عدنا والعود أحمد 😊
السلام عليكم ورحمة الله وبركاته, رجعنا بحمد الله ورعايته إلى أرض المملكة الغالية وكانت رحلة ناجحة بكل المقاييس والشكر لله ثم لكم.
بالبداية أشكر كل الأعضاء على ردودهم الجميلة اسعدتوني الله يسعدكم
بكمل معاكم كتابة التقرير على دفعات حسب الوقت وارجو المعذرة منكم...
يوم السفر 
طبعاً احنا عددنا 4 وقبل السفر كنت متفق مع أم لانا نآخذ 4 شناط صغيرة بعددنا اللي مسموح تدخل للطيارة بحيث نوفر وقت وجهد في انتظار الشناط توصل والطوابير والزحمة وغيره, كنت مخطط اننا نكون خفيفين ومن أمريكا نشتري شنطة او شنطتين كبار ونعبيها أغراض وهدايا من هناك, لكن الخطة فشلت وأم لانا أصرت اننا ناخذ شنطة كبيرة شحن لان اغراضنا كثير ☹ فقلت اوك خلاص تم.
جهزنا الشناط وكنا مستعدين والرحلة كانت يوم السبت 24/06/2023م الساعة 1 الصبح يعني من يوم الجمعة بالليل بنكون بالمطار من قبل الرحلة بـ 5 ساعات من باب الاحتياط.
وبما ان الرحلة عن طريق الخطوط التركية سبحان الله قلبي ماكان مطمن وكنت أقول هل كيمنيين نحتاج فيزا لدخول تركيا واحنا رايحين ترانزيت ساعتين ؟!؟! انا طبعاً رحت مكتب الخطوط التركية بنفسي مرتين وسألتهم قالو اذا عندك تأشيرة أمريكا سارية امورك طيبة ماتحتاج, لكن أبو لانا حريص وسبحان الله فتحت اللابتوب يوم الجمعة عشان اصدر البوردنغ ودخلت موقع الخطوط التركية وبديت اعبي البيانات وطلب مني معلومات تأشيرة أمريكا وطلب معلومات تأشيرة تركيا؟!؟!؟! حاولت اعدي هذا الخيار ماقدرت ضروري اعبيه, ومن هنا نغزني قلبي وقلت يابو لانا شكل التأشيرة التركية مطلوبة ☹ والرحلة تعتبر الليلة 1 الصبح ☹ قلت بسم الله ودخلت الموقع الرسمي لتأشيرة تركيا
www.evisa.gov.tr واخترت
Apply Now:
واتبعت الخطوات وعبيت البيانات لي وللعائلة وقيمة التأشيرة اونلاين للشخص 60$ الواحد, وهذي الشروط الواجب توفرها عشان تقدر تأخذ تأشيرة تركيا أونلاين:
لاحظ هذا الشرط اللي انا محدده (ضروري يكون معاك إقامة او تأشيرة سارية في دول الشنقن او في أمريكا أو بريطانية أو أيرلندا) فتوكلت على الله وسويتها ودفعت وفي نفس اللحظة وصلتني التأشيرات 😊 كذا أنا ارتحت 😊 صحيح اني خسرت 900 ريال قيمة التأشيرات لكن ماني مستعد اخرب الرحلة كلها عشان خطا بسيط.
رجعت للموقع اعبي بيانات التأشيرة عشان اطلع البوردنغ وتمت العملية ولكن بالاخير قالي
Error توجه الى الكاونتر بالمطار لاصدار البوردنغ...
