رحلتي السياحية الى الولايات المتحدة الأمريكية يونيو 2023م

ابو لانا · 10-09-2023, 02:02 PM

أورلاندو

(اليوم الرابع)

الجدول:

- ديزني Animal Kingdom

في البداية أشكر الإخوة والأخوات الكرام جميعاً بلا استثناء على تفاعلهم وكلامهم الطيب

اليوم السابق كان يوم خفيف ومافيه مجهود بدني وهذا الهدف علشان نكون مستعدين لليوم الرابع يوم ديزني ديزني Animal Kingdom....

بختصر لكم تحت قائمة بكل مكان في Animal Kingdom:

رابط خريطة باركات ديزني التفاعلية كاملة:
https://disneyworld.disney.go.com/attractions/#/

الأقسام والأماكن:

(Oasis)
- شوف الحيوانات يمين ويسار

(Discovery Island)
- Wilderness Explorers احواض ماء وحيوانات
- It's Tough to be a Bug! عرض مسرحي ثلاثي الأبعاد ضرووووري تدخلوه
- Meet Moana at Character Landing قابل موانا
- Tree of life شجرة الحياة الكبيرة تشوفها من بعيد وحوالينها حيوانات

(Africa)
- Tam Tam Drummers of Harambe عرض الطبول بالساحة العامة
- Festival of the Lion King عرض ضرووووري تدخلوه
- kilimanjaro safari جولة سفاري ضروووري تدخلوه
- Gorilla falls exploration trail ممشى فيه حيوانات ومن ضمنها الغوريلا
- Rafiqi's planet watch جزيرة تروح لها بالقطار حلوه Wildlife Express Train

(Asia)
- Feathered Friends in Flight! عرض طيور ضروري تدخلوه
- Kali River Rapids القارب المائي المدور ضرووري تدخلوه
- Expedition Everest - Legend of the Forbidden Mountain قطار قمة افرست ضروووري بس تدخلوه

(Dinoland)
- Finding Nemo: The Big Blue... and Beyond! عرض نيمو ضرووري تدخلوه
- The Boneyard منطقة العاب اطفال بايخة
- DINOSAUR عربة تمشي للعائلة حلوه

(Pandora)
- Na'vi River Journey قارب يمشي حلو للعائلة
- Avatar Flight of Passage ضروووري تدخلوه لايفوتكم

المطاعم حسب المناطق:

(Discovery Island)
- The Smiling Crocodile تاكوز 10 دولار
- Pizzafari بيتزا ووجبات اطفال رخيص

(Africa)
- Tamu Tamu Refreshments حلويات وكوكيز وايسكريم

(Asia)
- Mr Kamal's عربي فلافل وبطاطس

(Dinoland)
- Restaurantosaurus برجر ونجتس ونقانق 12 دولار
- Dino-Bite Snacks حلويات وكوكيز على كيف كيفك

صحينا من النوم جاهزين ومتحمسين ومثل ماوعدت الاميرات اننا بنفطر في مكان حلو اللي هو IHOP المعروف وكان قريب من الفندق, وصلنا وكانت الأجواء رايقة وهادية وطلبنا هذي الطلبات

الكل مبسوط

الحساب طلع 70$ + بقشيش للرجل الطيب هذا اللي خدمنا من قلبه وكان طول الوقت مبتسم هذا غير ان سنه كبير وانا اقدر واحترم كبار السن لهم معزه خاصة ويدخلون القلب بسرعة, وشي ثاني كان يقول لي لي I will make sure there will be no bacon يعني فوق ماهو طيب ومحترم يقول مابحط لكم bacon يعني فاهم بدون كلام, استأذنت منه اني احط صورته ووافق بكل حب اسمه DAN اذا رحتو هناك اكرموه يستاهل

بعد الفطور الطيب ولله الحمد وقبل التوجه لوجهتنا دخلت تطبيق ديزني واشتريت خدمة Genie+ للجميع وكانت ارخص من Magic Kingdom تقريباً بنص السعر لأنها بالعادة مو مزحومة, وصلنا المواقف وكانت واسعة وقريبة من بوابة الدخول, صورنا الموقف ورحنا لقطار التوصيل

وصلنا بوابة الدخول بسرعة وديزني قبل فترة محتفلين بمرور 100 سنة والشعار مازاال موجود

اول ماتدخل تلقى قدامك شجرة الحياة Tree of life ولابد من صورة عندها

طلعنا التذاكر وبصمنا ودخلنا, و اول ماتبصم دخول خلاص خدمة Genie+ تشتغل معاك لأنها مربوطة بدخولك, فتحت التطبيق وبديت احجز الالعاب بحسب المتوفر بس هذي المره مابغلط غلطة Magic Kingdom يعني الالعاب المزحومة بحجزها وبدخلها بغض النظر عن انها قريبة او بعيدة اهم شي يكون فرق الوقت نص ساعة بالكثير وبديت اشوف المتوفر واحجز ومثل ماهو واضح بالصورة اخترت Kali River Rapids القارب المائي المدور حلو وممتع وبتتسبحون كلكم

