ما شاء الله تبارك الله تقرير جديد وجميل من انامل مميزه مستمتعين معاكم
وبانتظار الاجزاء الجايه

أرسلت من SM-G935F بإستخدام تاباتلك

بسم الله الرحمن الرحيم



اليوم الثاني

اصبحنا واصبح الملك لله لا اله الا الله

الاماكن المراد زيارتها :

1 - الصنواي لاقون

الكبار = 170 رنجت - الصغار = 140 رنجت (من شباك التذاكر ) - ( 0 - 2 ) مجانا
تفتح يوميا من 10 ص - 6 م

Tickets, Deals & Packages

الكبار 153 رنجت - الصغار 126 رنجت ( من موقعهم ) - ( 0 - 2 ) مجانا

Asiatravel.com | Hotels Resorts Air Ticketing Tours Packages Reservation

الكبار 108 رنجت - الصغار 95 رنجت ( من اسيا ترافيل ) - ( 0 - 2 ) مجانا

2 - مول البراميد
يفتح يوميا من 10 ص - 10 م

3 - الاي سيتي
i-City | Official Website

تفتح يوميا من 5 م - 11 م
الدخول مجانا والالعاب بفلوس عن طريق شحن البطاقة بالسعر اللي تبغاه
والمتاحف الموجودة فيها كل متحف له سعر للدخول



استيقظنا في تمام الساعة 7:30 وصلينا واتجهزنا وكل واحد اخذ شنطته وحصنت البزوة ونزلنا للوبي وطلبنا جراب واتوجهنا للصنواي لاقون وصلنا كانت الساعة 9 تماما ولسه مافتحوا توجهنا للمجمع عشان نفطر ولقينا صب واي ودخلنا وفطرنا والحمد لله خلصنا واتجهنا لبوابة الملاهي وكان باقي ربع ساعة وتصير 10 وقعد حبيبي االصغير يتعرف على الموظفين وفي الاخير استقر باللعب مع حراس الامن الاثنين المهم في وقتها توجهنا لكاونتر التذاكر واعطيناهم اوراق الحجز واعطونا الاستكرات ولبسناهم وتم تفتيشنا



دخلنا الحديقة اخذنا جولة بعدها توجهنا للملاهي المائية الحديقة تقريبا كانت فاضية مافي الا نحنا والموظفين في ناس بس قليل مرة ابو حسن يقلي يقولوا زحمة ماشفنا شي قلت اجازة قال ها قلت انتظر العصرقال يالله خلينا ننطلق وعاد لعبوا اغلب الالعاب وكان الجو حلو مغيم وفيه هتان والولد الصغير كان بيغرق بالمسبح وبعدها حرم يروح بعيد والحمد لله للاسف ماقدرت اصور كثير لان الجوال كان محطوط بالواقي من الماء والصورة طلعت مش ولابد لان الحبيب تعلق فيني وباقي الصور شخصية لقيت لكم ذي































المهم الساعة 4:30 الكل قال جوعان خلاص تعبوا قلت تمام خرجنا ورحنا اتغدينا من برجر كنج قريب من صناديق الامانات وخلصنا ورحنا بدلنا الملابس وصلينا عصر وظهر ورحنا الملاهي لعبنا بثلاث العاب الباقي كان صيانة وبعدها قالوا البزورة نمر حديقة الحيوانات ولفوا كل القسم حق الحيوانات وعاد الصغير الله يحفظه هيوانات هيوانات تعبت وانا الحقه



























والحمد لله الساعة 6 تماما خرجنا من الحديقة واتجهنا لمول البراميد للبحث عن عربية للصغير ومالقينا تعبنا بعدين ابو حسن اخذ مساج عند ذا المحل وكان حلو قلي تعملي مساج قلت بالله شوف كيف الاخ نائم مال امه داعي قال تمام خلال المساج البزورة ناموا كلهم لمدة ساعة





قال ابو حسن ترجعوا الفندق او نروح الاي سيتي قلت لا لازم نروح كانت الساعة 7:30 بس قلت اول ابغي قهوة ضروري جدا جدا قال ايوه والله فين ديب اند ديب لقيناه وكان زحمة مرة مرة وكان في قبلنا بالانتظار 6 قال ابوحسن بيضيع الوقت خلينا ندور غيره ومشينا ولقينا كوفي حلو فيه العاب للاطفال قلنا ندخل عشان الصغير يخلينا نروق ربي يحفظه ودخلنا وطلبنا موكا واسبريسوا وتراميسسوا وثلالث ايس كريم للحلوين وهذا هو المحل















