تفاصيل رحلتي العائلة الى جورجيا مايو 2022

ِAhmed · 25-05-2022, 08:49 AM

اليوم السادس 6 مايو 2022

بما أنه لسى مركز التحميل ماضبط راح اكمل سوالف

وان شاء الله اذا ضبط نزلت لكم الفديوهات والصور ..

في نقطة نسيت اذكرها في اول يوم وهي مهمه جدا للمسافر والغير مسافر

موضوع الانترنت

طبعا النت عندهم رخيص مرة وانا عن نفسي بعد الاستماع لاراء الاخوان هنا ..

فضلت شركة ماغتي أو ماقيتي اكتب في قوقل بالعربي وبتطلع لك ..

الشريحه مع الانترنت 7 لاري لمدة اسبوع يشترطون طبعا الجواز ..

ولو بتطلع اكثر من شريحه بتحتاج اكثر من حواز مايقبلون بجواز واحد ..

الاجراء ماياخذ منك 10 د لو اقامتك اكثر من اسبوع وبتحتاج تقعل النت لاسبوع اضافي

الطريقة سهله جدا وصورتها لكم فيديو وراج انزلها باذن ..

راح تحصلون اجهزة مثل اجهزة الصراف الالى منتشرة في كل مكان عندهم هذي هم

يخلصون فيها كل المدفوعات الحكومية والتجارية اذا انجليزيتك كويسه ماراح تتعب ابد ..

بس اختار اللغة الانجليزية وانطلق ..

واذا مالك في الانجليزي انا صورت الخطوات والجهاز باللغة الجورجية ..

بعد ماتشحن المبلغ في الشريحة كل اللي عليك تضفط :

نجمة واحد خمسة سبعه مربع

بتطلع لك خيارات اضغط رقم واحد والتالي ومره ثانية خيارات اضغط واحد والتالي وثالثه نفس الشي

وخلاص كذا تفعلت الباقة عندك لك لاتسوي هالخطوات الا اذا تأكدت ان الباقة الاولى انتهت ..

نرجع ليومنا وتفاصيله الخطة كانت نصحى نفطر نجهز شنطنا وننطلق الى باتومي ..

وفعلا العم زازا جهز لنا الفطور اللي ماودك تقوم من الطاولة من لذته ..

وجلسنا معه شوي سوالف وصورنا معه كم صورة وانطلقنا لكن قبل نمسك الخط

رجع لمحل الجوالات وقفنا عنده تقريبا نص ساعه ركب الشاشة ب 270 لاري تقريبا ..

بعده مسكنا الخط الطريق جميل ماراح اقدر اوصف لكم جماله مهما تكلمت او وصفت ..

هي المسافه بالكيلو مو طويلة لكن تمر في قرى وتحويلات علشان كذا مايمديك تسرع

واصلا حرام تسرع وتتجاهل جمالة ..

طبعا كل الدنيا خضره وشوي تحصل قطيع ابقار ترعى شوي قطيع خيول ترعى ..

لاتخاف من موضوع البنزين كل مسافة بتحصل محطات لكن عاد لاتصير كسول وتخليه

ينزل عن الربع ولا تنتظر اللمبة تشتغل نفس نظامنا هنا

دخلنا باتومي اول مادخلت ماقدرت اقاوم جمال البحر وقفت في مثل الموقف فيه سكة قطار تمر

وخذت نقاهه استنشق هوا البحر ونصور ..

بعدها انطلقت الى الحي القريب من الكورنيش وعمارات اوربي ..

مشكله السكن اللي واجهتني وان شاء الله ماهي مشكله بس لازم اقولكم عنها وتنتبهون لتأكيد الحجز ..

هناك في ابراج مقابلة الكورنيش وانا افضل بقوة السكن فيها لانها اوفر واقرب وآمنه ..

لكن نظامها مافي هوس كيبنغ ويمرون عليك كل يوم ينظفون لك لا اخدم نفسك بنفسك ..

