ابوعبدالهادي ورحلة بريطانيا ٢٠١٨

ابو عبدالهادي · 14-09-2018, 01:48 AM

بسم الله نبدأ الجزء – 1

كانت الرحلة من الدمام الى جدة وترانزيت 3 ساعات بعدين الى مانشستر. استغربت من كلام الموظف اللي عطاني كرت الطيارة يسولف مع ولدي الصغير ويقول "تبي تطلع درجة رجال الاعمال"!! وفعلا سوى ترفيع لدرجة الاعمال,
كانت الرحلة من الدمام مليانة للاخر. لكن الحلو مايكمل, 3 ساعات ترانزيت مطار جده وكان زحمة شديدة لدرجة الواحد يفقد اعصابة.

بصراحة كلمة حق تقال, الخطوط السعودية تغيرت للافضل بشكل كبير, من ناحية توقيت الاقلاع والخدمات داخل الطائرة, ونظام الترفية على الشاشات جيد جدا. الغريب ان الجنسيات الاوروبية كانو اكثر من الجنسيات العربية على الرحلة في الذهاب والاياب!
الرحلة ماكانت مليانة فاستغلينا الوضع وكل عايلة اخذت صف او نصف صف من الكراسي.

وصلنا بحمد الله مطار مانشستر, كان اصغر بكثير من مطار هيثرو لندن والحمدلله ما اخذنا وقت كثير بالجوازات تقريبا 5 الى 10 دقايق ولا فيه تفتيش للعفش. الاسئلة المعتادة من وين جيتو, مدة الزيارة, سبب الزيارة وبعدها ويلكم سير تو مانشستر.

بقولكم سبب التاخير وانتبهو له زين علشان مايصيدكم وكانو بيرجعونا على نفس الطيارة!!
كنا 2 كبار و 3 اطفال (اعمارهم 11 و 12 و 3) طبعا اللي اعمارهم 11 و 12 اخذو بصماتهم بالخبر مركز التاشيرات. الموظف اخذ الجوازات كلها ودخل غرفة واحنا ننتظر . بعد فترة طلع وقال ويلكم سير تو مانشستر!! قلت ويش اللي حصل؟ رد: جهاز البصمات ماتعرف على بصمات الاولاد!! تعرفون ليش؟؟!! لانهم كانو طول الرحلة ايديهم شغالة مع الريموت حق العاب الفيديو, غير انهم بالبيت مع السوني. وتاثر تقاطيع البصمات اثناء ادخال معلومات الجواز بمطار مانشستر! والموظف رجع لملف البصمات اللي جاهم من السفارة وطلع مطابق, والحمدلله وعدت على خير. قلت له لو ماجا رد من السفارة اللي سويت فيها البصمات, ايش بيكون الاجراء؟ قال ترجع على نفس الطيارة!

ومن المطار اخذت اوبر الى الداون تاون قريب من بيكاديللي تقريبا 20 باوند. سكنت بشقق
The City Warehouse Aparthotel
وهذا العنوان:
6 - 14
Great Ancoats St, Manchester City Center, Manchester, United Kingdom, M4 5AZ

سويعات راحة بالشقة بعد تعب الترنزيت بجده وبعدها كعادتي بالسفر اول يوم استكشاف المنطقة المحيطة بالسكن .
وبعدها رحت لمحطة قطارات بيكادللي اطبع تذاكر لندن لان اليوم اللي بعده بنسافر لندن. فقط يوم واحد بمانشستر وبعدها لندن. بالرجعه من لندن بيكون عندي وقت كثير لاستكشاف ماتشستر.

صورة التذاكر

وبهذا انتهى الجزء 1 من الرحلة, ولمشاهدته على اليوتيوب تفضل الرابط

q8ya metnaqla, توبليرون, سفير جوجل و 10 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الحمد لله وصلنا سورابايا ٢٠١٨/٧/١م	الشايب	بوابة اندونيسيا	25	05-01-2019 06:57 PM
رحلتي الى اسطنبول ١٤-٢٤ يوليو ٢٠١٨	bargima	بوابة تركيا	19	30-09-2018 06:59 PM
أجواء أزنجول الآن ٣٠ يوليو ٢٠١٨ امطار وضباب وبراد	أبو يوسف2018	بوابة تركيا	33	27-08-2018 10:45 AM
أوزنجول الآن ١٣/ أغسطس /٢٠١٨	أبو يوسف2018	بوابة تركيا	11	16-08-2018 04:48 PM
الحمد لله وصلنا اندونيسيا امس ٢٠١٨/٥/٣١م	الشايب	بوابة اندونيسيا	70	29-06-2018 01:43 AM