وبعدها مرينا محل واشترينا مخبوزات وخرجنا وطلبنا اوبر عشان نروح الاي سيتي



ونحنا قاعدين ننتظر اوبر لانه قال انه قريب بس فيه زحمة قلنا ننتظرة عند البوابة افضل شوي مااحس احد لاصق فيني ادور وين اخوكم الصغير مافي اختفى جودي اسال سوني وميمي وين اخوكم ماندري كان عندك وساعتها خلاص حسيت بيغمي علي ابو حسن دخل المول وينادي باعلى صوته هو سوني وانا وميمي بندور برا وانادري واصرخ باعلى صوتي مافي رد وللامانة كان حولي كثير صينين والله مااحد تحرك برود غير طبيعي فيهم وقعدت اصرخ جاتني حرمتين ورجال اروبين وقعدوا يدوروا معايا وريتهم صورته الا شوي بعد 10 دقائق تجيني الحرمة وتقلي رجل الامن ماسك طفل بيبكي ممكن ولدك واروح والقاه مع رجل الامن اللي كان بالصبح يلعب معاه ويالله ساعتها سجدت لربنا شكر وشكرت رجل الامن عشت ساعتها لحظة اتمنى من كل قلبي ان ولا ام ولا اب بالدنيا يعيشوها الحمد لله ربي حفظه ليا
دقيت على ابو حسن وبلغته والغينا اوبر واخذنا تاكسي وعلى الفندق



تقيمي لملاهي الصن واي لاقون
20/17
حلوة وممتعة وتجنن وراح اروحها مرة ثانية ان زرت مالزيا ان صاروا يسمحوا للاطفال باي لعبة بالذات بقسم الثيم بارك حتى قسم الزحاليق وفوقها ليت لو يخلوها زي الليغو لاند تذكرة للثيم بارك وتذكرة للوتر بارك افضل وتكون ارخص عشان الواحد يقدر يخصص لها يومين وياليت لو يهتموا شوي بقسم الصلاة

تقيمي للكافيه اللي دخلته
20/15
الاشياء اللي طلبتها لذيذة وطعمه والله حتى التراميسوا مرة مرة لذيذ ومتنوع وعجبني اهتمام بوضع ركن للاطفال

تقيمي للمساج
20/15
ممتاز ومريح والمكان هادي ويجيب النوم بس عيبه اللي عمل لي المساج كانت يده خفيفه وانا احب الضغط القوي

تقيمي لمول البراميد
20/20
روعة وجميل متنوع فيه الغالي والرخيص وراح اكرر الزيارة له لان ماشبعت منه ولا لفيته عدل



مصاريف اليوم الثاني
جراب من الفندق للملاهي = 10 رنجت
فطور وماء من صب واي = 50 رنجت
تذاكر الملاهي من اسيا ترافل = 396 رنجت
غداء من برجر كنج = 50 رنجت
ماء وفشار = 20 رنجت
مساج للرجل = 40 رنجت
قهوة وابيس كريم = 34 رنجت
معجنات وعصائر = 50 رنجت
جراب للفندق = 50 رنجت
المجموع = 700 رنجت = 600 ريال



