السلام عليكم ورحمة الله وبركاته
أسعد الله مساءكم بالخيرات 🌸

بعد شهر باذن الله جايين زيارة للكويت
أنا وزوجي وأولادي

الميزانية محدودة
مدة 4 أيام
ابغى مطاعم بسعر جيد
اماكن ترفيه غير المولات
فنادق بمسابح

ما أعرف شي بالكويت


*أعمار أولادي 8-10 سنوات


وشكراً لكم 💖

الله يحييك
مشكور الله يعافيك ويسعدك🌸

هو مو شهر بالضبط تقريبا 20 يوم
مافي وجهه غيرها
بس ما نبغى مولات مافيها جديد غير التمشي
محتاجين فعاليات تغيير روتين وجو

اهلا وسهلا تنورينا

احدث مول مول العاصمة وفيه مركز العاب وايد حلو وجديد للاطفال راح يستمتعون فيه

الفنادق العالمية فيها مسابح طبعا بس اذا الميزانيةمحدودة لازم يبيلج فرة ببوكينغ وتلاقين اللي يناسبج ان شاءالله



اماكن حلوة ومطاعم مختلفة الاسعار

مثل الاوبرا
مجمعات المطاعم كثيرة عندنا تلاقين مجمع بس كله مطاعم تختارين اللي يناسبج وهذا تلاقينه بكل مكان

مروج / منطقة مطاعم والعاب اطفال في منطقة صبحان

الاوبرا / مطاعم ونافورة راقصة في الديرة

حديقة الشهيد تمشي وبحيرة ومطاعم في الديرة

حديقةالبوليفارد مطاعم وسوق والعاب اطفال داخليه وخارجيه بالسالميه

المركز العلمي حلو للاطفال مركز ترفيهي وفيه مطاعم سريعة بالسالميه

مركز عبدالله السالم الثقافي خمس قاعات تاريخ واسلاميات وفضاء واذا للاطفال بيستانسون على قاعة الاسماك والديناصورات



مادري بعد اذا اي شي تذكرته بكتبه باذن الله

٢٠ يوم
اشوفها واجدة جدا جدا
اخاف تملون
أنصحكم تخلون الحجز اسبوع
واذا عجبكم مددو على راحتكم
٢٠ يوم في دول الخليج
اشوفها واجد

تم الإرسال من SM-N960F باستخدام Tapatalk

آخر مواضيع بن قوت

- جدول مدة خمسة ايام في الشمال التركي - تنبيه من السفارة السعودية في تايلند - سبايدي كاب ** سلام يا تايلند - احتاج جدول لسفرة تايلند - الف مبروك منح الاخ المميز المسافر خبير سفر

توقيع : بن قوت

وعليكم السلام وحياكم الله
عاد وقتكم مثل ما قال بن قوت عز الحر

الفنادق اذا تبون مسابح برايفت مافي الا جميرا و هيلتون المنقف و منتجع صحارى في صبحان ..

اما باجي الفنادق فيهم مسابح للنزلاء

المطاعم طبي وتخيري وايد انواع وبمتناول الكل

مركز عبدالله الثقافي وايد حلو وفيه فعاليات وورش للاطفال تفاعليه وحلوه اقل شي يبيله يوم

حديقة الشهيد فيها متاحف عن الحيوانات والنباتات وغيرهم من متاحف وبحيرات ونافورة وكافيهات وورش للاطفال طبعا زيارتها على المسيان افضل ..

متحف بيت العثمان وايد حلو للزياره في حولي

ممكن يكون في عروض مسرحيه في وقتكم حجزوا لهم المسرحيات حلوه ..

متحف الكويت الوطني من المتاحف الجميله قريب من بيت السدو في منطقة شرق .. و الاوبرا ممكن وقتكم يكون فيها فعاليات و طبعا مثل ما قالت ام حسين فيها النافوره ومطاعم ..

في حلبة سرب في الشويخ وفيها كارت للاطفال

وفي مجمع الكوت في الفحيحيل اكبر كارتينغ مغطى q8 karting

في المركز العلمي بالسالمية عالبحر و قريب منه البيت المقلوب وغرفة الالغاز في سيمفوني و مارينا ويفز في العاب عالبحر وتأجير قواري ..

مروج في منطقه صبحان مطاعم وكافيهات وترامبولين والعاب خارجيه للاطفال.. وقريب منهم نادي الرمايه حلوه تجربة الرمايه فيه ..

ناشيونال جيوغرافيك عالم الاستكشاف في مول العاصمه وايد حلو حق الاطفال والمول يديد وحلو ..
صالات تزلج في الافنيوز و مجمع بروميناد ،، والعاب في الافنيوز و مول 360 ..

سوق المباركيه والتمشي فيه مع العشا

يفضل تعطينا التواريخ بالضبط عشان نفيدكم بالفعاليات في فترة وجودكم

في مكان لعب اسمه انفنتي للكبار والصغار في مول 360 و في بالكوت