بالتوفيق، أنا موعدي كان أمس في مكتب BLS في الرياض.
الأمور سهلة جداً ويسيرة. جيت قبل موعدي بربع ساعة. اول ما تدخل تلقى أمن عند الباب معه ورقة فيها أسماء، يشيك أسمك ووقت موعدك، وريته الموعد بالجوال ماكان مطبوع.
دخلت للاستقبال اخذت مني اوراقي وشيكت كل شي ورجعت لي ورقة حجز الطيران تقول لازم انجليزي. عطتني رقم انتظار اشوى ان وقت موعدي باقي عليه نص ساعة يمكن، ورحت طبعته برا وجيت مرة ثانية ونادوني وعطيتهم اوراقي وعطتني فاتورة تقول الدفع كاش،يفضل تروح قبل موعدك بوقت كافي تشيك اوراقك عشان اذا فيه تعديل يمديك تسويه برا. وجيب معاك صرف لأن يقولون ما معهم فكه.

في مشكلة واجهتني في بطاقة الأحوال قالت لي لازم ترجمة مع اني قريت وسألتهم قبلها بالتلفون هل لازم ترجمة او لا وقالوا لا بس كرت العايلة، واخذوا مني 130 ريال رسوم ترجمة عشان مكان الميلاد كان بالعربي . احرص ان كل شي عندك يكون بالأنجليزي. رسومهم عالية جداً واذا اوراقك ناقصة ترا مافي مكان تطبع فيه اوراقك.
بعدها تسألك اذا تبي تستلم جوازك اذا خلص والا يرسلونه لك، اذا داخل الرياض بدون رسوم واذا خارج الرياض بـ 80 ريال، وبعدين يعطونك اوراقك وجوازك ويقولون انتظر التبصيم والتصوير.

بخصوص متطلبات التأشيرة موجودة في الرابط اللي تحت
https://saudi.blsspainvisa.com/arabi...-for-saudi.pdf

سألتهم عن الوقت المتوقع لين تصدر الفيزا قالوا من 3 الى 5 أيام عمل.
وسلامتك والمعذرة على الإطالة