رِحلَة كُوريَا الجَنوبيَّة - ( سِيئُول + جيجُو ) - يُوليُو 2022

Boarding Pass · 01-02-2023, 05:21 AM

24 يوليو :
Common Ground

اليوم قررنا نروح لمجموعة محلات اسمها Common Ground .. قمنا زي العادة تقهوينا أنا و أمي في الفندق و الباقيين راحوا يفطرون برّا .. بعد ما خلصنا طلبنا آوبر ، و حطينا اللوكيشن و أول مرة أنا اللي أتقدعن و أعطي أهلي الوكيشن ! و كانت آخر مرة ! طلع في اللوكيشن إنه يبعد 45 دقيقة .. لما وصلنا نزلنا في حي فيه بيوت ! و محلات بسيطة على الشارع ، نفس اللي بالدراما ! دخل أخوي محل و سألهم ، و ورّاهم المكان و طلع منطقة مختلفة تماماً .. في الضفة الأخرى من العالم ! و طلع فقط يبعد عن فندقنا ربع ساعة بالسيارة ! و لعل الأجوما اللي بالمحل بلشت فينا مرة .. و تحاول تفهمنا إن المكان خطأ و فهمناها إننا فهمنا ، و رجعت لنا مرة ثانية و قالت أطلب لكم تاكسي ؟! .. تشكرنا و قلنا طالبين .. و راحت و رجعت و كتبت لنا اسم المكان في ورقة عشان نعطيها السواق في حال ما فهم ! قالت أمي خوذوا رقمها و كلموها بشروها إذا وصلنا و كلمناها و الله بعد ما جلسنا ساعة نحفظ الجملة اللي نقولها لها بالكوري ، و انبسطت يا قلبي هي !
المهم وصلنا و كانت المنطقة في الحقيقة كبر عيني ! بالأنترنت طالعة كبيرااااااااااه ! طلع فيها محلات بسيطة و أغلبها رياضية ، و أكشاك في الوسط ، و فود ترك ، و مطاعم ، المنطقة حلوووووة و مهم الواحد يشوفها ، صغيرة بس مختلفة ، و غريب إن المحلات على شكل حاويات ! تنفع الواحد يسوي فيها جلسة تصوير الصدق ..

فيها مخبز من ألذ ماذقت في حياتي ! بعد ما تقهوينا فيه ، أخذنا كيك برتقال و فستق من عندهم ، نتقهوى عليها في الصباحات القادمة

جلسنا ندور في المكان ، و نحلل المرمطة اللي تمرمطناها عشان نوصله .. و بعدها قررنا نتغدى و صار فيه انقسام كالعادة ! أنا أبي قهوة ، وأختي تبي بيتزا من الفود ترك ، و أخوي و أختي الصغيرة يبون مطعم إيطالي كان موجود في الدور الثاني .. أما الأم في عالم آخر ، عالم التسوق ! و قالت لأخوي يجيبون لها تيك آواي .
صح كان فيه مطعم بالدور الثاني لعائلة فلبينية مسلمة ، المطعم حلال بس كلّن مقرر وش يبي
وَ صح بعد ترى أغلب المطاعم الإيطالية في الأماكن السياحية المعروفة اللي متعودين على المسلمين لمّا نطلب منهم يقولون لنا راح يتأخر الطلب شوي لأننا سالقين المكرونة مسبقاً بمرق دجاج ، فراح نسوي لكم جديدة بماء عادي ، هالموقف تكرر علينا بمطعم في الآوت لت بـ 2018 ، و في فرايديز في سوق لوتّي مول كذلك بـ 2018 ، و هالمرة بعد

رجعنا للفندق ، و نزلنا نتمشى ، لأن المكان اللي حول الفندق كله أماكن حلوة و ماغطيناه كله و كل شوي نكتشف شيء جديد

25 يوليو :
Petite France ( ما رحنا لها هالمرّة ، فقط بـ 2018 ، أضفتها عشان يكون عندكم خلفية عنها لأنها بنفس المقاطعة )
The Garden Of Morning Calm
nami island

قمنا الصباح و رحنا كلنا لمحل 4B حق البـ bagel و أفطرنا ، و لما جاء وقت الانطلاق لوجهتنا لهاليوم أخذنا من عندهم قهوة و مرينا ماركت بجانب الفندق و أخذنا منه تشوكليت و حركنا لحديقة الصباح الهادئ و جزيرة نامي .. الحديقة تبعد عن سيئول بساعة و نصف وَ الجزيرة تبعد عن الحديقة بنصف ساعة .. كلهم موجودين في نفس المقاطعة ، مقاطعة غيونج جي

أخذنا تاكسي كبير لمدة 9 ساعات في هالمشوارين من نفس الشركة اللي أخذناها في جيجو بـ 1200 ريال ! غالية شوي صح .. صح ! و لكن المشوار رايح جاي قرابة الأربع ساعات ( في حال كان الطريق فاضي ) ، و صعبة نحصّل تاكسي في المنطقة هناك عند الحديقة عشان يودينا لجزيرة نامي ! أما عند الجزيرة ممكن فيه مواصلات و لكن الحديقة لا ! و كذا كذا مو بعيد عن سعر سيارتين من آوبر لما حسبتها و كذلك الآوبر ما راح ينتظرنا لما نخلص ، فاشتريت راحتنا !
و اللي يبي يروح إن شاء الله يضيف القرية الفرنسية للخطة و بنفس السعر بتكون ، أهم شيء الإتفاق على الساعات ..

