سكن الطلبة في الغربة

q8ya metnaqla · 07-05-2015, 06:15 PM

بسم الله الرحمن الرحيم

حبيت اليوم استعرض بعض من تجاربي في السكن وتجارب زملائي في الغربة

وراح يكون في هالموضوع عده انواع مختلفة ونذكر لكم المميزات والعيوب لكل سكن ...
ومن هالموضوع كل شخص يقدر يحدد اي سكن اهو يحبه ويرتاح له

السكن مع عــايلة :

المميزات :

- اهم نقطة في السكن مع العايلة اهو التحدث باللغه الإنجليزيه طول الوقت منها نسمع كلمات يديده تصحيح اخطاء لغوية وقواعد وتعليم اسرع ..

-نتعرف على عادات وثقافة الديرة وطريقة المعيشة ..

- مساعده بعض العايلات لنا في الواجبات وعن اي شي خارج الدراسة مثلا شركات الاتصال المحلات والجمعيات الزينه عن البنوك والخ .

- وطبعا هالنقطة مايختلف عليها اثنين واهي انه السكن مع عايلة وايد ارخص من السكنات الباجية لانه العايلة لما ندفع تكون معها ( انترنت ،كهربا ،والاكل تختارون اما وجبتين او وجبة )

-اكتساب صداقة ولغه بنفس الوقت اذا العايله عيالهم موجودين ومن اعمارنا ونطلع معاهم ..

- اي طالب وطالبة يقدرون يختارون نوع العايلة ممكن عوايل مسلمه او مسيحية اهما واختيارهم وممكن اختار مسيحية ومايشربون وماعندهم حيوانات عزكم الله.

العيــــوب :

- واحد من العيوب المهمه بالنسبة لي واهو الالتزام بوقت الدخول والخروج من البيت والاكل في وقت معين .

-أغلب العوايل تعيش برا السنتر وتكون بعيده يعني فيها 30 دقيقة الى 45 دقيقه عن السنتر فالتنقل يصير اشوي صعب واذا بعد رفيجاتي ساكنين في السنتر مااقدر اروح وايي عليهم وعلى الجامعه او المعهد.

-صعوبة التأقلم ويا العايلةاول جم شهر ( خصوصا للبنات اذا كان البيت في ريال)

-قلة من العوايل اللي ماتهتم في الطالب فيصير صعب على الطالب انه يستمر في السكن معاهم .

-مااقدر اخذ راحتي بعض المرات (يعني اذا مثلا بطبخ يمكن اخرب جولتهم او اذا بغسل الهدوم يعني لازم احط بالي على اغراضهم)

-اي طالب لازم بعرف انه اخو غير مسؤل عن اي شي مثلا تمشي مع الجلاب او يشوف الياهل اذا عندهم الا اذا اهو حاب من نفسه .

-اغلب العوايل يكونون كبار في السن ف لازم نكون هاديين حتى في المشي في البيت

سكن الجامعة :

المميــــزات :

- سكن الجامعه قريب عليها فهذا يسهل في عملية المواصلات .

- تكوين صداقات من خلال الدراسه والورشات مع بعض .

-إدارة السكن تتكفل بإصلاح أي عطل قد يحصل في شقة.

- اقدر ابلغ عن اي ازعاج في السكن والادارة تشوف شغلها .

- السعر في سكن الجامعة ارخص مقارنة بالبقية.

- الامان في اغلب المساكن الجامعية فيها سيكورتي على مدار 24/7.

العيـــــوب :

- بعض الشقق تكون الحمامات مشتركة وبعض منها يكون لكل طالب غرفه وحمام بس المطبخ والصاله مشتركة ( يعني السكن اللي كنت فيه كانت كل شقه عباره عن 4 غرف وحماماتهم ومعاهم صاله ومطبخ لكل الشقه ).

- بعض الطلبة ايبون اصداقائهم من برا مثلا وحده تيب البوي فريند.

- اغلب الغرف صغيييره حيل والحمام عزكم الله من جذي بعدها الطالب يدور على سكن خارجي.

- اغلب العقود من 6 اشهر الى سنه ، فيصعب على الطلبة فسخ العقد.

- اغلب المساكن الجامعية المطبخ والصاله مشتركه مع بقية الطلبة اللي معاي بالشقة .

- صعوبة في الحصول على شقه كلها بنات .. وهذا صار معاي

- عادي التأخير في عطلة نهاية الاسبوع.

السكن المنفرد :

المميـــــزات :

- اذا الشخص مثلي مو اجتماعي يفضل السكن بروحه.

- كل شي لك محد يشاركك ولا يحاسبك.

- التفنن في الطبخ والمواهب المدفونه تطلع

- حرية في الدخلة والطلعه .

- جو دراسي وهادي .

العيـــــوب :

-الملل القاتل ومافي احد يسولف معاك.

- ممكن انه الطالب يعتمد اعتماد كلي الطلبات من المطاعم .

- قلة الامن اذا كانت الشقه بعيده عن السنتر.

- التكاليف راح تكون اعلى علي لاني بدفع كل شي من ( كهربا – ماي – ايجار – ليسن تلفيزيون – انترنت – غاز )

السكن مع مجموعة من الأصدقاء:

المميـــــزات :

-قلة التكاليف والمصاريف.

- التعاون في الدراسة .

- العيشة اسهل اذا الكل من ديره وحده.

- وناسة اذا القروب متجانس .

العيــــــــــــــوب :

- مشاكل او سوء فهم بين بعض.

