شتاء جنوب المانيا و لمحات من بعض جيرانها في 2018

ابو عبدالله · 17-03-2018, 03:01 AM

اليوم هو يوم مغادرة قارمش وما اخفيكم انه كلنا تحسفنا على انه الايام مره شويه هنا ومع انه الوقت شتاء الا انه الحياة ماتتوقف هنا ويمكن ماتأثرت كثير او ماتأثرت ابدا ... لانه اسلوب ونمط حياة عندهم لفترة طويلة من السنة ... تصحى الصباح تلقى 20 سنتي ثلج فوق سيارتك والوضع عادي ، وهنا في بريطانيا جا اقل من كذا ولمدة يومين وعطلت المدارس وكثير من الشركات لمدة ثلاث ايام وانحجزوا الناس في بعض المناطق وتقفلت بعض الطرق السريعة ... مااقول ان الالمان جبارين وذولي تورطوا .. لا هو نمط الحياة في كل مكان المفترض اهل المكان نفسهم تلقاهم متعايشين معه وعارفينه ... بس مايتفاجئون فيه كل سنه وكأنه شي جديد عليهم !! قارمش منطقة كبيرة تستحق فعلا كم يوم للي يحبون الارياف والمشي او حتى التمشية بالسيارة وبالصيف حدث ولا حرج عن الجمال وين مارحت والاماكن فيها كثيرة وماتنتهي سبحان الله .. ميونخ كانت في طريق رجعتنا من قارمش الى بادن بادن وفي بادن بادن بنجلس باقي الايام ... الطريق الى بادن بادن تقريبا ثلاث ساعات ونص يمكن بس بنوقف بالطريق في ميونخ اللي تبعد ساعة عن شقتنا في قارمش ... بعد ماصحينا الصباح قفلنا شناطنا وحطينا المفتاح على الطاوله مثل ماقالت لنا صاحبة الشقة وتوكلنا على الله الساعة تسع الصباح تقريبا الى ميونخ ثالث اكبر مدينة في المانيا وعاصمة ولاية بافاريا

...كنا محددين وين بنروح في ميونخ لان ماكنا ناوين نطول فيها مع انه مزاراتها كثيرة وتستاهل بس هذا اللي صار !! كنت محدد من الليل موقف سيارات على قوقل ماب عشان مايضيع الوقت ادور موقف بس لقيته مقفل ! لحقت لوحة مواقف وهي كثيرة ولقيت لي موقف قريب ... لازم تدفع للمواقف طبعا والدفع بالعملة المعدنية او بطاقة البنك والدفع يكون مسبق وبعض الاجهزة الحد الاعلى للوقت ساعتين وانت اذا بتطول فلازم تشوف لك موقف وقته مفتوح وهذي غالبا تكون اسفل البنايات وتحاسب وقت خروجك ... المواقف المحددة بوقت معين او اللي لها دفع مسبق يطلب منك احيانا تكتبت رقم اللوحة فخذ احتياطك وصور اللوحة من اول عشان لو كان في سرا عند المكينة مايضيع وقتك روحة ورجعه وسرا جديد !! وكل شي مكتوب غالبا بالالماني ... ممكن تلقى مكاين فيها خيار انقليزي .. المكينة هذي كانت لغتها المانية فالافضل بدال ماتخبص وتضيع وقتك تشوف احد من اللي يمرون حولك ويساعدك ... انا دايم كذا اسئل ... سئلت واحد وطلع انقليزي مايعرف الماني وسئلت ثاني كان بياخذ سيارته وقال اعرف شوي انقليزي ( عشان يتفاهم معنا ) وزينها لنا ... احيانا تكون فاهم والشغله سهلة بس تبي احد يؤكد لك الشي هذا لانك ماتبي تكون مشغول بالك باحتمالات ثانيه !! .. كان اكثر وقت ممكن هو ساعتين واعتقد كان بـ 4 يورو وشوي ( ماوصل 5 ) ورجعت جددته مرة ثانية ...

حط الفلوس للوقت اللي تبي ثم اضغط الاخضر وانتظر شوي وتنزل لك التذكرة بالصندوق تحت .. خذها وحطها على طبلون السيارة بحيث ان موظف المواقف يشوفها اذا مر

طبعا خزنت مكان الموقف بالجوال وصورت كم جهة حول السيارة عشان لو ضيعت ممكن استدل بالمكان او احد يساعدني ..

تركنا السيارة ورحنا ...

اول شي كنا نبي كوفي او مطعم عشان نفطر ولقينا البوفيه هذا .. وكان كبير شوي وخياراته كثيرة ... والمهم انه بيقضي حاجتنا الان ( بعض المرات في السفر يكفيك اي شي ) وبعض المرات يكون نوع المطعم او الكوفي شي اساسي ...

