ايسلندا ... اجتماع البراكين بالثلوج بقلم احلى من العقد - الصفحة 2

فريق التطوير · 30-05-2015, 06:10 AM

تحركت السيارة ... ومشينا باتجاه احد المزارع المسورة الي يربون فيها خيول
و يقول امير انه عنده اذن ان احنا ندخل لين داخل السور ونمسك الحصن الايسلنديه المميزة ..

يختلف الحصان الايسلندي عن غيره ..
فهو قصير القامة و شعره جميل وطويل وقوي جدا ويستحمل البرد الشديد .. وبصراحه جميل جدا ..

كلهم دخلو داخل السور الا انا .. بصراحه ماامن للحيوانات ومااحبهم واخاف منهم

كانو مستأنسين عالخيول .. ياكلونها ويمسكونها وانا كنت اراقب خارج السور

توجد رحلات على ظهر الخيول الايسلندية .. ياخذونكم في جولات في براري ايسلند ويسون لكم برامج سياحيه كامله على ظهر الحصان

امير شكله معجب بالوالده .. يصورها كل شوي خخ

واشقر على اشقر
مثل ما الحر الاشقر
يجمع معاني الزين
كامل معانيها ..
متميزن بالوصف
مخضر ومنظر
اجمل وصوف الحسن
متجمعه فيه

ملابس امير كانت كيوت وظريفه .. هاي هي الازياء الايسلندية تلقون ناس وايد يلبسون بنفس هالستايل

ياخي الناس لي صورو الحصن او الخيول تطلع الصور جميله ... لكن صوري اجمل

وبعد ان اطعمو الخيول ومسكوها و بالغصب امير قال لهم يالله نروح عشان نكون عالجدول حسب المخطط .. وهم ماودهم يروحون مافي الا انا احس ان خلاص لازم نروح وهم ودهم يتمون اكثر
ركبنا السيارة وحركنا

شوفو الطبيعه لين نوصل الى محطتنا القادمة

.. وللحديث بقية

فريق التطوير · 30-05-2015, 06:11 AM

ومازلنا في السيارة نتأمل الطبيعة الغريبه بالنسبه لنا .. خضراء .. لكن بدون اشجار

كل شوي كنا نشوف شلال

شفتو هاي الشلال

هو محطتنا القادمة .. هو ملك لسيدة .. ويعتقد الايسلنديون ان مياه هذا الشلال شافيه من العديد من الامراض ويحبون يشربون من هالشلال للاستشفاء .. و ماي هالشلال احد انقى المياه في ايسلند و امير قال لنا جهزو غراشكم (( قاروراتكم )) عشان تملؤنها من ماي الشلال بننزل عنده عشان تذوقون طعم الماء وتاخذون لكم منه وتملؤن غراشكم

نزلنا من السيارة

ورحنا صوب مجرى الشلال

قعده جميلة

ورحنا نذوق ماي الشلال قربت للماي

حطيت يدي داخل الماي كاااان باااااااااااااارد

الماي شفااف

شربته ... صج صج صج حلو ... تحسونه على قولت القايل عذب فرات باااارد يبرد عالقلب ومثل ماي الصحه كلش مافيه طعم ترسنا اغراشنا و شربنا لين ارتوينا و قمنا
وكملنا طريقنا للمحطة القادمة

خرفان ايسلند ايضاً مميزه ... بيييضه ودبببه و فروها حلوووو ومدوره ولين تركض تحسونها تتفرفر تجنن كان خاطري الم لي خروف وافرك فروه بس الخرفان مع انها دبه بس سريعه

شوفو هاي الجبل الي فوقه ثلج ... هاي فوهة بركان مسدودة بالثلوج

هالبركان قد ثار من قبل و بتلاحظون الحمم البركانيه عنده تحسون الحمم واصله لييييييييييييييين مكان بعييييد

وللحديث بقية ..

فريق التطوير · 30-05-2015, 06:12 AM

ومازالت مناظر حمم البركان القديمة تملئ الارض والشارق يمر وسط الحمم ..

