ماشاء الله بداية تقرير جميل عن كباودكيا
زين تمت الرحلة ع اسبوع والتخطيط لـ هالمدينة يعتبر خيار مميز
مشوار من الصبح الى الساعه 9 بالليل حتى وصلتو الفندق وزي ماقال نواف لو اخذتي اليوم الاول في اسطنبول يكون افضل وخاصة ان وصولكم بدري
كانت تغطيتك من السناب جميلة ام ريمه يعطيك العافية

متابعين ومستمتعين بهذره وبدون هذره بس كثري صور نبي نشوف هالمدينة وانشطها السياحية

الف شكر

آخر مواضيع فارس من خيال

- من أجمل ما رأت عيني (جزيرة جيجو - كوريا ) - استطنـــــ(في خاطري شوق وحكايات واسرار)ـــبول - على اطلال (هونج كونج)2017 - هَِنأّ يِّفِّيِّض أّلَأحٌَّسأَّّس وِتّشٍبِعٌ أّلَحٌوِأَّّس(أوِروِبِــًـِـُـأّ) - بين الكلام والصمت جمال (نيوزيلــــ New_Zealandـــــدا)

توقيع : فارس من خيال

يوماً ما سَـأرحل دُون »وَداع« أَتمنى أن يَذْكرني أحدكم بدَعــوهْ Save

أسعد الله صباحك
حقيقه لنا الشرف بأن أول تقرير تكتبينه عن السفر في المنتدي
تخطيطك جميل
هم وقلق البعد عن الأطفال حتي وهم عند أعز الناس
متعه السكن في الكهف
تذكرت تغطيتك ما شاء الله عليك

متابعين

ذكرتيني بايام كبادوكيا الجميلة وان شاء الله تكونون توفقتوا شركة رحلات زينه

متابعني معاك ومنتظرين

قبل لا أبتدي في اليوم الثاني حبيت أتكلم عن شيئين نسيت أذكرهم في الجزء الاول

أول شي الفيزا
إحنا كبحرينين ما نحتاج فيزا لدخول تركيا و لكن نحتاج نعبي الاستمارة أون لاين و نطبعها
ونسلمها مع الجواز

الشي الثاني
أنا ذكرت إن تكلفة الفندق كانت 87 دينار
و حبيت أذكر إن هالتكلفة شاملة التوصيل من و إلى المطار


نبدأ
اليوم الثاني


صحينا ٧ ونص و تجهزنا و رحنا للفطور
للاسف وايد صور صورتهم راحت مع التغطية في السناب و الظاهر اني نسيت احملهم
و منهم صور الفطور

بس عموما الفطور تركي تقليدي تماماً لكنه بالنسبة لي كافي
أنواع أجبان .. نوع خبز .. طماطم و خيار و زيتون .. مربي و عسل .. كيك و أنواع بسكوت
عصير و شاي




خلصنا الفطور و قعدنا ننتظر باص رحلتنا
للرحلة الحمراء

من ورد حديقة الفندق



درجة الحرارة كانت تقريباً 6 ... بررررد

الساعة ٩.٤٥ بالضبط الباص كان عندنا
باص مرسيدس جديد نوعاً ما و مريح
مرينا على 3 أو 4 فنادق تقريباً
كل الفنادق قريبة من بعض بس الشوارع منحدرة و ضيقة وايد
ف ما طولنا يمكن خذنا 10 دقايق أو ربع ساعة
و رحنا مكتب الشركة في سنتر المدينة

و كل واحد من اللي في الباص توجه للباص الخاص في رحلته بعد دفع الرسوم


الشركة إسمها Gorgeous Tours
Gorgeous Turkey Tours Travel Agency | Mainpage
رسوم الرحلة الحمراء
100 ليرة للشخص شاملة الغداء .. و تذاكر الدخول (ان وجدت)
تبدأ من 9.45 و تنتهي 4.30

في أكثر من شركة تسوي نفس الرحلة
و سمعت ان بعض الشركات تمر على مزارع عنب و مصانع خمور
لكن هالشركة ما تمر عليهم

في الباص مرشد
و المجموعة كان أغلبها أتراك و شوي كبار في العمر
تقريباً في الخمسين
كنا 18 شخص


