لندن في يناير 2015

توبليرون · 07-05-2015, 12:03 AM

لندن في يناير
منتدى العرب المسافرون...بوابة السفر للمملكة المتحدة
سفرتنا للندن في يناير 2015

طبعا من تابعني الجزء الأول في البوابة التركية على هذا الرابط

http://www.arabtrvl.com/vb/t5732.html#post96078

وصلنا للندن بعد يوم طيراني طويل

وصلنا على طيران بيقاسوس الى مطار ستانستد لندن في الساعة 7.15 مساء

وهذا المطار خاص لشركات الطيران اللي يوصل من اوربا

وهني نزلنا ورحنا ورا الناس

ووصلنا هني

متروو يوصل لصالة القادمين

الكل هني بانتظار المتروو

وهني المترو وصلنا مسافة دقايق للصالة

اخذنا جناطنا من السير بعد كتابة كرت الدخول
وفهمت من اخونا القطري انها مالها داعي دام ان عندي فيزا .... مادري كتبناها
وكانت موجودة بالصالة وقالو لنا اللي مو كاتب يكتبها
وقفنا شوي وخلصنا الأجراءات لأن وقفنا انا وبنتي نكتب وخلينا بوحسين ودانه واقفين بالدور
يعني على ما خلصنا وصل دورنا للكاونتر
اخذنا الجناط وطبعا العربانة لازم تفتح بباوند
ورحنا جهة الباب ولقينا مكاتب للتاكسي تقص تكت ويعطونك تاكسي
يمكن طلع لنا ب 50 باوند لحد الكامبرلاند
تقريبا الطريج ساعة
وبالليل ما نشوف شي ههههه

الساعة الحين تقريبا 8.45 مساءا

ووصلنا للكمبرلاند

وهذا حجزنا من بوكينغ لغرفتين ستاندراد

أعتقد كل شي واضح للأسعار
6 ليالي لغرفتين = 848 دينار كويتي بدون افطار

تم سحب اول ليلة طبعا وبعدين اخذوا كل السعر مرة وحدة
والا بطاقة بوحسين مكسورة ما تشتغل على الجهاز عندهم
دفعت بنتي وبعدين عطيناها كاش
اعتقد كان التأمين او شي جذيه

وهذه الخريطة للموقع ....أكيد معروف عند الأغلبية
الموقع والعنوان والأحداثيات وتلفونهم

وعلى ما ينهون الأجراءات انا قعدت اصور

ريسبشن الكمبرلاند
هني صارت الساعة 10 بالليل

دانة وابوها

وخلصنا الأجراءات في الساعة 10.30 بالليل
التوقيت مثل ما تعرفون يقلب بالايفون عل المنطقة
يعني التوقيت هني لندني اذا ما خاب ظني

وهذه غرفتنااااااا انا وبوحسين صغيرونة
بس عادي دام احنا مو بنعيش فيها على طول

غرفة البنات اكبر وطلبنا سرير اضافي الليلة ب15 باوند اعتقد

ما صورتها مادري ليش ؟؟ يمكن احصل بعدين صور

السرير

الكبت والخزنة والثلاجة فيها بس بطولة الماي
اثنين عادي واثنين غازي
والتلفزيون فيه قنوات اخبارية عربية

المكتب وطاولة الجنطة

تكرمووووووون الحمام وشنو شايفين القلاصات
تتوفعون اني شربت فيهم

بس ما عليكم رزيت الفرش والمعجوون فيهم

الحمام صغيرون بعد بس يؤدي الغرض منه

وهذه غرفة الدوش
مقابل المغسلة

وهذا تكرمووون البتاع ....طبعا ما يعرفون شي اسمه شطاف

ادوات النظافة الشخصية

الأستشوار كان بره قريب من التلفزيون

وهذا الممر للباب

عاجبتني اللوحة الزجاجية خلف السرير

بعدها طلعنا ندور عشا يواااااعة جدا

الساعة 11 مساء في ماكدونالد القريب من الكمبرلاند

قعدت هني قريب من الباب شوية متنا من البررررد
على ما يطلبون البنات قمت وغيرت الطاولة
رحت داخل اشوة دفى شابين الدفايات

طلباتنا أقصد بعضها ما مداني اصور الجماعة يواعة

الحمدلله خلصنا الأكل الساعة 11.30وطلعنا رحنا بريماك علشان نشتري كبوس صوف حق بوحسين
وهذا احنا في بريماك الساعة 11.47
المحلات اللي يمه قاعدة تسكر