في حفظ الرحمن
ابو حسن و ام حسن

بسم الله الرحمن الرحيم







اليوم الثالث

اصبحنا واصبح الملك لله لا اله الا الله



الاماكن المراد زيارتها



1 - حديقة شاه علم

مفتوحة 24 ساعة

الدخول مجانا



2 - كيدزانيا

https://www.kidzania.com.my/



يفتح يوميا من 10 ص - 5 م عدا السبت يغلق 7 م

الكبار 50 رنجت - الصغار 75 رنجت - الاطفال 35 رنجت



3 - مول البراميد

يفتح يوميا من 10 ص - 10 م



4 - وتم اضافة الاي سيتي

i-City | Official Website



يفتح يوميا من 5 م - 11 م

الدخول مجانا لكن المتاحف والالعاب اللي فيها بفلوس







صحينا الساعة 6:30 صباحا وصلينا وجهزنا نفسنا وجهزت المعجنات الباقية والعصائر وحصنت البزورة ونزلنا اللوبي وسالتهم ان كان يقدروا يوفروا لي تاكسي لبكرة الساعة 7 قالت انتظري اشوف شوي وردت قالت تمام قلت كم ياخذ قالت 50 رنجت واتفقنا وطلبنا اوبر لان البارح حق جراب السيارة كانت معدومة للامانة فابو حسن قال ادفع زيادة وارتاح افضل وذا اللي صارتوجهنا لحديقة شاه علم وصلنا الساعة 8 والربع ودخلنا وكانت حديقة جميلة فعلا ورائعة بكل ماتعنيه الكلمة من معنى فطرنا وراحوا البزورة يلعبوا بالالعاب وركبوا الدرجات وكانوا يبغوا يركبوا قوارب بالبحيرة قلت لهم لا عشان لاتنعدم ملابسكم وانا بالحديقة وقلبي قلقان على الصغير والحمد لله انبسطوا والجو جميل جدا لا حر ولا برد وفيه غيوم تجي وتروح فعلا الحديقة تستاهل وقت اكثر للامانة ماصورت الا صورقليلة لان كنا مشغولين انا وابو حسن بالانتباه للصغير بس هذي صور من النت























قعدنا بالحديقة للساعة 11 بعدها طلبنا اوبر واتجهنا لكيدزانيا اعطيناهم ورقة الحجز واعطونا الاساور







دخلنا ووصلنا وكان فيه عرض بحاول انزله حلو وبداو البزورة بتجربة المهن المكان حلو وممتع للاطفال الا الصغير حقي ماناسبه الا في غرفة واحدة عاملينها لااطفال بسنة راح وجرب الالعاب اللي فيها وبعدها نام لانه تعب بالخديقة الاولى وانا قعدت معاه والبزورة مع ابوهم يكملوا لعب انبسطوا واتسلوا واعطوهم فلوس يستبدلوها بهدايا واخذوا هداياهم وبدا الكل يقول بصوت واحد جوعانين





































خرجنا تقريبا كانت الساعة 3 اتجهنا لكيرف مول اتوضينا وصلينا وبعدها دخلنا تكسو حبيب قلب قصة حب لان شفت بتقريرها ان فيه كل شي وقعدت ادور على عربية للاطفال وتعبت وماابغي الوقت يروح علينا سالت الموظفة قالت فيه وجزاها الله خير ورتني واخترنا عربيه واخذنا شوكلاته للبزورة وحطيت الولد بالعربية فورا يااني ارتحت حسيت هم وانزاح عن قلبي وعلى طول طلبنا اوبر وعلى البراميد مول







اول ماوصلنا بحثنا على فيش منهاتن قلت ل ابو حسن اسال اي احد انا مرة جوعانة والبزورة لاننا مااكلنا من الفطوروهو يقول الحين نلاقيه قصة قالت بدورالمطاعم حسيت ان السالفه بتطول قلت ل ابوحسن بمر ذا المحل بس قال تمام سالت الموظفة قالت امشي طوالي وانزلي تحت تلاقيه بيدك اليمين طالع فيني ابوحسن كذا وقعد يقول مرة ماتصبر ماتحب الاستكشاف كيف بتحفظي المكان وتستمتعي بالمكان لو مااكتشفتيه بنفسك وابو حسن يعطيني ارشادات الاستمتاع والاستكشاف بالسفر والبزورة يبغوا يروحوا يتزلجوا وانا ابغى اكل واتسوق







واخيرا وصلنا لفيش منهاتن وطلبنا وفعلا يستاهل المشوار طلبنا وجبة استكوزا انا وابو حسن عشان الرجيم لايخرب والبزورة وجبتين سمك فيلية وبطاطس وعصائر والحمد لله حمدا كثيرا على نعمته الجوع كافر فعلا وهذي الصور لطلبنا من النت لين القى صوري















