الفيزا البريطانية لمدة 5 سنوات خلال ساعات

MOHANAD · 24-11-2015, 02:00 PM

المواضيع كثير ولكن احب ان اطرح التجربه بأسلوبي وبالتفصيل الممل
واخذ الشخص معي كأنه هو مقدم علشان الي اول مره يقدم يعرف وين يروح و ايش يسوي
ويتطمن ان الوضع سهالات بأذن الله

تم التقديم على المركز الموحد للتأشيرات بالرياض
يوم الخميس 19 نوفمبر

وتم تعبأة الابلكيشن يوم 16 نوفمبر كعادتي المواعيد عندي مضروبه افكر وعلي السريع انفذ

ولم اجد موعد قريب خلال ذلك الاسبوع لاني كنت متواجد فالرياض وما بيكون لي رجعه للرياض الا بعد فتره
وكانت جميع المواعيد فل
فأضطريت اني احجز موعد برايم بزيادة 308 ريال
وكان قبل اخر نص ساعه دوام للمركز
حجزته الساعه 16.30
وكنت مقدم على 5 سنوات بقيمة 938 دولار يعني 3523 ريال
كنت مقدم مرتين قبل هالمره
6 شهور
و
سنتين

وصلت المركز قبل الموعد بنص ساعه

تمر على تفتيش تسليكي
بعدها للدور الثاني لاخذ رقم وبعدها تتبع الخط الازرق للتقديم للبريطانيه والاستراليه

فيه فالصوره الي فوق كرسي وطاوله المفروض يكون شخص جالس ويتآكد من الموعد وان اسمك موجود ومن الرقم اذا معك ويعطيك ختم على ورقة الموعد
وبعدها يفتحلك الباب وتدخل قسم لمملكة المتحدة واستراليا

واول ما تدخل على اليمين قسم لاستلام الجوازات المخلصه

ولقيت المركز شبه فاضي والموظفين خلاص شطبو يبغون يمشون
دخلت قسم المملكة المتحده وبما انه اخر موعد ما كان فيه ارقام ولا شي
وفيه قسمين عوائل و رجال

كان قدامي شخص واحد معاه كم ست مقدمين
دقيقة ومشى

جا دوري الموظف استغرب قال ليش حاجز برايم ؟ مافيه زحمه ومافيه ضغط
قلت على الموقع مالقيت الا برايم
( ممكن لاني حجزت فنفس الاسبوع فحركة من الموقع نفسه ) وقال طيب ليش ما جيت الصبح عادي برايم اي وقت تعال مو لازم على نفس الوقت الي حددته ( ممكن علشان مافيه ضغط عندهم الفتره الحاليه ومو موسم)

الزبده ان الشخص كان محترم وقال وش عندك من اوراق اعطني حبه حبه
بديت اعطيه الاوراق التاليه :
ورقة الموعد
الابلكيشن
تعريف بالراتب من العمل ونسيت اصدقه من الغرفة التجارية توني تذكرت قبل كتابة التقرير انه مو مصدق

كشف حساب اخر 6 شهور

صورتين شخصيه

ومن عندي اظفت صوره للماستر كارد الي معي مع العلم اني ما استخدمها

والموظف كان جدا محترم و يسولف معي ومفروض نخلص ف 3 دقايق بس الرجال مسك خط سواليف وانا ما عندي شي
و قلت هذي جلسه وسواليف خصوصا ان ما وراي شي

بعدها قال تبي اجرائات سريعه او عاديه قلت خليها عاديه
قال خلال 15 يوم تستلم جوازك
قلت اوكي
قال تجي تستلمه من الرياض قلت لا ارسله للمدينه الي ساكن فيها عن طريق ارامكس
والظاهر بزياده 67 ريال لان فالفاتوره زاد المبلغ 67 ريال ومكتوب للخدمات