هاي فوهة البركان الي مسدودة بالثلج .. سبحان الله من تحت بركان يغلي ومن فوق ثلج قاسي

لفينا باتجاه البحر

وصلنا ونزلنا ..

واول مكان اتجهنا له هو تمثال الباردور الكبير .. وهاي نوع من انواع البشر الاسطوريين الي يؤمنون فيهم الايسلنديين وهانوع من البشر يعتبرون محاربين

نبذه عن التمثال للي بيفهم ..

بعد ماصورنا عند التمثال قال لنا امير تعالو معاي برويكم اشياء حلوه ولحقناه

مستعدين عشان تشوفون اغرب المناظر الطبيعيه واجملها ...
يالله
1

2

3

شوفو الكهوف والتكونات الصخريه الي صايره من تلاقي البركان بالبحر
شوفو لون الرمل والماء والكهف الصخري

كان امير يحذرنا ويقول لنا على الاقل اتركو مسافة متر بينكم وبين المنحدر عشان ماتطيحون ماقدر اضمن لكم قوة الصخور على الاطراف

واهني الامواج نشوفها ناحته خطوط على الصخور بشكل غريب وجميل

بعدها مشينا باتجاه هالمنصه لمشاهدة مايوجد خلفها وطول الوقت امير يذكرنا بوجوب ترك مسافة متر على الاقل بينا وبين الحافه

وقربنا من المنصه

وشفنا منظر اخر مدهش وغريب ... منظر الصخرتين الي يبوسون بعض

حسيتهم اكثر كانهم جملين يبوسون بعض خخخ

والمناظر الجميله تستمر

ووصلنا الى لافته مكتوب عليها هاربور يعني الميناء .. وقال امير هاي وجهتنا

وللحديث بقية ..

فريق التطوير · 30-05-2015, 06:14 AM

الطريق طويل ...
المناظر غريبه جداً و تستحق التأمل بصمت

شوفو مجرا النهر وسط الحمم البركانيه الباردة ... هالبركان من قوته غطى مساحات كبييييييييييييييييييييييييييرة وشكله يخوف

كان احساسي بذاك الوقت اني على القمر .. احس التضاريس تشبه تضاريس القمر (( القمر الي في خيالي ))

سكه طويله
والبراري قفار
ودار تشكي
من جفى الزوار

يعتقدون ان هالمكان هو معبد قديم للعمالقة ..

يتبع ..

فريق التطوير · 30-05-2015, 06:15 AM

ومازلنا ماشيين متجهين الى وجهتنا القادمة وهي الوجهه الاكثر اثاره وتشويق وغرابه ..

بدأت ملامح الجليد بالازدياد

وها هي بحيرة الجليد بينت

واسمها بالايسلندي
Jokulsarlon Glacial Lagoon
هذه البحيرة من مياه عذبة مفتوحة على المحيط وعليها اجزاء متكسرة كبيرة من الجليد الضخم يطفو على البحيره ويمشي لين البحر ويذوب .. ومع ارتفاع درجات الحرارة في الكرة الارضيه كل سنه تنفصل كميات اكبر من الجليد و تمشي في البحيرة وثم الى البحر وتذوب .. الله يعين
و طبعا راح ناخذ نا جولة في البحيرة باستخدام المركب الي يمشي في الماي والبر شوفوه

هاي كشكات يبيعون فيها سناكات واكلات خفيفه ومشروبات وهدايا تذكاريه

وهاي المركب الي قلت لكم عنه
كل 45 دقيقه يحمل ناس ويدخل البحيره

والان اترككم مع صور لبحيرة الجليد العجيبه والمدهشه

لون البحيرة صاير ابيض من انعكاس الجليد

طبعا عطونا وقت محدد لازم منكون فيه متواجدين عند المركب عشان ياخذنا للبحيره الموضوع مب عشوائي .. ولازم الحجز مسبقاً

البحيرة جدا مدهشه في الواقع واول مره اشوف شي هالشكل

ولما قرب موعدنا رحنا صفينا جدام الموظفة مالت المركب عشان ندخل اول شي

وصل المركب واكتمل عدد الناس

وزعو علينا لايف جاكيت

ولبسنا الايف جاكيت

وهذا هو المرشد يكلم السواق يقول له صارت المجموعة جاهزه للانطلاق

وانطلقنا في البر

ودخلنا البحيرة

وبدأت الدهشة الحقيقية ...
وللحديث بقية ..