يعني كنك ساكن في شقتك الخاصه ..

وطبعا هالابراج نرا نفسها متكرره في البوكينع لكن لملاك مختلفين يعني نفس البرج هذا

تحصل اكثر من شخص يملك فيه شقق ويأجرها وحاط له اعلان في البوكينع ..

انا حجزت عند شخص حاط اسمه في بوكنغ :

Beautiful Apartments with sea view

وكان سعر الليلة تقريبا 180 لاري وهي عبارة عن شقة مو غرفة يعني تكفي عائلة متوسطة ..

المشكله وصلني تأكيد الحجز على الايميل والتطبيق بس بعد ماوصلت جلست ارسل له

علشان يطلع لي لاني البرج هذا مثل ماقلت لكم فيه اكثر من مالك وماتقدر تدخله الا ببطاقة

خاصة للمصعد ..

في النهاية ارسلي انها مسافر خارج جورجيا ويعتذر انه مانتبه للحجز والغاه من عنده ..

ممكن البعض يشوفها نكبه ويخترب يومه لكن لا ياحبيبي خلك ريلكس وامر الله كله خير ..

وفي حلول سكن كثيره هناك ..

كان في الاستقبال موظفة وكويس انها تتكلم انجليزي قالت لي لك بعطيك رقم واحد

عنده شقه بس تواصل معه انت وهو يقولك التفاصيل تو بدأت تعطيني الرقم الى بطلعته

من اللفت قالت لي هذا ونادته جاني سألته قالي موجوده وب 300 لاري ..

انا ماعجبني المبلغ لان كنت باحث في بوكنغ وشايف المتوسط للشقق مايوصل ل 300 ..

قلت له خلاص شكرا مابي ..

طلعت وابحث في البوكينغ الا تطيح عيني على واحد اسمه شقق لكجري ..

وقرأت التعليقات الناس تمدح في المالك واسمه محمود ..

وكان السعر 120 لاري سبحان الله مدري كيف طلع لي انا كنت باحث قبل ماطلعت هالشقة ..

حجزت ليلة وحده وهي هناك يفضلون كذا ان يكون التنسيق معهم هم مباشره علشان النسبة ..

اول ماسويت الحجز على طول هو كلمني في رسايل بوكينغ ..

رقمته

قلت له هذا رقمي ممكن تكلمني وتس ترسلي اللوكيشن ..

وفعلا اقل من دقيقتين هو مرسل اللوكيشن قريب مني دقيقه وانا عنده ..

وعندي رقمه للي حاب يتواصل معه مباشرة ويحجز ..

الموقع طبعا مو على الشارع العام اللي مقابل الكورنيش مباشره لا قدامك برج وهو وراه ..

مشي بالرجول الى الكورنيش 3 د بالكثير ..

كل الخدمات تحت البرج صرافين صيدلية سوبر ماركت مخابز مطاعم مواقف سيارات ..

وصلت الموقع وصورت له وبن واقف وطلع لي الرجال مؤدب محترم جدا جدا ..

قلت له ممكن اشوفها قبل قالي اي تفضل ورحت معه ..

هي عبارة عن غرفة وصالة ودورة مياه وبلكونه وفيها مطبخ صغير في الصالة ..

مجهز بكل شي ممكن تحتاجه وفيها برضو غسالة ملابس ..

الصالة فيها كنبات طويلة للنوم وفيه بطانيات اضافيه ..

وفيه سرير نفخ هواء اذا حاب تستفيد منه ..

ماقولكم النظافه 5 نجوم لكن فوق المقبول يعني 4 من 5 ..

قلت له خلاص توكل على الله ابيها 3 ايام حسب لي اليوم ب 100 لاري ..

يعني سعرها لثلاث ايام يساوي سعر هذاك لليلة وحده ..

والمستوى متقارب جدا وبالنسبة لي الموقع هذا افضل من اللي قبل لوجود مواقف ..