بعدها قال رح للتبصيم رحت لغرفة التبصيم

فيه كاميرتين فالسقف قال طالع فوق صوره
وبعدها كاميرا اماميه وصوره ثانيه وبعدها
بصمت وطفشت وانا ابصم
2 جالسين يتدربون فيني وفالجهاز المسكين
وسألني عن تاريخ الميلاد

بعدها مشيت وقفلو وكل شخص راح في حال سبيله

يوم الاحد 23 نوفمبر الساعه 12 الظهر جاني ايميل انو طلب الفيزا تحت الاجراء
يوم الاثنين الساعه 11:53 وصلني ايميل انو الفيزا خلصت ورجعوها لمكتب التاشيرات الموحد بالرياض

وخلال نفس اليوم الاثنين 23 نوفمبر الساعه 3 للعصر اتصلو علي المكتب الموحد وقالو جوازك عندنا تبغى تستلمه من الرياض او نرسله للمدينه الي حددتها قلت ارسلوه
قالو كم جواز قلت عدد 2 جديد وقديم
قالو اوكي يومين عمل من ارامكس والجواز عندك

انا استغربت وش هالسرعه خلال يوم واحد خلصو منه ؟

بديت اوسوس انو انرفضت الفيزا

لاني نسيت حاجتين المعروف عنها انها مهمه
1: تصديق من الغرفة التجارية لتعريف الراتب
2: فيه عمليات تحويل صارت بين حساباتي يوم كنت فبريطانيا اول شهر نوفمبر بس بمبالغ لا تتعدى ال 5 الاف ريال سعودي وما ذكرتها فالابلكيشن

وقلت انتظر و اشوف والله يسهل مع اني مقدم على 5 سنوات و ب 938 دولار بس غلطت الشاطر ب 10

و اليوم تاريخ 24 نوفمبر جاتني رساله من ارامكس واتصلو فيني قالو تعال استلم الارساليه
ورحت و استلمت الارساليه وقلت خلاص مو فارقه ما بفتح الارساليه الا فالبيت واشوف رفضو او وافقو الحمدلله على كل حال راضي بالمقسوم واذا انرفضت اكيد بسبب غلط مني

وهنا الاجابه

الحمدلله فيزا لمدة 5 سنوات دخول متعدد

رسوم فيزا 5 سنوات 3523 ريال
رسوم ارساليه مع ارامكس 67 ريال
رسوم موعد برايم 308 ريال

المجموع 3898 ريال

ولو نحسب الوقت الي استغرقته عندهم تقريبا 8 ساعات تقريبا

ما كان عندهم ضغط الفتره هذي واحسهم يوم شافو من كثر م رحت بريطانيا قالو لا تدققون فالاوراق هذا من ربعنا اعطوه 5 سنوات

الي يروح للموعد حقه يكون كاشخ افضل لان الصوره الي بتنحط فالفيزا بتكون الصوره الي بيصورنه في غرفة التبصيم
جراء التنويه ما يحتاج اقول ليش

حجز طيران وحجز فندق وتامين طبي ليست مطلوبه

مواضيع بتفيد المتقديمن

فيزا بريطانيا خطوة بخطوة 2015 UK VISA STEP BY STEP
http://www.arabtrvl.com/vb/t1482.html

فيزا بريطانيا متطلبات و نماذج 2015

http://www.arabtrvl.com/vb/t5855.html

اي استفسار كالعاده فالخدمه

تحياتي

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تجربتى مع الفيزا البريطانية والتى لم تنتهى بعد.	سامح سياحة	فيزا بريطانيا	34	02-12-2021 10:50 PM
تجربتي مع الفيزا البريطانية ..	HASSAN	فيزا بريطانيا	14	02-12-2021 10:49 PM
تجربتي مع الفيزا البريطانية	PrinceOfPersia	فيزا بريطانيا	20	21-06-2017 11:33 PM
الفيزا البريطانية \| ساعدوني أهل الشرقية	Ashwaq	فيزا بريطانيا	8	06-03-2015 01:19 AM