خلصنا الاكل وزاد والباقي اخذته سفري عشان ولدي لانه صحى ونحنا مخلصين قلت ياكل بالعربيه وبعدها تسوقنا وشوي واشوف محل الكيك الياباني وقلت لازم ناخذ واخذنا اثنين عادي وبالشكولانه قامت ميمي وسوني ماما يالله نقعد ناكل الكيك قلت لازم ناكله بارد ماسمعت الحرمة تاكد عليا قالوا ها طيب وكانت الساعة 8:30 قال ابو حسن تبغوا شي او نروح قلت بس الحمامات رحنا الحمامات وبعدها طلبنا اوبر وعلى الاي سيتي





وصلنا هناك وكانت الساعة 9 اشترينا ايس كريم وموية وشوية لذائذ وقعدنا واتجولنا وانبسطنا بعد ساعة شوي تنزل مطر خفيف وفرحوا البزورة مطر مطر الا شوي توقف قال ابو حسن ذي ياولدي مطيرة تصغير لمطر وقعدوا يضحكوا وشوي الجو يصير حار ورطوبة خلاص تخنق قلت ل ابو حسن خلاص انا مرة تعبت لان عباية ورطوبة وحرارة قال ابو حسن وانا صدعت بس البزورة يبغوا يلعبوا لسه قلت مافي وقت يادوب ارجع واجمع الاغراض بكرة ورانا سفر قال ايوه نسينا عاد وجوههم صارت كذا قالوا طيب نرجع نسبح قلت طيب طيب طلبنا اوبر وعلى الفندق







مرينا ناكد على الاستقبال بخصوص التاكسي قالوا تمام بيجي الساعة 7 قلت تمام وسالتها على المسبح قالت يقفل 9 قاموا البزورة قلت لهم بكرة بنروح مكان تحفة وطلعنا واتعشينا بالكيك والفطائر الباقية من امس والعصائر والحمد لله على النعمة وجهزت الشنط ونمنا











تقيمي لحديقة شاه علم

اعطيها 15 / 10

لكل شي حديقة شاملة وكاملة من كل شي حتى فيها مطعم هندي بس ماجربته وفيها اكشاك يبيعوا ذرة وموية وخفائف بس ماجربت شي لان جبت الاكل معايا وفيه انشطة اخرى بس ماجربتها



تقيمي لكيدزانيا

اعطيها 17 / 20

المكان حلو وممتع وتعليمي للاطفال ومرة مرة انبسطوا فيه بس عيبه ان بياخذوا مبلغ على الام والاب والمفروض يكون مجانا لان الام والاب مستحيل يلعبوا اي لعبة فما ادري ليه ادفع مبلغ وكمان الاطفال اللي بعمر جودي المفروض يكون في مكان افضل للعب فيه لان دافعه قيمة تذكرة له



تقيمي لمطعم فيش منهاتن

اعطيه 20 / 20

المطعم يستاهل كل ريال الاكل الخدمة الطعم كله تمام



تقيمي للاي سيتي

اعطيها 15 / 20

المكان حلو والفعاليات فيه حلو وكل شي بس ينقصه الجو الحلو يعني ممكن كانوا ركبوا رذاذ للماء لتلطيف الجو او مراوح زي اللي في صن واي لاقون مجرد اقتراح انا المتاحف ماجربت ولامتحف بسبب البزورة مايبغوا وكمان ينقصها العاب للاطفال لان اغلبها قديمة او صغيرة عليهم ماعجبتهم الا لعبتين ومالعبتهم لسببين

السبب الاول قالوا ميمي ماينفع تركب كذا لعبه لانها قصيرة وجودي لانه صغير

السبب الثاني ان كان ورايا سفر ولازم ارجع الفندق







مصاريف اليوم الثالث

اوبر لحديقة شاه علم = 11 رنجت

اوبر لكيدزانيا = 20 رنجت

تذاكر كيدزانيا من النت = 266 رنجت

مشروبات وعصائر = 20 رنجت

اوبر لمول البراميد = 20 رنجت

غداء متاخر في فيش منهاتن = 160 رنجت

كيك ياباني وماء وعصير = 50 رنجت

اوبر للاي سيتي = 24 رنجت

مشتريات من بقالة 7 الفن = 30 رنجت

اوبر للفندق = 10 رنجت

المجموع = 601 رنجت = 500 ريال







في امان الله

ابو حسن و ام حسن

دعواتكم

ماشاءالله

جميل جدا ذكر المصاريف

يوم جميل

جميل انطباعك عن شانغريلا حاسة كل الناس زاروا بينانغ الا أنا

باصات إيرولاين جربناها لأول مرة في رحلتنا الشهر الماضي وعجبتنا جدا جدا كخيار بديل للطيران .. فعلا كانت خدمة رائعة

