بسم الله الرحمن الرحيم

الثلاثاء
17 / 7 / 2018

وصلنا طرابزون الساعه الثانيه ظهراً على متن الخطوط ( اناضول جيت ) من موقع الخطوط التركيه











مطار طرابزون صغير وحليووو

اخذنا الشنط .. وبعدها اتجهنا لمكاتب ايجار السيارات
وتحديداً للمكتب اللي استأجرت من عندهم السياره من قبل حوالي ثلاثة أشهر ..

السياره ذي قصتها قصه !! واتبهذلت فيها بهذله أول يوم !!!!

قصة السياره / المفروض الواحد يستأجر سياره عن طريق موقع (rentlcars ) المعروف المشهور للمصداقيه والضمان .. لكن الأسعار كانت غاااااليه عندهم ..

فلقيت موقع اسمه (vib rent cars ) اتفقت معاهم على سيارة فان (فولكس واجن ) 9 راكب اتوماتيك وديزل ( لان البنزين عندهم غالي ) بسعر 2500 ليره لمدة 8 ايام ..



بعد اسبوع ردوا أن السياره غير متوفره !! واعطوني غيرها مرسيدس بزيادة 500 ليره ( يعني 3000 ليره ) وكمان يدوي مو اتوماتيك !!!



طنشتهم شهر .. وهم يرسلوا ايميلات وأنا ساحب عليهم .. وكنت ألف على المواقع ومالقيت للأسف سياره بنفس مواصفاتي بسعر مناسب ( كانت كلها غاليه !! ) .. رديت عليهم بعدين بالموافقه .. وللتأكيد كلمتهم بالتلفون أكدت الحجز .. وخصموا 100 دولار من الماستر كارد

لما وصلنا المطار .. ادور مكتبهم ما لقيته !! وريت الحجز للمكاتب .. فبلغوني بالذهاب لمكتب ( ناشيونال ) طلع موقع (vib ) وسيط بين العملاء ومكاتب الايجار !! وعمولتهم أخذوها مسبقاً المية دولار !!

عموما جينا لمكتب ( ناشيونال ) .. وبلغوني بوجود سياره أخرى بنفس المواصفات من نوع بيجو اتوماتيك اذا حبيت ..



لكن أدفع زياده مية ليره عن كل يوم ( يعني 800 ليره ) .. أنا رفضت .. وليتني لم أرفض !!

خلصت الأوراق ( ارجو الانتباه لوجود رخصه معاك .. لا تنساها في البيت )

وسحبوا من الماستر كارد ثلاثة الاف ليره كامله دون المية دولار !! وفوقهم ألف ليره تامين ..

وبعدها أخذنا باص من عندهم لمكان بره المطار لاستلام السياره !!

خلصنا .. واستلمنا السياره فرحانين بيها ..

وعند أول لفه .. طب طب قرقع !! السياره طفت !!



ايش فيه !! ايش اللي صار يابابا !!

والله يابنات أبوكم نسي كيف يمشي السياره باليدوي

اليدوي عله !! ويبغاله وزنيه بالرجل !! وشغلانه !!!!

ماعليكم .. الحين تزبط الأمور

وعند الإشارة الأولى .. طب طب قرقع !! وتطفي السياره مره ثانيه !! والسيارات ورايا طااااااااط طااااااط بواري !! أم الأحراج !!



أنا كان مالي ومال القير العادي اليدوي !! ماكان زودت فلوس واخذت الاتوماتيك اللي أعرف له !!

ومره ثالثه !! ومره رابعه !!

استغر الله العظيم !! ايش الامتحان ذا !!!!!

ماني قادر ازبط القير !! وكمان ركبتي اليسار قامت توجعني !!!



لا وكمان اخبركم أن طرابزون طلعت فوق جبال !! يعني طلعاااااات ونزلاااات .. وكل ما طلعت تطفي السياره !!

والمدام والبنات يطالعون فيني !!!!!