جولتنا اليوم بتكون فقط في جزء من التاون سنتر او مركز المدينة او المدينة القديمة او ALTSTADT والمنطقة تاسست مع بدايات تاسيس مينوخ القديمة في القرون الوسطى وهي مليانه اماكن تمشية ومحلات وساحات وجدا جميلة وممتعه وتستاهل لو الواحد بيخصص لها يوم كامل ... وليتنا جلسنا فيها اكثر لان ماشفنا الا جزء بسيط منها ... المنطقة ميب كبيرة مره بس مليانه والتفرعات فيها كثيرة تاخذك لاماكن اخرى واعتقد تخصيص يوم لهذي المنطقة مناسب بس يمكن ماراح تغطيها .. دخلنا مع شارع اسمه Theatinerstra?e وكان دخولنا من ساحة اوديون بلاتز

والشارع هذا ينتهي بساحة المارين بلاتز وعشان كذا معروف بكذا والساحة موجود فيها نصب او مسرح فلد هارن هول Feldherrnhalle ورغم انك بتمر بالمكان هذا وكانه مكان عادي الا انه صار احداث كثيرة مختلفة بالمكان هذا سواء احتفالات او انقلابات او حتى حروب .. وانت واقف بالمكان هذا اعرف انك واقف بمكان دبابة او سقوط قذيفة او عرض عسكري في يوم من الايام ...
https://www.google.com.sa/maps/place...1!4d11.5773548

الساحة عند التقاطع هذا
شارع الاوديون الى الامام

وشارع برينر او برينر شتراسه ( شتراسه بالالماني يعني شارع ) وهو شارع تسوق ايضا

برينر من جهة ثاني

خلينا النصب هذا على يسارنا و ( دلفنا ) للشارع مثل اي سائح يمشي ويتلفت ( كنه احد مضيع شي ) ... الشارع مخصص بالكامل للمشاة .. فاخذنا راحتنا نمشي ونصور هنا وهناك وبدا المكان كأنه جميل ومبشر بأنه اختيار جيد والحلو انه الشمس طالعه ومافيه مطر ... ماتدري تطالع يمين او يسار .. تمشي بشويش لايفوتك شي .. احيانا الاشياء تتكرر عليك في اكثر من بلد بس مستحيل يتكرر الترتيب او طريقة البناء لازم يكون فيه شي مختلف .. فيه طرق جانيبه احيانا صغيرة جربوا تدخلون معها بتاخذكم لساحات صغيرة جميله ...

المداخل الجانبية لاتتعدونها ادخلوها

واحنا نتمشى من مكان لمكان في الشارع وصلنا لمول فونف هوف
https://www.fuenfhoefe.de/fashion/shop/mode/?L=1

لمول لاباس به حلو ومرتب ومتاجره متنوعه بالاضافة لكافيهات ومطاعم

طاولات مغطينها لان المنطقة مكشوفة لاتحسبونها ( جنايز )

ماطولنا كثير في السوق عشان نلحق اماكن ثانية ... طلعنا منه

صوف لبسه اصلي عشان كذا جايب خروفه للتأكيد هههه

الشمس ساطعه

وصلنا ساحة المارين بلاتز

كان فيه فعالية من فعاليات المهرجان مخلصه

تحت الساحة محطة قطارات ضخمه

الموية اللي كذا حلوه وينشرب منها عادي ( طبعا مو من البركه من الحنفية اللي تصب )

بوابة الساحة من الجهة الثانية

تقدرون توصلون منها الى سوق فيكتولين او سوق المؤن وبيجي الكلام عنه ان شاء الله

بعد ماطلعنا من الساحة لشارع فيكتولين ماركت ....
محلات كثيرة جنب بعض يمكن 20 كلها جزارين ولحوم ( مالهم علاقة بسوق المؤن الشعبي )

قطعنا الشارع ورحنا للسوق

https://www.google.com.sa/maps/place...5!4d11.5762552

وهو عبارة عن سوق شعبي فيه تقريبا 160 كشك يباع فيه خضروات وفواكه وورود ومنتجات اجبان و ( اسر منتجه )

وهو يستاهل الاطلالة عليه بشكل سريع للي يزور المنطقة وفيه اكشاك مطاعم ....

الاماكن اللي اعرفها في ميونخ كثيرة واللي مااعرفها اكثر ومن الظلم ان اقول اني زرت ( ميونخ ) ... اربع ساعات هنا في جزء بسيط وما كفاه بس اقول انها من المدن اللي جدا اعجبتني ..
بعد الماركت رجعنا للساحه واخذنا لفة سريعه ورجعنا للسيارة لان وقت الموقف تقريبا خلص وورانا مشوار ثلاث ساعات الى بادن بادن ... ان قلت لكم اني متحسف ( ندمان على ترك ميونخ) بميونخ فانا الحقيقه متحسف مررره لانها تستاهل كم يوم على الاقل في نظري يومين ... وبتعرفون في بادن بادن الندم زاد او زال او زي مايقولون سو سو !!

AL Tunaiji, فيصل, توبليرون و 3 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
آخر أيام الصيفية فى جنوب القارة الأفريقية.......(جنوب أفريقيا مارس 2015)	Bika	تقارير لا تنسى	96	04-07-2021 09:31 AM
تنبيه مهم جدا جدا لمن يريد زيارة جنوب أفريقيا و كيب تاون في صيف 2018 م	Oman Knight	بوابة جنوب افريقيا	33	15-09-2019 01:28 PM
شروط الحصول على تاشيرة جنوب افريقيا 2018	abumohmd	فيزا دول اخرى	19	28-05-2019 05:27 AM
لمحات و ذكريات_رحلتي لأسبانيا 2015	عاشقة مسقط	بوابة اسبانيا	136	19-02-2018 12:43 AM
لمحات و نصائح ونقاط سريعة من رحلتي للشمال الغربي التركي -اوردو - وما حولها	jeddah1425	تركيا	17	19-07-2015 06:23 PM