توجهنا مطار الملك فهد الدولي بالدمام قبل الرحلة بـ 5 ساعات وكان فل فل فل مليان عالآخر ماشاء الله في عز موسم السفر, كاونتر البوردنغ يفتح قبل الرحلة بـ 3 ساعات ماقدرت اطلعها أونلاين, خلصنا الإجراءات والزحمة وانتظرنا الكاونتر يفتح, فتح الكاونتر والحمد لله الخطوط التركية ماكان عليها زحمة مثل باقي الخطوط, لما جاء دورنا الموظفة اخذت الجوازات وقالت لي وين مسافرين؟ قلت أمريكا, قالت وريني التأشيرة, وريتها وقالت عندك تأشيرة لتركيا؟؟؟؟ انا هنا ابتسمت وقلت نعم عندي 😊 😊 😊 قالت وريني ووريتها, سألتها وقلت لها هل ضروري تأشيرة لتركيا واحنا بس ترانزيت؟! قالت نعم للجنسية اليمنية والمصرية والسورية والسودانية ضروري تكون معاك تأشيرتين !!!! انا قلت الحمد لله اني ماصدقت المكتب واخذتها احتياط 😊 قلت لها ترى رحت مكتب الخطوط وقالي عادي؟ّ قالت الجنسية اليمنية من قبل أسبوعين جانا التعميم بضرورة الحصول على التأشيرة التركية حتى لو عندك أمريكية!!! قلت شكراً جزيلا يعني جاء القرار بعد ماسألت الخطوط التركية ☹ يعجبكم أبو لانا حريص 😊 الحمد لله خلصنا امورنا وحطينا الشنطة الكبيرة مع شنطة صغيرة والباقي معانا بالطيارة.
ملاحظة: هنا فايدة انك تروح المطار قبل الرحلة بـ 5 الى 6 ساعات تحسباً لأي مشكلة تواجهك يكون عندك وقت تصدر تأشيرات وتحل مشاكلك قبل الإقلاع.
خلصنا الجوازات وختمنا وتوجهنا لبوابة الصعود, طبعاً باقي على الرحلة 3 ساعات تقريباً وانا عندي قاعدة اذا عيالي معي ضروري ادخل اللاونج وسألت هناك قالو مافي بالصالة الدولية الا لاونج واحد اسمه
(Plaza Premium Lounge بلازا بريميوم لاونج) رحت هناك وللأسف بطاقتي الفيزا مافيها خدمة
LoungeKey حق صالات المطارات فأضطريت أدفع وكنت حاسب حسابي لذا الشي, قيمة الشخص 120 ريال. دخلنا وريحنا وكان مزحوم صراحة لكن الحمد لله لقينا مكان مريح وريحنا واكلنا من البوفيه اكل خفيف وتقهوينا وجاء موعد الرحلة وانطلقنا بحفظ الله ورعايته.
تقييمي للاونج 6 من 10 بين الجيد والجيد جداً وهذي الصور اللي لقطناها:
كنا متوقعين ان الخطوط التركية بتكون فاضية وكل واحد يأخذ اكثر من كرسي وينام براحته لكن العكس صحيح ماشاء الله الرحلة فل ولا كرسي فاضي ☹ وصلنا مطار إسطنبول بالسلامة وتوجهنا للرحلات المواصلة عشان نلحق على رحلتنا والترانزيت مدته ساعتين تقريباً وصراحة كانت شوي بعيدة ومشينا كثير لين وصلنا ولقيت شاشة الرحلات صورتها بسرعة عشان نلحق وقلت بقراها واحنا ماشيين شوفو كمية الرحلات تقول طلاسم مايمديك تلقاها:
