بعد ماتغدينا وحمدنا ربنا على نعمته ورزقه ... شغلنا البوت مرة ثانيه ... المكان جميل والجو حلو ... بس نبغى نشوف زيادة ... ونبغى نسوق البوت ... وبما ان البوت بطيئ ... فهو مناسب حتى للاطفال انهم يستمتعون بقيادته ... وانا ماخليت بخاطرهم شي ... واغلب الناس اللي يقابلونا نشوف عيالهم يسوقون وهم قريبين منهم طبعا ... والمناطق كثيرة وتطلع من نهر لنهر ... يعني صعب تكرر المناظر الا اذا رجعت من نفس طريقك ... والفعاليات اللي بتكون مفتوحه بتاخذ وقت ... مااعتقد ان الملل بيطرق بابكم ابدا ... انطلقنا نتجول في الانهار وبعض المناطق بالمناسبة هي بالاصل مناجم قديمه جدا غمرتها المياه ... وفي وحده من الدخلات لقينا مكان للتزود بالماء وكان فاضي ... فقلنا نوقف عنده ... ورجعنا للخلف الين وقفنا عنده ... وطبعا مميز هو اما بلوحة او تشوفون ليات الموية الزرقاء ..

وقفنا هنا ....


وطلع الموقف موب مجاني ... الى ساعة توقف بـ 1.5 باوند ... والمكان جميل جدا وفيه فعاليات واكواخ وتخييم للي يحب بس تفتح في اول ابريل ...



طبعا محد فيه ... وانت اخدم نفسك ...



عبينا المويه وتوكلنا على الله ...













وقفنا بموقف عند قرية ...


وتجولنا فيها ..





رحنا للبقالة ...



بس كانت مشطبه اغراضها قبل نوصل ..



خذنا توست وحلويات ...











يوم وصلنا بوتنا ... والا فيه ناس واقفين ورانا ... والمغرب باقي عليه ثلاث ساعات تقريبا ...

تونا معنا وقت ناخذ لفة ... وادفه ابيه يبعد نطلع ... عجزت عنه ... وراعي البوت الثاني شايب بريطاني ... واقف يتفرج ... قلت له اني ماعرفت اطلعه ... قال لف ويطلع ... وجلس يدف معي ... قلت رح سق انت ورني شطارتك .. ويركب ويحاول وانا وعياله ندف البوت على جنب ... وبغى يكسر قاربهم الصغير اللي يسحبونه وراهم ... اخر شي قال لعياله فكوا بوتنا وخلوا نطلع عنهم... وفعلا طلعوا عنا ومشينا ... واشوا مشينا .... طحنا بقرية جميلة مره ... البريطانيين جدا كويسين مع انهم هم يصنفون نفسهم انهم سيئين ...طبعا هم مايحبون الشخص اللي يطلب فلوس ... بس اذا مساعده او يفيدك بشي فهم جدا ودودين ... بس لا تقرب جهة فلوسه ..













الطيور مره موالفة ومتعودة على الناس ... لدرجة انها تركب على البوت اذا وقف ...



بوت للبيع ... بس مابيه ... يا بوت جخ او لا ..



موقف مجاني





بعض الجسور المرور تحتها بفلوس ... وشفنا رقمهم من الخريطه وكلمناهم نتأكد ... بس طبعا بوتنا ماكان يدخل لان المنسوب مرتفع... ويقول على اخر الاسبوع يمكن يصير مناسب ...



فرجعنا مع طريقنا



ووصلنا للموقف اللي نشبنا فيه مع البريطانيين ...



وكان الوقت خلاص قريب المغرب ... وماحبيت نغير المكان يمكن مانلقى موقف قريب ويجينا الليل ..









قهوة المغرب



بعد المغرب بدا الجو يتغير وجاء هوا قوي مع مطر .... يالله الخيره حنا يخوفنا المطر والهوا وحنا في بيوتنا كيف في بوتنا ... كيف وحنا في المويه ... زي ماقال ذاك ... اخاف من كلب يطلع لي اسد ...

بس مالك الا تقضب ارضك ... وين تروح ... وحتى القرية بين وبينها مسافة مشي !!! صلحنا عشانا وتعشينا وتقهوينا والوضع يزود .... وبدا البوت يتأرجح والموج يضرب من تحت لان كنت موقف في وجه الهوا ... ويمكن احسن من لو اني موقف على جنب ...
رحنا للنوم ... والنومة الله اعلم بها ... كل شوي اطل اشوف حنا بمكانا والا وين رحنا ... وراحت علي نومه ... الين وقت الفجر ... صليت الفجر ... وفكرت اسوي خبز ... فعجنت ولفيته بجاكيتي وحطيته قدام الدفايه... ورجعت انام ... بعد ساعة يمكن ...الا وطراااخ ... ونفز انا وام عبدالله ... وش السالفه .... شالنا الهوا لمكان ثاني !!! او وش ... وصار اللي قدامنا ( وكان بيننا مسافة بوت يمكن ) يوم فك حباله ماقدرو يسيطرون عليه ودفهم الهوا علينا وصدموا فينا ... جلست اطل عليهم بعد مالفوا ... بس مره عجزوا يلفون جهة الهوا ... كل ماحاولوا رجعهم للجهة الثانية ... غيروا مكانهم وبعدوا شوي عننا ... عادة المكان هذا البوت يلف للجهة المقابله بدون الحاجة للرجوع للخلف ... هم يمكن اخذوا اكثر من خمس مرات يرجعون فيها للخلف عشان يلفون وبالاخير نجحوا ...



