هذا الحصى اللي تسلقته في شاطئ البطاريق







اليوم الثالث
ثالث يوم كان غريب وعجيب




قررنا نروح فعاليات كثيرة نشطب على أكبر عدد ممكن من المزارات، بس كنا غير محظوظين، قلنا بنروح اليوم لثلاث فعاليات، "الزحليقة"، "جبل الطاولة"، و"حديقة الأسود"، وإذا ساعدنا الوقت نروح لمول "كانال ووك"، بعد الفطور توكلنا على الله واليوم الثالث مثل اليومين الماضيين سحاب مع أمطار بس كل يوم يكون المطر أخف، والغيوم أقل بشكل تدريجي 🌩️بس كان فيه سحاب ومطر خفيف، مع نسمة هواء جميلة،



حبينا نروح أول حاجة للزحليقة، فيه لفة، وثلاث، ويمكن خمس نسيت، اخترنا ثلاث لفات لكل واحد، المكان كان يعج بالعوائل الخليجية بس يعني ما كان فيه أجانب إلا بالنهاية جت عائلة أوروبية، قصينا التذاكر، وكانت أسعار كل المزارات في كيب تاون متوسطة بالنسبة لي، الزحليقة سبق جربناها قبل سنوات في انترلاكن، وأذكر ما كانت متعبة، بس لما جربت اللي في كيب تاون بصراحة كانت متعبة، 🌝رجلي وظهري تصلبوا بعد أول لفة، بس بيني وبينكم كانت الدعسة حقتها حلوة، أنا بالأول وخليت المدام وراي، وأول ما جت الفرصة حاولت أغلق الطبلون عشان تشوف المعزبة كمية المهارات، 🤙بصراحة اللعبة ممتعة، تتقمصون شخصيات "بيتر، وهايدي"، ولو دقائق بس،








بعد اللفة الأولى قلت للمدام أنا تعبت والله، شوي أريح وبعدين نأخذ اللفة الثانية، وقلت ياليت خذيت وحدة بس كانت بتكفي، كانت "الزحليقة" شوي زحمة، يعني توقف بالطابور خمس دقائق إلى عشر تقريبا عشان يجيك الدور، بعد ما خلصنا جلسنا بالمكان نتفرج على اللعبة والناس اللي تفرفر، بعدها قررنا المكان الثاني اللي بنروح له "جبل الطاولة"، وبالفعل توجهنا له، لكن لما وصلنا بلغونا إن التليفريك تحت الصيانة، يعني تشوف المطل من منتصف الجبل تقريبا، وبلغونا إنه ما راح يفتح إلا بعد أسبوع تقريبا يعني بعد رجوعنا، 😥تمنينا نطلع ولكن ما يندرى وين الخيرة، لما شفنا المطل البديع على المدينة قلنا بعد كذا بنروح نتقهوى بمكان حلو، ونتمشى بضواحي المدينة، لما وقفت السيارة ونزلنا لمقهى في حديقة فندق كان خارج المدينة تقريبا وكانت المواقف فاضية، بس بعد ما رجعنا لقيت راعي سيارة موقف قريب مرة من بابي سيارتنا ويالله قدرت أركب، وضرب بابي في سيارته، وبعد ما شغلت السيارة وربطنا الأحزمة كان المزار الثالث اللي بنروح له هو "حديقة الأسود"، 💪بس يبدوا إن الأسد قرر يجينا وإنا بالسيارة 🥺 مستعجل يشوفنا أكثر من نشوفه،