اول شي وقفنا عند كهف كبير و عالي و يقال انه المكان اللي كان يلجأ له سكان غوريميه وقت هجمات الأعداء



وقف المرشد يشرح بالتركي أول و بعدين التفت علينا إحنا اللي نتكلم إنجليزي
5 أشخاص
شرح بس جملة او جملتين و مشينا

و بعدين اتجهنا لمتحف غوريميه في الهواء الطلق
(كنائس و معابد قديمه من العصر البيزنطي)

تجمعنا عند بوابة المتحف و قال المرشد راح أوديكم أول كنيسة لان الدخول لها لازم مع مرشد و بعدين بعطيكم وقت تلفون على باقي المتحف و الكنايس و التجمع مرة ثانية عند البوابة

وقال أنا أكثر شرحي راح يكون بالتركي لان الاتراك جاهلين بتاريخ دولتهم و اصلا ما يعرفون انه كان فيه مسيح بتركيا
و هالشي وايد ضايقني منه احنا دافعين مثلهم و ماله حق يركز عليهم اكثر

طبعاً البوابة عبارة عن حاجز يفتح ببطاقة الدخول

دخلنا البوابة و اول شي في محل المتحف يبيع تذكارات بسيطة و عند الباب وحدة تبيع عصير رمان و برتقال
خذت واحد مشكل و كان ب 18 ليرة وايد أغى من برا بس كان خاطري فيه شكل الرمان أغراني





هذي مدخل الكنيسة













و المدخل و المخرج واحد
أغلب الكنايس في كهوف و مخفية عن الأنظار و السبب إن كانوا يستخدمونها المسيح
في عصر الدولة الرومانية لانهم كانوا ممنوعين من ممارسة الدين المسيحي
لان الرومانيين في ذاك الوقت كانوا وثنيين

و طلعنا نكمل بروحنا
في كنايس و كهوف مفتوحة و في بعضها مسكرة و أشوف عليها صيانة
و التصوير ممنوع في اغلب الكنايس لكني خطفت بعض الصور



قبر اتوقع لواحد من الرهبان



























خلصنا قبل القروب و دخلنا محل المتحف نشتري
كان زحمة من الجالية الصينية او الشرق آسيوية عموماً ف ما صورت
و أغلب البضاعة شفت نفسها برا و السعر مبالغ فيه
بس عجبني سكارف حرير مرسوم عليه معالم كبادوكيا و المناطيد
ب 180 ليرة و خذته

صور من معروضات عجبتني






المتحف حلو و يسوى تروحون له .. و ما احس انه يحتاج مرشد للي ما يفضل يروح مع قروبات

رجعنا الباص ورحنا منطقة أفانوس

و مرينا على النهر الأحمر اللي منه يستخرجون الطين الاحمر و عليه تسمى بهالاسم
و المنطقة مشهورة بصناعة الفخار المستخرج من هالنهر

و قال المرشد بنروح نتغدا و بعدين بنمر على مصنع فخار و سيراميك

الغدا في مطعم هان على نظام البوفيه
المطعم شكله أبداً ما يشجع و زحمة من السياح
لكن الصدمة ان الاكل لذيذ .. كل شي ذقته كان حلو و حتى زوجي عجبه الاكل

ما صورت و هذي صور من النت











بعدين رحنا مصنع السيراميك عرض و المحل في أشياء حلوة بس الاسعار غالية و اصلا هالأشياء ما تستهويني

ولد صاحب المصنع يشرح لنا خطوات صناعة السيراميك



و عرضوا لنا الخطوة الاولى وهي تشكيل الطين الخام و خلوا وحدة من المشاركات في القروب تجرب
و ما شاء الله عليها عرفت تسوي شي مرتب




اليمين اللي سواها المعلم و اليسار المشاركة




زيارة المصنع بالنسبة لي شي مكرر و ما تستاهل


بعدين إتجهنا ل Imagination valley أو وادي التخيل
صخور على شكل حيوانات و ناس
و انا ما شفت منهم إلا الجمل











ما أدري يمكن خيالي مو واسع

بالنسبة لي المكان ما يسوى الزيارة إلا اللي وده يشوف هالجمل
لان جد باقي الاشكال اللي شرحوها لي ما شفتها او ما كانت واضحة