أجل كيف بسوي اذا رحنا حيدر نبي ولا اوزنجول المرتفعه !!!

خلال الطريق تواصلت مع صاحب الشقه .. وارسلي الموقع عبر الواتس اب .. وصلنا الشقه بعد ماطفت السياره ست مرات !! قابلنا الرجال وعطانا مفتاح الشقه

الشقه كانت راااااااااااائعه جداً



في عماره من ثلاث أدوار .. الدور الأرضي عائله تركيه .. والدور الثاني فاضي .. واحنا الدور الثالث ببلكونته الكبيرررررره الرااااااائعه اللي فيها منظر يرد الروح .. منظر ثلاثي بانورامي رائع .. تطل على البحر وعلى المدينه وعلى الجبال الخضراء .. وفيها عدد 2 طاولة طعام بمظله من كبر البلكونه .. وكرسي مرجيحه

لو أجلس سفرتي كلها في ها البلكونه ما عندي مانع



لاحظتوا توقيعي على الصوره ترى الحقوق محفوظه



منظر من البلكونه



منظر ثاني





منظر على البحر من جهه أخرى





الشقه / غرفة نوم رئيسيه كبيره .. غرفة نوم ثانيه 2 سرير .. صاله كبيره فيها 3 صوفا تقلب3 سرير .. ومطبخ كبير جاهز من مجاميعه .. حمام واحد فقط كبير .. غساله .. الأثاث ممتاز وجديد .. الشقه تكفي سبعةأو ثمانية أشخاص بالراحه

الشقه مثاليه لمن سيقضي مده طويييييله في طرابزون



باب الغرفه المؤدي للبلكونه .. وتشوفون المنظر الجميل



الغرفه الثانيه



الصاله الكبيره اللي فيها 3 صوفه



المطبخ الكبير الجاهز من مجاميعه



بجوار الشقه سوبرماركت .. ومسجد

الشقه من موقع ( بوكنج ) اسمها ( apartment with terrace and sea view at cukursayir district ) وهذا رقم الشخص المسؤؤل اسمه فهد ( 905063853087 ) أخذتها أربعة ايام بسعر 1700 ريال .. يعني اليوم 430 ريال ( سعر ممتااااااز )


بعد الراحه .. وين رايح ؟؟

بارجع المطار أغير السياره ذي اللي طفشتني

طيب نروح معاك .. ومن هناك نكمل نتمشى في طرابزون .. ونشوف مكان نتعشى فيه

رجعنا المطار .. وبدلنا السياره .. وكانت غلبه ودوشه !!! ونفس الموااااال .. أوراق جديده .. وسحبوا من الماستر كارد 800 ليره .. وباص ودانا خارج المطار لاستلام السياره الجديده .. السياره الجديده طلعت محتاجه تنظيف !! وانتظااااار !!

وتعليمات / السياره استلمتوها مليانه ديزل .. لازم ترجعها مليانه ..

والأمر الثاني السياره استلمتها نظيفه .. لازم ترجعها نظيفه !!

بعد الاستلام .. كاشخين وفرحانين
لا طفت السياره ولا حاجه

تمشينا شوي في طرابزون .. ولاحظنا كمية هائله من العمائر تحت الأنشاء .. حركه عمرانيه رهيبه في طرابزون



طرابزون مدينه هادئه .. ومشاويرك كلها قريبه منك ..

البحر أمامك .. والجبال الخضراء اللي تفتح النفس حولك وخلفك

حل المساء .. وذهبنا إلى ( بوز تبه ) وهو مكان مرتفع فيه العديد من المطاعم .. اخترنا واحد

صور لبوزتبه







صوره مسائيه



الجو كان بارد قليلاً بالليل .. تعشينا كباب وشيش طاووق .. وكان الأكل سئ ( والله الحمد ) والحساب 250 ليره

( بوز تبه ) في نظري الأفضل انك تروح لها بالنهار
المنظر بيكون أجمل .. والجو ألطف

يتبع ..