كان في عليها طابور لكن بالحجز دخلنا مباشرة

كل ماتدخل لعبة ادخل التطبيق واحجز اللعبة اللي بعدها عشان تلحق فتحت التطبيق ولقيت متوفر حجز رحلة السفاري kilimanjaro safari هذي الرحلة ضروري تدخلونها ممتعة جداً وكانت مزحومة بس بالحجز دخلنا دايركت

يمينك ويسارك حيوانات ومنظار تفتح النفس

خلصنا الرحلة الجميلة وبالطريق لقينا Kevin الطير المشهور من فلم Up ولقطنا كم صورة

مشروبات لزوم الجو

بعدها دخلت التطبيق وحجزت عرض نيمو Finding Nemo: The Big Blue... and Beyond! العرض جداً جميل

بعد العرض الجميل توجهنا لمنطقة Discovery Island عشان ندخل عرض Festival of the Lion King هذا العرض يرجعك 20 سنة ولأجمل الأيام طول الوقت قاعد اغني معاهم

بعد العرض الرهيب حجزت قطار Expedition Everest - Legend of the Forbidden Mountain يعتبر من الألعاب القوية اللي الاطفال يخافون منها لكن قدرت اقنع الشيخة نور تدخل لأن الباقي مجانين مثلي ماعندهم مانع ركبنا وللأسف الشديد كان قرار خاطيء نور خافت كثير وكنت ماسكها طول الوقت واحاول انسيها اللعبة لحد ماوقفت ونور المسكينة كانت تبكي وخايفة, صالحناها وراضيناها ووعدناها ماندخلها العاب تخوف

وهذي صورة لي مع نور في الللعبة

وهذي نور بعد ماراضيناها

وانت ماشي تلقى حيوانات في كل مكان

بعدها حجزنا لعبة DINOSAUR عربة تمشي وديناصورات حلوة وهذي صورة لنا, ملاحظة: اذا اشتريت خدمة Genie+ اي صورة يصوروك داخل اللعبة تقدر تتوجه للكاونتر بعد اللعبة ويحطوها لك في التطبيق بحسابك وتحملها لجوالك طبعاً الناس عارفين ان اللعبة بتصورهم

بعدها توجهنا الى منطقة Pandora الخيالية مناظر رهيبة

حجزنا في منطقة Pandora لعبة Na'vi River Journey عربة تمشي ومناظر حولك تستحق التجربة

بعدها حاولت القى حجز لعبة Avatar Flight of Passage لكن للأسف الشديد كانت جداً مزحومة ومافي لها حجز في فقط دفع فلوس او تصف طابور, وبما أن العيال كان فيهم شدة قالة يابابا عادي ندخل وننتظر بالطابور وفعلاً دخلنا والحمد لله ان الانتظار مو في الشمس وكان المكان مكيف وانتظرنا تقريباً ساعة الى ان جاء دورنا والحقيقة كانت فعلاً تستحق الإنتظار ومن اجمل الالعاب اللي لعبتها وهي 4D شي خيال وابداع جربوها .

طبعاً احنا لعبنا العاب كثير من القائمة ودخلنا عروض وختمنا تقريباً كل شي وكان الوقت تقريباً العصر, طلعنا وتغدينا وريحنا بالمنتجع شوي وانا وام لانا كالعادة اذا في وقت مانحب نقعد واكن جنب المنتجع القرية القديمة Old Town ماتحتاج سيارة نروح لها مشي, المدينة القديمة عبارة عن محلات ومظاعم ومقاهي والعاب لكن بالطراز القديم وكل شي هناك قديم بس الأكل مايناسبنا ابداً كله Bacon ويمينك ويسارك كحول وبيره فالمكان فقط للتمشية وشراء الهدايا الصغيرة متوفرة هناك بكثرة. وصلنا وكانو مسويين مسيرة للسيارات القديمة المكان كان مزحوم عالآخر وهذي كم صورة

بعدها رجعنا المنتجع وانتهى يومنا الرابع, انتظروني مع اليوم الخامس وخلوكم قريبين ...

أخوكم/ أبو لانا

الايمان, q8ya metnaqla و توبليرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
هل سبق وزرت الولايات المتحدة	non91	فيزا امريكا	2	16-02-2022 09:32 AM
شرح طريقة حجز شقق فندقية بالصور في الولايات المتحدة الأمريكية	العنان	بوابة امريكا	22	01-09-2019 11:16 PM
تنبيه لزائري الولايات المتحدة	Well Done	بوابة امريكا	25	01-09-2018 05:49 PM
رحلتي السريعة الى الولايات المتحدة الامريكية	ek201	بوابة امريكا	11	03-06-2018 11:09 PM
تنبية للمسافرين إلى الولايات المتحدة الأمريكية (سياحة أو دراسة)	ابو ناصر المسافر	بوابة امريكا	28	10-04-2017 11:15 PM