لا زلت متابعة

بسم الله الرحمن الرحيم


اليوم الثامن
اللهم مااصبح بي من نعمة او باحد من خلقك فمنك وحدك لا شريك لك

الاماكن المراد زيارتها
1 - التوجه للنكاوي

2 - حجز الدبابات والمانغروف
سعر ركوب الدباب العائلي من 200 - 250 رنجت
رحلة المانغروف مركب خاص من 300 - 350 رنجت

3 - الوصول للمنتجع والراحة والغداء

4 - الفورميلا ون
تفتح يوميا من 10 ص - 7 م
37 رنجت لمدة 10 دقائق سيارة راكب واحد
60 رنجت لمدة 10 دقائق سيارة راكبين لبالغ وطفل

5 - حديقة لجيندا ونصب النسر ومسجد الهناء
تفتح يوميا من 10 ص - 6 م
الدخول مجانا



استيقظنا اليوم في تمام الساعة 5:30 واستعدينا ورتبنا امورنا وصلينا ونزلنا الشنط ونزلنا الفطور وتوديع المنتجع الرائع شانغريلا جولدن سادس والمرور بالشاطي ومشاهدة اخر شروق للشمس في اللولوة بينانغ ثم توجهنا للافطار وكالعادة افطار متكامل يلبي جميع الاذواق























خلصنا الفطور الحمد لله على نعمه التي تعد ولا تحصى وعملنا اجراءات الخروج واتصلنا على احمد قال هو بالطريق الساعة 7:40 دقيقة وصل ماشاء الله توكلنا على الله واتجهنا للمطار وكان مطاررائع بكل ماتعنيه الكلمة من معنى شحنا العفش واتجهنا لصالة الانتظار واشتريت خفائف للاطفال وبعدها صعدنا الطائرة ووزعوا علينا وجبة خفيفة والبزورة كانوا شبعانين قالوا ماما مانبغي قلت حطوها بالشنطة شوي ووصلنا الساحرة لانكاوي









وصلنا المطار نزلنا من الطيارة وادور شنطة القهوة وادور مافي فائدة اسال ابو حسن شكلك نسيتها بالمطار قلت لا تقول شحنها اكيد شحنها مع الشنط قال والله مااذكر باذن الله نكون شحنها دخلنا المطار الجو زي النار والشمس قوية ورطوبة دخلنا وانتظرنا نص ساعة بعدها استلمنا العفش وندور الشنطة مافي قلت الله يرحمها واتجهنا لمكاتب حجز الرحلات المواجههة لبوابة الخروج واخذنا رحلة من المكتب الثالث من جهة اليد اليمين الموظفة الوحيدة اللي كانت مسكينة مااحد عندها وهي اللي نادتنا بنت طيوبة ومحجبة وتتكلم عربي مكسر ( لاتضحكوا على الوصف عاد ماني لاقية الكرت حقهم والله ) المهم بعد جدال ومكاسرة اتفقنا على رحلتين مع التوصيل من والى الفندق
جولة الدبابات ساعتين ونص ب 300 رنجت دبابين
و رحلة المانغروف مركب خاص 4 ساعات ب 300 رنجت
وبعدها توجهنا لمكتب التكاسي واخذنا تاكسي من المطار واتجهنا للمنتجع
3 ايام منتجع ميريتوس بلانجي بيتش - جناح حديقة ( 3150 ريال )

[url=http://www.booking.com/Share-mvvAfH]Meritus Pelangi Resort, Pantai Cenang, Malaysia - Booking.com[/urlMeritus Pelangi Resort, Pantai Cenang, Malaysia - Booking.com