والأكسفورد بالليل 11.50

الحياة مستمرة العالم سهرانة

وهذا بريت لازم ندخله بنحلي وشفنا البضاعة الفوودية للحين ندور الأكل الساعة 11.55

فلافل وسلطة وخبزة بعد وجبة كاملة

الكافيه فاضي تقريبا بيسكر

ورجعنا غرفنا الساعة 12 صباحا

غرفة البنات

وهذه غرفتنا مثل ما قلت لكم الغرفتين متصلتين بباب وطلبنا منهم يفتحونه

وهذا اللي أكلته من جيز كيك الليمون اللي شريته من كافيه بريت

وهذه خريطة الغرف ومثل ما تشوفون مكتوبة بالعربي بعد

وبعدها نوووووم

والى لقاء قريب ان شاءالله

|القحطاني| · 07-05-2015, 12:16 AM

الشقة جميلة والاجواء الباردة أجمل

وش أحلى من الجو البارد

الله يعطيك العافية >> متااابع

توبليرون · 07-05-2015, 07:00 AM

اقتباس : المشاركة الأصلية كتبت بواسطة |القحطاني|

الشقة جميلة والاجواء الباردة أجمل

وش أحلى من الجو البارد

الله يعطيك العافية >> متااابع

الغرفه جميله والفرش نظيف الحمدلله
والبررررد مافي أحلى منه
ومع لبس الكوتات واللبس الشتوي وناااسه
يعافييك ربي على المرور الجميل

فارس الجبيل · 07-05-2015, 12:30 AM

ياسلام ام حسين منزلة تقرير وعن لندن بعد وفي الشتاء قلبي الصغير لايتحمل

موعودين بتقرير من الوزن الثقيل والخمس نجوم اكيد

جعلك عل القوه ياام حسين

توبليرون · 07-05-2015, 07:02 AM

اقتباس : المشاركة الأصلية كتبت بواسطة فارس الجبيل

ياسلام ام حسين منزلة تقرير وعن لندن بعد وفي الشتاء قلبي الصغير لايتحمل

موعودين بتقرير من الوزن الثقيل والخمس نجوم اكيد

جعلك عل القوه ياام حسين

تسلم يااخوي فارس من ذوقك
بس تراه تقرير صغيرون ان شاءالله يكون بالمستوى مع تقاريركم الروعه
ربي يعافييك ويقويك
شكراا لك

محمدويوسف · 07-05-2015, 12:52 AM

بداية موفقة يا أم حسين
اتذكر موضوع الجلاصات والنقاش الطويل عنهم بالبوابة العامة
متابعين الرحلة الشتوية

توبليرون · 07-05-2015, 07:04 AM

اقتباس : المشاركة الأصلية كتبت بواسطة محمدويوسف

بداية موفقة يا أم حسين
اتذكر موضوع الجلاصات والنقاش الطويل عنهم بالبوابة العامة
متابعين الرحلة الشتوية

يوفق الجميع يا رب
اي ههههه وطلع الكل يرز الفرش فيهم
متابعتك تسعدني يا اخوي
شكراا لك

فيصل · 07-05-2015, 02:17 AM

ايه احد ينسي موضوع الأكواب ماذا تعني

يا سلام عليك أم حسين

توبليرون · 07-05-2015, 07:08 AM

اقتباس : المشاركة الأصلية كتبت بواسطة فيصل

ايه احد ينسي موضوع الأكواب ماذا تعني

يا سلام عليك أم حسين

ههههه كان موضوع جميل
والكل اتفق على عدم الشرب منها لرزة جلالتهم

تسلم يابو خالد ومبروووك على الثماني نجوم تستحقها وبكل جدارة

طوق الياسمين · 07-05-2015, 10:11 AM

ماتتخيلين قد ايش فرحت بتقريرك

تقاريرك اعيش معاها جو وكأني كنت معاكم

ماشاءالله عليك

الكمبرلاند حلو وموقعة جميل

رحلة شتويه موفقة

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
صفحآت من حياتي فِ اسطنبول .. يناير 2015	م.عبدالرحمن	تركيا	73	06-08-2015 05:35 PM
مقتطفات من رحلتي قطر يناير 2015	Fahad Mandi	بوابة قطر	31	28-05-2015 10:14 AM
ثلوج اسطنبول يناير 2015	فتاة الدمى	تركيا	39	06-05-2015 09:48 PM
الطايف احلى يناير 2015	آخـــرفـــرصـــة	بوابة السعودية	72	22-02-2015 04:17 PM
الفعاليات في دبي شهر يناير (1) / 2015	khalid	بوابة الامارات	31	29-01-2015 03:55 AM