أول شيء وصلنا الحديقة و ما قدر زرناها قبل ، و سعر التذكرة للكبار 11000 وون ( 30 ريال ) وَ الصغار بـ 7500 وون ( 21 ريال ) و كذلك الشباب لهم سعر أقل من الكبار .. وَ كانت من أجمل الأشياء الطبيعية اللي زرتها في سيئول و الصدق أحلى من hallim park اللي بجيجو تحتوي الحديقة على 5000 نوع من النبات .. اسُتخدِمت هذه الحديقة كموقع لتصوير عددٍ من المسلسلات التلفزيونيّة الكوريّة .. ذكرتني جداً بسويسرا .. جميلة جميلة جميلة ! و تأخذ وقت صراحة كبيرة كبيرة ! بس فتنة والله ! فعلاً خلاّبــة ما شاء الله !

بعد ما خلصنا خواتي قالوا إنهم جوعانين و ما كان فيه غير كشك يبيع كورن دوق ! يكون النصف العلوي جبنة و النصف الآخر هوت دوق .. أكلوا اللي فوق و خلّوا اللي تحت ، و أكلوا آيسكريم و شبعوا الحمدلله

بعدها توجهنا لجزيرة نامي و بالطريق شفت فندق غريب ، جازلي والله ، الخطة القادمة لازم نسكن فيه إن شاء الله ..

المهم وصلنا و رحنا بنحجز الـ Zip-wire، و قالوا لنا أقرب وقت الساعة 4 ، يعني انتظار ساعة !
تذكرة الـ Zip-wire كانت بـ 1500 ريال للجميع و شاملة دخول الجزيرة .. و تذكرة الدخول للجزيرة عن طريق العبارة رايح جاي بـ 16000 وون ( 45 ريال ) وَ تذاكر الصغار و الشباب أرخص بعد ..
رحنا للمقهى اللي جنبه لما يجي وقت دخولنا .. أخذت كرواسون حالي و أمي آيسكريم ، و الباقين قهوة و تمشينا في الشوارع اللي قريبة للجزيرة ، و فيه بالمنطقة مطاعم كورية حلال ، جربناها بـ 2018 بس ما استسغنى الأكل الحمدلله .. و كذلك داخل جزيرة نامي فيه تقريباً 3 مطاعم حلال ..
لما جاء الوقت ، رجعنا .. طبعاً ممنوع منعاً باتاً التصوير في الـ Zip-wire .. ( الوزن المسموح فيه من 35 كيلو - 120 كيلو / الطول السموح فيه من 140 سم - 200 سم )

أول مرة جينا بـ 2018 كان فيه كاميرا تحت تلتقط لك صورة و تأخذها في حال كنت تبغاها ، هالسنة ماكووو ! انتظرنا بعد ما نزلنا كلا و رحنا تمشينا، و كانت السناجب الدعنونة ملياااااانة ، لطيفة لطيييفة !

استأجرنا سكوتر كهربائي و سيكل عادي لمدة ساعة لخواتي بـ 5000 وون ( 14 ريال ) و لازم بطاقة الأحوال و تستلمونها بعد ما ترجعونهم .. أما أمي و أخوي أخذوا سيكل ثنائي معلق في السماء سيكل مرتفع يمشي على سكة حديد ، مرعب في البداية يقولون و لكن مجرد ما مشوا انبسطوا و عبارة عن دورة واحدة فقط ، و طويلة لأن السكة طويلة .. و التذكرة كانت بـ 8000 وون ( 22 ريال ) .

خلصنا و رحنا صلينا في المصلى اللي حاطينه .. مرتب مرة .. و دورات المياه فيها شطّاف .. الصدق ما تأزمنا حنّا لأننا ماخذين 3 شطّافات من السنيدي

كنت مخططة على المطعم الإيطالي ، و لكن مع الأسف كل المطاعم مسكرة ، ما أعرف ليش ! طبعاً فيه مطعم حلال ، و مطاعم كثيرة ، و مقاهي كثيرة ، و لكن مغلقة كلها !
و بعد ما خلصنا قررنا نطلع و توجهنا للعبّارة .. في طريق الخروج لقيت أجوما تبيع خبز قرع مطبوخ على البخار و محشي فاصوليا حمراء بـ 1000 وون ( 3 ريال ) ، مدري ليش نفسي سوّلت لي آخذه ! لا آكل فاصوليا حمراء و لا هو وقت القرع صراحـة ! حاولت ألزّم على اللي معي يذوقونه بس ماش عجزوا ! أكلت الأطراف ، و لقيت سنجوب صغير و عطيته إياه و كان له نصيب الأسد من هالخبزة قلبي السنجاب والله أحسه كان يجاملني يوم كمّلها !

