مساء الخير احبائي تقرير بسيط جداً لم اكن انوي مشاركته

لكن اقل مااقدمة لمنتدانا الغآلي بعد عودته.. فالحمدلله على العودة والشكر لفيصلنا وابو غسان لاحرمهم ربي الاجر

كانت رحلتي مع " العم بو نجيب مشرف تايلند في شهر اكتوبر " اجازة الحج"

بدايتها كنت افكر بسفره بسيطه لاتتعدى 6 ايام وفجاءة مسج ابو نجيب إنه مسافر فيينا بعد اسبوعيين من هنا بداءت الرحلة الو سلام عليكم كيف الحال عمو طيبين بشرر عنك

الحمدلله تمام ياهولمز حبيبي مسافر فيينا مع العائلة والا لوحدك بالله لوحدك اجل انا معاك حياك ياهولمز ههههههههه

وعلى طول الخطوط القطرية جدة دوحة فيينا وجاء يوم السفرة واقص البوردنق اول واحد

المصيبة والنحاسة اللي ماتفارقني اعلنوا عن الرحلة لكن المحفظة وينهااا

دور من هنا والا من هنا مرررة مالها حس رحت اجلت الرحلة الا ودقائق اخوي يتصل علي هولمز محفظتك معي بالسيارة بغيت اذبحهه اه قهرررر فيها الفيزا والفلوس

عدلت حجز الطيران وبوكينج من 6 الي 9 اكتوبر وغرامة 300 ريال للطيران اما بوكينج حبيب الشعب تعديل مجاني

سافرت ووصلت الفندق بحمدلله مطار فيينا اللي كان متعب وصعب عكس مطار جنيف سهل

نمت الي 5.30 عصرا الا موظفة الفندق تقول لي واحد يبيك تحت وعلى طول على الجوال الا بو نجيب مكالمات لم يرد عليها من بدايتها قلة حياء ياهولمز

نزلت وكلي شوق للقاء عمو بونجيب والحمدلله كان نعم الرجل انسان متعلم وناظر مدرسة محترم ورحال تشرفت بمعرفته ..

بعد اخذ وعطاء وسوالف خرجنا من الفندق وعلى المترو

وقصينا التكيت لمدة 3 ايام اعتقد..وعلى كاتدرائية ستيفنز في قلب فيينا،

يرجع تاريخ بناء الكاتدرائيه الى عام ١١٤٧، انا شخصيا جدا جدا معجب بالفن المعماري الاوروبي القديم .. بنوا شغلات قبل ١٠٠٠ سنه عجيبه جدا جدا



وتمشينا بساحة استيفانز والناس والحركة وهذا سر جمال فيينا شرحة وحركة ليل نهار عكس انترلاكن وماحولها دجاج من 6 مغرب كوكوكو نووووم



صوره للكدرائية



واركب الحنطور




وواصلنا التجول في فيينا الجميلة الي ان وصلنا الي اجمل مافيها وجهة نظري مقهى ساخيير

مقهى ساخير: لهذا المقهى قصه جميله، يعتبر احد اعرق مقاهي فيينا، فتح هذا المقهى في القرن التاسع عشر وكان يعتبر مكان يلتقون فيه كبار الادباء و السياسيين.

اشتهر المقهى و الفندق بكيكة ساخير وهي عباره كان كيكة شكلاته مصنوعه من مكونات محد يعرفها الا هم و الوصفه مثل مايقولون محفوظه في مكان ولا يمكن لاي

احد انه يطلع عليها الا اصحاب المقهى، دارت على هذي الوصفه حرب قانونيه كبيره بين شخصين يدعون احقيتهم بترويج الكيكه بعبارة (كيكة ساخير الاصليه) حتى فاز فيها

فندق ساخير، الكيكه ممكن تلقونها في اي مقهى في فيينا ولكن كلها تقليد، الكيكه بالمكونات الاصليه موجوده فقط في ٥ اماكن تقريبا في النمسا من بينها فندق

ساخير في فيينا و السوق الحره في مطار فيينا الدولي.

هذي صورة الكيكة لذيذة لاابعد ماتتصوروا



قضيت عليها مع كبتشينوا روووعه .. واتوجهنا الي دار الاوبرا عروض رائعه وفن وجمال هذي هي فيينا



انتهى اليوم الاول وتوجهنا للعشاء في مطعم صبابا مطعم كباب جيد جدا ..

ذكريات الي الان اقول لاابو نجيب صبابا صارت لنا مواقف وذكريات مااحلى الذكريات في بلد الجمال

توجهنا للنوم استعدادا ليوم اخر جميل مع ابو نجيب حسن الحمادي

اصبحنا اليوم الثاني وكالعادة دق دق من عالباب بليز صاحبك تحت وعلى طول اغسل وجهي وانزل معليش عمو والله سهرت امس كالعادة بسعة صدره وأدبه الجم تقبل

الموضوع " فديته " وخرجنا على المترو والي قصر الشانبرون من اهم معالم فينا الرائعه والجميلة









وهذا عمو االحبيب وفالها على الاخر مستكن بهالصوره ويحق له الزهور من خلفه والورود من امامه وهولمز عن يمينه ههههه






وبعد اخذ صور للذكريات والتجول في هذا المعلم الرائع خرجنا متجهين الي قصر هوفمبورغ




هولمز يتهلمز هههههه





واكملنا المسير الي ان وصلنا الي شارع ماريا هفلر شارع التسوق الاشهر بفيينا


انتقلنا بعدها الي برج الدانوب وبرضه كيكة ساخيير وكابتشينو المقهى متحرك

برج الدانوب المطل على نهر الدانوب في فيينا




شيبان يلعبون شطرنج عملاقه في حديقة برج الدانوب واعزتي عن شيباننا اهلكتهم الظامنه والورق



ومن اعلى فيينا المحقق يتأمل سبحان الخالق مايملون من الخضار والطبيعة .. هههه ترى كابتشينو وقسم



كانت أوقات ممتعة قضيناها في البرج واخذنا صور ب 13 يورو اعتقد للذكرى ومازلت ولاأزال ان شاء الله احتفظ فيها لي ولعمو ابو نجيب

خرجنا من الدانوب والي ساحة ستيفانز وهدايا الي الاهل والي الساعة 11 بالليل انا وابو نجيب استعدادا للرجوع الي الوطن والي سنابل السلام اللي كله شيره ههههه

رحلة من اجمل رحلات العمر تبقى فالذاكرة الي الابد شكراً ابو نجيب شكراً لمنتدانا الي عرفني على مثل هولاء الاخوة الذين احببناهم فالله والشكر لله اولاً وأخراً

استودعكم الله

انتهى
محبكم .. هولمز