ضيفونا عصير وجلسنا باللوبي وجانا موظف اخذ ورقة الحجز والجوازات وقلنا خمس دقائق وبعدها رجع قلنا حجزنا فيه مشكلة سالناه قال الجناح مايقبل الا طفل و بالغين قلت طيب الحل قال لازم ناخذ جناح ثاني للاطفال قال له ابو حسن لايمكن الاطفال اعمارهم اقل من 12 سنة قالوا ذي سياسة المنتجع قله ابو حسن ورقة الحجز تقول جناح حديقة لعدد 2 بالغين و3 اطفال شامل الفطور قال لايمكن كيف كذا من وين حجزتوا قلنا له من اجودا قال طيب انتظروا اسال المدير ان يسمح قلنا طيب واللوبي جدا جدا حار والبزورة بدوا كل واحد انا جوعان انا عطشان قلت لهم خرجوا الوجبات اللي بالطيارة واعطلوا واعطيتهم السناك الا شوي يجي المدير يحاول يفهمنا ان سياسة المنتجع ماتقبل وان الخطا من اجودا قلنا لهم تفاهموا مع اجودا قال طيب الحين نتصل عليهم شوي يرجع لنا ويقول اجودا يقولوا بلغوكم قلت لهم ماوصلني الا ذا الايميل غيره ماوصل المهم جاء المدير مرة ثانية وقعد يشرح ونحنا مصريين على راينا ونحنا خلاص منتهين حر وعرق وجوع بالذات انا وابوحسن وشوي ياذن الظهر وخلاص بدات اصدع جاء المدير من جديد بحل انه يغير الحجز لجناح عائلي مطل على الشاطي بس ندفع باليوم فرق 500 ريال قلنا له وليه نحنا نتحمل الغلط اجودا اللي اعطتنا الحجز هم يتحملوا فارق السعر نحنا مالنا صلاح قال مايصير وكذا وجلسنا نتجادل للساعة 2 ونص شوي يجي الموظف يقلنا نبغي الجناح العائلي او لا راح ابو حسن يشوفه الا يلاقيه صغير قلهم لا ماابغاه ابغي الحجز حقي وخلاص قالوا طيب نشوف لسه نتصل باجودا ونتفاهم معاهم المهم بعدها رجع لنا المدير وقال اجودا مو راضية تتحمل ونحنا مانقدر نعطيك شي يخالف سياستنا والغجناح العائلي خلاص تم حجزه من قبل ناس وقاعد يورينا ساعتها ابوحسن انفجر وقله شوف ياانك تعطيني حجزي او اطلب البوليس السياحي قله عادي انا الغي لك الحجز بس مااعطيك فلوس لان الحجز غير مسترد انت فكر وشوف قعدنا نشوف فنادق طلع يومها لانكاوي كلها فل والله مااكذب حتى الفنادق الرخيصة شوي يرجع لنا المدير بعرض جديد انه يخلي الاطفال بنفس الغرفة بس بشرط ندفع لكل طفل 100 للسرير والفطور عن كل ليلة قله ابو حسن وليه وهزء المدير قله ايش ذا التعامل وهذولا اطفال خلاص انا ماابغي ولا غرفة اطلب البوليس السياحي وهو يحلها راح المدير واجتمعوا 3 انفار وقعدوا يتشاوروا وخلاص انا وابو حسن تعبانين حر وكتمة والبزورة طفشوا قعدت اتشاور مع ابوحسن قال نشوف ايش من عرض بيجيبوا لنا واذن العصر ونحنا نستنا بعدها جاوا بعد شوي الثلاثة قالوا خلاص ماعاد فيه الغرفة حقك كل اجنحة الحديقة تم حجزها مافي الاجناحين يطلوا على المسبح الساعة 4 الحين بيغادروا اللي فيهم تبغوهم ابو حسن اصر انه ماعد بيتفاهم وهزاهم وقلهم انه عمره ماشاف معاملة كذا وراح يقيمهم تقيمم سي بكل المواقع وبرضوا بشتكي عليهم ساعتها انا راسلت دينا حبيبتي وشرحت لها الموضوع وقالت معاكم حق بس ممكن الشرطة ماتنصفيكم لان الغلط من موقع الحجز مو من المنتجع وقالت لي حاولي تتوصلي ل اتفاق افضل وقلت ل ابو حسن قلي نفس راي زميلي وشوي يرجع لنا المدير يقول خلاص نعطيك جناح مطل على المسبح وبيحسب كل طفل ب100 رنجت فطور وسرير عن كل يوم قله ابو حسن كل طفل 50 رنجت سرير وفطور عن كل ليلة المدير يقول قله ابو حسن خلاص انتظر البوليس السياحي شوي الا يوافق ونكتب العقد ويعطونا المفتاح ونروح الغرفة كانت الساعة 5 العصر بالتمام وذي الغرفة