فيه كثير أنشطة في الجزيرة غير الـ Zip-wire وَ الـدراجات و القطار .. فيه Motorboat وَ Motorboat وَ Water sports & pedal وَ أشياء أخرى ، و كلها أرخص من الـ Zip-wire .

رجعنا و قررنا نخلي السواق ينزلنا في مطعم أردني حلال اسمه البيداء .. من أكثر المطاعم المعروفة هناك و أقدمهم ، طلبنا مشروبات و الأكل كان مسخن و كباب الظاهر و الصدق نسيت وش طلبنا ! بس السعر رخيص بالنسبة لمطعم عربي حلال .. حول الـ 300 ريال .. تعشينا و رجعنا ، و يالله يالله حصلنا آوبر ، لأن المنطقة بعييييدة و غير سياحية ..
الآوبر حقنا بني آدم طبيعي .. حق أخوي شكله كان مقرقع شوي ! وقف بمكان خطأ و لما راح له انهار السواق و بدأ يصرخ و يقول " التاكسي الكوري ما ينتظر ! طلّع أخوي الجوال و بدأ يترجم له إنك إنت يا متخلف غلطان و واقف بمكان خطأ ! قام هذاك يلج لج و هو يسوق و قام يصبّخ ! و كذلك أخوي قام يلج عليه و يصبخ ( قابل الصراخ بالصراخ تسلم ) و فعلاً توحّش السواق و هجد ! اتصل أخوي على الشرطة من خلال تطبيق آوبر و حط سبيكر عشان يسمع السواق .. و قالوا له ما نقدر نتدخل إلا إذا كان فيه اعتداء بس راح نحرك الدوريات داير مدارك .. خاف السواق ! و بدأ يغني فجأة ، و يسأله من وين أنت و هو مبتسم ! و أخوي ما يرد عليه و مكمل مع الشرطة في جهة ، و يهاوشه في جهة ثانية ! و تواصل أخوي بوقتها مع إدارة آوبر ، و رجعوا له قيمة المشوار و حطوا له مبلغ زيادة في حسابه نفس قيمة المشوار وَ شالوا السواق من البرنامج وَ الشرطة حررت للسواق مخالفة لترهيب السيّاح و مدري وش سوو فيه بعد ! و اعتذروا الشرطة من أخوي لتصرف السواق .. رجع أخوي و سوّاله قهوة دريب و قطرها على روقان و روّق ، و قالنا السالفة من بكرة عشان أمي ما تنهبل ..
قلنا لأخوي المفروض نزلت و خلاص ! قال قهرني ، و بنقهر لو ما أخذت حقي ! يقول لو معي وحدة منكم كان نزلت من السيارة و اشتكيت عادي و انتهى الموضوع و طلبت سيارة ثانية !
حنّا سكتنا و ما ناقشناه ، لأن أخوي هادي جداً و ما شاء الله تبارك الله عليه طولة بال تقتلنا حنّا ! فعارفين إذا رد هالمرة أكيد إنه السواق منرفزه و متعدّي حدوده و قاهره ! فـيستاهل السواق .. و يصير يأدبـه لباقي السيّاح مستقبلاً .

و اللحين بنزل صور للقرية الفرنسية بشكل سريع و مبسط .. بدايةً القرية أفتتحت عام 2008 ، عبارة عن قرية فرنسية و الشخصية الكرتونية للقرية هي شخصية الأمير الصغير (‏ هي رواية صغيرة للكاتب الفرنسي أنطوان دو سانت إكزوبيري ) .. فيها فندق ، و كذلك فيه عروض حيّة على المسرح .. رسوم الدخول للأطفال 9900 وون كوري ( 38 ريال ) و الكبار 18900 (71 ريال ) .

و الله يا كميّة صور حطيتها لكم ربي يعيينكم بس تحسفتبهم و حطيت لكم منهن شوي
و شكل ما باقي لنا إلا شـوي من غير شر

AL Tunaiji, توبليرون, ملاك و 5 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ام حسين في باريس 2022	توبليرون	بوابة فرنسا	234	17-09-2022 01:02 AM
إسطنبول Jul 2022	احمد ال مقبل	بوابة تركيا	72	23-07-2022 04:08 PM
عدد من الأسئلة السريعة -USA May 2022	Fahad2021	بوابة امريكا	16	12-04-2022 01:05 AM