فجأة هجم الأسد


👌 بعد لحظات من ركوبنا السيارة وتونا رابطين أحزمة الأمان، إلا فجأة واحد يضرب في دريشة السيارة ضرب عنيف، طلع الأسد بدري، 😂 فتحت باب السيارة إلا يهاوش يقول ضربت سيارتي ببابك، وشف بويت سيارتي انقشعت شوي، المهم أنا نزلت واعتذرت قلت إنت موقف قريب وما عطيتني فرصة أركب واعتذرت له ثانية وثالثة وهو مصر يهاوش، هنا المدام فقدت أعصابها وهي داخل السيارة وانطلقت، بس حقيقة ما حبيت الموقف قلت يابنت الحلال فكينا منه، بنشب معه وبتخرب سفرتنا كلها عشانه كيفه، وختمت المدام النقاش بعد ما ركبت وركب هو سيارته بكلمة "جعله المرض روعني"، 😁 بعد الأكشن اللي صار قلنا على خطتنا بنروح "حديقة الأسود"، والمدام كانت تكتب كل عنوان من وصولنا كيب تاون كنا نروح له عن طريق "قوقل ماب" والجوال معها تحدد مسارات الطريق وأنا أسوق، الغريبة إنه بعد وصولنا للعنوان ودخولنا للحديقة تفاجأنا بوجود قرود كثير، التفت على المدام قلت إنتي متأكدة إن هذي حديقة الأسود، اللي أشوفه قرود أشكال وألوان، كبار وصغار، قالت إيه العنوان مطلع نفس المكان هذا بس يمكن الأسود بآخر الحديقة، قلت لا تضيعين علينا اليوم ترى ما استفدنا منه وقدامنا وقت قصير، جبل الطاولة وما طلعناه، ثم تهاوشنا مع الأشقر، والحين دخلنا حديقة ما نبيها، قالت متأكدة، قلت يالله نروح نهاية الحديقة ما لقيت أحد أسأله، ومشينا مالقينا ولا أسد، قلت خل بس نطلع الهوشة ضربت إعداداتك 😂



ودخلتينا عند القرود وإنا نبي الأسود، لو أمدانا على حديقة الأسود زين لأنها تسكر الساعة 5 العصر، سألت اللي عند التيكت قالت هذي حديقة القرود، الأسود بعيدة، دخلنا العنوان قبل نبي نتأكد منه عشان نتفرغ لباقي الفعاليات الأيام الثلاثة الباقية ووصلنا للحديقة، الغريب ما كان فيها أحد، أول ما وصلنا قالت البنت ترى قدامكم بس نص ساعة، قلنا ما يخالف نأخذ جولة ونشوف الأصناف الموجودة ونطلع، قالت أهم شيء لا تقرب لأن الأسد ترى لو قربت يهجم، قلت ما عليك أول ما يشوفني بينحاش، كانت الحديقة جميلة، بس ما لحقنا على فقرة الأكل حقتهم مع المدربين، شفنا الأسود واللبوات، وكان فيه نوع أبيض من الأسود واللبوات بنهاية الحديقة، جلسنا لحد ما طلعونا، سألت واحد من اللي يشتغلون قلت ليش المنطقة هذي فيها ذكرين ما يتضاربون قال لا هذولي إخوان،





المهم بعد كذا قلنا بنروح مول "كانال ووك"، فيه سباق سيارات جربناها في سنغافورة وكانت حلوة، المول كان بعيد كثير عن الحديقة أذكر، وحتى مدخله ما كان واضح بالنسبة لي، خذيت لفة طويلة عشان أقدر أوصل مواقفه، لما دخلنا المول كان كبير كثير، مو مثل فكتوريا أكبر بكثير، ولاحظت إن العوائل الخليجية في المساء تتواجد بالمولات، يعني اليومين اللي راحت بمول فكتوريا، واليوم هنا، يمكن برودة الجو كان لها دور، أو لأن المزارات في النهار بس وإحنا الخليجيين متعودين على السهر، أول ما وصلنا جلسنا بمقهى، بعد كذا تمشينا بالسوق، وتعشينا بكنتاكي، ثم بدينا نسأل عن مكان سباق السيارات، الغريبة محد عرف حتى اللي يشتغلون بالمول، إلا واحد حارس أمن قال لازم تطلعون من المول وتطلعون مع الدرج وبتكون مقابلتكم، وبالفعل حصلناها، خذينا ربع ساعة تفحيط، وأحسن شيء ما كان فيه أحد في وقتنا كان قبلنا فيه مجموعة محترفين، قبل تركب لازم طبعا تلبس لبس معين لسلامتك، وتحط اغراضك برى ما تكون معك بالسيارة، بعد انتهاء سباق الفورملا1 قررنا نرجع الفندق استعداد لليوم الرابع، بس قلت أول ما وصلت الفندق للحبيب أبو بكر أبي تحجز لي بكره بمطعم "جولد" قرينا عن المطعم والعروض الإفريقية اللي فيه وحبينا نتعرف على ثقافتهم ونشوف طقوسهم ورقصاتهم عن قرب، وحجز لي الله يسعده على الساعة 7.30 مساء، مدة العرض ساعتين، وبكذا ختمنا اليوم الجميل.