مساء الخير
آسفه للتأخير
بعد ماوصلنا جنيف الآن يا نآخذ قطار ونواصل لفرانكفورت يا نآخذ ليله بجنيف
وبما ان كل شي جاء ملخبط ومارتبنا واول مره بجنيف قررنا نآخذ قطار ونروح لفرانكفورت
انطلق القطار المغرب تقريباً وغيرنا المحطلجات لحد ماوصلنا لفرانكفورت الفجر
كانت رحله متعبه ومرهقه وبنتي الصغيره تعبت معنا
الحمد لله الآن وصلنا بالسلامه واكيد ما أكلنا شي ومرهقين ووووو الخ
أخذنا تاكسي وع الفندق ولله الحمد
طبعاً بزعمنا ان التعب انتهى والاكشن قال باي باي
والله اللي صار لنا بالفندق شي للآن اقول ياترى صدق والا هواجيس والا مدري
بعد ما وصلنا الفجر استقبلتنا ذيك الشقراء اللي تفتح النفس بالفندق وسولفنا معها وقالت واضح انكم مرهقين روحوا افطروا شكرناها لكن والله التعب شديد وخصوصاً ظهري،،، اذا سمحت لي الاداره اذكر اسم الفندق فيما بعد
دخلنا الغرف واخذت غرفه لي وللبنات والغرفه الثانيه لزوجي والولد الله يحفظهم
غيرنا وصلينا ونمنا الى العصر
صحصحنا لكن جوعانين مره
راح زوجي وولدي جابوا ساندوتشات صب واي كانت قريبه بعدها طلعنا نتجول بالمنطقه
ولما جاء الليل رتبتا اوضاعنا اكثر انا وبنتي الصغيره بسرير ىبنتي الكبيره الله يحفظهن بالسرير الثاني
طيب ايش اللي صار
ياربي ماني مرتاحه قلت يمكن التعب وكذا خصوصاًالظهر عندي يتعبني بأقل مجهود لازم مسكن
شوي والا احس فيه احد يدفني من السرير ( يحاول يبعدني )
مادققت وطنشت وتكرر معي سألت بنتي الكبيره قالت ماما فيه احد يدفني من السرير بغيت اطيح
بسم الله الرحمن الرحيم
قلت حتى انا
لا ياماما نامي بس وسمي واذكري الله
شوي الا اشوف ع الجدار ظلال كبير
لكن لا زلت ماجزمت ان فيه شي اقول لا لا اكيد من السيارات والا والا الخ
وبنتي تقول ما بي انام ع السرير
بعد شوي الا اسمع ذاك الضحك قسم بالله ضحك قهقهه ما انساها كأنها افلام الرعب ايام ماكنت مدمنة افلام امريكيه سقى الله ذيك الايام
انا لما سمعت هالاصوات المرعبه ناعاد تشوفون الا فزتي من الغرفه وآخذ شرشف واطلع اركض بالممر وبناتي وراي هههههه
كل ماذكرتها اموت ضحك
جاء زوجي وقال غرفتهم مافيها شي الحمد لله
شغلنا القرآن ونمنا الحمد لله بعد الرعب اللي صار له يومين من طلعنا من البيت اللهم لك الحمد
والليالي الثانيه اشغل القرآن واتركه
في الصباح شفت مطل الغرفه على حديقه حلو المطل لكن زوارها قليل جداً