- الحفلات في الشقه من قبل البعض واحضار الاصدقاء من الاجانب (لازم يكون في اتفاق بالنسبة الحفلات ) مااقصد العزايم ..

- قلة ممارسة المحادثة مع بعض بالانجليزي وهذا من احد الاسباب اللي تضعف اللغه وما تقويها .

- عدم الالتزام والتقيد بالقوانين اللي نحطها ابسط شي ( خروج القمامه مثلا اليوم فلانه او فلان ) اوغسيل او دفع والخ

- الازعاج وقت الدراسة واللامبالة بالبقية .

- اختلاف في الشخصية والعادات بين الطلبة.

وفي الختام اتمنى التوفيج من الله لجميع الطلبة

وهذا اللي عندي وذكرته لكم واغلبها من تجاربي الشخصية وتجارب رفيجاتي

واتمنى هالموضوع يساعدكم في اختيار نوع السكن

ولاي استفسار او اضافه انا اختكم / كويتية متنقلة موجوده وبالخدمه

q8ya metnaqla · 12-06-2015, 09:52 PM

هذا السايت ممكن يساعدكم للبحث عن السكن في جميع انحاء بريطانيا

cardiff in United Kingdom | 2 Bedroom Flats & Houses for Rent - Gumtree

الغردقاوي · 13-06-2015, 04:44 AM

أفضل نوع هو السكن مع الأصدقاء والأفضل أن لا يزيد العدد عن أثنين أو ثلاثه بالسكن فقط

تسلمي أختي على الموضوع المفيد والمهم لكل الطلبه المغتربين

oceanus · 13-06-2015, 05:17 AM

انا افضل الخيار الاول

اشوف انه مناسب لي ,,, وخاصة اني ما احب اخرج من البيت ابداااااا

شكرا لك مشرفتنا الكريمة

q8ya metnaqla · 13-06-2015, 02:49 PM

اقتباس : المشاركة الأصلية كتبت بواسطة الغردقاوي

أفضل نوع هو السكن مع الأصدقاء والأفضل أن لا يزيد العدد عن أثنين أو ثلاثه بالسكن فقط

اقتباس : المشاركة الأصلية كتبت بواسطة الغردقاوي

تسلمي أختي على الموضوع المفيد والمهم لكل الطلبه المغتربين

حلو مع اصدقائك بس لازم تكون ضامنهم وانكم على قلب واحد وفاهمين بعض ..
الله يسلمك بوشهاب نورتني

اقتباس : المشاركة الأصلية كتبت بواسطة oceanus

انا افضل الخيار الاول

اقتباس : المشاركة الأصلية كتبت بواسطة oceanus

اشوف انه مناسب لي ,,, وخاصة اني ما احب اخرج من البيت ابداااااا
شكرا لك مشرفتنا الكريمة

ممم العايلة ممتازه بس لفتره بسيطة في نظري مو كل سنوات دراستي
العفووو نورتني بوعبدالرحمن

توبليرون · 13-06-2015, 03:11 PM

ماشاءالله
تجارب حلووة وأكيد بيستفيد منها كل الطلاب
المبتعثين
شكراا ابرار على التقرير المفيد

فيصل · 13-06-2015, 06:42 PM

شكرا لك

بكل سكن فيه عيوب
لكن اذا السكن مع عائله عندهم كبار حلو او ان اعمارهم شباب مره شيء طيب ..كبار السن ما يصلحون

سكن الجامعه طيب بس لو تحصل لك شيء خاص فيك مطبخ ودوره مياه

الغردقاوي · 13-06-2015, 07:01 PM

اقتباس : المشاركة الأصلية كتبت بواسطة q8ya metnaqla

[/FONT]

حلو مع اصدقائك بس لازم تكون ضامنهم وانكم على قلب واحد وفاهمين بعض ..
الله يسلمك بوشهاب نورتني

تسلمي أختي
لكن مين بو شهاب
أنا الغردقاوي ← بوحميد ( من أحمد )

q8ya metnaqla · 13-06-2015, 08:05 PM

اقتباس : المشاركة الأصلية كتبت بواسطة توبليرون

ماشاءالله
تجارب حلووة وأكيد بيستفيد منها كل الطلاب
المبتعثين
شكراا ابرار على التقرير المفيد

العفووو ام حسين
ان شاءالله تفيدهم وتساعدهم في الاختيار

q8ya metnaqla · 13-06-2015, 08:15 PM

اقتباس : المشاركة الأصلية كتبت بواسطة فيصل

شكرا لك

بكل سكن فيه عيوب
لكن اذا السكن مع عائله عندهم كبار حلو او ان اعمارهم شباب مره شيء طيب ..كبار السن ما يصلحون

سكن الجامعه طيب بس لو تحصل لك شيء خاص فيك مطبخ ودوره مياه

اي بوغازي - هههه لا والله حتى الشياب ساعات احسن من الشباب ..في الحين بعض الاسكان معاهم مطبخ وحمام عزك الله

اقتباس : المشاركة الأصلية كتبت بواسطة الغردقاوي

تسلمي أختي
لكن مين بو شهاب
أنا الغردقاوي ← بوحميد ( من أحمد )

ههههههههه والنعم احمد
ادري اسمك احمد واحنا في الكويت احمد نقولة بوشهاب
ولاتزعل بوحميد

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
شلال جولنجر في اقليم سالزبورج بقلم طائر الغربة	فريق التطوير	بوابة النمسا	10	21-07-2019 02:56 PM
مدينة الطفل في فيينا بقلم طائر الغربة	فريق التطوير	بوابة النمسا	5	26-07-2017 06:12 AM