فريق التطوير · 30-05-2015, 06:16 AM

ومشى المركب في البحيرة ..

يقول المرشد اننا لازم نترك مسافه بيننا وبين الجليد على الاقل 10 امتار

والسبب الي يخلينا لازم نترك مسافة 10 امتار بيننا وبين الجليد هو ان الجزء الي احنا نشوفه طالع يمثل فقل 10% من حجم الجليد و 90% من الحجم الكلي غايص في الماء فاحتمال يكون من تحت الجليد كبير مما يؤدي لكسر المركب وبعدين نكرر قصة تايتنك
وهالكلام ينطبق على كل جبال الجليد او احجار الجليد او كتل الجليد الموجوده على الماء لازم مانقترب منها لان الجزء الخارج الي نشوفه فقط 10 بالاميه من اجمالي الحجم ..

شوفو هناك .. هالجليد الي هناك هو عباره عن ارض من الجليد وكل سنه ينكسر جزء من الجليد ويتحرك في البحر ... يعني الي هناك مش ارض من رمل وحجر وفوقها جليد لا مجرد كتل قديمة من الاف السنين من الجليد الصلب

وهاي كتل الجليد المتناثرة

لو لاحظتو بعض كتل الجليد عليها لون اسود .. هاي بقايا رماد بركاني

وهاي المرشد .. وقف يشرح لنا شلون يعرفون عمر الجليد و سولف لنا شوية سوالف عن البحيرة وعن قطعة الجليد الي ماسكها

ولان قطعة الجليد الي ماسكها كانت قاسيه جدا جاب دريل وكسرها قطع صغيره ووزعها علينا اذا حابين نذوقها

واخيرا جا دوري وعطاني

وانا انسانه احب الثلج واكله خالي فعدلت مزاجي بالثلجه

وخذت وحده ثانيه .. للتحليه

والمناظر الجميله والغريبه مازالت حولنا في البحيره

طبعا الماء هنا باااارد الانسان مايقدر يستحمل برودته فلايمكن السباحه فيه

وعدنا للبر

نزلنا من المركب واحنا بردانيين ومحتاجين شي دافئ نشربه فتوجهنا للاكشاك

وخالتي عزمتنا على هوت شوكلت ماحبينا نقعد عالطاولات

وقررنا نتمشى ونشرب الهوت شوكلت الدافئء في هالجو الباررد

وهاي نوع من انواع الطيور الايسلنديه

وانتهت المده المخصصه لبحيرة الجليد وركبنا الباص

وانطلقنا

وللحديث بقية ..

فريق التطوير · 30-05-2015, 06:17 AM

ووصلنا الاستراحه

قالت لنا المرشدة ان يمكنكم تناول اكلات خفيفه او شرب أي شي او دخول الحمام .. وايضا يمكنكم الذهاب باتجاه الشاطئ
لكن حذرتنا حذر شديد من الاقتراب من الامواج والبحر ..
تقول ان الماء باااارد جدا جدا جدا
وهي تشدد تحذيرها وتقول
ان مره من المرات في سائحة طنشت التحذيرات واقتربت من الموج وفجأه جات موجه قوية وضربتها ومن برودة الماء السائحة شكل ماتقولون اتيبست مكانها مثل لين تفتحون الماي البارد مره وحده عليكم تحسون الجسم ينصدم ويتيبس مكانه ...
وبعدين اسحبتها الموجه لين داخل البحر وغرقت
البحر باااارد وموجه عالي وعميق لانه من ماء المحيط الهادي الشمالي .. فحذاري من الاقتراب من الماء او الموج والرجاء عدم الاستهانه ..

