22-06-2023, 04:30 PM
|
#1 |
مسافر متميز
تاريخ التسجيل : Jan 2015 رقم العضوية : 996 الجنس : ذكر المشاركات : 122
|  رحلتي السياحية الى الولايات المتحدة الأمريكية يونيو 2023م
الإخوة والأخوات الأعزاء أعضاء منتديات العرب المسافرون جميعاً بدون استثناء، السلام عليكم ورحمة الله وبركاته،،،
معاكم أبو لانا يمني مقيم في المملكة العربية السعودية الأرض الطاهرة الغالية على قلوبنا جميعاً وأهلها الطيبين الغاليين, وعضو مميز سابقاً في منتدى العرب المسافرون القديم, وقبل كل شي اشكر الله عز وجل الذي رزقني من فضله واعانني على هذه الرحلة الجميلة فلله الفضل والمنه والشكر على كل شيء ثم للمملكة الغالية ثم لزوجتي ورفيقة دربي أم لانا اللي كانت سندي في هذه الرحلة ثم الشكر لأعضاء هذا المنتدى الغالي اللي هيضوني للسفر بمواضيعهم الجميلة والرائعة, ولله الحمد والمنة وصل عمري الآن 40 سنة:
بسم الله الرحمن الرحيم ﴿فَتَبَسَّمَ ضَاحِكًا مِّن قَوْلِهَا وَقَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ أَعْمَلَ صَالِحًا تَرْضَاهُ وَأَدْخِلْنِي بِرَحْمَتِكَ فِي عِبَادِكَ الصَّالِحِينَ ﴿19﴾ ﴾ [النمل آية:19, الله يحفظنا ويحفظكم جميعاً.
بالبداية تدرون ان الصيف قرب وان معظم الناس قامو يخططون للسفر وكل واحد قام يخطط ويقدم طلب اجازه عند مديره من بدري 😊 وأنا وأم لانا سبق لنا زيارة أمريكا في مايو 2013م وكانت رحلة من الأحلام ونجاح رحلتي السابقة كانت بفضل الله ثم بفضل الأعضاء بالمنتدى القديم والتقارير اللي ترد الروح والحمد لله حصل تقريري القديم لرحلة أمريكا في 2013م على جائزة افضل تقرير وهذا اعلان أسماء الفائزين واسمي mmmr240:
وهذي صورة حصرية لكم محتفظ فيها للذكرى وهو خبر اغلاق منتديات مكتوب ومن ضمنها منتدى العرب المسافرون:
ولا انسى الزملاء في المنتدى القديم مازلت أذكر أسمائهم إلى الآن وهم: الأخ العزيز الغالي فيصل مدير المنتدى والأخ IMPACT الغني عن التعريف مشرف الولايات المتحدة الأمريكية والأخ المبدع أبو سعودQ8 من دولة الكويت الشقيقة والأخ سعود بن محمد والأخ aziz20012001 و الأخ شكبم والأخ kakashi9 والاخ عادل الردادي والأخت سوسو الصغيرة والأخ Usas والأخت -ريانة دهن العود- والأخ أسامه أحمد والأخ عاشق الخالد والأخت قطرية كول مميزة بريطانيا والأخ بورمث والأخ بن كارترايت والأخ ولد الديرة 2008 والأخ بقايا ليل والأخ أبو معاذ العمري والأخ Al Osaimi والاخ الانسياب المتزن عميد بوابة أوروبا والأخت ام عزيـــز والعضو القدير الغردقاوي
ارجو من اللي ذكرت اسمائهم اذا كانو موجودين حالياً ياليت يكتب لنا في الردود او اذا عندكم خبر عنهم ياليت تبلغونا لأننا كنا مثل الأهل وعائلة واحدة يجمعنا حب السفر.
وفي هذا المنتدى الغالي ما انسى حبايب القلب واخص بالذكر شيخ المنتدى وشيخ بوابة أمريكا الأخ الغالي Abu Muataz و um Muataz و مراقبتنا الكبيرة q8ya metnaqla ومديرتنا الكبيرة توبليرون وحبيب الشعب وملح المنتدى و الــ CEO للمنتدى أخونا الغالي آخر فرصة والأخت الايمان والاخ المراقب بن قوت
اللي ابدعو بمواضيعهم صراحة ولا يهونون باقي الأعضاء.
