مطعم مارغريتا الايطالي - الصفحة 2

هاوية الاسفار · 08-12-2015, 11:52 PM

السلام عليكم و رحمة الله و بركاته

انا و عائلتي الصغيره من عشاق الاكل الايطالي

و هذا المطعم من مطاعمنا المفضلة و اللي افتتح اول فرع له في الجي بي آر في سنة 2008

و كنا من المترددين الدائمين لكن بفضل من الله تم افتتاح المطعم قبل سنة في شارع الشيخ زايد

بعد الجسر المؤدي الى دبي مول

مارغريتا

جلسات المطعم الداخلية

المطعم له جلسات داخلية و خارجية و الجو حاليا رهيب للجلسات الخارجية

ما قدرت اصور لانه فيه زباين كثير في الخارج

ضيافة المطعم

و طبعا احلى شيء في المطاعم الايطالية ضيافتهم و هذا الصوص

المنيو

في الجي بي آر كنا دوم نيلس برع و خاصة في الشتاء اما الصيف نقعد داخل في البراد

لكن بسبب الزحمة و عدم توفر المواقف كنا نضطر احيانا نوقف في مواقف الفندق الساعة ب 50 درهم

و هذا كله عشان عيون مارغريتا

لكن اشكر صاحب المطعم اللي انقذنا و فتح فرع ثاني و الفرع الثالث بيتم افتتاحة في 2016

ان شاء الله

نكمل وياكم المنيو

الحلويات للاسف ما عندي صورة بس جربت حلا التيراميسو و كان لذيذ

الصور القديمة كلها مسحتها الا وحده و هي رافيولي و بيتزا بالخضار المشوية لذييييييييييذه جدا

و هاي الصورة قبل سنة بالضبط

طبعا صرنا مشهورين و اول ما دخلنا شافنا النادل و يقول وينكم من زمان ما بينتوا

مع انه يمكن 3 اسابيع ما سرنا بس

قلت ممكن تاخذ تيلفوني و تصور الاكلات في المطبخ قال لحظه بكلم المسؤولة كانت اجنبية

و يتنا و هي مستغربة شو عندكم قلت و الله ابغي اسوي تقرير عن المطعم و راويتها المنتدى

و قلت هذا للسياح و عطيتها فكرة عن المنتدى و قلت لها بالعربي قالت خلاص بخلي البوس Boss يشوف

و استانست و خذت التيلفون و سارت المطبخ تصور و هاي الصور

باستا

هذا الشيف يسوي ريزوتو

و خلص الريزوتو

لازانيا

و فوقها بارميزان

البيتزا و الفران

هاي البيتزا بالمشروم كانت تيك اوي

و هاي المارغريتا طلبنا

طلبت باذنجان بالجبن لذييييييييييييييذه و شكلها نفس صحن اللزانيا اللي فوق بالضبط

بس للاسف ما صورتها لاني سالت المسؤولة قالت انا صورتها

و عندهم جبنة موزاريلا فريش مثل الكورة وياها طماطم كرزيه و صوص بعد لذيذه

و هذا بعد بيننا و بينه عشرة عمر

عموما المطعم وجباته كلها لذيذه و انصحكم فيه بشده

و في الاخير عندهم حركة هاي الجرة فيها ارقام و تختارون رقم معين

و اذا طلع الرقم صح العشا يكون مجاني

بس للاسف و لا مره صابت ويانا عقب ما دفعنا قعد العامل يلعب ويا ولدي و يقول عطني

رقم قال34 و طلع صح بس للاسف راحت علينا

لكن مب خسارة اللي ندفعه مقابل الاكل اللذيذ

خلصنا التقرير و انتظروني في تقارير قادمة باذن الله

دمتم بود

الايمان, MOBARKI, آخـــرفـــرصـــة و 8 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
كنا هنا (4) المطعم الايطالي ال غوستو + كافيه " جوفريز " جدة	آخـــرفـــرصـــة	بوابة السعودية	48	29-04-2016 06:07 AM
الريف الايطالي ؟	bader264	بوابة ايطاليا	2	27-10-2015 12:36 PM
مطعم الدبلومات ... أفخم مطعم في اديس ابابا	آخـــرفـــرصـــة	بوابة اثيوبيا	23	13-05-2015 02:29 AM