كلام المرشدة يخوف .. بس شدنا اكثر ان احنا نروح للشاطئ نشوفه ..

طنشنا الاستراحه و رحنا باتجاه الشاطئ

وصلنا للشاطئ
هل تعلمون ان الشواطئ في ايسلند ايضا مميزه ومختلفة ...
تخيلو ...
الرمل ناااعم
لكنه اسسسسسسسسسسسسسسسسود

اليوم بطولة مناكيري خخخخ امي تكره هاللون تقول كانه زواع بريعصي خخخخخ (( ترجيع ابو بريص خخخخخ )) ماشاء الله احنا عائلة الفاضنا رقيقه

شوفو الشاطئ وركزو على الموج ... كان عالي وسريع واحيانا تجي موجه اعلى من غيرها وتوصل لييييييييييييين جدام فكنا نحاور الامواج نشرد عنها

شوفو الصخور من بعيد اشكالها غريبه

وقربت الفتره المخصص لهالمكان على الانتهاء فقررنا نرد الاستراحه ونشوف اش فيها و اش مافيها

الحمدالله ماتحسفنا ان احنا هديناها ورحنا الشاطئ لان مافيها شي .. بس شفنا ناس غريبيين يخوفون استغفر الله خلقت الله بس اشكالهم تخووووف اتحسونهم يصرخون مع انهم ساكتين
عمااااااااااااااااالقة
عراااااااااااض
يمكن وجه الواحد فيهم طوله نص متر كان خاطري اصورهم لكم بس خفت منهم
حتى خفت اشوفهم واتمقل فيهم لايفعصوني بيدهم ... ضخمين بشكل مخيف لو قالو لي ان هذولا هم العمالقه الي في ايسلند كنت بصدقهم طول بعرض بارتفاع..
وللحديث بقية ....

فريق التطوير · 30-05-2015, 06:18 AM

بعد ان رجعنا الشقه لنستريح من الرحلة البحرية ..
حان الوقت للرحلة الثانيه ..
وهي رحلة داخل البركان ...
النص الثاني من اليوم راح نقضيه داخل فوهة البركان الي ثار من 4000 سنه .. وراح ننزل 120 متر تحت الارض ...
كلنا حماس لهالرحلة .. لكن امي ماجات عشان تقعد مع الصغيره .. وخالتي كانت تعبانه من البحر فقررت ترتاح ..
اما احنا فكنا ناطرين الباص الي بيودينا للبركان ...
حجزنا كان مسبق الدفع ل6 اشخاص .. وخالتي ماجات فراحت عليها فلوسها سعر الشخص 1100 ريال قطري .. وهاي هو الموقع المخصص لحجز الرحلة .. ولمعرفة المزيد من التفاصيل ..
http://www.insidethevolcano.com/

انتظرنا طويلاً والمفروض هالدقيقه الباص يكون موجود جدام باب الشقه .. لكن ماجاء
ولمحنا باص مر بسرعه وماوقف .. حسيت ان الباص تأخر قلت مافي الا امير ..
اتصلت استفسر منه ... واستغرب ان الباص ماوصل لين الحين ..
لين كلمهم راعي الباص قال جيتهم ومالقيتهم .. خل يجون لين الموقع الخاص برحلة داخل البركان بالتاكسي .. اعتذر امير وجانا لين الشقه وقال الحل يااما تلحقونهم بالتاكسي او ماتروحون .. قلت لا طبعا نلحقهم بالتاكسي ..
وركبنا التاكسي .. واخذ العنوان ومشى ومشى وفي اقل من نص ساعة وصلنا ...
تدرون كم كلفنا التاكسي ..
101000 كيرونا ايسلنديه .. تدرون يعني كم ريال .. يعني مايقارب ال 3000 ريال قطري
صدمني السعر
بس دفعت زي الشاطره خخ
وهاي قريب من نقطة تجمع رحلة البركان

وهاي هو التاكسي

جانا المرشد وقال تعالو معاي بنمشي مسافة مادري كم كيلو داخل الحمم البركانيه .. ومشينا وراه

كانت الدنيا تمطر قبل مانجي فالارض صايره جدا صعبه متعرجه وزلقة وصخور واشياء تحسونها مثل الطحالب مستويه لين اندوس عليها تغوص ريلنا .. كان المشي على طريق صاعد .. و صوت الريح يصفر حولنا ... كانت تجربه جميله ومتعبه ..تعبنا وايد واحنا نمشي ونقاوم الريح والجاذبيه واللزوجه ..

