مساكم الله بالخير والنور والسرور .. قبل لا انتقل لروفانيمي بنزل الاماكن المقترح زيارتها ب هلسنكي والي ما قدرت اني ازورها ..




السوق المفتوح Kauppatori ..

سوق اكل شعبي بالهواء الطلق بالصيف وبالشتا يكون داخل المخيمات وفيه تشكيلة من المطاعم الي تقدم الاكل الشعبي الفنلندي والهدايا والتحف وغيرها من الصناعات المحلية ..

مكانه على الخريطة ..


صورة





نجي بعدين لمدينة الملاهي .. Linnanmäki
للاسف كانت مغلقة اثتاء زيارتي .. ومن الموقع كاتبين انها تفتح فترة الربيع والصيف من بداية شهر ابريل لسبتمبر ..

موقعها على الخريطة




صورة لها ..






حديقة حيوانات Korkeasaari Zoo


مكانها على الخريطة




هذا تقريبا اللي لقيته اثناء البحث .. طبعا في تشكيلة من المتاحف التاريخية والتشكيلية للفنون وغيرها اضافة لعدد من الكنائس من ضمنها كاتدرائية هلسنكي والي تعتبر المعلم الرئيسي عندهم

السلام عليكم ورحمة الله وبركاته


وجمعة مباركة على الجميع ..




مقدمة عن روفانيمي ..



عاصمة اقليم لابلاند وتقع على حدود دائرة القطب الشمالي ,, منطقة من اجمل المناطق الي زرتها الى حد الان .. اهل المنطقة عندهم اعتزاز وفخر كبير بشخصية سانتا كلوز وعشق كبير للشتا واجواء الكريسماس وعيد الميلاد . لدرجة انهم بالمطار كاتبين شعار " المطار الرسمي لسانتا كلوز" وحتى على باب الطيارات الفنلندية في شعار سانتا ومكتوب عليه " الناقل الرسمي لسانتا كلوز "





روفانيمي منطقة سكنية صغيرة نوعا ما .. وبعد ما قرات عنها اتضح انها من اكبر مدن العالم من حيث المساحة ( على ذمة ويكيبيديا ) وجزء كبير منها يغطيه الغابات وبكون منظرها واضح جدا من الطيارة ..

منطقة باردة جدا جدا .. وسجلت ادنى درجة حرارة فيها بالتسعينات ووصلت -47 ومع التغير المناخي والاحتباس الحرارري تراجعت درجات الحرارة على مدار السنين .. بس ما زالت محافظة على مستوى متدني اكثر من غيرها .. وشهر يناير وفبراير من ابرد شهور السنة على الاطلاق ..

المنطقة مشهورة كوجهة شتوية بامتياز ولسبب رئيسي هو الشفق القطبي . وكان فيها عدد كبير من السياح من شرق اسيا ومن دول اوروبا مثل فرنسا وسويسرا ,, وقابلت كثير فرنسيين هناك .. حتى السكان واصحاب المحلات من اللغات الرئيسية عندهم الانجليزية والفرنسية ويتحدثوا فيها بطلاقة .



محاولات تتبع الشفق القطبي ..



خلال 5 ايام في روفانيمي تم محاولة تتبع الشفق القطبي 4 مرات .. 2 منها مع جروب متخصص بتتبع الشفق القطبي و2 منها كانت محاولات فردية .. كل رحلة كان لها جو ورونق مختلف عن الثاني .. والحمدلله رب العالمين محاولتين منها تكللت بالنجاح وبذكر التفاصيل مع الصور ضمن التقرير باذن الله



تجهيز الملابس ..

اثناء اقامتي بهالمدينة وصلت درجات الحرارة الى - 16 بسبب تعرض المنطقة لمنخفض مفاجئ ,, وهنا مشكلة ثانية كانت موجودة الي هي اطراف الجسم زي اليدين والارجل والوجه والراس .. حرفيا وصلت مرحلة اني ماعد حسيت فيهم



برودة الجو في روفانيمي كانت مختلفة اختلاف جذري عن هلسنكي .. في هلسنكي اكتفيت بملابس الثيرمال وفوقها طبقة ملابس وحدة اضافة للجاكيت وكانت الامور تمام .. بس بروفانيمي اضطريت اني افعل وضعية الطوارئ الخماسية والي هي طبقتين ثيرمال ( الثانية شريتها من روفانيمي وكانت جدا ممتازة وبنزل صورتها ) وفوقها 3 طبقات ملابس اضافة للجاكيت .. ومن ناحية تدفئة الجسم كانت كافية جدا .. بس الاطراف كانت مشكلة حقيقة تحتاج معالجة

كان تجهيزي كالتالي ..

اولا .. محتاجين شي يدفي الرقبة




ثانيا .. قفازات حرارية .



ثالثا .. شوز للثلج .. وهذا مهم لابعد درجة لان الشوز العادي ما ينفع وخصوصا ان المنطقة هناك مغطية بالثلج وبعض الاماكن ثلج كثيف اضافة ان الشوز العادي يسمح بدخول البرودة حتى لو لبستو جرابات حرارية وعدة طبقات بس مارح تكفي وانا عانيت منها اول يومين الى ان اشتريت واحد زي هذا




رابعا .. جرابات حرارية



خامسا .. كمادات حرارية ( للطورائ ) وتحصلوها في الصيدليات او محلات السوبرماركت وفي منها انواع لليدين او الارجل اكرمكم الله



سادسا .. ملابس ثيرمال ( اشتريتها من روفانيمي وكان سعرها تقريبا 120 يورو للقطعتين )



سابعا .. اي شي يغطي الراس



اغلب هالاشياء طلبتها من النت وتلقونها بروفانيمي بكثرة
والثيرمال شريتها من محل SOKOS



المواصلات ..