بعدين إتجهنا ل Mushroom Valley أو وادي المشروم
وفيه تشكيلات صخرية على شكل مشروم
و فيه كنيسة و محلات صغيرة

هني شرح لنا المرشد شوي أكثر عن طريقة تشكل منطقة كبادوكيا و التشكلات الصخرية فيها

المنطقة في العصور القديمة كانت عبارة عن بحيرة عودة و حوالينها في براكين اثنين

أول بركان ثار شوي بعيد عن البحيرة ف على ما بدا ينزل الرماد و يتجمع كان خلاص برد
ثاني بركان ثار شوي أقرب و الرماد ما كان كله بارد و منطفي
ف لما تجمع في قاع البحيرة صار أصلب من الرماد اللي تحته

لما البحيرة مع مرور الزمن نشفت
و مع تعرض المنطقة للزلازل و عوامل التعرية من رياح و امطار

الرماد اللي ما كان تصلب تماماً بدا يتحلل و بقى هالتشكيلات
واللي شكلها مثل المشروم أو القطعة الغامقة من فوق هي من بقايا البركان الثاني
حتى الجبال اللي حول المنطقة أغلبها مكونة من نوعية الصخور
و لو تكرزون في أطراف الجبال ف هي بدت تتحلل و تتشكل على شكل التشكيلات الصخرية الغريبة المشهورة في كبادوكيا
(أتمنى شرحي يكون واضح)






تمشينا شوي و شفت الخيل و قلت بركب
لفة ب 20 ليرة



الفارسة المغوارة أم ريمه




و إحنا راجعين شفت هالعروسين
مثل عادة الاتراك يحبون يصورون في الاماكن المشهورة




آخر شي خذت ذرة في كوب ب 5 ليرات و رجعنا الباص

في رايي المكان حلو و يسوى الزيارة لان التشكيلات الصخرية اللي فيه شوي مختلفة عن باقي الاماكن



بعدين رحنا بانوراما غوريميه .. تطل على كامل غوريميه و المنظر جميل صورنا شوي و مشينا









و خلصنا ٤.٣٠ تقريبا و وصلوا كل واحد لفندقه

قبل لا ندخل الفندق تذكرنا اول ليلة وصلنا قال لنا (كاان) ان منصة غروب الشمس تبعد ١٥٠ متر من الفندق قلنا دامه وقت غروب خلنا نستغل الوقت و نروح
المكان مرتفع و منحدر جداً و متعب بس يستاهل العنوة
فيه كوفي شوب و منصة خشبية و الإطلالة على كامل غوريميه و غروب الشمس جميل جداً
















رجعنا الفندق و رجعنا غرفتنا نرتاح عشان ننزل من وقت للعشى ما نتأخر مثل اول يوم

الساعة ٧ ونص تقريبا طلعنا و ما حطينا في بالنا مطعم مع انه بحثت عن أحسن المطاعم أون لاين و إحترت
فإتفقنا أنا و زوجي آخر شي نختار على النظر و قبل لا ندخل المطعم نشوف تقييمه

تمشينا شوي في السنتر و مرينا سوبرماركت خذينا أشياء بسيطة محتاجينها
السنتر هالمرة كان مليان ناس و أغلب المحلات و المطاعم مفتوحة

جذبنا هالمطعم و دفاية الخَشب داخله









طلبنا ريش و كفتة بصلصة الطماط و روب و عيران و ماي اما الخبر إكرامية مِن المطعم





و الاكل لذيذ و الخدمة سريعة و السعر 92 ليرة




في طريقنا امس شفنا كوفي شوب حبينا جلسته اسمه باشا كافيه
و الدفايات اللي في الجلسات الخارجية كلها على خشب و قلنا بنشرب عندهم قهوة
بس للاسف لما وصلنا الكافيه كان متحول لشي يشبه البار
شرب و أغاني و الجو ما يناسبنا ف غيرنا راينا
و شفنا كافيه ثاني بسيط خذنا قهوه تركية و كنافة بالجبن لذيييييييييذة
ما اتذكر اسمه و ما صورت لان قعدنا بره وكان برررررد

رجعنا الفندق و نمنا نومة جميلة بعد التعب

و نلقاكم في جزء اليوم الثالث