بعد مداولات قررنا نقوم ونصلح قهوتنا ... ثم بديت اصلح خبيزاتي ...



جايبين معنا الفراده ...



ومقاس الخبزة على مقاس المقلى ...



خبز حاااار في الجو البارد ... بس ناقصه الفول



والفول قريب





بعد ماافطرنا وغسلنا مواعينا ...جلسنا نتابع اللي امس حادينا ثم تحركوا عنا ... كانوا ناشبين بين بوتين .. والهواء ضدهم بعد ..كل مالفوا رجعهم لمكانهم ... الين تحركوا اللي قدامهم شوي ... بعد ماراحوا ...فك جاك سباروا حبال الجوهرة السوداء .. وانطلقنا













شفنا لوحة موقف فيه بقالة ... ولفينا عليه ...

وهنا ساعدنا واحد ثاني في الوقوف بين بوتين ... رجعنا له ثم عطيناه الحبل وسحبنا عند بوته ... اقولكم جدا خدومين وودودين ومايعطونك فرصة حتى تشكرهم ... يعني وانت تشكره يقول لك لا خلاص ما سويت شي ويمشي ..

في كل اماكن التوقف يتوفر دورات مياه عامة ...



لوحة بالفعاليات





بقالة : والاسعار عادية











قصة قصيرة : البطة اللي في المويه كانت تتهاوش مع البطة اللي على البوت ...وجلدت اللي على البوت ورمتها بالنهر ... جت البطة السوداء وعضتها اللي فوق وطاحوا كلهم بالنهر ... بس موقفهم مره مضحك ...



انطلقنا من جديد عشان نفضي المكان لناس غيرنا يتزودون بالموية ...





بمناسبة لوحات السرعه ... شفت بوت للشرطة .. بس ما لحقت اصوره ...









للايجار ..



الخريطه مفيدة مره بالنسبة للفعاليات ومعرفة الطريق ... وسهله مره ... قوقل ماب يشتغل تمام ... بس ما يعلمك الطريق بالنهر بس كنت اشوف الطريق احيانا والاماكن اللي حولنا به ..





تشوفون فيه هواء وامواج بسيطه





منطقة مطاعم والوقوف بالمرسى بالحجز ...



مطعم ... ميزة البريطانين انهم يتعشون الساعه 6 ... فوقت عشانا لو حبينا نتعشى بمطعم مايكون زحمه ويصيرون فاضين لنا ...









































بما انه اخر يوم ... بدينا نرجع نقرب من مكان اخذ البوت .... لان التسليم تسع ونص الصبح







هذا جاية تقول ... وييييييييي اخر يوم لكم !!!









وصلنا ووقفنا وتعشينا ونمنا .... وش رايكم بالاختصار ... ومافيه صور بعد ... لان شحن الكاميرا خلص ...

كانت ليله هاديه وجميله ... ونمنا للصبح بدون اي فواصل اعلانيه ....

كنا متفقين نتحرك مع شقة النور زي مايقولون ونتمشى 3 ساعات لين موعد التسليم لان فيه لفة مارحنا معها ... محللينه ذا البوت



قمنا وتقهوينا ومشينا بدون فطور بعد .... والعيال توهم نايمين ...

















رجعنا للمكان الاول ولسان حالنا كما:
نال منا يوم الفراق كمـا***نـال من الناكثين سـيف الأمير




من هنا بدينا وهنا ننتهي ... بس النهاية كانت تعلق اكبر من البداية .... لجمال التجربة ... وغرابتها بالنسبة لنا ... امتزجت بالمتعة والاستمتاع ... فحمدا لربنا على رزقه ...وحمدا له على توفيقه ...وحمدا له على كل شي

هذا موقع الشركة :
Richardson's Boating Holidays - Norfolk Broads Boat Hire and Boating Holidays

تقيمي 10/10

وفيه شركات اخرى منتشرة في بريطانيا واوربا ... سعدت بصحبتكم واشكر لكم حضوركم ودعمكم ... كم اسعدتني ردودكم ... فلا حرمتم سعادة الدارين ... الى لقاء ولعله يكون قريب ...

رفعت الجلسة