كيف قررت اسافر أمريكا هذي السنة؟
كنت اقلب في صور رحلة أمريكا القديمة والفيديوهات وشاش راسي وحنيت اروح لها مرة ثانية لأن المرة الماضية ماأخذت بناتي الله يحفظهم رحت أنا وأم لانا لحالنا, بناتي ودهم يروحون أمريكا ويشوفون بلاد العم سام, فقلت يابو لانا لازم تقدم على الفيزا من بدري قبل الزحمة وتشوف نصيبك اذا جات الموافقة على التأشيرة كان بها وإن ماجات شفنا لنا دولة ثانية, وبعد استشارة زوجتي ام لانا فديتها وفديت اهلها ماقصرت صراحة لقيتها متحمسة وحبيت اشارككم تجربتي خطوة بخطوة.
احدثكم الآن وأنا قاعد أجهز الشناط مع عيالي وبإذن الله بنزل لكم تقرير عن رحلتي بالكامل وبالتفصيل من الألف إلى الياء:
جهزوا البيبسي والشاي والفشار والمكسرات لأن التقرير شوي دسم وبتكلم فيه كثير وبسرد لكم الرحلة كاملة مع نصائح ومعلومات تهم المسافر لأول مرة إلى أمريكا وكيفية التجهيز للسفر والتقديم للتأشيرة وحجز التذاكر والفنادق والسيارة الى الوصول والعودة بإذن الله فبسم الله نبدأ:
التقديم على التأشيرة
هنا حطيت لكم موضوع عن تجربتي في استخراج فيزا أمريكا:
مقيم يمني وعائلته وتجربتنا في استخراج فيزا سياحية لأمريكا
https://www.arabtrvl.com/vb/t52353.html
مدة الرحلة
15 يوم – يوم السفر ويوم العودة مايحسب لأنك بتوصل تنخمد على خشتك ومالك خلق تروح اي مكان
تاريخ السفر
من 24/06/2023م إلى 09/07/2023م
الوجهة
4 ليالي نيويورك و 11 ليلة اورلاندو
معلومات هامة عن أمريكا:
الإنترنت
الإنترنت في امريكا سريع وكل شي مفتوح جميع المواقع مفتوحة فإنتبهو وعلموا عيالكم وأهلكم وخلوهم ينتبهون اذا بغو يستخدمون النت.
شرائح الجوال
تقدر تشتريها من المطار بتلقون مكاتب لشركة AT & T وT.Mobile قيمتها 40 دولار لـ 28 يوم وعندهم نظام شريحة الكترونية E-Sim تريحك من سالفة الشرايح, انا عن نفسي مابشتري شريحة وبفعل باقة التجوال الدولي من STC فيها نت واتصال لمدة أسبوعين قيمتها 300 ريال عشان الشغل اصير اقدر اتصل للسعودية واستقبل بأسعار ممتازة و تفاصيل الأسعار تلقونها في تطبيق الشركة نفسه سواء STC او موبايلي أو زين وغيرها من الشركات.
الحياة الإجتماعية
شعب امريكا طيب جداً للأمانة بغض النظر عن أي شيء لكنها دولة متفتحة جداً يعني ممكن في اي لحظة تلقى منظر قدامك غير مألوف لك مثل حضن وبوس سواءً في الشارع او المطعم او الباص او الملاهي خصوصاً اورلاندو لأنها ملتقى السياح يعني في اي مكان ولا تقول والله مادريت انهم كذا وكلن في حالة هناك مالهم شغل في احد – اعذروني على الصراحة لكن علشان يستفيد الجميع.
