23-05-2016, 09:45 AM
|
#1 |
مسافر جديد
تاريخ التسجيل : Mar 2016 رقم العضوية : 8574 الدولة : المملكه العربيه السعوديه الرياض الجنس : ذكر المشاركات : 28
|  ملاحظات من سفرتي لتركيا
السلام عليكم ورحمة الله
اولا احب اشكر كل القائمين على منتدى المسافرون العرب
وكل من كتب تقرير وكل من افادنا واسأل الله القدير ان يوفقهم ويحميهم ويرزقهم
ولا اقدر اذكر احد معين لأن الجميع بدون استثناء اجادوا وافادوا
ولكن
ماجد الفهد
ماجد الفهد
لازم اخصه بالشكر وليعذرني الجميع .
ثانيا:
من عزمت السفر الي تركيا وبديت اخطط واقراء كنت اقراء كثييير عن اخلاق الأتراك الشينه وانفسهم الضيقه
ودايم تمر على مسامعي من الناس الأتراك قشران وبهم شوفة نفس وينفخون و و و ...
وسبحان الله في نفس الفتره اللي قررت اسافر كان عندي عده مراجعات حكوميه وبنوك وكنت احتك بكثير من الموظفين الحكوميين وموظفين البنوك ولا اعمم لكن كنت اشوف كثييير منهم اخلاقهم ضيقه و ينافخ على غير سبب ويعطل مصالح المسلمين بدون مبرر وكثييير منهم وكثيييير يخلصون واجباتهم على اكمل وجه ولكن بوجه عابس ورفع صوت وخصوصا العماله الأجنبيه في البنوك والله اني استحي من معاملة الموظفين لهم من رفع صوت ومن وجه عابس ومن تعامل سيء
واقارن ما اسمع واقراء و اشوف واقعنا بوطننا الحبيب
واسأا نفسي هاللي يسبون اخلاق الأتراك وتعاملهم ما يشوفون حنا وشلون نتعامل مع بعض وبنفس الوقت اقول انت ما رحت لتركيا الي الآن اصبر ولا تحكم الا من واقع تجربه
والصدمه من البدايه من وصلت اسطنبول وأول تعامل لي مع شركة ايجار نقاط النت الرجال واقف على موعدنا و رافع اسمي و بأبتسامه عريييضه جميله وسلام حار شكيت انوه يعرفن من زمان.
وكان عندي رحله على طول لطربزون وسريع سريع الصاله الثانيه ونجي للتفتيش وتوصل زوجتي ويوم شافتها الموظفه
بكامل حجابها ما فتشت قدام الناس قالت لو سمحتي وهي تتبسم تعالي
انا استغربت وقلت هذي تبي تسلط عليها وبعد شوي ترجع زوجتي وتقول فتشوني بأحترام ولا حتا طلبوا مني افك النقاب بس ما رضت تفتشها تفتيش شخصي قدام الناس وتقول انهم يضحكون معي وانهم لطيفين للغايه
قلت هذي مهيب مقياس .
الصدمه بطربزون واوزنجول وايدر يا ناس مؤدبين وبشوشين واخلاقهم عاليه وكلمه دايم اسمعه (عرب ستان قود )
والمواقف لا تعد وكثيره
وبعد ما جيت اسطنبول اسأل نفسي هل انا موفق او كلهم كذا ابتسامه وحبابه
صاحب اول مطعم تعشينا عنده كنت متزمت ومتشدد بحكم انهم حراميه ويأخذون اكثر من الواقع وينزلون طلبات زياده
والمفاجأه ان الماء بلاش
والشاهي بلاش
وطلبنا نعناع وبلاش
كله على قولتهم ( اكرام )
انا ما ادري وين ضيق الخلق وشين النفس اللي يقولونه الناس ..
