اليوم الثالث والرابع في سريلانكا

علي صلاح · 29-04-2017, 06:13 PM

بسم الله الرحمن الرحيم

اول شي اعتذر عن الانقطاع الطويل لكن اعذروني لاني عملت عمليتيتن جراحة و نايم بلفراش صارلي اكثر من شهر وابشركم الحمد لله الحين وضعي مية المية بفضل الله

اليوم الثالث في نيجومبو كان يوم متعب كثير لانه يشمل ( سيكلات(بدون صور) + تجذيف )

الساعة 5 الفجر صحيت من النوم وتريكت ريوك سريلانكي و اتصلت براعي المكتب الي حجزت معاه رحلة سيكلات عشان يتكلم مع راعي التك تك و بالفعل دلاه على المكان ورحت ونزلت عند باب المكتب لاقيت سياح 4 من اوربا كاعدين ينتضرون راعي المكتب يجي المهم هو تاخر علينه 10 دقايق و ساعة 7 انطلقنا جولة في نيجومبو ورحنا كثير اماكن لاكن اجمل مكانين هم (السوق الشعبي في نيجومبو + سوق الخضار ) يعني ما اطول عليكم السالفة ضلينا نفتر داخل نيجومبو بلسيكلات لين الساعة 1 الضهر طبعا اني استمتعت جدا لاني رياضي ودائما احب اختبر نفسي بلتحمل والحمد لله اسمتعت كثير كثير اسف جدا لعدم الدعم بالصور لان لما كنت اسوق السيكل شوي مرتبك لان السياقة عندهم من جهة اليمين فخفت ايصير قدر لاسامح الله وماصورت

بعد مارجعت ساعة 1 الضهر رحت مكتب قريب على الفندق وسالتة على رحلات مغامرات وقال لي عندة تجذيف فقط قلت له كم قال 100$ قلت له تمام متى نروح قال ساعة 2 تجيني وياخذك اسواق . انا رحت الفندق ريحت شوي و رجعتله واخذني السواق الى الموقع حيث كان يبعد تقريبا ساعتين عن نيجومبو وصلنا الساعة 4 العصر عند مكان التجذيف

وهذي لقطات تقريبا على الساعة 5:30 عندما بدت الشمس تغيب ياجماعة قسم بالله منضر ولا ارووووووووووع سبحان الله

وهذا الي كان معي بلزروق يجذف هو سريلانكي راعي الزورق

ياجماعة هذا النهر في منطقة نسيت اسمها ياريت لو شخص خبير بسريلانكا يذكر لنا اسم المنطقة الي فيها هذا النهر

يوجد فندق على النهر صراحة انصح بيه اي شخص رايح الى سريلانكا يبات في منطقة التجذيف هذي ليلة واحدة اوليلتين لان يوجد كثير من النشاطات هناك مثل التجذيف وتسلق جبال واشياء كثر بلاضافة الى الفندق الي قلتلكم عليه صاير على النهر هو مثل المنتجع انصح فيه وبشدة للخص الي يريد الهدوء و الناس الرايحين شهر عسل بس اذكروا لي اسم المنطقة راح اطلع المنتجع من البوكنق على طول

اليوم الرابع

يا اخوان هذا اليوم كان جدا جدا جدا مهم لي لاني اساسا رحت سريلانكا عشانه الا وهو (التسلق و المشي لمسافات طويلة والتخييم )

كالعادة استيقضت صباحا للريوك والريوك كان شوربة سمج و اشياء سريلانكية تقليدية ماعرف ايش اسمها لكنها لذيذة جداااااااا وحارة وشغل شطة وسبايسي

بعد ماخلصت الريوك رحت لراعي المكتب نفسه الي جابلي سواق وداني التجذيف وقلت له يوجد جماعة في كاندي ينتضروني راح اتصل بيهم وانت تكلم معاهم عشان تجيبلي سواق يحطني عندهم قال اتصل واتصلت بالشخص الي انا حجزت معاه رحلة التخييم و تكلم مع راعي المكتب ودله المكان وجابلي سواق ووصلني عند الشخص اي اتفقت معاه اترككم مع الصور

هاذي في الطريق المنضر رووووووعة

وبعدين وصلت المكان المتفق عليه وكان خارج كاندي والتقيت بالشخص الي اتفقت معاه على الرحلة وتحولت في سيارته ورحنا طريق فرعي ضلينا نمشي حول الساعة ونص ونزلنا وبدينا مشي باتجاه المخيم طبعا الطريق كان كله سكان قرويين وال ريف طبعا كانوا جدا طيبين والابتسامة ماتنزل من وجوههم وهذا بداية الطريق

وهذا كلب اجلكم الله

طبعا للحين احنا نمشي باتجاه المخيم وبحالة صعود

هذي اصورة قبل المخيم يوجد نزلة تودي لبركة ماء جاري الدليل قال لي اذا ودك تسبح خل ننزل بس راح نتعب بالصعود مرة الخ لهنا قلت له خل ننزل ونزلنا لبركة الماء

اثناء النزول

وهنااا وصلنا بركة الماء ونزلت اسبح

وبعد ماخلصت سباحة الدليل حقي قالي الغدا معي تتغدى ولا لا قلت له بتغدى لاني هنا تعبت كثير خاصة بعد مشي 4 ساعات ونص تقريبا بحالة صعود وبعدها سباحة هههههههه تعبت كثير وجعت

هذا الغدا رز و سمج و سبايسي وشغلات ماعرف ايش هي

بعد ماتغديت طلعنا صوب المخيم

طبعا هاذي الصورة في فترة الصعود خشينا بقرية صغيرة جدا اربع لو خمس بيوت اول ماوصلنا طلعوا جهالهم يركضون جوي علينا وطكيت وياهم صور ههههههه

هنا قبل الوصول الى المخيم بساعة و ربع

هنا قريب الميخم

فترة استراحة وتامل

وهنااااا وصلنا المخيم وكان الدنيا ليللم استطع تصوير المخيم بشكل كامل

هاذي الخيمة حقتي

هذا زي الرسبشن هههههههههه

هذا العشا الي جابوه لي

وهذا مطبخ المخيم

المشكلة الي واجهتها في الليلة الاولى هي ان جوالي خلص شحن وكنت محسب اني بشحن جوالي في المخيم لكن لما وصلنا المخيم تفاجات بان الكهرباء ماتوصل للمخيم وانا مو متصل بابوي من الصبح ولا مخبرهم اني بروح تخييم هههههه انا قلت خلاص الوالد الليل ماراح ينامه المهم حكيت لصاحب المخيم الله يجزاه الخير جاب لي مولد كهرباء صغير وشغله قال لي اشحن جوالك بس حتى لو شحنت ماراح تحصل شبكة بالفعل شحنت وخلصت ضليت ادور على شبكة ماحصلت الارسال مايوصل للمخيم ضليت قلق لان الوالد باله يضل يمي المهم سويت الي عليه لكن مافاد كلشي وضليت سهران الى الساعة 2 ليلا جالس على طارف المخيم .
قسم بالله المنضر الي كان قدامي بالليل والادغال وضوء القمر الواضح وصوت الحيوانات شييييييي خياااااااااااااااال شي لايوصف بكلمة ولا صورة.

وهكذا انتهى اليوم الثالث والرابع

واي سؤال او استفسار انا حاضر وياربي تستمتعون معي بالتقرير

فيصل, hazim b و توبليرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
التقرير الثالث:- رحلتي إلى هاواي - عين على السماء	عين على السماء	رحلات الجزر والكروز	38	08-12-2019 10:13 AM