بسم الله الرحمن الرحيم

السبت
15 / 7 / 2018

بحيرة سبانجا وقرية المعشوقيه

عند وصولنا للفندق امس .. واحنا بنتهاوش معاهم على الغرف لاحظت وجود بروشورات سياحيه باللوبي .. وكان عندهم برنامج لبحيرة سبانجا .. اتفقت معاهم وأنا ماودي اكسبهم !! لكن قلت أزبط العلاقات ..

وهم بدورهم رجعونا لفندقنا السابق .. وعطونا غرفتين جنب بعض

لكن ما جملوها !! الغرف كانت بالدور الأرضي جنب اللوبي !!

وأم الازعااااااااااج .. صوت النزلاء كان يوميا هو اللي يصحينا مو المنبه !!!!



نصيحه لا أحد يأخذ بالدور الأرضي .. وخصوصا في اسطنبول لأن الغرف بدون عازل !! فالصوت واصلك واصل !! لو تحط عشر مخدات على رأسك !!!

نرجع لموضوع الرحله

برنامج الرحلة عادة يشمل حديقة حيوان تقع في منتصف الطريق .. لكن احنا استبعدناها ..
اتفقنا نروح من الصباح الساعه تسعه ونرجع المساء بسياره فان مرسيدس 9 راكب بسواقها بسعر 700 ليره .. وحاسبت اللوبي من ليلتها

انطلقنا متوكلين على الله

البحيرة موجودة في الجزء الأسيوي .. وتقدر مساحتها بحوالي 45 كيلومتر مربع وتقع بين سهول ادابزاري وخليج ازميت .

كان الطريق جميل ومناظر حلوه .. وبعد حوالي ساعه ونص ( على ما أتذكر ) توقفنا في مكان للألعاب والكافيهات

احنا لعبنا لعبة الحبل اللي ينقلك من مكان لاخر بسرعه عاليه من مكان عالي لمكان منخفض

لعبه جميله لايوجد بها خطوره .. تخلي الادرينالين عندك يضرب سته الاف





وبعدها اعطونا صور لنا .. أشكالنا مفجوعه وتضحك ( الصوره 25 ليره )

وبعدها استمرينا نحو البحيره .. ووصلنا .. وكانت بحيرة كبيره بالفعل






على امتداد البحيره كورنيش جميل بكراسي .. ومطاعم وكافيهات ..

وأكشاك مختلفه تبيع أيس كريم .. كافي .. اكسسوارات .. صور وخلافه

صوره من أحد المطاعم المطله على البحيره




أيضا يوجد مراكب للنزهه داخل البحيره




احنا استمرينا في المشي لاخر الكورنيش وكان بالنهايه مطعم دائري يمتد داخل البحيره بجلسه حلوه ..

جلسنا فيه وطلبنا حاجات خفيفه .. وكان منظر على البحيره خلاب وممتع

جلسه هاديه رايقه تنسيك صخب اسطنبول





قعدنا حوالي ساعتين .. وبعدها رجعنا لسيارتنا .. ومنها انطلقنا لقرية معشوقيه

وصلنا لمجموعة من المطاعم الممتده على طول النهر

دخلنا احدها .. وكان بعض الطاولات فوق النهر .. والاخر بجوار النهر ..

تجربه جديده راااائعه







الأكل كان جيد .. والاسعار كانت معقوله .. وأرخص من مطاعم اسطنبول

الحقيقه كانت جلسه جميله .. وتجربه جديده .. لكن ما فيها روقان !!

لأن النهر كان يهدر هدر بجوارنا دج دج دج دج







عدنا لاسطنبول على الساعه سبعه او ثمانيه .. وكان الطريق زحمممممه .. واخذنا بالعوده حوالي ساعتين ونصف !!

رحلة بحيرة سبانجا وقرية معشوقيه أنصح بها لمن سيقضي عشرة أيام و أكثر في اسطنبول ..

لأنها تستهلك يوم بكامله

يتبع ..