دبي - رحلة برفقة السيارة

ابو عبدالله · 29-01-2015, 09:03 PM

Skai Dubai
سكاي دبي
اكثر من 22000متر مربع مغطاة بالثلوج

- الموقع : مول الامارات
- اماكن قريبة يمكن الاختيار منها لادخاله ضمن البرنامج :
(جي بي ار ، جزيرة نخلة ، مدينة جميرا ، ستي والك )
مواعيد الزيارة :
بالنسبة لنا وهو مجرد رأي وناتج زيارات متعددة (يمكن 4 مرات) افضل وقت هو من بداية الافتتاح تقريبا 8 صباحا او الثامنة والنصف صباحا.
المكان جداجداجدا رائع والسنة هذي فيه اضافات جديدة ( كوفي جديد ، لعبة الطلقة الثلجية ) بالاضافة لبعض مجسمات الاكواخ ...
نروح من بدري وما ابالغ اذا قلت ان الموجودين داخل سكاي دبي يعدون على الاصابع احيانا والمهم انه الالعاب فاضيه جدا وتقدرون تلعبون الين يطلع اللعب مع خشومكم ...تلعب مرتين واربع وخمس ولا مرة تمسك فيها سرا ... طبعا احنا معجبنا الوضع وكأن المكان ملكنا صاير ... الزلاجات بأنواعها فاضية ... المنحدر فاضي ...الكوفي شهق بنا يوم جينا ماعنده احد ...

انواع التذاكر :
ثلاث انواع اعلاها واغلاها هو الدخول لكامل السكاي لمرات متعددة في اليوم يعني تقدر تطلع وتراجع تدخل ثانية
-الثانية نفس الاولى بس الدخول لمرة واحدة واذا طلعت ماتقدر ترجع مره ثانية .
- الثالث نفس الثاني بس ماتقدر تدخل المنحدرولا الكافيهات ولاتلعب بالكرة العملاقة ..
انا افضل الخيار الثاني لان دخول المنحدر حتى لو ماكنت متزلج ممتع جدا وتقدر تجلس بالكوفي اللي فوق او تحت
- فيه لقاء البطاريق وهذا له تذكره لحاله وهو يدخلونك فيه على البطاريق وتجلس معها والبطاريق هذي لها اصلا كل يوم عرض بعد الظهر فيعني انت بتشوفها اصلا بس من ورا الحاجز ...
- التذكرة يعطونك معها بالطو طويل او قصير حسب رغبتك وقفازات وكاوتش ( القفازات ممكن تحتفظ فيها ) بس الباقي يرجع ويعطون الاطفال (خوذة للرأس)
- تقدر تاخذ صندوق لحفظ اغراضك اللي ماتبي تدخل بها ( جزمة الله يكرمكم ،او اي شي تبي يخفف عنك داخل ) والصندوق يكون بـ 25 درهم + تدفع تأمين 20 درهم على كل تذكرة تسترجعه من اجهزة الدفع بعد الخروج ..
هذي صورة الصندوق ويتم قفله وفتحه بواسطة بطاقة الدخول للسكاي واللي عن طريقها تقدر تفتح حواجز المناطق المسموح لك دخولها

انا زرتها العام والسنة هذي تختلف بكم شغله عن العام ...يعني الجماعه شغالين ومهتمين بالتطويرماشاء الله عليهم ..

درجة الحرارة داخل حسب اللوحة كانت -2
يعني تلطموا والله يحييكم في هذي الجولة البسيطة :

اعتقد مجسمات النحاس في الصورة التالية بتتغطى بالثلج بعد فترة وتاخذ نفس الشكل

الجو في الكهف الثلج ابرد منه في المنطقة المفتوحه

مافيه زحمه تقدر تلعب كم مره بسهوله

ركبنا مقاعد المنحدر (مثل التلفريك تنقلك لفوق وفيه توقفين الاول للجميع والثاني فقط للمتزلجين ) التوقف الاول تقدر تنزل للكوفي وجلسته جدا حلوة تكشف كل المنطقة وتشوف المتزلجين واللي يركبون الطلقة ... والطلقة هذي موب موت بس الا موت وخراب بيوت بعد
وهو انك ماتقدر تدخلها بالتذكرة العادية ..لا.. لازم تدفع مبلغ اضافي اعتقد 70 درهم وبعدين تتعلق في حبل من الكوفي اللي فوق وهووووبا يدفونك لتحت

((صورة من النت ))

-الحين صوري

يوم كنا نازلين في طريق الرجعه الولد قام يصارخ ويحذرني وبابا انتبه وانا تروعت معلقين في السماء وهذا قام يصارخ
هو في اول ابتدائي وطبعا موذينا في الشوارع وكل محل يقرا اللوحات ( طفر بالقرايه) وكان فيه لوحات تحت تحذيرية للمتزلجين ( خفف السرعه ) وابو الشباب قراها ( فخ ) وحسب ان فيه شي بيصير لنا

الكوفي فوق فيه جلسات داخل الكوفي وجلسات برا ... طبعا برا اشرح وخصوصا مشغلين كشافات مسلطه على الجسات ومدفيه المكان

وهذولي جايين يركبون الطلقة ... وماصمل الى الحرمه وللي معها رجعوا ... مدري ماحجزوا او طقتهم ام الركب

جلسنا تقريبا 4 ساعات كانت ولله الحمد ممتعه جدا وعلى الساعه 2 بعد الظهر يبدا المكان ينزحم ويصير قدامك في اللعبه 10 او 15 عادي ...
احنا مع بدايات الزحمه نكون خلاص اكتفينا ..
ودنا لو يكون فيه مطعم حلو جوا ( مطعم طبخ ونفخ ) لان الكوفي مستواه موب مره بس مكانه حلو والكوفي الثاني مادخلناه ومكانه تحت عند نهاية (الطلقة الثلجية)

المكان جدا حلو وممتع وانصح به بقوه وفيه كورسات للي يبي يتعلمون التزلج ...

استمتعت بتذكر احداث الـ ( سكاي دبي ) واتمنى انها تكون ممتعه لكم

كونوا بخير ...

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
استفسار عن موقع استلام وتسليم السيارة وشو نصيحتكم بنوع السيارة	india	تأجير السيارات	12	13-06-2018 11:16 PM
السيارة المنحوسة ..!	غلاتي	عام	33	14-02-2016 11:06 AM
اثبات غرض الزيارة	m.shaban	فيزا	3	30-03-2015 05:23 AM
السيارة في انطاليا	alm7arb	تركيا	5	18-03-2015 08:41 PM
بخصوص حجز السيارة	ذيبة	تركيا	4	15-02-2015 05:52 PM