طبعا في هالاماكن لازم تلبسون اقوا واحسن واريح جوتي عندكم على الاطلاق ولازم تلبسون ملابس شتويه ثقيله لان البرد بررد مايلاعب

شفنا تجويفات في حقول البركان ويقول المرشد هاي بيوت الاقزام

والجدير بالذكر ان ايسلند مافيها ثعابين وعقارب وهالسوالف

مغارات كثيره الحرص واجب لاحد يتهور ويطب داخل

مشينا مشي وتعبنا وكل شوي نصبر روحنا ولين سألنا المرشد وين المكان قال عند ذاك الجبل

يالله قونا .. بس احس هاليوم حرقت سعرات صح

ووصلنا للشلخ الي يفصل بين قارة اوربا وقارة امريكا الشمالية .. كنا في اوربا ورحنا امريكا

عميق ويخوف

لازم نعبر فوق هالجسر واحد ورا الثاني ..

وكملنا مشي ..

وخلاص وصلنا تقريبا وشفنا هاليكوبتر .. وسألنا المرشد يصير نرجع بعدين بالهاليكوبتر ولا لازم مشي .. قال طبعا يصير بالهاليكوبتر بس برسوم .. وقال ترا مب رخيص ... قلنا يا حبيبي اسأل بكم مافينا شدة نطقها مشي .. المسافه بعيده جدا وتعب متعب و تفدانا الفلوس .. قال زين بسأل لكم وبقولكم السعر وردو علي خبر عشان نتصل نحجز لكم هذولا حق ناس غيركم .. قلنا زين ..

والله كنت متحمسه للهالوكوبتر تجربه جديده بالنسبه لي
شوفو الارض شلون مبلوله من المطر

ومازلنا نمشي

وبينت الكبينه من بعيد

سألنا المرشد بننزل للبركان من الكبينه .. قال لا بتحتاجون تمشون شوي بعد اكثر وعقب بتنزلون البركان

ومابذني ماي ناويه على الهاليكوبتر

انا ماحب الحيوانات واخاف منهم .. ماشوف جدام الباب الا هالحيوان ..

نعم انه ثعلب ... كنت متخرعه لكني صامده اسوي نفسي مب خايفه عشان مايشم ريحة الخوف قاعد يحوس حول المكان

دخلنا داخل الكبينه نتدفى ونرتاح من المشي

بينما احنا قاعدين نشرب شاي .. حاطين عالطاولات شاي وقهوه مجانا للي حاب .. وريحة المكان مرق لحم ..
المهم بينما احنا قاعدين نتدفى ونتحدث دشو 3 بنات اجانب شقر ورشيقات ودلوعات وكل وحده لابسه كعب طول ضرسها في هالمكان الي كلش مايصلح ان أي حد يلبس كعب .. واخر وحده لابسه كعب لوبيتان اش طوله