نزلنا حطينا اغراضنا وجاب لي طبعا مناشف اضافية وبطانيات ..

بعدها انطلقنا نكتشف المكان وقدامنا الكورنيش رحنا هناك مكان مريح نفسيا وكلا في حاله ..

استأجرنا سكوتر كهربائي ناخذ فيه جوله النص ساعه ب 10 لاري الى 15 انا اخذته ب 10 ..

بعدها توجهنا الى محطة صعود التلفريك في باتومي هي على البحر وياخذ لاعلى مكان تشوف

تقريبا البحر وماحولة من فوق ..

تقدر توصل فوق بالتاكسي طبعا ولكن تجربة التلفريك حلوه والمسافة طويلة ,,

انا كنت شايف السعر قبل اروح الكبار 15 والصغار 5 يوم رحت شفت التسعيره تغيرت

وطبعا مكتوبه في ورقة الكبار 30 لاري والصغار 7 لاري ..

دفعت المبلغ وركبت المسافة مثل ماقلت لك طويلة توصل لاعلى القمه فيها هناك كوشك

يبيع هدايا تذكارية ومطعم وكوفي ودورات مياه الله يكرمكم ..

جلسنا تقريبا نص ساعه وبعدها نزلنا حل الليل وجا وقت الاكل ..

انا كنت مجمع اسماء اكثر من مطعم هناك اخترنا مطعم هندي اسمه Cafe Mumbai

برجع اسولف لكم عن المطعم بس بقولكم اول موقف التاكسي ..

طبعا هو شايب ومافي متحيليين هناك مثل شيبانهم ههههههه ..

طلبت بولت طلع لي هو تاكسي وشغال بولت في نفس الوقت وانا محدد وجهتي وين ..

وصل ركبنا معه طبعا مابدأ المشوار وأأشر له علشان يبدأ المشوار في التطبيق مدري هو مو فاهم ولا يسوي نفسه مايفهم ..

ويمشي وانا اصلا مشغل الخرايط ويلف ويدور بعدين عطيته جوالي قلت له امش على هالموقع ..

ووصلنا طبعا المشوار كان طالع لي التطبيق 7 لاري هو طلب 15 عطيته العيار ..

نرجع للمطعم المطعم صحيح هندي قولا وفعلا

ديكوراته اقل من بسيطة وطاولاته كنك في بومباي المطعم مو للتصوير ابد ..

مساحته صغيره داخل حي بسيط جدا لكن اكله حلال ولذيذ ويشبع ..

طلبت تقريبا 4 اطباق + السلطة + مشروبات الحساب 150 لاري ..

بعدها رجعت طلبت السيارة وهالمره جاني واحد شباب بس نفسيته في خشمه ..

وصلنا حسابه 7 لاري عطيته 10 قلت له خلاص الباقي لك سبحان من غير نفسيته وجلس يشكر ..

طبعا انا عندي سيارتي بس اول يوم وتو واصل من طريق قلت بتكشف البلد واشوف اذا المواقف متوفره

وبعدها قررت ماطلع اي مشوار الى بسيارتي ..

بعدها دخلنا سوبر ماركت تحت البرج اللي ساكنين فيه بالضبط اخذنا كم شغلة وكذا خلص يومنا ..

Abu Muataz, آخـــرفـــرصـــة, توبليرون و 2 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
استفسار:رحلتي الأولى إلى تركيا نهاية مايو 2022	One Dream	بوابة تركيا	8	10-11-2022 02:56 AM
عيد الفطر 2022 14 يوم مع العائلة	Eng.Fahd	بوابة ماليزيا	24	07-09-2022 12:15 AM
مسافر الى جورجيا - فبراير 2022	Bohasan	بوابة جورجيا و اذربيجان	4	26-01-2022 12:02 PM
ترجمة بطاقة العائلة من طلبات التأشيرة الفرنسية 31 مايو	ياويلي	فيزا	5	20-08-2016 01:57 PM