رحلتي الجميله لطوكيو 2015

هداوه · 20-05-2015, 09:14 PM

اليوم الاول في طوكيو

قمنا متأخرين من النوم

صباح الخير طوكيو

هذا المنظر من شباك غرفتنا

وجهزت الريوق

طبعا انا يايبه انواع من الخبز

اللبناني والخبز الايراني حق أول يومين

وعندي نيه أسوي مرقوقه

بالاضافه الى عدة الريوق من الاجبان والعسل الطبيعي

والزيتونات والزعتر والجام وكل لوازم الريوق

ومانسينا أنواع الشاي والنسكافيه

تايبه من أيام كوريا ، هاي المره مستعده عدل

لأنه بوعيسى كان واصل قبلنا أمس فهو كان يايب من

السوبرماركت فواكهه وماي وخفايف

عقب ماتريقنا طلعت مع بوعيسى نتمشى في الفريج هههههه يعني حوالين الفندق

وخليت البنات يتجهزون ع راحتهم

كان موعدنا مع سايا مرشدتنا الساعه 2 الظهر

أول ماطلنا شفنا شجرة الساكورا

وكان عدالنا بقاله صغيره فاملي مارت

دخلت اتفحصها واشوف شو ممكن نشتري منها

والصراحه مافيها الكثير من اللي نحتاجه

عقب مامشينا مسافه شفت جدامنا جسر ينزلكم ع الجهه الثانيه

ماركبناه وسرنا صوب اليمين وشفت هالشارع ومصفوفه اشجار الساكورا من الطرفين

بس هالشارع شويه صعده وكان ودي استكشفه بس مابغيت

أستهلك طاقتي ورجعنا من صوب فندقنا

ومشينا في الاتجاه المعاكس

يعني المره الاولى من طلعنا من الفندق لفينا صوب اليمين

الحين ردينا صوب اليسار ومشينا مسافه وشفت كوفي حلو حق الريوق بس ماجربناه

وكملنا سيده بس ماشفت شي يذكر

ماعدا سوبرماركت شويه كبير وهو سفن الفن

مادخلناه لضيق الوقت

ومقابلنه جسر

ماقدرنا نعبر ونمشي في هاذيج الجهه لأنه بنتأخر ع موعدنا مع سايا

عقب ماخلصنا جولتنا أنا وبوعيسى رجعنا الفندق

أول مادخلنا اللوبي الا نشوف سايا ويالبنات في استقبالنا

أنا تفاجأت فيها اني شفتها حلوه وانيقه وصغيره

وهي بعد تفاجأت فينا وقالت لبوعيسى انته محظوظ انه معاك 3 حلوات بسم الله علينا

بعد ماتعرفنا ع بعض وسلمنا ع بعض قلتلها

اول شي أبا أسير محل دزني اللي في شيبويا عشان نبا نحجز التذاكر من الحين

خذت موقع محل دزني من الفندق وانطلقنا

لمانطلع من فندقنا ونمشي في جهة اليمين بعد مسافه بسيطه

نركب الجسر ونعبر للجهه الثانيه واللي فيها الحياه

شيبويا

وهي منطقه تعج بالحياه وفيها تقاطع شيبويا الشهير

وفيها الكثير من المطاعم والكوفيهات ومن هالكافيهات ستاربكس

اللي يطل ع تقاطع شيبويا

ومنه تقدرون تصورون هالتقاطع من فوق

وكافيه كي كي ولا لا وغيرهم

وفيها مولات مثل مول 109 وغيرهم والكثير من المحلات من بينها محل دزني

ومحل ون بيس بالاضافه الى وجود محطة شيبويا

فيها محطة القطارات جي آر

ومحطة الميترو

هذا محل للكريمات وهو محل فرنسي ومعروف وله فروع حول العالم

لكن المميز في طوكيو واللي ماشفته في أي مكان انه فوقه كوفي

ومطعم تابع له والجميل انه يطل ع تقاطع شيبويا

في هاي العماره ستاربكس وهو مطل ع تقاطع شيبويا

شوفوا الناس كيف واقفه تنتظر تولع الاشاره الحمراء

وهنيه عاد المنظر الرهيب خصوصا وقت الزحمه

تشوفون الناس تقطع الشوارع من عدة جهات

ويامحلات شكلهم اذا يطيح مطر تلقون أغلبهم بالمظلات

الصراحه منظر مابتشوفونه الا في طوكيو

بتشوفون وايد ناس تلبس كمامات ومنظرهم متعودين عليه

مره سألت سايا قلتلها ليش هاذيل يلبسون كمامات ، قالت

انه فيه ناس عندها حساسيه من الجو وخصوصا في الربيع

وسمعت بعد مره انه فيه ناس اذا فيها زكام أو رشح تلبسه عشان مايعادون حد

واعتقد ممكن ناس تلبسه عشان ماتيها عدوه من حد

وهذا مول 109

محلات معروفه مثل زارا

طبعا المنطقه كبيره وبعطيكم صور اضافيه عنها في اجزاء قادمه

الحين وصلنا محل دزني ستور

المحل يتكون من ثلاث طوابق وماشاءالله كان متروس

والمشكله انه الكاونتر اللي نقطع منه التذاكر كان في الدور الثالث

وماحصلنا جدامنا غير هذا الدري ( السلم )

ماصدقنا انه وصلنا ، انقطع نفسنا ، مول ماشي لياقه

نحن بعدنا ماتفسحنا تونا نقول بسم الله وريولنا تكسرت

الله يعينا ع اللي ياي

حجزنا التذاكر حق يومين ، يوم 8 حجزنا تذاكر دزني سي

سعر التذكره للكبير = 4200 ين

ويوم 10 حجزنا حق دزني لاند

سعر التذكره = 4200 ين

عقب ماخلصنا ع طول طلعنا من المحل ماكان في نيتنا نتشرى تونا واصلين

وغير جيه حاطين في بالنا نشتري من مدن الالعاب

طلعنا من دزني ستور

وع طول اتجهنا للمحطه نشتري بطاقة الميترو

ونبدأ انطلاقتنا الاولى لأول وجهه سياحيه

تابعوني ..

وشاركوني بتعليقاتكم وآرائكم

ولا

ناشيء الرميحي و الايمان معجبون بهذا.

ام ميلاد · 21-05-2015, 03:20 AM

ههههههههههههههههههههههههههههه

فكره حلوه الظاهر جيه بسوي

وبعطيج معلومات وبخبرج قصص هم مابيعرفونها

حبيت الصور.. حسيت الجو رايق

وفعلا هالمرشده اختصرت لكم الوقت

بس مو كنه طوكيو على طول زحمه؟
اشوف بالشارع.. ومحل دزني.. ماتضايقتوا من الزحمه؟

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي الى جورجيا يونيو 2015	Fahad Mandi	بوابة جورجيا و اذربيجان	115	11-07-2018 12:02 PM
الطيور الجميله	أبوهمس	بوابة اثيوبيا	8	16-07-2015 11:11 PM
رحلتي إلى تركيا 2015 ( #اليوم_الثاني )	المصور أحمد المعراج	تركيا	12	08-06-2015 10:49 AM
مقتطفات من رحلتي قطر يناير 2015	Fahad Mandi	بوابة قطر	31	28-05-2015 10:14 AM