نصيحة من القلب
ياغريب كن أديب, لاتتدخل بأي شي تشوفه سواءً جيد او سيء او سياسي او أي معتقدات دينية عندهم, وتذكر انت رايح عندهم وموافق على شروطهم وقوانينهم فألتزم بالقانون وانت رايح سياحة فقط فخليك في السياحة ياعسل 😊
النقاب والحجاب في امريكا
النقاب في امريكا عادي جداً ولقيت منقبات ومحجبات كثير لكن المشكلة الوحيدة ان النقاب يلفت الأنظار بشكل غير طبيعي وتلقى العالم كلهم يناظرون في المنقبة وكأنها معلم سياحي وتلقاهم يحاولون يصورونها لأن بعضهم اول مرة يشوف النقاب على الطبيعة. اما بالنسبة للحجاب فهو ممتاز مع لبس نظارة شمسية كبيرة وكمامة واموركم بتكون تمام التمام وماراح تلقى احد يناظر فيك والحمد لله امريكا ملياااااانه محجبات وفي الأول والأخير القرار لك سواءً نقاب أو حجاب.
نظرتهم للمحجبة
بصراحة قمة الاحترام والتقدير للمحجبات احرجوني بأخلاقهم ودايما مبتسمين لنا بكل احترام.
تفصيل العباية المناسبة لأمريكا
انصح بتفصيل عباية لأخواتي المسافرات تكون خفيفة وتقدرون تطبعون صور من النت وتودونهم للخياط يفصلها لكم, وهذي صور عبايات من النت:
البقشيش في امريكا
الصورة هذي تشرح لكم كيف تعطيهم بقشيش:
الميزانية
تختلف من شخص لشخص في ناس مقتدرين وفي ناس وضعهم المادي متوسط ونصيحتي للجميع اذا تبغى تنبسط وتستانس زود الميزانية شوي خصوصاً اذا معك عائلة وأطفال لأنك بالأول والأخير رايح تستانس وتنبسط انت وعيالك فلا تبخل على نفسك ولكن بالمعقول.
المصروف اليومي
300 دولار من باب الاحتياط لأن عددنا 4 واعتقد ان هذا المبلغ كثير كمصروف يومي لكن هذا الاحتياط والمتبقي يرحل لليوم اللي بعده, وعندي ملاحظة اني دايماً اذا سافرت ومعي دولارات ارجع من السفر وباقي في جيبي تقريباً 2500 دولار 😊 مااصرفها اخبيها للسفرة الجاية وانساها 😊 اجي وقت السفر القى عندي 2500 دولار على جنب ياسلام 😊
تذاكر الطيران
الذهاب: (على الخطوط التركية) من الدمام إلى إسطنبول 4 ساعات وربع + ساعتين انتظار في مطار اسطنبول + 11 ساعة من إسطنبول إلى نيويورك مطار JFK
العودة: (على الخطوط الإماراتية) من اورلاندو الى دبي 14 ساعة متواصلة + انتظار ساعتين في مطار دبي + ساعة ونص من دبي الى الدمام
نصيحة: يفضل لما تحجز تذاكر انك تخلي فترة الانتظار لاتقل عن ساعتين من باب الاحتياط لاقدر الله اذا كان المطار زحمة والبوابة قد تكون بعيدة خصوصاً للي مسافرين ترانزيت على اكثر من خطوط فيكون عندك وقت كافي تلحق على الرحلة وانت مرتاح
الطيران الداخلي
عن طريق خطوط دلتا Delta من نيويورك الى اورلاندو مدة الرحلة 3 ساعات
حجز السيارة
استأجرت سيارة من مطار اولاندو عن طريق Booking من شركة Dollar طلع علي سعرها 2146 ريال لمدة 12 يوم (أبو معتز الغالي عطاني نصايح بخصوص اجار السيارة لكن تأخرت وكان المفروض أستشيره قبلها بوقت كافي, بسرد لكم تجربتي معاهم لما نوصل بالسلامة ان شاء الله وايش التأمين والأشياء اللي ضفتها للسعر)
حجز الفنادق
نيويورك – 4 ليالي في فندق New York Marriott Marquis في وسط التايمز سكوير يعني من الآخر كل شي جنبك ومطل على التايمز 😊 وهذا عنوانهم
https://goo.gl/maps/u9uLip9sLNue5Rdk7
وهذا موقع الفندق في نص التايمز:
حط في بالك ان فيه رسوم إضافية وضرائب لكل ليلة غير اللي مكتوب بسعر الفندق يعني احنا علينا يومياً 30 دولار في 4 أيام = 120 دولار.