بعد مامشينا مسافة طويلة وصلنا للبوابة وصراحة المطار حلو لكن حر حر كأن المكيف طافي ؟! رحنا للبوابة كان فيه تفتيش فتشونا انا والبنات وكانت الريحة مااحكيكم اكرمكم الله مو قصد من شي او إهانة لا والله لكن الموظفين والحر مافي تكييف فكانت ريحتهم وهم يفتشونا صنننة تصن راسك مؤذية جداً لاتليق بموظفين مطار وأتمنى ماحد يزعل مني, المهم خلصنا ورحنا نبغى نجلس ننتظر مع الناس بالكراسي قدام البوابة لكن للأسف كل واحد حاجز اربع كراسي ونايم حتى النساء كلهم نايمين على اربع كراسي, طيب واحنا وين نقعد مع عيالنا؟! لقينا كراسي شوي بعيدة قلت تعالو نروح هناك .... البنات يبون دورة مياه الله يكرمكم وكانت جنبنا بعد البوابة كلمنا الموظف ورفض قال لااااااا لازم ترجع وتروح مكان ماجيت وتلقى دورات المياه هناك واذا رجعت للبوابة هنا ترى بنفتشكم من جديد ؟!؟! انا قلت للعيال باقي نص ساعة ونطير تتحملو؟ قالو ايه نتحمل ولا نعيد نفس الإجراءات مرة ثانية... ابشركم لقينا كراسي اخيراً وجاء موعد الرحلة وانطلقنا بحفظ الله ورعايته وكذلك هذي الرحلة كل الركاب اتراك فل فل فل ولا كرسي فاضي ☹
بعد رحلة طويلة وطفش الوقت طويييل وصلنا بالسلامة مطار
JFK ولما وصلنا حصل لنا موقف, لما جينا ننزل من الطيارة استأذنت من اللي على يساري اني اطلع من قدامه انا وعايلتي لأننا في اربع كراسي مع بعض وقال تفضل, طلعت انا الأول واخذت الشنطة ومشيت على بالي عيالي وراي بيلحقوني الا ام لانا تناديني وتقول وقف وقف الرجال ماسمحلي امشي ؟!؟!؟! انا وقفت وانتظرت وخليت نفس الرجال اللي استأذنت منه يعديني وجات ام لانا عندي والعيال وطلعنا سوى وقلت لها ايش فيه؟؟ ليش مالحقتيني ؟! قالت اللي استاذنت منه مارضى قام ينافخ عليها ويقول نون و نو ؟!؟! يعني انا مستأذن منك طيب وانت وافقت تقوم تمشيني وعيالي لأ ؟!؟! حزت بخاطر ام لانا المسكينة وطول الوقت زعلانه منه قلت لها ولا يهمك مو كل اصابعك سوى ولا تخلي شي يعكر علينا الرحلة 😊 واحمدي ربك على نعمة العرب والإسلام والمسلمين ونعمة السعودية والخليج والله ماتلقي اطيب منهم ولا أطيب من العرب😊 الله اكرمنا بالإسلام.
ملاحظة: انا وام لانا مازرنا تركيا قبل وكنا مخططين نروح لها لكن بعد الموقف اللي حصل بالمطار من الكراسي المزحومة وريحة التفتيش ودورة المياه اللي ممنوع تستخدمها واللي مايتسمى بالطيارة ماخلانا نمشي, خلاص قررنا نكنسل السفر الى تركيا نهائياً حتى الخطوط التركية بنحاول نتجنبها لأن الكتاب واضح من عنوانه...
المهم نزلنا مطار JFK بعد رحلة طويلة والصدمة كان طابور الجوازات فل فل فل ماعدا مواطنين ومقيمين أمريكا وكندا لهم طابور لحالهم, ونوقف بالطابور ساعة ونص ☹ ☹ فوق التعب تعب ☹ ☹ وصلنا وختم جوازات العيال وسألني كم سؤال وقالي خلي عيالك يروحون يستلمون العفش وانت الحقني للمكتب ☹ انا طبعاً متوقع هذا الشي لأن تأشيرتي فيها نجمتين تحت (**) هذي علامة يحطونها بالتأشيرات اللي عنده نجمه * اموره طيبة واللي نجمتين ** تدقيق اكثر واللي 3 نجوم *** تدقيق وتفتيش واكثر.
