هولندا كانت بالنيه بس تغيرت
الله يكتب لنا سفره حلوه هالسنه
مع ان للحين عندي خوف انها ما تصير شوف توقيعي

كان يوم الثلاثاء حافل بالتحقيقات من العيال يبون يعرفون وين بنروح ! وكأنهم سمعوا شي بالغلط مني اننا بنسافر بسفينة !! طبعا ردت الفعل منهم كانت جدا سلبيه .. وعبدالله رافض الفكرة جملة وتفصيلا ... لأن السفينة ممكن تغرق !!! وهو دايم الله يصلحه صاحب افتراضات سلبيه ويبي يلقى له حل قبل تصير ( يولم العصابة قبل الفلقة ) ... وهو دايم يفرفر بقلبي في الطيارة كل ما سافرنا واجلس على اعصابي وهواجيس تروح وتجي ...
المهم طلعنا من البيت بدري تحسبا للزحمه الساعة سبع ونص الصباح ... ووصلنا الميناء على الساعة ثمان ووقفنا سيارتنا بالميناء ... ودخلنا وكان فاضي مره المكان ولولا وجود العبارة كان اقول راحوا عننا ... وصلنا للاستقبال وقصينا تذاكر الصعود + مفاتيح الكبينة وخلونا ناخذ الشنطة معنا لان معنا كبينة ... جلسنا بالانتظار وجاء عائلتين كلهم كبار سن .. ودخلونا ع الجوازات وخلصنا بسرعة ... كل هذا ومابعد صورنا شي يمكن !! طريقة الصعود كانت بواسطة باص ينقلنا لداخل العبارة






نزلنا وصعدنا للدور العاشر بواسطة الاصنصير.. ينزلنا بالتاسع لان طوابق الكباين مايوقف فيها! ...







رحنا ندور كبينتنا


وحصلناها بسهولة



وقت الحجز كان فيه خيار انها تكون داخليه او خارجية فاخترناها خارجية تطل ع البحر ومثل ماقلت كنت احس اني مختار الوسط موب الستاندر ولا التوب بس طلعت لي الاستاندر ... وكانت حلوه فيها مكيف ودورة مياه مع شاور وعدد كافي من الافياش للشحن وتلفزيون ودولاب بالاضافة للسراير .... وممكن الحجز يكون بعد ركوب العبارة بس حسب التوافر لو كان زحمة





كان باقي تقريبا ساعه على موعد الابحار ... فنزلنا ناخذ جولة





المكان فاضي ... قالت ام عبدالله كاننا داخل لعبة بلاي ستيشن كل شي مجهز بس مافيه احد ... كافيهات وصالات لعب ومطاعم ومطلات بس فاضية ...







اعترف لكم اني لعبت هنا شوي













مدة الرحلة تقريبا ثمان ساعات .... فاخذنا شاي ورجعنا للكبينة ... وحسينا ببداية الابحار ...
وطلينا مع شباكنا


نسيت اقول انه كان فيه موضوع مأزمني ومسوي لي قلق الله به عليم اللي هو موضوع دوار البحر ... وسببه اللخبطة بين العين والاذن الداخليه ... فالعين تشوف كل شي ثابت والاذن الداخلية تحس باختلال التوزان بسبب الابحار فيتلخبط العقل ويعتقد ان فيه تسمم حاصل وتبدا حالة الغثيان والتعرق الخ ...
وكنت اسمع عن الحبوب اللي تنوخذ قبل الابحار بنص ساعة ولقيت انواع منها شي يوخذ قبل ثلاث ايام بعد للرحلات الطويلة بس المشكلة اثارها الجانبية واكلها بعد الاصابة بالدوار غير مفيد لانها ماراح يمدي الجسم ياخذ شي منها وان الابر وقتها تكون افضل ( فلم رعب ) ودخلت منتديات صيادين سمك ولقيتهم يفضلون اكل العلك اثناء الابحار .. فانا رضيت واقنعت نفسي بالشي هذا مع العلم انه ممكن مايصير بس كنت ابي نستمتع وماتكون ذكرى سيئة ... وشريت علوك ... والحمد لله مشى الموضوع تمام في الروحه والرجعه ... في العودة مااكلت علك وكان الموج قوي شوي بس الحمد لله عدت بسلام بعد ماحسيت بمقدمات بس عزمت ... ويمكن توهم !!



بعد ما تحركنا رجعنا طلعنا ثانية وكان فيه نت مجاني وسريع تحت في منطقة التسوق والمطاعم ولقينا فيه ناس جالسين بس العدد قليل جدا ...




منطقة السيارات والشاحنات على ظهر العبارة فارغة الا من شاحنة واحدة ... وطبعا فيه اكثر من طابق للمركبات بس الناس ماكانوا كثير ... بالاضافة الى ان سواقين الشاحنات لهم منطقة جلوس خاصة بهم ... طبعا كنت اقدر اخذ سيارتي لو كنت مأمن عليها للسفر خارج بريطانيا بس اني ما أمنت ...







اكتشفت ان فيه حركة بحريه ضخمه جدا لدرجة اني احيانا اقدر اعد 40 سفينة حوالينا !! بالاضافة لوجود الكثير من منصات البترول والغاز ...