اورلاندو – 11 ليلة في منتجع Regal Oaks IDILIQ Hotels & Resorts وهذا عنوانهم
https://goo.gl/maps/FyMXS3zq4yg3dEVE9
وهذا المنتجع سالفته سالفه وعنده رسوم غير عن نيويورك ضروري تشيكون على التفاصيل قبل الحجز وأكثر الناس تنصدم لما توصل المنتجع انهم يطلبون منهم مبالغ مايدرون عنها وهذي التفاصيل للرسوم اللي بندفعها غير عن سعر الحجز:
- تأمين 200 دولار للتلفيات مسترجع وقت الخروج.
- رسوم التنظيف 100 دولار لمدة الإقامة كاملة.
- رسوم استخدام مرافق المنتجع 27 دولار في الليلة لمدة 11 يوم = 297 دولار وتشمل التالي:
* المسبح
* الجاكوزي
* مناشف سباحة
* الجيم
* النادي الصحي
* منطقة العاب الأطفال والآركيد
* مركز الاعمال (ورق/كمبيوتر/نت/اتصال)
* صندوق امانات بالغرفة
* القهوة اللي بالغرفة
* خدمة Concierge يعني مساعدتك وارشادك لو بغيت تحجز او تسأل عن أنشطة سياحية
* منطقة غسيل ملابس (طبعاً بفلوس مش ببلاش)
يعني مثل ماانتم شايفين خدمات يفترض انها مشمولة مجاناً لكن هذي قوانينهم.
التجهيز للسفر
- ارسل صورة من الجوازات مع التأشيرات إلى ايميلك الخاص لأنك بتحتاجهم اذا ضيعت الجوازات لا قدر الله.
- احرص يكون معاك بطاقة فيزا لأنها مهمة جداً لحجوزات التذاكر والفنادق وإيجار السيارة, وتكون من النوع اللي الأرقام فيها بارزة مش مطبوعة.
- لازم تجيب معاك رخصة القيادة السعودية.
- بالنسبة للعزبة لا تجيب معك رز أو اندومي أو سوائل ممنوع واخذوهم علينا بالمطار والخضار و الفواكه لو جبتها وشافوها مخيسة او فيها عفن ياويلك ويلاه عليها غرامات مالية باختصار جيب معك معلبات فقط سواءً بهارات أو أكل لازم يكون معلب وما يكون مفتوح وبتتسهل امورك.
- حول لك مبلغ 2000 دولار كاش (مو كل الأماكن في أمريكا عندهم ابل باي او جوجل باي).
- بطاقة فيزا يكون فيها مبلغ طيب للاحتياط.
- اذا وصلت نيويورك اشتري مظلة من البائعين بالشارع او من المحلات ضرورية جداً للمطر والشمس.
- اشتري لك جوتي رياضي اكرمكم الله لأنك بتمشي مشي مو طبيعي.
- أدوية بسيطة = حرارة, كحة, كريم شمس, بندول اكسترا, بخاخ للأنف.
- ملابس شتوية وصيفية.
- سجادة صلاة.
- احرص انك محمل تطبيق STCPay او MobilyPay او غيره للاحتياط لاقدر الله احتجت فلوس تقدر تحول لنفسك حوالة دولية وتستلمها بنفسك 😊 عن طريق Western Union وهذي فروعهم في نيويورك مانهاتن كثير جداً يعني امورك ان شاء الله في السليم:
- حمل تطبيقات التوصيل مثل Uber و Lyft عشان المواصلات اذا احتجها, انا بالنسبة لي ضبطت اموري في المواصلات بطريقة مريحة بشرحها لكم بالتقرير.
- جيبو معاكم أفياش وشواحن وهذي منافذ و افياش أمريكا:
بالنسبة لتقرير الرحلة أحتاج تفيدوني هل يناسبكم أنزل التقرير على شكل يوميات أو مرة وحدة لما ارجع اجهز كل شي واسرده لكم بالكامل؟ أفيدوني ... نقطة أخيرة وماأدري هل مسموح في المنتدى أو لأ, هل مسموح أشارك سنابي للي حاب يتابعني في الرحلة بنزل فيه نصايح ويوميات في أمريكا... أخوكم/ أبو لانا.
|
|  |
293الاعجاب
العرض العادي
المواضيع المتشابهه 
