مشكور اخوي سالم
وننتظر بقية التقرير :1

ونكمل ...

بعد أربعة ليالي فكرنا نغير المنطقة فقط لمجرد التغيير وحجزت شقة صغيرة في وسط الغابات لمدة ليلتين اسمها Готель Шато وتقييمها 9.4 وبمبلغ 1350 غريفنا وهذا يعادل 180 ريال .

صورة من إطلالة الشقة يعيبها الأشجار الكثيفة تحجب الرؤية والإطلالة من أسفل إلى أعلى ما هي جميلة .



الشقة من الداخل مرتبة وفيها نظام موسيقى يشتغل بشكل مستقل في كل مكان حتى في الحمام وأنتم بكرامه ولكن مع إطلالة غير جميلة ما يمشي الحال .









بالجوار 3 مطاعم بجنب بعض على نفس الشارع تبعد 200 متر تقريباً عن الشقة وهذا أحدها





أغلب قائمة هذا المطعم أسماك .

في اليوم التالي اعتذرت من صاحبة الشقة وقلت لها نبي نطلع ونرجع للسكن الأول ومبلغ الليلة الباقية ما نبيه . وانطلقنا إلى السكن الأول الاستوديو أبو تراس خرافي وحجزناه خمسة ليالي .












في صباح اليوم التالي ..... قررت نغير النشاط ونخليها قعدة على التراس وشوي . رحت لواحد عنده خرفان أخذت هرفي بمبلغ 3000 غريفنا وهذا يعادل 420 ريال .





هذي بنته في قمة اللطافة .....



وقعدنا نشوي من الصباح إلى الليل ، خلينا كلاب الحارة كلها تعوي وتقلط معنا .









وباقي الأيام كنا نكرر نفس المطاعم ونذهب إلى مطاعم أخرى للتغيير ومنها هذا المطعم الايطالي وجباته لذيذة ... الباستا مع الجبنة الزرقاء كأني آكلها في ايطاليا .











وبسبب طول النهار كنا نكرر الزيارة لفعاليات الترفيه بجانب منتجع Voda Club فيه مطعم وجباته لذيذة ولكن يعيبه أن كل العرب متكومين فيه لأنه بجانب الفعاليات مثل التلفريك والزحليقة والبحيرة .



البحيرة اللي بجانب المنتجع فيها قوارب تجديف بالأرجل هي أكثر شي حبيناه سعر النصف ساعة 240 غريفنا وهذا يعادل 33 ريال ... نصف ساعة بالكاد تكفي لتدور حول البحيرة وفيه فوق البحيرة المشي بالدراجة المعلقة على حبل ولكن ما جربتها وفيها القفز الحر من منصة ما جربته . وفيه بجانب البحيرة التلفريك وسعره 150 غريفنا للشخص وهذا يعادل 21 ريال وفيه الزحليقة وسعرها 500 غريفنا للشخص وهذا يعادل 70 ريال . الصور من أيام متفرقة :















بعد الليلة الخامسة ، أصبحنا بهذا الصباح الرائع والغيوم والرذاذ .









ما قدرت أغادر المكان من جماله وطلبت من ماريا صاحبة السكن أن نمدد ثلاثة ليالي أخرى (التواصل عن طريق قوقل) ولكنها اعتذرت لأن السكن محجوز وبعدها قالت لي فيه غرف فوق ، قلت لها لأ أبي بالدور الأرضي ، قالت فيه منزلنا المجاور أمتار قليلة عن الاستوديو اللي ساكنين فيه لكنها قالت البيت كبير عليكم فيه أربعة غرف نوم وصالة جلوس في الدور الأرضي والعلوي وفيه غرفة طعام ، قلت لها ما فيه مشكلة ما أبي أبعد عن هذا المكان وطلبت 3300 غريفنا لليلة وهذا يعادل 460 ريال وأخذت البيت لثلاثة ليالي . تعودنا على المكان وعلى فطور وجلسات Villa Blanc و Villa Livorno والموقع بشكل عام رائع والولد تعود على كلاب الحارة يلعب معهن وتاركنا على راحتنا .





في الصورة اللي فوق يظهر الاستوديو اللي كنا ساكنين فيه بالبيت الأبيض ، ما فيه بينهن مسافة كبيرة .

درجة الحرارة وصلت إلى 13 درجة .... هذي صورة من شاشة الجوال كانت الساعة 12:37 الظهر ولاحظوا الفرق بين درجة حرارة بوكوفل وباقي مدن أوروبا الغربية الفرق شاسع .



هذي صور البيت من الداخل :















الأجواء أكثر من رائعة .









يتبع ....

تقريرك المميز جافي وقته خصوصا مع الاقبال الكبير على اوكرانيا من قبل السعوديين خاصه والخليج عامه

وكان خطوه ذكية منهم ان خلو دخولها بدون تأشيره وسهلو اجراءات الدخول لها

جميله هي اوكرانيا بعيونك يا اخينا سالم


ذكرت انك استخرجت التأمين الاوكراني من الشركه الاوكرانيه!!

هل هي في المطار ؟ ام كيف استخرجتها ؟

مقصد سفريتك هو الاقامه في مدينه بوكافيل فكيف

عرفت انها وجهة تستحق الذهاب اليها والاقامة بها؟



ننتظر بقية التقرير


تقبل مروري

التقرير متعة بصرية ماشاء الله
تصويرك رائع والتفاصيل والمعلومات مميزة وتفيد أي زائر لهذا البلد
ننتظر بقية التقرير

يعجبني المسافر المغامر اللي يعشق الاكتشاف
يعطي الرحلة بعد آخر
بالفعل الانطباع العام عن اوكرانيا كما ذكرت غير جيد
ومتابعين معك التقرير بدهشة
استمتاعكم بالرحلة واضح من ثنايا سردك
واحنا مستمتعين معكم

معلومات جديدة مفيدة لكثير من السياح حالياً
تسلم يا عسل واصل الابداع