دخلت المكتب وكان فيه تقريباً 8 اشخاص منتظرين معي واحد سعودي والباقي عرب ومن جنسيات مختلفة حتى امريكان موجودين, انلطعت نص ساعة وام لانا ترسل لي مسجات (انا مفعل التجوال لي وللعيال 😊
تقول وش فيه؟ قلت لها لاتخافي إجراءات عادية اخلص واجيكم خذو الشناط واستريحو... جا دوري ناداني موظف اسمراني طيب وحبيب وداني داخل مكتب وقفل وقدمه كمبيوتر وقالي هذي اجراءات طبيعية ولا تقلق وبدأ يسألني اسأله معتادة: كم معاك كاش؟ وين بتسكن و و و و ..... أبو لانا يعجبكم واثق من نفسي ومبتسم واتكلم انجليزي بلبل وهو انبسط ومسك معي خط سواليف يقولي كيف السعودية حلوة؟ قلت له السعودية اجمل وافضل بلد بالعالم وهو استغرب يقول لي How?? وبديت اشرح له كيف اني مبسوط وعايش فيها بسلام وراحة وقلت له تعال بنفسك زور السعودية وبتشوف ان كلامي صحيح 😊 ... المهم تدرون وش فاتح بالشاشة؟ كان فاتح الابليكيشن حقي اللي قدمت فيه التأشيرة وقاعد يسألني اسأله من نفس الابليكيشن ويطابقها مع اجاباتي حتى سألني سؤال قالي هذا رقم مين... قلت له هذا رقم زوحتي, وهذا رقم مين؟ قلت هذا رقم مدير الـ HR بالشركة وقالي عطني اسمه .... 😊 المهم سألني كل شي بالابليكيشن لكن اعيد وأكرر أبو لانا حريص ويعجبكم حافظ الابليكيشن كله ومعلوماتي صحيحة ولا عندي شي اخبيه على احد, وبعد مرور ساعة ونص ختم جوازي وقالي Welcome to USA يعني قضينا بالمطار 3 ساعات كاملة ☹ رحت للعيال وقلت لهم يله مشينا وعلى طول اخذت تكسي للفندق.
خلوني اشرح لكم وش افضل خيار لك من مطار JFK الى الفندق: الطريقة الأولى: عن طريق الباصات العامة (تصلح للي ساكنين في أمريكا ومتعودين عليها).
الطريقة الثانية: عن طريق باصات Shuttle الجماعية (تكلف 40$ للشخص وتصلح للعزابي).
الطريقة الثالثة: التكسي الأصفر وهو الأفضل بالنسبة لي كعائلة يكلف مع البقشيش من 80$ الى 90$ ولاتنسي لما تركب تقول له Flat Rate يعني التسعيرة الثابتة بدون عداد (التسعيرة الثابته فقط من المطار او الى المطار اما داخل المدينة ممنوع وضروري يشغل العداد).
الطريقة الرابعة: تطبيقات التوصيل مثل Uber و Lyft يكلف 100$ للجميع لكن لازم تآخذ باص مجاني خاص بالمطار اسمه Free Shuttle يوديك لمكان تكاسي تطبيقات التوصيل يعني فيها حوسة وتعب.
الطريقة الخامسة: عن طريق المترو ويسموه AirTrain وهذا الأرخص يكلف الشخص 20$ دولار لكن اضربها في 4 يطلع لي نفس التكسي فالتكسي الأصفر افضل خيار ناسبني 😊.
الجدول:
- تسجيل الدخول للفندق
- عالم هيرشيز Hershey’s Chocolate World
- عالم M & M’s
- مخبز وحلويات Carlo’s Bakery المشهور
- سوبر ماركت Target
- منتزه Bryant Park
- حديقة The Channel Gardens في ساحة Rockfeller Plaza
- محل FAO Schwarz قريب ساحة Rockfeller Plaza
- مخبز Bread Bakery
ملاحظة/ ماقدرنا نخلص كل الأماكن فخلينا بعضها ليوم ثاني لأننا كنا شوي تعبانين
هذا رابط جوجل مابس جاهز للي حاب يستخدم خطتنا (طبعاً كله مشي قريب)