وكعبها كان يغرز في الطين وهي تمشي وتتمايل وتدلع واول مادخلت رفعت يدينها وصرخت قالت وووهوووو ... قلت في قلبي اش هالدلوعات يبيلهم كف يسنعهم
عقب مادخلو دخل وراهم واحد مسوي اكشن ويستهبل ويتكلم بصوت عالي بلكنه امريكيه ويأشر اهني وهناك ويقول ييياااي و مادري شنو وتحسون كأنه يبي يلفت الانتباه ... واحنا مثل أي مواطن قطري مانحب نراوي أي حد ان احنا نشوفه فكنا شاغلين روحنا بروحنا بس نشوفهم من تحت لي تحت وكأننا مانشوفهم ..
الا الريال الشايب الي اذا صغرته عطيته 45 سنه قام يبوس البنات الثلاث بطريقه مش ولا بد وحده تلو الاخرى .. وانا اقول في قلبي وااخزياه شنقايل هاي المايستحي ..
ومازالو هالاربعة (( الرجل والثلاث بنات )) يسوون حركات بصوت عالي ويسولفون بطريقه تافهه .. اخر شي اختي قالت احس اني شايفه هالشايب مادري وين ..
وخوي قال بعد انا ويهه مب غريب ...
الا قالت بنت خالتي اييييي عرفته ... هاي ممثل امريكي ..
يااااراااااااااجل ....
قلت لها أي واحد ذكريني .. قالت ماتذكر اسمه وقامت تقولي وين مثل .. لكني لين هاللحظه ماعرفته .. بس المهم انه طلع ممثل امريكي مشهور وكلهم عرفوه الا انا مفهيه .. بس استمرينا مانعيره أي اهتمام ...
حسيت الريال شك بشهرته ..
تخيلو جى لين عندنا وقال استمتعو المكان اميزنق ويتميلح على قولت السعودييين يبينا نحسسه انه مشهور .. قلنا له اوكي ثانكيو وابتسامه بسيطه ... وتم يتكلم عن المكان ويفتح يده ويقول استمتعو والمكان رائع .. واحنا بس ...
مسكين سنوات شهرته ضاعت سداً جدامنا .. اخر شي راح مكسور الوجدان هو وحبيباته مادري صديقاته مادري زوجاته (( هين )) وركب الهاليكوبتر وطلع هو الي حاجز الهاليكوبتر ورااااااح ....
وعقب جانا الموظف وقال مستعدين قلنا ايوه ... لبسنا خوذه عليها ليت .. وربط خصرنا و لبسنا مثل الي بينطون في قفزالمضلات الحبل من تحت ومثل تسلق الجبال ومشينا ورا المرشد ..
المنظر جدا جميييل و مهيب

ربطو الحبل الي على خصرنا بهالجسر وقال المرشد واحد واحد مرو على الجسر ودخلو لين اللفت الي بينزلنا الى الاسفل ..

عقب مادخلنا اللفت كلنا ربطنا باللفت .. وبدا ينزل اللفت داخل البركان ..

بدأت الرهبه تحل بالمكان ... اثار البركان والمعادن واضحة على الصخور داخل جوف البركان

يتبع ..

فريق التطوير · 30-05-2015, 06:19 AM

ومازال اللفت ينزل وينزل الى 120 متر تحت الارض

وصلنا للقعر المخيف ... المكان له هيبه ويخوف

طبعا فقدنا الارسال في الجوالات ..

تقول المرشدة الي كانت موجوده في الاسفل .. ان هناك بركان اخر تحت هالبركان وراوتنا حفرته ... المكان يخوف وايد ... وتحسون بالرهبه ... المرشدة قالت تقدرون تغنون لان بتسمعون الصدى يغني معاكم ... لكننا خجولين خخخخ ماغنينا وتمت مصره ان احنا نغني واحنا نطالع بعض خخخخ

المكان جدا جميل وغريب ومخيف الصور مب مبينه شي من الواقع اخخخخ بس لو اعرف اصور مثل خلق الله جان علووم

بعد ما خلصت جولتنا في الاسفل كنا اخر مجموعه تدخل البركان ركبت اللفت المرشده معانا ورحنا فوق ... ولما طلعنا كان المكاان باااااارد والسماء صارت مغيمة بغيم غامج و دخلنا الكبينه الا قدمو لنا شوربة لحم .. دافيه