وكنا مرة مرة تعبانبن وجوعانين خرجنا ورحنا اتغدينا واتعشينا بمطعم سبايس قاردن الحمد لله على النعمة ونسيت اصور الاكل الجوع كافر

















ومرينا على محل الفورملان وقالوا مايسمحوا الا لحسن وابوه وانا وكانا تعبانين قال ابوحسن تبغوا قلنا لا لان الوقت قليل والمبلغ كثير وفوقها تعبانين وذي صور من النت للمكان









رجعنا الفندق الساعة 6 ولسه حضرتهم ماجابوا الشنط كلمتهم قالوا طيب الان نجيبها واتاخروا ابو حسن استلقى بالسرير وقلي اروح ودي البزورة المسبح رحنا قالوا لا خلاص قفلنا اخذنا لفة وشفنا الغروب قالوا بيروحوا نادي الاطفال وديتهم وكان قبال باب الفلة قعدوا للساعة 8



للامانة كنت تعبانة ومافيني حيل اصور لقطت ذي الصورة عشان البزورة ذكروني
ورجعت ولسه الشنط ماجات دقيت وهزاتهم الا جابوا الشنط والاسرة الاضافية وبعدها اكلوا البزورة من الخفائف اللي كانت بالشنط ونمنا وضاع اليوم بسبب الفندق حسبنا الله عليهم



تقيمي لطيران اير اسيا
20/20
حلو وروعة وخدمتهم رائعة

تقيمي لمطار بينانغ
20/20
روعة ومرتب ومنظم وكل شي فيه حسيته احلى من مطار جدة وعاد من الظلم مقارنته بمطار الطائف

تقيمي لمكتب الرحلات
الموظفة جدا طيبه وحبوبة ومتفهمة للامانة بعدين اقلكم ايش صار ليت القي الكرت عشان احطه لكم

تقيمي لمنتجع ميريتوس بلانجي بيتش
20/10
المنتجع متكامل بس بسبب تعاملهم معانا وعدم التساهل في موضوع الحجز وفوقها التاخير في العفش ووجود دولاب الملابس ومكان وضع الشنط بالحمام والثلاجة مرة مرة ماتبرد وصغيرة جدا جدا والتكييف جدا سي اتجاه الهواء واحد ووكان من اسباب مرض بنتي وولدي اللحاف والمخدات مرة مايليقوا بمستوى منتجع خمسة نجوم وانه يعتبر موحش بالليل للامانة لو ماكان نادي الاطفال مقابل الكوخ حقنا كان ماقدرت ارجع لوحدي مع البزورة السلبيات كثيرة بقولها بالختام لان بعضها اكتشفتها الايام الباقية

تقيمي لمطعم سبايس قاردن
20/10
اكله لذيذ وطعمه جيد ونظيف المكان بس عيبه اغلب الاكل مفلفل ومافي خيار يعملوا شي بدون فلفل ثانيا التاخير بالطلب
فيه جلسات خارجية وجلسات داخلية بسبب الجو الحار قعدنا بالجلسات الداخلية



مصاريف اليوم الثامن
تاكسي الى مطار بينانغ = 60 رنجت
خفائف وموية من المطار = 30 رنجت
تاكسي للفندق = 30 رنجت
تاكسي للمطعم = 10 رنجت
غداء وعشاء في سبايس قاردن = 110
تاكسي للفندق = 10 رنجت
المجموع = 250 رنجت = 210 ريال



في حفظ الرحمن
ابو حسن وام حسن
دعواتكم

ما شاء الله تقرير رائع ويحوي قدر كبير من المعلومات
كنت متابع تخطيطكم وأسئلتكم في المنتدى قبل السفر وهذا انعكس بشكل واضح على تنظيم سير الرحلة واختياراتكم الموفقة
مستمرين في المتابعة لإكتشاف متعة الحلقات القادمة
بوركت جهودكم