وصلنا بالسلامة فندقنا الجميل الساعة 3 العصر وكنا تعبانين بعد الـ 3 ساعات في المطار, لما نزلنا استقبلتنا موظفة الفندق حق تحميل الناط وقالت لي هل تحتاج اساعدك واطلع لك الشناط لفوق؟ قلت لها لا انا بشيلها بنفسي, قالت لي الاستقبال في الدور الـ 8 انا استغربت شوي ولما دخلت طلع تصميم الفندق غريب وحلو بنفس الوقت (الدول الأرضي فيه تكاسي و خدمات سياحية و مقهى ستار بكس ومصاعد للي عنهم حجوزات) طلعنا للدور الـ 8 عند الاستقبال وطلع الفندق ضخم ضخم وكبير فيه صالات للعروض المسرحية ومطاعم ومقاهي و و و و و أشياء واجد يعني يبيلك يومين تختم الفندق وكل هذا تشوفه وانت طالع بالمصعد. سوينا تسجيل الدخول وطلبت من موظف الاستقبال يحطنا في دور عالي مطل على التايمز سكوير, قالي الاطلالة تكلفك 100$ زيادة, قلت له كنسل يامدير 😊 وجناحنا كان بالدور الـ 41 😊 ولما دخلنا تفاجأنا انه مطل عالتايمز سكوير مباشرة 😊 يسعد جوه عطانا إياها ببلاش 😊
مطل الغرفة عالتايمز مباشرة
على طول ريحنا و بدلنا ملابسنا واخذنا شاور وصحصحنا قلت لهم فيكم حيل والا تعبانين؟ قالو فينا حيل وجوعانين... قلت لهم يالله البسو نطلع نقضي اول يوم ونستغل الوقت مادام وصلنا بدري. الشيخة نور عندها Wishlist قائمة امنيات تبينا نسويها لها قلت لها تحت أمرك 😊 وهذي القائمة:
- Jollibee
- Miniso
- كوكيز Levain Bakery
- Mcdonald's Grimace Shake هذا مشروب موجود بس في أمريكا لمدة محدودة بمناسبة ميلاد شخصية Grimace
وهذي صورة المشروب
وهذي شخصية
Grimace 
العصافير في اللوبي جاهزين للطلعة
قالت ابغى نتغدى في مطعم Jollibee يشبه كنتاكي بس بنكهة مختلفة, وطلع جنب الفندق بالضبط وهذي ميزة انك تسكن في التايمز تختصر على نفسك جهد ووقت وفلوس, لما طلعنا من الفندق التايمز كان فل فل فل مليااااان عالآخر توجهنا للمطعم والحمد لله رغم الزحمة لقينا طاولة وطلبنا اللي في خاطر الشيخة نور والصراحة كان لذيذ عجبنا تحسه كذا دسم ومو صحي عشان كذا لذيذ 😊 بس قولو له مانبغى أي شي فيه بيكن Bacon.
خلصنا الغداء المتأخر الحمد لله وطلعنا نآخذ لفة في التايمز وكان فيه عروض كثير بالشارع, اخذنا كم صورة
محدثكم
وصلنا عالم هيرشيز
Hershey’s Chocolate World وعينك ماتشوف الا النور, كل واحد اخذ له سله لحاله ويعبيها حلويات وشوكلت 😊 وهنا حبيبات قلبي مبسوطين
بعدها توجهنا الى عالم M & M’s وماطولنا فيه لأنه كان كل شي ملون (
افهم يافهيم 
)
بدأ الليل يخيم والتايمز يزدحم اكثر وأكثر وشفنا العروض وريحنا شوي وخذنا كم صورة مثل ماانتو شايفين زحمة زحمة بس وناسة
بعدها توجهنا الى مخبز وحلويات
Carlo’s Bakery المشهور
اخذنا شوي حلى
بعدها رحنا سوبر ماركت
Target لكن للأسف طلعت مقفلة يقفلون 9 المساء, واصلنا طريقنا ورحنا منتزه Bryant Park هذا المنتزه عام وفيه مقاهي وعروض مجانية للجميع وفيه محل مشهور يبيع وافل لذيذ لكن مالحقنا نجربه كنا شبعانين وتعبانين, تمشينا فيه شوي وقررنا نرجع الفندق نرتاح وننام علشان نتجهز لليوم الثاني
مطل الغرفة عالتايمز بالليل خيااال لكن للاسف نسيت اصوره
وجبت لكم اقرب صورة لنفس المطل من النت
اكتفي بهذا القدر ونشوفكم في اليوم الثاني, خليكم قريبين ....
293الاعجاب
23-06-2023, 04:57 PM
هههه كلنا في الهوا سوا
.gif "(125)")
العرض العادي
المواضيع المتشابهه 