من الجوع والبرد شربتها كلها عشان ادفى وشوي اترس بطني

قال لنا واحد من الموظفين اذا تبون بنطلب لكم هالكوبتر بس بتنتظرون لين يوصل .. قلت له كم السعر قال السعر 38000 كيرونا يعني تقريبا 1000 ريال للشخص .. يعني خمستنا ندفع 5000 ريال عشان نركب الهاليكوبتر ونرجع ... طالعتهم قلت جنه وايد ... اختي قالت وااااااايد واااايد ... هالخمستالاف نخشها نسوي فيها شوبنج احسن لنا ... قلت لها زين ... وزي الارنب رجعنا مشي

سيداتي انساتي سادتي ... كنت قاعده امشي ورا المرشد واخواني وكنت اخر وحده لاني كل شوي اوقف واصور وقفت اصور كم صوره .. وكنت احس شوي والدنيا تظلم ويطق مطر شوفو

فجأه ... اختفو كلهم ... مااشوف حد حولي ... مافي الا انا وبس شمال جنوب يمين يسار مافي الا انا والغيييييييم
تصرقعت وقمت امشي احاول اشوفهم ولا شفتهم ..

وايقنت اني ضعت في حقل البركان

كل شوي اصبر نفسي واقول لاتخافين امشي سيده الا بتوصلين ... وفجأه من بعيييييييييييييييييييييييد شفت شارع .. بس ماعليه البيت الي راويتكم اياه فوق .. قلت دخيل الله خل اروح امشي عالشارع اسهل من هالصخور وعالاقل لي طق المطر ماازلق .. وتذكرت الثعلب المكار
ومشيت ومشيت ومشيت ومشيت ... والدنيا كل مالها تظلم والريح تقوى والمكان يصير يخوف اكثر ... فجأه اسمع صوت وحده تقول هااااالووووووووووو هل تسمعني ...
الف يمين يسار فوق تحت ..مافي أي بني ادم ...
قلت اييييوه اسمع وانا خايفه وشكيت ان هاي صوت الجن ...
ويرد الصوت هل تسمعني ...
وانا اقول ايوه ....
قلت يمكن جني محتاج مساعده ويطلع مثل المارد يحقق احلامي ..
ويرد يقول هل تسمع ....
يا بابا والله اسمع ...

وفجأه تطلع لي وحده من بعيد تقول وينج انتي بخير ... قلت ايوه بس ضعت و خذتني معاها لين الباص .... و الحمدالله ماضعت
ورجعنا لين العاصمه ... واحنا كلنا بدون استثناء نتراجف جوعاً وبردا وقلنا بس مب لازم نروح للشقه اكيد امي وخالتي دبرو عمرهم وكلو ... خلونا نروح ناكل ومشينا باتجاه المطعم الي عليه العين

ووصلنا لمطعم شاليمار الباكستاني ... ابشركم جميعاً هناك اكل يترس البطن والعين والانف

دخلنا وقلنا طاوله ل 5 لوسمحتو ..

الموظفين استانسو لين شافو وجوه تشبههم ... طول الوقت يشوفون هالشقر البيض الي مافيهم لون .. اخيرا شافو الوان قريبه منهم خخخخ وقعدونا فوق

وفي ذاك الوقت كنت مستعده اكتب قصيده بحب الاكل الهندي المفلفل واللذيذ الساخن في هالجو البارد وهاي الطاوله

انا شرابي لاسي منجا (( شكل ماتقولون عصير منجا بالروب )) وبنت خالتي عصير منجا والباقي طلبو لهم كوكاكولا

وعقب الاسي طلبت شاي اعشاب .. احب اشرب شاي مع الاكل

وهاي اكلنا .. خبز براتا

خبز نان بالجبن

وهاي طبقين صورتهم الباقي ماقدرت استحمل وهجمت عالاكل

انصحكم تقولون للموظف نبي الاكل بدووون فلفل .. لانه مهما قلتو مانبي فلفل يحط فلفل ... انا قلت له ابيه شوي مفلفل جابه لي نار الله الموقده من حرارته حرق لهاتي ...
وعقب الاكل ... الي ماتذكرت اصور سعره ... رحنا بخطى ثقيله للشقه ... ونمنا ... وانتهى يومنا الرابع ..
وللحديث بقية ..