جلسنا فترة ثم رجعنا للكبينة ونمنا يمكن ساعتين .... جددنا نشاطنا وشحنا الجوالات ونزلنا للغداء ... واللي كان بوفيه بخيارت محدوده ... اخذنا عرض العائلة 2 صغار و 2 كبار ب 29 يورو شامل المشروب ...واخذت انا فيش اند شيبس ..



المطعم يقفل قبل الوصول بساعة تقريبا .... وقبل الوصول بربع ساعة تقريبا تبدا عمليات التنظيف في العبارة والاستعداد لرحلة العودة يمكن او تسليمها لطاقم العودة يمكن ... بس احس انه مزعج للركاب شوي ...



الرحلة كانت اكثر من ممتعه ولله الحمد وجميلة جدا جدا .. وكانت فكرة الكبينة جدا مفيدة ... وبدت علامات الوصول الى هوك اوف هولاند



جمعنا اغراضنا ونزلنا



وكان بدون الحاجة لباص ...



خلصنا الجوازات بسرعة وسألوا عن سبب الزيارة وطلبوا حجز السكن وكان مطبوع وجاهز ... طلعنا بسرعة عشان نلحق القطار اللي بجنب الميناء ... بس طووووط ... مافيه قطار !!! اشوف لوحات تشير لمكان المحطة واشوف السكة ... بس ماعرفت اوصل ... وكان عن السهم بوفيه !!! دخلت وسألت واحد ونادى واحد يشتغل يقول له شف هذا يسأل عن القطار !! يقول باستغراب ... قال لنا انه خلاص من زمان مافيه قطار وطلع البوفيه مركب على مكان السكة !!
فيه موقف باص قدام بوابة الميناء اخذنا منه الباص رقم 711 الى سنتر مدينة شيدام ب 12 يورو ولمدة نصف ساعة تقريبا بدون توقف ..ومنها بالقطار ب 30 يوروالى مدينة ليدن ثم تبديل القطار الى مطار امستردام لمدة 45 دقيقة مع اربع توقفات ...









المطار كبير وحلو ومرتب بس ما اخذت عنه فكرة كافيه لاني مستعجل شوي واخاف اتأخر عن السكن واستلام السيارة ...
السيارة كنت حاجزها من برا المطار بس فيه شتل مجاني يوصل لباب مكتب التأجير ... انتظرنا تقريبا نص ساعة للشتل لان يمكن وقت وصولنا كان وقت مغادرته ... وكان اول توقف له عند مكتب التأجير ... حجزي كان لسيارة يارس قير عادي لان قلت انها تفرق عن الاوتوماتيك بنصف القيمه وكان العرض مغري ... قالت الموظفه متوفر يارس جديده بس انها اتوماتيك !! عادي تأخذها ؟ بغيت اتغلى واقول لا ... فعلا السيارة جديده وماشية حوالي 5000 كيلو بس ... واستلمتها فل بنزين وراجعها نفس الشي فل... وكانوا عارضين علي اخذ قارمن بس رفضت وقلت بستعمل قوقل ماب ... وطلع السيارة ملحق فيها اصلا جي بي اس ... كنت ماخذ حامل الجوال للسيارة ... ومع تجوال نت مجاني 4 جيجا في شريحتي البريطانية .. فما احتجت اني اخذ شريحة .. واحتياطا كنت محمل خريطة هولندا من قوقل ماب وفادتني مره يوم علق النت في جوالي في مرة من المرات ..واستعمال الجوال كان مريح بالنسبة لي اكثر من الجي بي اس حق السيارة ...





خلال الفترة هذي تواصلنا مع صاحبة البيت وقالت اوك لاتستعجلون وبحط لكم المفتاح تحت الدعاسة .... وحطيت العنوان بقوقل وتوكلنا على الله ...وكان المشوار ربع ساعة فقط ..

وصلنا البيت وكان محل سكنا عبارة عن ملحق او شقة كبيرة جنب بيت الاسرة ... المكان كان في الريف وتحديدا بمزرعة ...











الشقة مجهزة انها تكفي 5 اشخاص واحس انها قابله لاكثر من كذا لان فيه مفارش اضافية موجوده بالدولاب ....



المطبخ وفيه مكينة قهوة وفرن وغسالة صحون وغسالة ملابس ... بس مافيه غلاية



















بعد مانزلنا اغراضنا طلعنا نشوف لنا بقالة او مطعم فاتح ... لقينا مطعم عربي ... واخذنا عشاء وكان اغلى مطعم دخلناه بهولندا للاسف مع انه بوفيه عادي ... بس عاد مافيه الا هو وقتها ... رجعنا وتعشينا ونمنا ... الساعة 7 الصباح افطرنا على ضيافة كانت صاحبة الشقة حاطتها من الليلة السابقة ( مافيه فطور ) فافطرنا على السريع وبدينا الاجمل في الرحله وهو اللي ببداه معكم في الاجزاء القادمة ان شاء الله ....




اتوقف هنا والقاكم بالجزء القادم على خير ...

رحلة موفقة