تقرير آخر سفره الى كاليفورنيا ديسمبر 2019 (قبل الكورونا)

العنان · 09-05-2021, 03:28 PM

Doha - Los Angeles
13 ديسمبر 2019 (من فينا هالليلة ينام)

موعد الرحلة كان يوم الجمعة الساعة 7:45 الصبح، طبعاً ليلتها كانت حالة استنفار عندنا في البيت، وكل واحد يسأل الثاني حطيت الغرض الفلاني ليكون نسينا نجيب هالغرض (السفر مع البنات جدا مريح ) المهم عدا يوم الخميس 12 ديسمبر بخير وسلام بعد ما راجعنا كل الاغراض وتأكدنا من ان كل شي مرتب وجاهز ومب ناقصنا غير التوجه للمطار ✈ ، بعدها الكل توجه لسريره حتى ينام لكن فرحة السفر طغت على التعب والارهاق اللي كنا واصلين له ولسان حال الموقف كان يغني اغنية حسين الجسمي “ من فينا هالليلة ينام والشوق صاحي ماينام”.

الساعة 4 الصباح المنبه من اول رنه صحيت عليه وعلى طول قمت خذت شاور وصليت وقعدت بناتي ويلا يلا الموقف كان يضحك فيه استعجال على هواش وشوية ضحك ، تقريبا الساعه 5 الصباح طلعنا على المطار، طبعا من ليلتها الشناط السايق حطهم بالسياره فركبنا على طول معاه وبعد التوكل على الله توجهنا لمطار حمد الدولي ، والزين ان المسافه بين البيت و المطار اقل من 20 دقيقه.

وصلنا المطار وهني كنت انا وزوجتي جالسين نتراسل على الواتس اب حتى نتفق كيف راح نفاجئ العيال ، محد كان يدري ان احنا رايحين أمريكا غير انا وزوجتي بس اما باقي القبيله مايدرون كنا قايلين لهم بنروح تركيا 🇹🇷 😜، لكن خلاص حبل الكذب بدا يقصر.

المهم بعد مانزلنا توجهنا لكاونتر الخطوط القطرية الا موظفه قبل الكاونتر كانت تتأكد من ان الجوازات فيها صلاحيه وتسأل عن وجهة السفر وانا جالس اساسرها (احنا رايحيين أمريكا) بصوت هادي ، طبعا مابي حد يسمع من العيال ، الا هي جزاها الله خير قالت اووووه أمريكا لا انتوا لازم تروحون الكاونتر رقم كذا طبعا المطار كله سمعها بما فيهم بناتي، طبعا فرحة السفر لهم صارت مضاعفه وهم مب مصدقين اللي سمعوه، باختصار رحنا دخلنا الشنط وخذنا التذاكر وخلصنا من الجوازات وفطرنا في المطار.

بعدها توجهنا الى اول مرحلة صعبة بالرحلة وهي بوابة التفتيش للدخول لبوابة السفر لأمريكا، اتوقع كثير يتفق معاي ان هالمرحلة جدا تنرفز ومملة لكن الحمدلله عدت بخير وركبنا الطياره وبدا العد التنازلي لل 16 ساعه للوصول الى مطار لوس انجلوس.

طبعا قضينا الرحلة بين سوالف ونوم ونوم وسوالف والحمدلله ان الخطوط القطريه تقدم خدمة الوايرلس
على طياراتها اول ساعه تكون مجانيه وبعدها لو حاب تكمل الخدمه على طول الرحلة تدفع
مبلغ رمزي اظن انه كان بين 30 او 40 ريال ، قبل لا توصل الطيارة لمطار لوس انجلوس بساعه وشوي تقريبا قمت دخلت دورة المياه اعزكم الله وغسلت وجهي وبدلت ملابسي ورجعت للكرسي وبديت اعبي النموذج اللي توزع علينا.
في الجزء الجاي بنتكلم عن مطار لوس انجلوس وعن استلام السيارة باذن الله

Abu Muataz, توبليرون, q8ya metnaqla و 6 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي الي سيرلانكا 2019 ديسمبر	artist dreamsss	بوابة الهند وسيرلانكا	16	14-02-2022 10:06 AM
مشورتكم في رحلتي الي الفلبين مع العائله ديسمبر 2019	Dawas	بوابة الفلبين	2	10-11-2019 08:46 AM
شهر العسل تايلند ديسمبر 2019	alshaia	بوابة تايلند	7	23-09-2019 09:42 PM
شهر العسل تايلند ديسمبر 2019	alshaia	بوابة تايلند	0	06-09-2019 09:25 AM
سفره شتويه نهاية ديسمبر	موجة بحر	بوابة البوسنة	12	16-10-2018 05:41 PM