ولا حرج بانواع العفش ( انا كان معي 8 شنط وسط و 2 صغيره داخل الطائرة و2 لاب توب ) يعني حمولة عربيتين عفش مطار مليانات ...

هذي مقدمه للاجزاء القادمة واللي بتصير من وقت الوصول مع بعض الصور واعذروني على القصور
وطبعا اللي اكتبه هو اللي صار معي بالضبط (يعني تجربة شخصية )

بالمناسبة كنت متخوف من الشعب البريطاني وكلام الناس انه شعب مايرحب بالناس وانه منغلق على نفسه بدرجه كبيره ولاتحاول تحتك فيه
تجربتي ( انه شعب جدا ودود وخدوم ومرح ) ومستحيل احد جرب انه يحتك فيهم يقول غير كذا الا واحد احتك بشخص واحد لان من خلال تجربتي وانا كنت مخربها واطب عليهم طبوب ( يفزعون بكل اريحيه ) غير انه ذابحهم التأسف على كل شي يقولك اسف حتى لوك انت المخطي ( فيه عينات قابلتهم بس نسبتهم 0.01% يمكن ومايؤثرون على الجو العام ومايخربون لي جو )
بالمفيد اذا اشكل عليك شي هناك فعادي وقف اي واحد بالطريق واستفسر منه

اشوفكم بالجزء القادم .. وفيه الوصول للمطار ثم الوصول لمدينة كولشيستر

الوصول :
كانت الرحله بيوم 5/9/1436 الساعه 12 الظهر وذاك اليوم ماافطرنا ، مسهلة ربي يالله لك الحمد وش يحدنا نصوم واحنامسافرين وبيكون اجمالي ساعات الصوم 21 ساعه لان الامساك في السعودية والفطور في بريطانيا فافطرنا في المطار الصباح واشوى اننا افطرنا لان وجبات السعوديه ماكانت قد كذا ..وبالنسبة لي ماقدرت اكل منها الا الفاكهة ..
الطائرة كانت فاضية وماكان عليها الا 77 راكب بس وافيه اكثر من 200 مقعد فاضي

فخذنا للعيال مقاعد ورا وطقوها نومه كل الرحله الين الوصول ... وفيه ناس كثيرة سوت كذا وناموا ، بس انا للاسف مستحيل انام بطياره وحتى لو كنت مواصل
وقربنا من الهبوط


ونزلنا وكانت الاجواء جدا حلوه وفيه لسعة بروده


وكان كابتن الطياره الله يسعده وزع كروت تسريع اجراءات على بعض الركاب وجانا منها ولما نزلنا دخلنا في سرا خفيف وبسرعه وصلنا لموظف الجوازات وتم اخذ البصمه للجميع بما فيه الاطفال .
وبما ان فيزتنا تير4 تم طلب القبول للمعهد ثم ابلغنا انه لازم نسجل في مركز الشرطه خلال سبعة ايام من تاريخ الوصول لبريطانيا
ماطولنا معه وطلعنا على العفش واول مره بحياتي تطلع شناطي اول شناط والحمد لله جت سوى ،، حملناها وقلبي على يدي مدري يدي على قلبي لان معي كان ادوية وقهوه وتمر وهيل وبهارات
ونمر من عند بوابة الخروج وفيه بوابتين من عند الجمارك ( وحده خضراء اذا مامعك شي تفصح عنه ) والثانيه اذا معك شي تفصح عنه
وانا مامعي شي افصح عنه حسب اعتقادي فدرعمت مع البوابة الخضراء ومحد قال شي
بعد الخروج كنت ابي احد يوصلني لمنطقة ( هيس ) قريبه من المطار عشان اخذ سيارة كنت مستاجرها وكانت سيارة ستيت ( بوكس )
المهم كنا نبغى شريحة نت وكنت سائل الشباب في بوابة بريطانيا وقالوا تلقى شريحة شركة ( 3 ) في كل محل فلقيت مكينه تبيع شرايح بس ماعرفت استعملها وجت وحده بتشتري وكان اول احتكاك مع البريطانيين هنا ،
قلت لزوجتي قولي لها تشري لنا
وقالت لها ورحبت بس ماانقلبت بطاقاتنا لافيزا ولا عادية والكاشكان معنا 50 باوند اكبر من فتحة الكاش
فأجلنا الفكره ،، وشفنا بريطاني يوصلنا كداد
وقلنا اشتر لنا شريحه وحاول وماكان معه صرف يكفي مبلغ الشريحه
فخذ عربيه وانا عربيه وطلعنا برا لسيارته
كنت مستأجر سيارة من ارقوس كانت سيارة صغيرة بوكس (طبعا كبيرة عشان تشيل شناطنا وكان مكتوب تشيل 6 شناط)
نزلنا شناطنا في المكتب وكان في فندق شيراتون
قالوا السيارة اللي انتم حاجزين ميب عندنا وجابوا سيارة يالله تشيل شنطتين بالكثير ، وانا معي 10 شناط غير شنطتين لاب توب
طبعا اللغة كانت حائل في التفاهم معهم بس هم قالوا ان ارقوس كذابين واحنا ماعندنا هنا السيارات هذي ، قالوا عندنا ونيت يشيل عفشكم بزود 10 باوند ،، واحنا ورانا مشوار لكولشيتر وهذي اول مره اطب بريطانيا ودركسون يمين ، فقلت يالله جيبوها بس ، وكان فيه شايب عراقي قال شكلكم طالعين قنص
وتوكلنا على الله ... وكان فيها قارمن ،، وكانت ديزل واتوماتيك












وعبينا ديزل ومسكنا السريع حقهم



اول يوم وكنا تعبانين شوي والا الطريق كان جدا حلو وقابلنا قطيع غزلان يرعى بس للاسف ماامدانا نصوره
ودخل علينا الليل بالطريق الين وصنا اوتيلنا

وكان هوليداي ان وحاجزه عن طريق موقعهم
https://www.ihg.com
هو برا كولشيستر بس قريب منهم يعني شغلة 3 دقايق يمكن ( على الطريق السريع ) لان ماكنت محصل حجوزات في كولشيستر وماكنت ابي اجي ادور على عماها ووصولي بالليل ، فحجزت فيه 4 ايام ، وكان اللي محلي الموضوع انه معي سيارة وكانت ميزه ( بالمناسبة سعر ايجار السيارة يساوي تقريبا سعر احد يستقبلني ويوصلني لكولشيستر ) ...

الاوتيل حلو اجمالا بس كل شي اخدم نفسك بداية من تنزيل الشنط ، وماكان عندهم الا غرف فاضطرينا ناخذ كلنا غرفة وحده





دورة المياه الله يعزكم بدون شطاف


وشطاف المسافر ماركب فدبر عمرك بعلبة موية



وكان فيه نت مجاني وكان اول شي فتح حساب في الملحقية



طلبنا فتح الحساب والصباح تم قبول الطلب ...

للكلام بقية ....نراكم على خير

الليل قصير مايمديك تسوي شي جد