بالنسبة للوصول لروفانيمي من هلسنكي في قطار لمدة 12 ساعة وبسعر تقريبا 60 يورو
وفي طيران لمدة ساعة والاسعار توصل الى 100 يورو ومع الشنط ممكن تزيد وضروري الانتباه ان الوزن في الطيران الداخلي يقل عن الطيران الدولي والشنط غير مشمولة بسعر التذكرة ويلزم اضافتها اثناء الحجز او قبل السفر ..


بالنسبة للمواصلات داخل المدينة في باصات تنقل الركاب من السيتي سنتر للمطار او لقرية سانتا كلوز وما يحتاج بطاقة مواصلات عامة بامكانك الدفع داخل الباص بتكلفة 8 يورو للمشوار سواء ذهاب او اياب




السكن ..

تم حجز السكن عن طريق Airbnb

اسم الشقة في الموقع Renovated city center apartment وصاحبها من باب الصدفة بروفيسور جيلوجي مقيم ب جدة .. واتصل علي مكالمة فيديو ورحب فيني .. هو يشكيلي من الحر وانا اشكيله من البرد

مكان الشقة على بعد خطوات من السيتي سنتر وتم حجزها لمدة 5 ليال ب 4100 ريال تقريبا .. كل الشقق بهالمنطقة كانت اقل من هالسعر بشي بسيط بس مكان هالشقة كان جدا خرافي وهنا للتوضيح

الصورة الاولى توضح مدينة روفانيمي وبعدها عن المطار .. وبينهم ربع ساعة تقريبا بالسيارة



الصورة الثانية توضح الشقة ومنطقة السيتي سنتر ..



الخط الاحمر هو شارع السيتي سنتر ..

وهنا اتركم مع صور الشقة

المبنى من برا




ومن الداخل












الشقة كانت جدا رائعة والتدفئة الي فيها جدا ممتازة ,, السلبية الوحيدة ان مافيها غلاية مي وبالتالي ما كنت اقدر اسوي قهوة بنفسي الا اني اشتريها من برا

وهنا فيديو للشارع برا




اللوحة الحمرا الي عاليمين هناك بداية شارع السيتي سنتر




يتبع بتكملة التقرير والوصول الى روفانيمي

روفانيمي ..اليوم الاول .


حجزت رحلتي على الطيران الفنلندي .. وكانت الرحلة لمدة ساعة

هنا فيديو من مطار هلسنكي قبل الاقلاع



وحدة من الاشياء الي حبيتها كثير على الطيران الفنلندي هو عصير توت يقدمونه واتعب وانا اقولكم لذيذ

ولو كانت رجعتي من فنلندا كان عبيت شنطة كاملة منه .







وصلت المطار وصورت هالفيديو لحظة النزول من الطيارة .. ما قدر اوصفلكم الفرحة الي كنت احس فيها



وهنا صور المطار من الداخل





وبعد ما استلمت الشنطة وطلعت لبرا



كان في برودة واضحة ومحسوسة .. في الباصات الي بالصورة وتنزلك بالسيتي سنتر بس الا تستنى الى ما يتعبى الباص بعدين يمشي .. وسعر الذهاب 8 يورو .

انا ما كان عندي صبر وطلعت مع اقرب تكسي وكان سعر المشوار 30 يورو



اقول للسائق الجو بارد جدا فعطاني النظرة الباردة وقلي تراها بس -5 الحين

انا : بس ؟!

المهم وصلت للشقة ونزلت اغراضي .. والمسؤول عن الشقة مشكور اخذني جولة تعريفية بالمدينة

وصورت هالصور اثناء الجولة

هذا مول كبير وفي محلات متنوعة







هذا النهر وكان متجمد بالكامل سبحان الله





وهنا فيديو من عند النهر



.. بعد تمشية بسيطة وكان قريب غروب الشمس لعب فيني الجوع ورحت هالمطعم وكان يقدم شاورما



واكله كان لذيذ ..




رجعت الشقة وريحت شوي وكان غابت الشمس ورجعت اخذ لفة ليلية بالمنطقة .. ويمكن كل الاشياء اللي تحتاجون تشوفونها موجودة بالسيتي سنتر اما خارج هالمنطقة فهي عبارة عن منطقة سكنية بحت ..

اتركم مع الصور









منظر النهر بالليل والنجوم .. كان خرافي





هنا فيديو للنهر









هنا فيديو تمشية ليلية بالسيتي سنتر




السيتي سنتر في عدد من المطاعم التركية والامريكية والاسيوية وغيرها اضافة لعدد من المولات ومحلات الالبسة والهدايا اضافة لعدد من محلات تاجير معدات التزلج


رجعت بالنهاية عند النهر واكتفيت بالتمشية والتامل

وكذا ينتهي يومنا الاول في روفانيمي



يتبع