فريق التطوير · 30-05-2015, 06:21 AM

اليوم هو اليوم الخامس في ايسلند
اخر يوم من المغامرات والرحلات الفريدة من نوعها ..
جدولنا اليوم ككل يوم مميز وجديد بالنسبه لنا ..
رحلتنا اليوم لمدة 8 ساعات على الاقل راح تكون بالسياره الوحش
Monster Truck
شوفو الصورة وشوفو الرياييل الي واقفين جمب السيارة يبينون اقصر من السيارة من ضخامة السيارة

كما تلاحظون امير واقف مع السواق الي كأنه مصارع .. يتطمن على الرحله وياخذ حلاله ..
وجاء يودعنا لانه قد لن يرانا مره اخرى ..
وهاي هو الموقع الي ممكن تحجزون منه مثل هالرحلات بهالسيارة الضخمة المريحة والفارهه

http://www.icelandriverjet.com/

سعر الرحلة لايعتمد على الاشخاص بل على الرحلة نفسها والسيارة .. فكان سعر الرحلة لليوم
185000 كيرونا ..
يعني مايقارب 5500 ريال لمدة تزيد عن 8 ساعات كحد ادنى .. وطبعا انا اقترحت الاماكن وطلعت هناك جولة تشمل كل المناطق الي ابيها و مناطق زياده وراح نمشي على جدول معين مع السواق المرشد ..
السيارة الكبيرة لها 3 ابواب

ومشت السيارة ... وكنا مبهورين فيها وتمنينا لو هي سيارتنا فله حسيناها ووسيعه من داخل و طبعا مرينا ببراري ايسلندا .. وعينا تعودت عليها وما عادت شي غريب ومدهش بالنسبه لنا ..

صح تذكرت نقطه مهمه لين شفت الصور ...
تذكرت ان السواق راوانا البركان الي ثار من فتره قريبا واسمه هيلكا اعتقد وهو مب قريب من العاصمه وصورته صحيح تذكرت
شوفو الجبل البعيد ... هاي هو بركان هيلكا

وهاي معمل لانتاج الكهرباء من الطاقة الحرارية

والبركان مااثر على اهالي ايسلند حتى رماده ماضايقهم لان البركان لما يثور شكل ماتقولون ينفجر والغبار يطير فوووق وينتشر بسبب الرياح على الدول المجاوره والطيران عند الدول المجاوره يوقف بس ايسلند ماتتأثر .. اعتقد ذكرت هالنقطه لكم من قبل ..
المهم ..
وصلنا لمحطتنا الاولى .. وهي المنطقة الي نشوف فيها الالواح التكتونيه لقارة امريكا الشمالية وبنعبر الى قارة اوربا ..
نزلنا من السيارة .. وعادتاً نشاهد نظرات الدهشة والاعجاب بالسيارة من السياح بالذات ..

مادخلنا الاستراحه الي في الصورة السابقة وفضلنا المشي واكتشاف المكان والعبور من امريكا الشماليه الى اوربا ..

وبدينا المشي على المسار المخصص للمشاهدة

بحيرات من بعيد

شايفين الصدع الفاصل بين القارتين ...

منظر البحيرات من بعيد يشد

تحبون امشيكم بين الصدع وبعدين نعبر من امريكا الى اوربا .. تعالو معاي

بين القارتين

تدرون الشمس في ايسلند ماتضايق مادري شلون مب مثل شمس اوربا

كنا على ذاك المطل ونزلنا تحت

المكان حلو بس انتهى الوقت المخصص لهالمكان وصار لازم نرد

وركبنا السيارة وانطلقنا الى مكان اخر

وللحديث بقية ...

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
بوكت ... رحلة سريعة لكن ممتعة بقلم احلى من العقد	فريق التطوير	بوابة تايلند	61	09-08-2019 02:37 PM
ستوكهولم ... عاصمة السويد بقلم احلى من العقد	فريق التطوير	بوابة اسكندنافيا	17	11-06-2015 04:29 AM