بأخر يوم بأسطنبول مريت على راعي المطعم هذا نفسه بالصدفه يوم شاف البزران بدا يخمخمهم ويحبهم ويوم قلنا اننا مسافرين تقطع ابن الحلال تقل بيننا عشرة طويله
عموما
باقي كم نقطه انصح المسافرين لتركيا
1-لا تصرف دولار وليره ويور من واقع تجربتي السحب من الصراف احسن بكثير واذا طلب حسابه باليورو او الدولار اقول ما معي الا ليره وغالبا يصير سعر الصرف مناسب جدا
طلب من 50 دولار قلت مامعي الا ليره قسم وضرب قال هات 140 ليره ويوم حاسبته لقيت ان سعر الصرف
50 دولار = 148 ليره
بالنسبه للشمال الشرقي
وتحديدا اوزنجول وما جاورها
2- اذا كان الجو ماطر لا تتحرك ابد ولا تفكر انك تروح لمرتفعات ابد ابد ابد تقدر تروح لقرى مجاوره مثل شيكرا لكن مرتفعات ابد لا تفكر.
3-وانت رايح لمرتفعات السلطان مراد يوجد طريقين اونت طالع من اوزنجول متجه لطربزون اول طريق يسار لا تروح معه الطريق الثاني يسار بالماريه عنده لوحه عربي مكتوب مرتفعات السلطان مراد هذا مسفلت وطريق زين الأول وعر ولا سفلت وكله حفر.
4- لا تفوت بحيرة السمك ومرتفعات شكرسو ابد
صحيح الطريق مهب مسفلت ومخيف بعض الشي ومو شرط توصله ولكن لا تفوت الأستمتاع بتفاصيل الطريق والمرتفعات ولو تطلع نص المسافه وترجع مع العلم اني اشوف ان الطريق حلو جدا لكن بعض الأخوان يرونه مخيف واهم شي يكون الجو مشمس.
5-المطاعم البعيده عن بحيرة اوزنجول ارخص بكثيييير .
6-انا لقيت العسل بالمرتفعات وبالقرى الصغيره ارخص بكثييييير من المحلات
هل فيه فرق بالجوده ؟
الله اعلم انا مانب خبير بالعسل لكن اشوفه من المناحل اللي بالقرى وانت طالع المرتفعات ارخص .
7- مثل ما قال كل من كتب تقرير عن الشمال الشرقي
فعاليات ما فيه ذاك الزود استرخاء وطبيعه ومناظر لا تمل وهدوووء عجيب وراحة اعصاب غير كذا لا تدوره بالشمال الشرقي .
*اسطنبول*
1-التكسي اللي عداده مهوب بالمرايه فوق تراه نصاب وحرامي ابعد عنوه وانصحكم ببرنامج bitaksi الحقيقه مفيد جدا وجزى الله خير من دلنا عليه.
2- تذكرة دخول فيالاند تقدر تدفع 50 ليره زياده ولا تصف سرا في بعض الألعاب مع اني رحت يوم اربعاء لكن كانت مزحومه وبعد ما دخلت دفعت زياده لكل شخص 50 ليره وصرنا ما نصف ندخل كل لعبه بسرعه.
3-لا تفكر ابد ابد تروح لجامع ابو ايوب الأنصاري رضي الله عنه او ما يسمى بمنطقة ايوب والتلفريك ومقهى بيير لوتي
يا ناس هل يعقل يجي للرياض سائح بولندي مثلا و اوديه لمقبرة النسيم او العود ؟؟؟
يا ناس هل من المعقول اني اقعد احتسي قهوتي الساخنه وانا مطل على قبور ؟؟؟
تلة العرائس افضل واحسن اطلاله وجو ولا اروع وارفع عن مستوى البحر.
4- بحكم اني اول مره ازور تركيا يوم جيت لأسطنبول استعنت بمرشد سياحي عراقي يومين فقط لين دليت ومسكت الدرب وعرفت المناطق وعرفت كيف استخدم المترو والترام والباص والعبارات وبعده انطلقت ورحت ولله الحمد لأغلب المناطق اللي نصحتون بزيارته لحالي .
واخيرا ما كتبته يعبر عن رأيي انا ولا هوب لازم يصلحلكم بس هذا ما كان يقرقع بخاطري
من سافرت الين رجعت .
والمعذرة على الأطاله ترا اول مره اكتب موضوع
وأولا واخرا نحمد الله على الرجوع للوطن ونحن بخير والدعاء لكل من كتب بهذا الموقع المبارك وجزاكم الله خير
وصلى الله على سيدنا محمد . |
|  |
75الاعجاب
العرض الشجري
المواضيع المتشابهه 
